ឯកឧត្តម ទិត សុធា អ្នកនាំពាក្យ អង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី
បានច្រានចោលការសរសេរបំភ្លើសការពិត និងគ្មានមូលដ្ឋានច្បាស់លាស់ របស់ Facebook Page Camnews ថ្ងៃទី ៣០ ខែមេសា ឆ្នាំ២០១៥នេះ ដែលបានលើកឡើងថា សម្តេចតេជោ នាយករដ្ឋមន្ត្រី
ប្រមាថមើលងាយអាយុជីវិត ឯកឧត្តម កឹម សុខា ដោយចោទថា ចង់ផ្តួលរំលំរាជរដ្ឋាភិបាល
CPP និងចោទប្រកាន់ថា មានប្រពន្ធច្រើន និងបានធ្វើនយោបាយបោកប្រាសលុយខ្មែរនៅក្រៅប្រទេសជាដើម។
ឯកឧត្តម ទិត សុធា បានគូសបញ្ជាក់ថា អ្នកសរសេរ និងផ្សព្វផ្សាយព័ត៌មានគប្បី
ផ្សាយនូវព័ត៌មានពិត សរសេរនូវអ្វីដែលជាព្រឹត្តិការណ៍ដែលជាបច្ចុប្បន្នភាពរបស់កម្ពុជា។
ផ្ទុយពីនេះទៅវិញ ឯកឧត្តម ទិត សុធា កត់សំគាល់ឃើញថា អ្នកវិភាគព័ត៌មានមួយចំនួនហាក់បីដូចជាមិនមានគោលជំហរច្បាស់លាស់
ហើយមិនបានធ្វើឲ្យត្រឹមត្រូវទៅតាមវិជ្ជាជីវៈរបស់ខ្លួនដែលគួរតែធ្វើព័ត៌មានឲ្យមានតម្លាភាព។
អ្នកវិភាគខ្លះបានផ្អៀង និងកាន់ជើងទៅលើគណបក្សមួយចំនួន
ដែលធ្វើឲ្យបាត់បង់សេចក្តីថ្លៃថ្នូររបស់ខ្លួននៅក្នុងនាមជាអ្នកសារព័ត៌មាន។
យ៉ាងណាមិញការចុះផ្សាយរបស់សារព័ត៌មាន Camnews ដែលគេបានដឹងថា
មាននិន្នាការគាំទ្របក្សប្រឆាំង គឺបានបំផ្លើសនូវព័ត៌មាន ខុសពីការពិត ដោយបានមួលបង្កាច់ថា
សម្តេចតេជោ ហ៊ុន សែន គឺមានបំណងប្រមាថអាយុជីវិតឯកឧត្តម កឹម សុខា ប៉ុន្តែបើយោងទៅលើ
ប្រសាសន៍របស់ សម្តេចតេជោ ដែលបានថ្លែង នៅឯខេត្តព្រះសីហនុ នៅថ្ងៃទី ២៩ ខែមេសា
ឆ្នាំ២០១៥ គឺសម្តេចមិនបានប្រមាថដល់អាយុជីវិតរបស់ឯកឧត្តម កឹម សុខា ដូចការចុះផ្សាយបំផ្លើសនោះទេ
ផ្ទុយទៅវិញគេបានមើលឃើញថា សម្តេចតេជោ គ្រាន់តែជម្រុញឲ្យឯកឧត្តម សម រង្ស៊ី
ត្រូវតែពង្រឹងផ្ទៃក្នុងបក្សរបស់ខ្លូន និងបញ្ឈប់នូវសកម្មភាពប៉ែងជើង។
ដោយឡែកចំពោះ វប្បធម៌សន្ទនា ដែលប្រមុខដឹកនាំនៃគណបក្សប្រជាជន
និងគណបក្សសង្គ្រោះជាតិកំពុងតែអនុវត្តនេះ ត្រូវបានឯកឧត្តម ទិត សុធា ពន្យល់ថា «សម្តេចតេជោ
បានសំលឹងឃើញថា ស្របពេលដែលវប្បធម៌សន្ទនា បាននិងកំពុងមានភាពល្អូកល្អឺន
ក៏ប៉ុន្តែភាគីម្ខាងទៀត នៅក្នុងគណបក្សប្រឆាំង សំដៅទៅលើឯកឧត្តម កឹម សុខា គឺបាន
បើកយុទ្ធនាការទ្រង់ទ្រាយធំ ក្នុងការប្រើពាក្យសំដី ដោយចោទប្រកាន់នានា មកលើថ្នាក់ដឹកនាំគណបក្សកាន់អំណាចថា
ដឹកនាំផ្តាច់ការ និងកុម្មុយនីស ព្រមទាំងទំយើខ្លួនឯងថា
បើសិនជាគណបក្សសង្គ្រោះជាតិជាប់ឆ្នោត គឺនឹងមិនមានការសងសឹក»។
ឯកឧត្តម ទិត សុធា បញ្ជាក់ថា តាមរយៈទង្វើរល្មើសនឹងវប្បធម៌សន្ទនា
ម្តងហើយម្តងទៀតរបស់ ឯកឧត្តម កឹម សុខា នេះហើយ ដែលធ្វើឲ្យសម្តេចតេជោ ប្រើការព្រមានដល់ឯកឧត្តម
កឹម សុខា ថាឲ្យបញ្ចប់ទៅ មិនអាចយកមនុស្សពីរនាក់ដើរតួក្នុងពេលតែមួយ មួយដើរតួចរចារ
ហើយមួយដើរតួជេរបញ្ចោរ រឺប៉ែងជើងនោះទេ។ នេះគឺជាការខ្វះនូវតម្លាភាពនៅក្នុងភាពជាដៃគូរសន្ទនាក្នុងន័យនេះ
មិនមែនបានន័យថាជាការប្រមាថដល់អាយុជីវិតរបស់ឯកឧត្តម កឹម សុខា ទេ។ នេះគ្រាន់តែជាការផ្ញើរសារព្រមានឲ្យបុគ្គលនោះដើរទៅត្រង់ផ្លូវនៃគោលការណ៍សន្ទនា
តែ Camnews បែរជាចោទថាជាការគំរាម នេះគឺជាការនិយាយបំផ្លើសរបស់អ្នកសរសេរនៅក្នុងCamnews។
ឯកឧត្តម ទិត សុធា បន្ថែមថា ហើយម៉្យាងទៀតអ្វីដែលជាការពិតនោះ
Camnews
គួរតែទទួលស្គាល់ថា ឯកឧត្តម កឹម សុខា ពិតជាបានប្រើពាក្យផ្តួលរំលំ
រាជរដ្ឋាភិបាលប្រាកដមែន យ៉ាងណាមិញ បើទោះជាមានវប្បធម៌សន្ទនាហើយក្តី គឺនៅឯខេត្តបាត់ដំបង
ឯកឧត្តម កឹម សុខា បានមានប្រសាសន៍ថា គណបក្សសង្គ្រោះជាតិ មិនមែនជាគណបក្សរណបគណបក្សប្រជាជនទេ
គឺជាគណបក្សដែលប្រកួតប្រជែងដើម្បីដណ្តើមជ័យជម្នៈ និងចង់ផ្តួលរំលំដាច់ខាតនូវការដឹកនាំរបស់គណបក្សប្រជាជនបច្ចុប្បន្ន
នេះជាចេតនា ដែលបង្ហាញដោយអនុប្រធានគណបក្សសង្គ្រោះជាតិ។
ឯកឧត្តម ទិត សុធា សង្កត់ធ្ងន់ថា នៅមានការពិតជាច្រើនទៀត ដែលរំលេចឲ្យឃើញថា
អនុប្រធានគណបក្សសង្គ្រោះជាតិ បាននឹងកំពុងដើរផ្ទុយពីវប្បធម៌សន្ទនា និងប្រព្រឹត្តខ្លួនប្រាសចាកពីក្រមសីលធម៌ជាអ្នកដឹកនាំ។
ឯកឧត្តម បន្តថា ចំពោះរឿងដែលថា ឯកឧត្តម កឹម សុខា មានស្រីញីប្រពន្ធចុងច្រើន, មានផ្ទះសំបែងច្រើន
រួមជាមួយនឹងការប្រើប្រាស់លុយជំនួយដែលបានមកពីក្រៅប្រទេសសំរាប់ផលប្រយោជន៍ផ្ទាល់ខ្លូននោះ
ដែលតាំងពីមិនមានទ្រព្យសម្បត្តិច្រើន រហូតដល់មានទ្រព្យសម្បត្តិច្រើនយ៉ាងឆាប់រហ័សនេះ
នេះគឺជាការពិត។
ឯកឧត្តម ទិត សុធា ក៏បានលើកឡើងផងដែរថា អ្វីដែល Camnews បានសរសេរ
គឺបានបង្ហាញថា Camnewsមិនបានទទួលស្គាល់ការពិតដែលលោក
កឹម សុខា បានប្រព្រឹត្តកន្លងមក និងបាននឹងកំពុងពាក់ព័ន្ធនោះទេ
ផ្ទុយទៅវិញគេហាក់បីដូចជាធ្វើជាការបន្ទរសម្លេងបន្ថែមទៀតគាំទ្រទាំងងងឹតងងុលលើអ្នកនយោបាយ
ដោយបង្វែរសភាពការណ៍ ងាកមកទម្លាក់កំហុសលើរាជរដ្ឋាភិបាល តាមរយៈការខ្ចីប្រាក់ពីបណ្តាប្រទេសមួយចំនួនដើម្បីអភិវឌ្ឍន៍
ដោយគេចោទថា គឺជាលុយដែលបានមកដោយការជំពាក់គេ។ ឯកឧត្តម ទិត សុធា បញ្ជាក់ថា
នៅលើពិភពលោក ប្រទេសមហាអំណាចមួយចំនួនក៏ជាប់ជំពាក់លុយពីបណ្តាប្រទេសដ៏ទៃៗដែរ
នៅក្នុងការអភិវឌ្ឍន៍ប្រទេសរបស់គេ ហើយនៅកម្ពុជាយើងនៅក្នុងដំណាក់កាលដែលត្រូវការអភិវឌ្ឍន៍
ដូច្នេះការខ្ចីជំនួយពីបរទេសគឺជារឿងចាំបាច់ដើម្បីយកមកអភិវឌ្ឍន៍ប្រទេសឲ្យមានការរីកចំរើន។
ឯកឧត្តម ទិត សុធា បានរំលឹកថា សម្តេច ហ៊ុន សែន ធ្លាប់បានជម្រាបដល់សាធារណៈជនរួចហើយថា
មិនមានការចរចារណាមួយ រវាងសម្តេចតេជោ ជាមួយនិងឯកឧត្តម សម រង្ស៊ី
ជាការបំផ្លាញជាតិនោះទេ។ ផ្ទុយទៅវិញមានគោលការណ៍ពីរដែលបានកើតឡើងអំពីវប្បធម៌សន្ទនានេះ
គឺទី១ ជំរុញឲ្យមានការឯកភាពជាតិ ការផ្សះផ្សារបង្រួបបង្រួមជាតិ និងទី ២
រួបរួមគ្នាដើម្បីអភិវឌ្ឍន៍ប្រទេសជាតិឲ្យមានការរីកចំរើន នេះគឺជាគោលការណ៍ចម្បងពីរដែលប្រមុខដឹកនាំគណបក្សប្រជាជនកម្ពុជា
បានដាក់ចេញជាយុទ្ធសាស្ត្រនៅក្នុងវប្បធម៌សន្ទនានេះ ក៏ប៉ុន្តែផ្ទុយទៅវិញ គេបានមើលឃើញថា
ភាគីម្ខាងទៅ សំដៅទៅលើគណបក្សប្រឆាំង គឺមិនបានគោរពឲ្យត្រឹមត្រូវទៅតាមគោលបំណងដ៏ពិសិដ្ឋនៅក្នុងវប្បធម៌សន្ទនានេះទេ។
ឯកឧត្តម បន្តថា វាហាក់បីដូចជាមានក្រុមមួយ បានដើរផ្ទុយពីវប្បធម៌នេះ
ដោយបង្កើនល្បឿននៃការប្រឆាំងនៃវប្បធម៌សន្ទនានេះ រួមជាមួយនឹងបំផុសដល់យុវជនជ្រុលនិយមមួយចំនួន
តាមរយៈបណ្តាញផ្សព្វផ្សាយសង្គម ដើម្បីឲ្យមានការស្អប់ខ្ពើមនូវវប្បធម៌នេះទៀត។
ដូច្នេះការព្រមានរបស់សម្តេចនាយករដ្ឋមន្ត្រីថា បើសិនជាមិនមានការពង្រឹងផ្ទៃក្នុងរបស់បក្សប្រឆាំងនោះទេ
វប្បធម៌សន្ទនានេះអាចនឹងត្រូវបំផ្លាញចោល។ នេះគឺជាការដាស់អារម្មណ៍ដល់បក្សប្រឆាំង
គួរគប្បីគោរពឲ្យបានត្រឹមត្រូវ ដោយភាពស្មោះសរនៅក្នុងដំណើរការឆ្ពោះទៅមុខនៃវប្បធម៌សន្ទនា៕
អត្ថបទ៖ ច័ន្ទ ទេវី
No comments:
Post a Comment