នៅក្នុងឱកាសចូលជួបសម្តែងការគួសម ជាមួយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី៨ ខែឧសភា ឆ្នាំ២០១៤ នៅវិមានសន្តិភាព ឯកឧត្ដម Xu Qiliang អនុប្រធានគណៈកម្មាធិការយោធាមជ្ឈិម នៃសាធារណរដ្ឋប្រជាមានិតចិន បានមានប្រសាសន៍ថា សម្តេចតេជោនាយករដ្ឋមន្ត្រី ជាអ្នកនយោបាយមានបទពិសោធន៍ខ្ពស់ និងមានការគោរពស្រឡាញ់ពីប្រជាជនកម្ពុជា និងការដឹកនាំរបស់សម្តេចបាននាំមកនូវការអភិវឌ្ឍគ្រប់វិស័យទាំងអស់។
ឯកឧត្តម អ៊ាង សុផល្លែត ជំនួយការសម្ដេចតេជោបានថា ឯកឧត្ដម Xu Qiliang បានពាំនាំនូវការផ្ដាំផ្ញើសាកសួរសុខទុក្ខ ពីសំណាក់ឯកឧត្ដមប្រធានាធិបតី ឯកឧត្ដមនាយករដ្ឋមន្ត្រីចិន ជូនចំពោះសម្ដេចតេជោនាយករដ្ឋមន្ត្រី។ ឯកឧត្តមក៏បានសម្តែងនូវក្តីរីករាយយ៉ាងខ្លាំង និងអបអរសាទរចំពោះសមទ្ធិផលទាំងឡាយ ដែលព្រះរាជាណាចក្រកម្ពុជាទទួលបាន ក្រោមការដឹកនាំរបស់សម្ដេចតេជោនាយករដ្ឋមន្ត្រី ដោយឯកឧត្តមមានប្រសាសន៍ថា ទស្សនកិច្ចរបស់ឯកឧត្ដមមកកាន់កម្ពុជានាពេលនេះ គឺត្រូវ បានទទួលការអនុញាតពីឯកឧត្ដមប្រធានាធិបតី ហើយមានទិសដៅទី១, បង្កើនការយល់ដឹងគ្នារវាងកម្ពុជា និងចិនជាយុទ្ធសាស្ត្រ។ ទី២, ជំរុញកិច្ចសហប្រតិបត្តិការដែលផ្ដល់នូវផលប្រយោជន៍ទៅវិញទៅមករវាងប្រទេសទាំងពីរឲ្យកាន់តែស៊ីជម្រៅ និងទី៣, ជំរុញទំនាក់ទំនងរវាងយោធា នៃប្រទេសទាំងពីរ ជាពិសេសលើវិស័យអភិវឌ្ឍធនធានមនុស្ស ក្នុងន័យធ្វើឲ្យប្រទេសទាំងពីរទទួលបាននូវភាពថ្កុំថ្កើងរុងរឿង។
សម្ដេចតេជោតេជោនាយករដ្ឋមន្ត្រីបានមានប្រសាសន៍ថ្លែងអំណរគុណចំពោះការពាំនាំនូវ ការផ្ដាំផ្ញើសាកសួរសុខទុក្ខពីសំណាក់ឯកឧត្ដមប្រធានាធិបតី ឯកឧត្ដមនាយករដ្ឋមន្ត្រី ហើយក៏បានថ្លែងអំណរគុណចំពោះឯកឧត្ដម Xu Qiliang ដែលបានលើកឡើងនូវគោលដៅនៃការបំពេញទស្សនកិច្ចនេះ និងក៏សូមស្វាគមន៍នូវរាល់គោលដៅដែលឯកឧត្ដមបានលើកឡើងផងដែរ៕
No comments:
Post a Comment