នៅរសៀលថ្ងៃទី ២៣
ខែកុម្ភៈ ឆ្នាំ២០១៥នេះ សមត្ថកិច្ចក្រសួងមហាផ្ទៃបានអនុវត្តច្បាប់អន្តោប្រវេសន៍ដោយចាប់ឃាត់ខ្លួន លោក ALEJANDRO ដែលទិដ្ឋាការរបស់គាត់ហួសសុពលភាពនៅថ្ងៃ
ទី២០ ខែកុម្ភៈ ឆ្នាំ២០១៥។ លោក ALEJANDRO គឺជាសកម្មជន
ការពារព្រៃឈើនៅតំបន់ជាយអារ៉ែង ដែលក្រុមសកម្មជនរបស់អង្គការមាតាធម្មជាតិរបស់
លោក ALEJANDRO
ដែលគេបង្កើតឡើងរយៈពេលប៉ុន្មានឆ្នាំមកនេះ បានចាត់ទុក
លោក ថាជាវីរៈជនការពារព្រៃឈើដ៏សកម្មមួយនៅក្នុងប្រទេសកម្ពុជា ហើយពេលនេះត្រូវបានសមត្ថកិច្ចក្រសួងមហាផ្ទៃឃាត់ខ្លួននៅតំបន់ក្បែរផ្សាររាត្រី
និងបានបញ្ជូនទៅដល់ព្រលានយន្តហោះអន្តរជាតិភ្នំពេញហើយ។
ពេលនេះគឺសកម្មជនរួមទាំងអង្គការក្រៅរដ្ឋាភិបាល
អង្គការសិទ្ធិមនុស្ស ក្រុមអ្នករត់ម៉ូតូឌុប ហើយនិងអ្នករត់ទុកៗ កំពុងតែប្រមូលគ្នា
ដើម្បីទៅទាមទារការពារ លោក ALEJANDRO ហើយបានសុំឲ្យរាជរដ្ឋាភិបាលដោះលែង
លោក ALEJANDRO
ត្រឡប់មកវិញ ហើយសុំរាជរដ្ឋាភិបាលផ្តល់ទិដ្ឋាការទៅដល់
លោក ALEJANDRO ដើម្បីបានបន្តការពារតំបន់អារ៉ែងនៅខេត្តកោះកុងក្នុងប្រទេសកម្ពុជាបន្តទៀត។
យោងតាមលិខិតរបស់អគ្គនាយកដ្ឋានអន្តោប្រវេសន៍
នៃក្រសួងមហាផ្ទៃចុះថ្ងៃទី ២០ ខែកុម្ភៈ
ឆ្នាំ២០១៥ បានជម្រាបទៅលោក ALEJANDRO ថា សុពលភាពនៃទិដ្ឋាការពន្យារការស្នាក់នៅក្នុងព្រះរាជាណាចក្រកម្ពុជារបស់លោកលេខ
EI00850241 ដែលមានសុពលភាព ចាប់ពីថ្ងៃទី១២ ខែសីហា ឆ្នាំ២០១៤ ត្រូវផុតកំណត់នៅថ្ងៃទី២០
ខែកុម្ភៈ ឆ្នាំ២០១៥នេះ ហើយសមត្ថកិច្ចកម្ពុជាមិនបានពន្យារការស្នាក់នៅរបស់លោកបន្តទៀតឡើយ។
គួរបញ្ជាក់ថា លោក ALEJANDRO
ជាអនុប្រធានអង្គការ បានប្រព្រឹត្តខុសទៅនឹងលក្ខន្តិកៈរបស់អង្គការមាតាធម្មជាតិដែលតម្កល់ទុកនៅក្រសួងមហាផ្ទៃ
ដោយបានធ្វើសកម្មភាពរារាំងការគ្រប់គ្រងរដ្ឋបាលសាធារណៈរបស់អាជ្ញាធរខេត្តកោះកុង
តាមរយៈការញុះញង់ប្រជាជនឲ្យចូលរួមបិទផ្លូវសាធារណៈ
មិនឲ្យក្រុមការងារចុះទៅជួបប្រជាពលរដ្ឋនៅឃុំថ្មដូនពៅ ឃុំប្រឡាយ
និងឃុំជំនាប់ ក្នុងស្រុកថ្មបាំង។ សកម្មភាពល្មើសនេះ ត្រូវបានលោក ALEJANDRO ទទួលសារភាពតាមរយៈ
លិខិតសុំអភ័យទោសសរសេរផ្ទាល់ដៃជាភាសាខ្មែរ ចុះថ្ងៃទី ១៥ ខែកញ្ញា ឆ្នាំ២០១៤។
អាស្រ័យហេតុនេះ ក្រសួងមហាផ្ទៃ តម្រូវឲ្យលោក ALEJANDRO ចាកចេញពីព្រះរាជាណាចក្រកម្ពុជា។ ក្រសួងមហាផ្ទៃពុំមានគោលការណ៍ហាមឃាត់លោក
ALEJANDRO ក្នុងការចូលមកព្រះរាជាណាចក្រកម្ពុជាវិញនោះទេ
ប្រសិនបើគាត់បានបំពេញបែបបទ និងមានលក្ខណៈសម្បត្តិគ្រប់គ្រាន់
ដូចជនអន្តោប្រវេសន៍ដ៏ទៃទៀត ស្របតាមគោលការណ៍ច្បាប់នៃព្រះរាជាណាចក្រកម្ពុជា។
កាលពីព្រឹកមិញនេះដែរ ក្នុងពិធីចែកសញ្ញាបត្រដល់និស្សិតសាកលវិទ្យាល័យជាតិគ្រប់គ្រង នៅថ្ងៃទី ២៣ ខែកុម្ភៈ ឆ្នាំ២០១៥នេះ
សម្តេចនាយករដ្ឋមន្រ្តី ហ៊ុន សែន បានថ្លែងថា
«មិនថាជនបរទេសបំពានទេ ជនជាតិខ្មែរបំពានក៏ត្រូវតែមានទោសដែរ។ អំណាចរដ្ឋ ម្យ៉ាងទៀត ប៉ុន្តែសង្ឃឹមថារឿងអស់ទាំងនេះ
ត្រឹមតែរដ្ឋមន្រ្តីមហាផ្ទៃ ដោះស្រាយបានហើយ។ គេទៅរំខានដល់ព្រះមហាក្សត្រណោះ»។
សម្តេចតេជោ
នាយករដ្ឋមន្ត្រី បានមានប្រសាសន៍ថា ប្រទេសកម្ពុជាជារដ្ឋអធិបតេយ្យមួយ ហើយប្រសិនបើជនបរទេស
និងប្រជាជនខ្មែរណាបំពាន គឺត្រូវតែមានទោស ហើយសម្តេចបន្តថាករណីនេះ កំពុងតែធ្វើឲ្យស្ថានការណ៍កាន់តែអាក្រក់
ដែលអាចនឹងនាំឲ្យមានការបណ្តេញចេញ និងត្រូវចូលបញ្ជីខ្មៅរបស់រដ្ឋាភិបាលកម្ពុជា។
លោកបញ្ជាក់ថា« គេសុខចិត្តឲ្យនៅរហូតដល់អស់ទិដ្ឋាការ។ អញ្ចឹងយើងចេញទៅសិនទៅ រួចហើយចាំសុំត្រឡប់មកវិញ
វាទាស់ខុសអី។ ចាំបាចប់ង្កើតស្ថានភាពនេះ(ឲ្យកាន់តែអាក្រក់)។ តែគេបណ្តេញចេញហើយ
វាត្រូវចូលក្នុងបញ្ជីខ្មៅ។ វាចប់ហើយ។ អាហ្នឹងហើយគេថាចង់ជ្រុល»។
សម្តេចតេជោ
ហ៊ុន សែន បានស្នើឲ្យ លោក អាឡិច ចេញពីប្រទេស មួយរយៈពេលសិនទៅ ហើយកុំនៅបង្ក
បញ្ហាក្នុងប្រទេសកម្ពុជាទៀត។ សម្តេចនាយករដ្ឋមន្រ្តីបន្តថា ក្នុងករណីអាឡិចនេះ
ទុកឲ្យក្រសួងមហាផ្ទៃជាអ្នកចាត់ការ កុំថាឡើយ ជនបរទេសសូម្បីតែខ្មែរ ក៏ត្រូវមានទោសដែរ
ហេតុនេះហើយសូមឲ្យអង្គការ មួយចំនួនក៏ដូចជាអ្នកនយោបាយ កុំធ្វើការអធិប្បាយហួសហេតុពេក៕
អត្ថបទ៖
ច័ន្ទ ទេវី
No comments:
Post a Comment