ទស្សនវិភាគ​ដោយ៖​ ទេព​ អម្រឹត,​ វិទ្យុអាស៊ី​សេរី​ ដែល​ល្បី​ថាឯករាជ្យ​និងប្រជាធិបតេយ្យ​ពេញទំហឹង ​តែធាតុពិត​គឺផ្តាច់ការ​

Tuesday, April 28, 2015

ទស្សនវិភាគដោយ៖ ទេព អម្រឹត, វិទ្យុអាស៊ីសេរី ដែលល្បីថាឯករាជ្យនិងប្រជាធិបតេយ្យពេញទំហឹង តែធាតុពិតគឺផ្តាច់ការ

នេះមិនមែនជាលើកទី១ទេ ដែលវិទ្យុអាស៊ីសេរី រងការរិះគន់ ពីសំណាក់បុគ្គលិករបស់ខ្លួន ដែលត្រូវបានវិទ្យុនេះបញ្ឈប់ពីការងារ លាឈប់ដោយខ្លួនឯង និងដោយបញ្ចប់កុងត្រានោះ។

កន្លងមកបុគ្គលិកវិទ្យុអាស៊ីសេរី មួយចំនួនក៏ធ្លាប់ធ្វើការតវ៉ា ទាមទារឲ្យអ្នកគ្រប់គ្រងវិទ្យុនេះគោរពច្បាប់ការងារ និងផ្តល់សំណងតាមច្បាប់មុនបញ្ឈប់ពួកគេពីការងារ ហើយបុគ្គលិកវិទ្យុមួយនេះ ក៏ធ្លាប់ធ្វើបាតុកម្មដុតកង់ឡាន នៅមុខវិទ្យុថែមទៀត ដោយពួកគេលើកឡើងពីភាពអយុត្តិធម៌ ដែលអ្នកគ្រប់គ្រងវិទ្យុនេះបានប្រព្រឹត្តមកលើពួកគេ។

វិទ្យុអាស៊ីសេរី តែងតែអះអាងថា ខ្លួនឯករាជ្យ មិនលំអៀង មានតម្លាភាពក្នុងការផ្សាយ ក៏ដូចជាដំណើរការការងាររបស់ខ្លួននោះថ្មីៗនេះ ត្រូវបានបុគ្គលិកជើងចាស់ម្នាក់ ធ្វើការបកអាក្រាត ពីរបៀបដឹកនាំបែបផ្តាច់ការ របស់ថ្នាក់ដឹកនាំវិទ្យុមួយនេះ។

លោក អ៊ុំ សារិន ហៅ កែវ និមល ដែលជាបុគ្គលិកជើងចាស់ របស់វិទ្យុអាស៊ីសេរី ដែលបានបំរើការងារនៅវិទ្យុអាស៊ីសេរីរយៈពេល១៨ឆ្នាំមកហើយ តាំងពីឆ្នាំ ១៩៩៧មក កាលពីថ្ងៃទី ២៥ ខែមេសា ឆ្នាំ២០១៥ កន្លងទៅ បានធ្វើការរិះគន់ថា វិទ្យុនេះជាស្ថាប័ន ដែលធ្វើការគាបសង្កត់បុគ្គលិក បង្ខំឲ្យធ្វើការហួសកម្លាំង បក្ខពួកនិយម និងដឹកនាំបែបផ្តាច់ការ។

លោក អ៊ុំ សារិន ដែលអ្នកស្តាប់ស្គាល់ថា ជា លោក កែវ និមល បានសរសេរសារបង្ហោះនៅលើទំព័រ Facebook របស់ខ្លួន ដោយបានរៀបរាប់ថា ចាប់ពីថ្ងៃទី ២៥ ខែមេសា ឆ្នាំ២០១៥ តទៅ លោកបានបញ្ចប់កុងត្រាការងារ ជាមួយវិទ្យុអាស៊ីសេរីហើយ។

នៅក្នុងសារសរសេរជាភាសាខ្មែរ និងអង់គ្លេសរបស់ខ្លួន លោក អ៊ុំ សារិន (កែវ និមល) បានសរសេររៀបរាប់ពីការលំបាកក្នុងដំណាក់កាល ៦ឆ្នាំចុងក្រោយ ដែលលោកធ្វើការងារនៅក្នុងវិទ្យុអាស៊ីសេរី ដោយលោកអះអាងថា ចាប់ពីឆ្នាំ ២០០៩ មកដល់ ២០១៥ គឺតាំងពីឈ្មោះ សម បូលី ហៅ ពៅ ពន្លក ឡើងធ្វើជានាយក និងឈ្មោះ ហួត វុទ្ធី ហៅ ជុន ចន្ទ័បុត្ត ឡើងកាន់អំណាច ជានាយករងមក ពួកគេរករឿង រុកគួន មិនឲ្យលោក មានសេចក្តីសុខទេ។ លោក បន្តថា ពួកគេនោះ ធ្លាប់រុកគួន ធ្វើបាបមនុស្ស សហសេវិក វិទ្យុអាស៊ីសេរី ជាច្រើននាក់មុនរូបលោក ដូចជានៅអាមេរិកមានលោក ម៉ាយារិទ្ធ, មឿង ទុម, សម បូរិន, ហាស់ សាន, កឹម វណ្ណថា និងអ្នកមួយចំនួនទៀត។ លោក អ៊ុំ សារិន បន្តថា ចំណែកឯបុគ្គលិកនៅស្រុកខ្មែរ មានដូចជា គីមពៅ សុតន្ត, សុខ សេរី, ហ៊ុយ វណ្ណៈ, សៀង សុភ័ណ, ផាន សុផាត, ថៃ សុធា ជាដើម។ ថ្មីៗនេះ មានសហសេវិក មួយចំនួន បានចាកចេញពី វិទ្យុអាស៊ីសេរី គឺក្នុងមួយខែសោះ មានមនុស្ស ៥ នាក់ បានសម្រេចចិត្តចាកចេញ មានដូចជា ទេព សុរ៉ាវី, អាន ស៊ីថាវ, ម៉ុម សូផុន, ជា សុធាជាតិ, វណ្ណ វាចា, ជាដើម។ លោក អ៊ុំ សារិន បន្ថែមថា សំរាប់លោកវិញ គឺសុំបាយបាយ វិទ្យុអាស៊ីសេរីហើយ។

វិទ្យុអាស៊ីសេរី ត្រូវបានគេដឹងថា ទទួលបានការគាំទ្រ យ៉ាងពេញទំហឹងពី គណបក្សប្រឆាំង ក្រុមអង្គការសង្គមស៊ីវិល ដែលមាននិន្នាការប្រឆាំងនិងរាជរដ្ឋាភិបាល រហូតប្រជាពលរដ្ឋខ្មែរមួយចំនួនយល់ថា វិទ្យុនេះជាវិទ្យុរបស់គណបក្សប្រឆាំងថែមទៀតផង ដោយហេតុថាវិទ្យុនេះតែងតែបន្ទរផ្សាយព័ត៌មានពីសកម្មភាពដ៏រស់រវើករបស់គណបក្សសង្គ្រោះជាតិ និងលើកកម្កើងវាគ្មីនដែលចូលចិត្តវាយប្រហារមកលើរាជរដ្ឋាភិបាល។

ជាការពិត នរណាដ៏បានដឹងថា វិទ្យុអាស៊ីសេរីជាសេនាធិការរបស់បក្សប្រឆាំង ដោយតែងតែធ្វើការរិះគន់មិនដាច់ពីមាត់ ពីសកម្មភាពនានារបស់រាជរដ្ឋាភិបាល ហើយជាពិសេសគេកំរបានលឺវិទ្យុនេះ ផ្សាយពីសមិទ្ធផលនានាដែលរាជរដ្ឋាភិបាលសំរេចបានណាស់។ផ្ទុយទៅវិញ គេបានឃើញថាពួកគេពួកែបំផុសរឿងតូចតាចដុតឲ្យទៅជាធំ និងធ្វើការផ្សាយដោយពុំមានវិជ្ជាជិវៈឡើយ

វិទ្យុនេះ ត្រូវបានប្រជាពលរដ្ឋខ្មែរមួយចំនួន ពិសេសអ្នកដែលគាំទ្រគណបក្សប្រឆាំងតែងតែប្រសិទ្ធិនាមថាជាវិទ្យុឯករាជ្យ និងមានតម្លាភាពក្នុងការផ្សាយ ប៉ុន្តែការពិតផ្ទៃក្នុងនៃវិទ្យុនេះ គឺស្អុយរលួយ គ្មានសុច្ចរិតភាព និងជិះជាន់កម្លាំងពលកម្មបុគ្គលិក រហូតបុគ្គលិករបស់ខ្លួនហ៊ានពោលពាក្យថា បញ្ចប់ការងារកន្លែងចាស់ មានអារម្មណធូរស្រាល ដូចរួចចេញពី សហករណ៍ នៃរបបកម្ពុជាប្រជាធិបតេយ្យ ដូចបក្សារួចចេញពីទ្រុងមាស.........អ្នកធ្លាប់រស់នៅជាមួយខ្មែរក្រហម ក្នុងរបបប៉ុលពតបានដឹងថា មានអារម្មណ បែបនេះ វាសប្បាយយ៉ាងម៉េច សូមបញ្ជាក់ថានេះជាពាក្យសំដីរបស់លោក អ៊ុំ សារិន ដែលបានបង្ហោះកាលពីថ្ងៃទី ២៦ ខែមេសា ឆ្នាំ២០១៥។

គួរបញ្ជាក់ថា មុនការបង្ហោះសារទាក់ទងនឹងការបញ្ចប់កុងត្រារបស់ខ្លួន ២ថ្ងៃ ជាមួយវិទ្យុអាស៊ីសេរី លោក អ៊ុំ សារិន ពោលគឺនៅថ្ងៃទី ២៣ ខែមេសា បានបង្ហោះសារមួយហាក់បីដូចជាមានចេតនាចង់និយាយអំពីភាពស្អុយគគ្រុក នៃស្ថាប័នវិទ្យុរបស់ខ្លួន ក៏ដូចជាអ្នកគ្រប់គ្រងរបស់ខ្លូន គ្រាន់តែលោកមិនបាននិយាយចំៗតែប៉ុណ្ណោះ។ សាររបស់លោក អ៊ុំ សារិន មុនបញ្ចប់កុងត្រា បានសរសេរថា មនុស្សខ្លះនិងក្រុមមនុស្សខ្លះ មើលឃើញគេអាក្រក់ តែខ្លួនឯងអាក្រក់ មើលមិនឃើញ មើលឃើញគេរំលោភសិទ្ធិមនុស្ស តែខ្លួនអែងរំលោភសិទ្ធិមនុស្សមើលមិនឃើញ មើលឃើញគេរំលោភច្បាប់ តែខ្លួនអែងរំលោភច្បាប់មើលមិនឃើញ ......មើលឃើញថៅកែជិះជាន់ធ្វើបាបកម្មករ តែមេធ្វើបាបជិះជាន់ខ្លួនមើលមិនឃើញ ....... មើលឃើញគេពុករលួយតែខ្លួនអែងពុករលួយមើលមិនឃើញ។

ពិតណាស់ថា ទីកន្លែងការងាររបស់មនុស្សម្នាក់ពិតជាបានចូលរួមចំណែកយ៉ាងធំធេង ក្នុងការអភិវឌ្ឍន៍ខ្លួនយើង ឲ្យមានចំនេះដឹងបន្ថែម មានបទពិសោធន៍ មានភាពប៉ិនប្រសព្វ មានមុខមាត់ មានការទទួលស្គាល់ ពិសេសកន្លែងការងារគឺជាកន្លែងដែលផ្តល់ធនធាន សំរាប់ ចិញ្ចឹមជីវិត និងជាកន្លែងដែលពោរពេញទៅដោយអនុស្សាវរីយ៍ យ៉ាងច្រើនមិនអាចបំភ្លេច បាន។ បុគ្គលគ្រប់រូប តែងតែមិនចង់និយាយអំពីគុណវិបត្តិរបស់ស្ថាប័នដែលខ្លួនធ្លាប់បំរើ ការងារឡើយ ដោយយល់ថាជាក្រមសីលធម៌នៃការងារ ប៉ុន្តែករណីខ្លះ ដែលមានការប្រមាថ ការរំលោភ ការបង្ខិតបង្ខំ ការមិនឲ្យតំលៃ ធ្វើឲ្យឈឺចាប់ផ្លូវចិត្តធ្ងន់ធ្ងរ ហួសនិងទ្រាំទ្របាន ដូចជាករណីលោក អ៊ុំ សារិន អ្នកសារព័ត៌មានជើងចាស់ វិទ្យុអាស៊ីសេរី បានជួបទើបលោកសំរេចចិត្តទម្លាយបញ្ហាផ្ទៃក្នុងរបស់វិទ្យុនេះ។

ប្រជាពលរដ្ឋខ្មែរមួយចំនួនធំ មិនយល់ថាវិទ្យុអាស៊ីសេរី ជាវិទ្យុឯករាជ្យទេ ដោយសារតែវិទ្យុនេះ តែងតែធ្វើការវាយប្រហារគ្រប់រូបភាពទៅលើរាជរដ្ឋាភិបាល និងលើកឡើងតែពីបញ្ហាខ្មៅក្រខ្វក់របស់សង្គមខ្មែរ រួចបំបិទចោលនូវភាពល្អប្រសើរ និងការខិតខំប្រឹងប្រែងរបស់ រាជរដ្ឋាភិបាល។ ក្រៅពីនេះវិទ្យុនេះធ្លាប់បានផ្សាយព័ត៌មានបំភ្លើស និងមានចរិតមួលបញ្ហានយោបាយក្នុងសង្គមខ្មែរជាបន្តបន្ទាប់ ដើម្បីផ្គាប់ចិត្តបក្សប្រឆាំង និងដើម្បីបង្ហាញសាច់ដុំ ថាខ្លួនជាស្ថាប័នដែលខ្លាំង ហ៊ានប្រឆាំង និងរិះគន់រាជរដ្ឋាភិបាលពេញៗមាត់។ ហើយគេបានដឹងថាសហរដ្ឋអាមេរិចបានផ្តល់លុយរាប់លានដុល្លាក្នុងមួយ ឆ្នាំដើម្បីឲ្រវិទ្យុមួយនេះធ្វើការក្នុងបំណងពង្រឹកលទ្ឋិប្រជាធិប តេយ្យនៅកម្ពុជា និងផ្សាយព័ត៌មានពិត ដើម្បីបំរើផលប្រយោជន៏ខ្មែរ។ប៉ុន្តែអ្នកដឹកនាំវិទ្យុបរទេសមួយនេះបាន អនុវត្តផ្ទុយពីគោលការណ៍នេះ ក្រោយពីមានការលើកឡើងនិងរិះគន់ពីបុគ្គលិក ជើងចាស់របស់វិទ្យុនេះ យើងជឿជាក់ថា និងធ្វើឲ្យសាធារណៈជនស្គាល់ពីវិទ្យុអាស៊ីសេរីកាន់តែច្បាស់ ហើយគេរិតតែមិនគាំទ្រវិទ្យុនេះទៀត ខណៈដែលអ្នកគ្រប់គ្រងវិទ្យុនេះ មិនមានក្រមសីលធម៌ជាអ្នកដឹកនាំ៕

Pages

Tuesday, April 28, 2015

ទស្សនវិភាគដោយ៖ ទេព អម្រឹត, វិទ្យុអាស៊ីសេរី ដែលល្បីថាឯករាជ្យនិងប្រជាធិបតេយ្យពេញទំហឹង តែធាតុពិតគឺផ្តាច់ការ

No comments:

Post a Comment