លោកឧត្តមសេនីយ៍ទោ ហុង វិណុល មេបញ្ជាការរងកងរាជអាវុធហត្ថលើផ្ទៃប្រទេស ទទួលបន្ទុកព័ត៌មាន សន្តិសុខ និងស្រាវជ្រាវបង្រ្កាបបទល្មើសបានអោយដឹងថា កាលពីរសៀលថ្ងៃទី១៨ ខែមករា ឆ្នាំ២០១៦ រថយន្តដឹកឈើ១គ្រឿង ត្រូវបានបង្ក្រាបចាប់នៅស្រុកអូររាំង ខេត្តត្បូងឃ្មុំ នឹង២គ្រឿងទៀតចាប់នៅស្រុកស្វាយអន្ទរ ខេត្តព្រៃវែង។ ដោយឡែកនៅយប់ថ្ងៃដដែលនេះ កម្លាំងបានបន្តចាប់បានចំនួន៥ឡានទៀតនៅលើកំណាត់ផ្លូវជាតិលេខ២ជិតស្នាក់ការសន្តិសុខ២០១ ស្ថិតក្នុងស្រុកបាទី ខេត្តតាកែវ ដោយមានការដាក់បន្លំជាមួយរថយន្តដឹកដែក។ ឈើទាំង៥ឡានចាប់នាយប់នោះ នឹងធ្វើការត្រួតពិនិត្យនៅព្រឹកថ្ងៃទី១៩ ខែមករា ឆ្នាំ២០១៦ ដោយគណៈកម្មការ ជាមួយស្ថាប័នគយនៅផែស្ងួតតាមបណ្តោយផ្លូវវេងស្រេង ព្រោះកម្លាំងរបស់លោកកំពុងនាំឡានទាំងនោះមកកាន់រាជធានីភ្នំពេញ ហើយលោកបានគាំទ្រដល់ស្ថាប័នគយលើយុទ្ធនាការបង្ក្រាបនេះ ដែលបានសហការដើម្បីប្រមូលពន្ធជូនរដ្ឋ។
គួរបញ្ជាក់ដែរថា រាល់ការបង្រ្កាបឡានដឹកឈើពិនិត្យឃើញថា ការដឹកជញ្ជូនឈើមានភាពមិនប្រក្រតី ដោយរថយន្តខ្លះគ្មានលិខិតអនុញ្ញាតិដឹកជញ្ជូន បើមានវិញគឺផ្ទុកលើសច្បាប់ រថយន្តគ្មានឈៀកត្រឹមត្រូវ គ្មានការកាត់ស្តុកពីគយជាដើមនិងមានអាវក្រោះក្នុងរថយន្តផងដែរ។ ចំពោះរថយន្តដឹកឈើនោះផងដែរ សមត្ថកិច្ចពិនិត្យឃើញថាបានលួចប្រើស្លាកលេខក្លែងដូច្នេះលោកនឹងមានវិធានការចាត់ការក្នុងរឿងព្រហ្មទណ្ឌតាមនីតិវិធីដោយច្បាប់ចរាចរណ៍ថ្មីត្រូវបានកំណត់ពីទោសទណ្ឌស្រាប់ផង។
បើយោងតាមប្រភពខ្លះបានធ្លោយអោយដឹងថា រថយន្តដឹកឈើបន្លំជាមួយឡានដឹកដែកនេះ ជារបស់លោក អេង ឃាង មេបញ្ជាការយោធាវរៈការពារព្រំដែនលេខ ៣០១ ចំណុៈអោយតំបន់ប្រតិបត្តិការរងខេត្តតាកែវ និងជាមេខ្លោងរកស៊ីដឹកដែកគេចពន្ធ ពីវៀតណាមលក្ខណៈទ្រង់ទ្រាយធំដែលគេសង្ស័យអាចមានពាក់ព័ន្ធជាមួយក្រុមហ៊ុនជីព ម៉ុងផងដែរ។
ដោយឡែកចំពោះរថយន្តធុនធំចំនួន៣គ្រឿង ដឹកឈើប្រណិតពេញ មានបំណងលោតឆ័ត្រ ទៅកាន់ប្រទេសវៀតណាមនោះ ត្រូវបានកម្លាំងអាវុធហត្ថខេត្តព្រៃវែង សហការជាមួយកម្លាំងអាវុធហត្ថ ខេត្តត្បូងឃ្មុំ ស្ទាក់និងបង្ក្រាបបាន នៅរសៀលថ្ងៃទី១៨ ខែមករា ឆ្នាំ២០១៦នេះ ស្ថិតនៅលើផ្លូវជាតិលេខ១១ នៅភូមិពានា ឃុំអំពិលក្រៅ ស្រុកស៊ីធរកណ្តាល ខេត្តព្រៃវែង។
មេបញ្ជាការអាវុធហត្ថខេត្តព្រៃវែង ឧត្តមសេនីយ៍ ម៉ែន ស៊ីប៊ន បានបញ្ជាក់ថា ក្រោមបញ្ជាផ្ទាល់ពីមេបញ្ជាការអាវុធហត្ថលើផ្ទៃប្រទេស នាយឧត្តមសេនីយ៍ សៅ សុខា នោះកម្លាំងរបស់លោកសហការជាមួយខាងខេត្តត្បូងឃ្មុំ ដេញបង្ក្រាបបានរថយន្តដឹកឈើខុសច្បាប់(ឈើប្រណិត) ដែលបើករត់គេចពីសមត្ថកិច្ចខេត្តត្បូងឃ្មុំ បានចំនួន០៣ឡាន(រថយន្តធំកង់១០) ហើយ រថយន្តទាំង៣គ្រឿងនេះត្រូវបានប្រគល់ទៅឲ្យរដ្ឋបាលព្រៃឈើ ខេត្តព្រៃវែង ដើម្បីត្រួតពិនិត្យនៅពេលក្រោយ។
គួររំលឹកដែរថា នៅព្រឹកថ្ងៃទី១៨ ខែមករា ឆ្នាំ២០១៦នេះ នាយឧត្តមសេនីយ៍ សៅ សុខា ប្រធានគណៈកម្មាការបង្ក្រាបបទល្មើសព្រៃឈើ បានបញ្ជាឲ្យបិទច្រកព្រំដែនទំាំងអស់ជាប់ព្រំដែនប្រទេសវៀតណាម មិនឲ្យមានការដឹកជញ្ជូនឈើចេញនោះឡើយ។
សូមបញ្ជាក់ថា នៅក្នុងកិច្ចប្រជុំគណៈរដ្ឋមន្រ្តី កាលពីថ្ងៃសុក្រ ទី១៥ ខែមករា កន្លងទៅនេះ សម្តេចតេជោ ហ៊ុន សែន បានចេញបទបញ្ជាឲ្យអាជ្ញាធរ សមត្ថកិច្ចពាក់ព័ន្ធរួមគ្នាបង្រ្កាបបទល្មើសព្រៃឈើ ជាពិសេសជំនួញឈើទៅប្រទេសវៀតណាម។
សម្តេចតេជោ ប្រមុខរាជរដ្ឋាភិបាលកម្ពុជា ក៏បានសម្រេចបង្កើតគណៈកម្មការជាតិដើម្បីទប់ស្កាត់ និងបង្រ្កាបបទល្មើសព្រៃឈើដែលមាន នាយឧត្តមសេនីយ៍ សៅ សុខា ជាប្រធាន ឧត្តមសេនីយ៍ឯក ហ៊ូ សាគុណ អគ្គស្នងការរងនគរបាលជាតិ និងជាប្រធាននាយកដ្ឋានកណ្តាលនគរបាលព្រំដែន ជាអនុប្រធាន លោក ឆេង គឹម ស៊ុន អគ្គនាយករដ្ឋបាលព្រៃឈើ លោក ផៃ ប៊ុនឈឿន តំណាងក្រសួងបរិស្ថាន រួមនិងអភិបាលខត្ត ត្បូងឃ្មុំ ក្រចេះ កំពង់ចាម មណ្ឌលគិរី រតនគិរី និងខេត្តស្ទឹងត្រែង ជាសមាជិក។
ក្រោយការដាក់ចេញបទបញ្ជារបស់នាយករដ្ឋមន្រ្តី គេសង្កេតឃើញថា កម្លាំងសមត្ថកិច្ចនៅក្នុងតំបន់សម្បូរបទល្មើសព្រៃឈើ បានចុះទៅបង្រ្កាប យ៉ាងសស្រាក់ សស្រាំ និងរឹបអូសឈើបានយ៉ាងច្រើនសន្ធឹកសន្ធាប់ផងដែរ៕
No comments:
Post a Comment