សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដឹកនាំកិច្ចប្រជុំផ្សព្វផ្សាយអំពីបច្ចុប្បន្នភាពការងារកំណត់បង្គោលខណ្ឌសីមា និងបោះបង្គោលព្រំដែនរវាងប្រទេសកម្ពុជា និងប្រទេសវៀតណាម នៅព្រឹកថ្ងៃទី១៤ ខែកក្កដា ឆ្នាំ២០១៥ នៅទីស្តីការក្រសួងមហាផ្ទៃ។
កិច្ចប្រជុំនេះ ក៏មានការចូលរួមពីសំណាក់ឯកឧត្តមទេសរដ្ឋមន្ត្រី វ៉ា គឹមហុង ប្រធានគណៈកម្មការកិច្ចការព្រំដែន អភិបាលខេត្ត ស្នងការខេត្តនៅជាប់បណ្តោយព្រំដែនរវាងកម្ពុជា-វៀតណាម រួមទាំងមន្ត្រីយោធា និងមន្ត្រីជំនាញព្រំដែន។
សម្តេចក្រឡាហោម ស ខេង បានថ្លែងនៅក្នុងកិច្ចប្រជុំថា កិច្ចប្រជុំនេះ ទាក់ទងសភាពការណ៍ និងកិច្ចការព្រំដែន ហើយកិច្ចប្រជុំនេះ បានប្រព្រឹត្តទៅចំពេលដែលគណៈកម្មការកិច្ចការព្រំដែនកម្ពុជា-វៀតណាម កំពុងតែដោះស្រាយ គឺការបោះបង្គោលព្រំដែនជាក់ស្តែងលើដី ដែលបានព្រមព្រៀងគ្នា និងបន្តជជែកដោះស្រាយនូវព្រំដែនដែលមិនទាន់ដាច់ស្រេច និងមិនទាន់ស្រុះស្រួលគ្នា។
សម្តេចក្រឡាហោមបន្តថា ស្របពេលដែលព្រឹត្តិការណ៍តាមព្រំដែនបានកើតមានបញ្ហាជាបន្តបន្ទាប់ ហើយការប្រជុំនេះ គឺទាក់ទងនិងបញ្ហាព្រំដែន គឺមានបំណងសំខាន់ៗ៣ រួមមាន៖
ទី១. ធ្វើការផ្សព្វផ្សាយអំពីគោលការណ៍ សភាពការណ៍ និងបច្ចុប្បន្នភាព នៃការបោះបង្គោលព្រំដែនជាក់ស្តែង ដើម្បីខណ្ឌសីមាព្រំប្រទល់រវាងកម្ពុជា និងវៀតណាម ព្រមទាំងផ្តល់នូវឯកសារចាំបាច់មួយចំនួនពាក់ព័ន្ធ និងការងារព្រំដែនដល់អាជ្ញាធរពាក់ព័ន្ធទាំងអស់ដែលឈរជើងនៅតាមខ្សែបន្ទាត់ព្រំដែនកម្ពុជា វៀតណាម។ ទី២. កំណត់វិធានការចាំបាច់នានាក្នុងការគ្រប់គ្រងព្រំដែន ការថែរក្សាការពារបូរណភាពទឹកដី អធិបតេយ្យភាពជាតិ ហើយទាំងអស់គ្នារួមគ្នាក្នុងការពារបូរណភាពទឹកដីនៅតាមព្រំដែន។ ទី៣.លើកកំពស់កិច្ចសហប្រតិបត្តិការរវាងអាជ្ញាធរ និងកម្លាំងមានសមត្ថកិ្ចតាមបណ្តោយខ្សែព្រំដែន ដើម្បីបន្តថែរក្សាសន្តិសុខ ស្ថិរភាព ខិតខំបន្តអនុវត្តគោលការណ៍របស់រាជរដ្ឋាភិបាលកម្ពុជា និងរដ្ឋាភិបាលវៀតណាម ដោយឈរលើ ស្មារតីសហប្រតិបត្តិការ និងសន្តិវិធី ដោយមិនប្រើប្រាស់កម្លាំងប្រាប់អាវុធ ដើម្បីដោះស្រាយបញ្ហាទេ។
សម្តេចក្រឡាហោម ស ខេង បានលើកឡើងថា “កន្លងមកនេះ យើងក៏បានដឹងថា ប្រជាពលរដ្ឋរបស់យើងភាគច្រើនលើសលប់បានលើកកំពស់នូវទឹកចិត្តស្នេហាជាតិដ៏ឧត្តង្គឧត្តមក្នុងការការពារបូរណភាពទឹកដី ប៉ុន្តែវាក៏មានមនុស្សខ្លះ បានឆ្លៀតប្រើប្រាស់បញ្ហាព្រំដែន ទៅជាបញ្ហានយោបាយ បម្រើឲ្យផលប្រយោជន៍ទៅក្រុមបក្ខពួករបស់ខ្លួន យើងគិតថា បញ្ហានេះ វាមិនជាការល្អប្រសើរទេ បើគ្រាន់តែធ្វើនយោបាយ ដើម្បីបម្រើផលប្រយោជន៍ក្រុមណាមួយនោះ ផ្ទុយទៅវិញ យើងចង់ឃើញ ចង់បាន ហើយក៏អំពាវនាវឲ្យមានការចូលរួម ដើម្បីការពារផលប្រយោជន៍រួមរបស់ប្រទេសជាតិរបស់យើង បម្រើផលប្រយោជន៍ឲ្យគ្រប់និន្នាការនយោបាយដែលមាននៅប្រទេសកម្ពុជា”។
No comments:
Post a Comment