ពង្ស សុក្រឹត្យ
ឈានចូលដល់រដូវកាលនៃការឃោសនាបោះឆ្នោត
ជ្រើសរើសក្រុមប្រឹក្សារាជធានី ខេត្ត ក្រុង ស្រុក ខ័ណ្ឌ ចូលមកដល់
គណបក្សនយោបាយដែលបានចុះឈ្មោះក្នុងបញ្ជី បានសកម្មក្នុងការចុះជួបជាមួយអង្គបោះឆ្នោតរបស់ខ្លួន
នៅទូទាំងប្រទេស។ នេះបញ្ជាក់ថា ប្រទេសកម្ពុជា កំពុងតែអនុវត្ត
នូវរបបប្រជាធិបតេយ្យ សេរីពហុបក្ស យ៉ាងពិតប្រាកដ។
ក្នុងនោះគណបក្សប្រឆាំង ក៏បានបង្ហាញវត្តមានរបស់ខ្លួនផងដែរ។
នៅពេលដែលគណបក្សសង្គ្រោះជាតិ
បាននិងកំពុងមមាញឹកក្នុងការដើរភូតភបោកប្រាស់ប្រជាពលរដ្ឋ
និងកៀងគកម្លាំងដើម្បីត្រៀមនឹងផ្តួលរំលំរាជរដ្ឋាភិបាលនៅថ្ងៃណាមួយនោះ
ទាំងលោក កឹម សុខា និងសម រង្ស៊ី មិនបាននិយាយមួយមាត់ទាល់តែសោះថា ការបោះឆ្នោតនៅពេលនេះឯកបក្ស
ប៉ុន្តែ ពួកគេនិងស្រែកអាក្រោកឡើងវិញ
ប្រសិនបើសម្លេងឆ្នោតរបស់ពួកគេបាត់បង់ នោះប្រាកដជាចោទថា
ត្រូវបានគេគំរាមកំហែង គេទិញទឹកចិត្ត និងគេលួចបន្លំសន្លឹកឆ្នោត និងមិនសេរី
មិនយុត្តិធម៌ ទៀតជាក់ជាពុំខាន។
មិនត្រឹមតែប៉ុណ្ណោះ
ប្រហែលជាពួកគេអាចបញ្ជាឲ្យអង្គបោះឆ្នោតដែលបានជាប់ឆ្នោតធ្វើពហិកានៅក្នុងក្រុមប្រឹក្សាអាណត្តិទី២
ដូចសមាជិកសភារបស់ខ្លួនទៀតផង ហើយចុងក្រោយ គណបក្សសង្គ្រោះជាតិនឹងស្រែកទៀតថា
ក្រុមប្រឹក្សាអាណត្តិទី២ ឯកបក្សទៀតហើយ។
បើនិយាយអំពីយុទ្ធនាការ
នៃការឃោសនាក្នុងការបោះឆ្នោតជ្រើសរើសក្រុមប្រឹក្សាអាណត្តិទី២ របស់គណបក្សប្រឆាំងវិញ
គឺមិនបានអនុវត្តទៅតាមសេចក្តីណែនាំរបស់គណៈកម្មាធិការជាតិរៀបចំការបោះឆ្នោត(
គ ជ ប )ឡើយ។ នៅក្នុងចំណុចមួយចំនួននៃសេចក្តីណែនាំរបស់
គ ជ ប ដែលបានផ្សព្វផ្សាយ គឺណែនាំឲ្យតំណាងគណបក្សនយោបាយមិនត្រូវប្រើភាសា
ឬដៀមដាម ប្រមាថមើលងាយដល់គណបក្សនយោបាយ ឬតំណាងគណបក្សនយោបាយណាមួយឡើយ
និងមិនត្រូវប្រើសកម្មភាពឃោសនា ឲ្យទៅជាសកម្មភាពបាតុកម្មប្រឆាំងតវ៉ា
ឬស្រែកទាមទារដែលផ្ទុយពីគោលការណ៍នៃការឃោសនាបោះឆ្នោតឡើយ។
ផ្ទុយទៅវិញ
ទាំងលោក កឹម សុខា និងលោក សម រង្ស៊ី បែរជាកំពុងដើរឆ្ងាយពីផ្លូវច្បាប់
និងនាំឲ្យពលរដ្ឋមានការភាន់ច្រឡំ ដោយបានយកវេទិកាឃោសនាបោះឆ្នោតក្រុមប្រឹក្សាអាណត្តិទី២នេះ
មកធ្វើជាសកម្មភាពបាតុកម្មប្រឆាំងតវ៉ា ស្រែកទាមទារនៅក្នុងការឃោសនារបស់ខ្លួនកាលពីព្រឹកថ្ងៃទី៧
ខែឧសភា ឲ្យមានកំណែទម្រង់គណៈកម្មាធិការជាតិរៀបចំការបោះឆ្នោត(គ.ជ.ប.)
និងការបណ្តេញនាយករដ្ឋមន្ត្រីចេញពីតំណែង
ទៅវិញ។
ការឃោសនារបស់
កឹម សុខា ដែលប្រើពាក្យថា « គណបក្សប្រឆាំងនឹងការពារឆន្ទៈប្រជាពលរដ្ឋដោយតស៊ូរហូតដល់មានការចុះចេញពីតំណែង
របស់លោកនាយករដ្ឋមន្ត្រី ហ៊ុន សែន » គឺជាការប្រកាសបណ្តេញនាយករដ្ឋមន្ត្រីស្របច្បាប់ចេញពីដំណែង
និងជាការរំលោភលើឆន្ទ:របស់ប្រជាពលរដ្ឋម្ចាស់ឆ្នោត
ដែលបានសម្រេចដោយសម្លេងភាគច្រើនដាច់ខាត។ មានន័យថា កឹម សុខា បាន
និងកំពុងប្រើប្រាស់នូវសិទ្ធិជ្រុលហួសហេតុ ដែលផ្ទុយពី
របបប្រជាធិបតេយ្យសេរីពហុបក្ស ហើយ។
ការលើកឡើង របស់លោក កឹម
សុខា ជាការប្រមាថមួយដ៏ធ្ងន់ធ្ងរ មកលើប្រមុខរាជរដ្ឋាភិបាល
ដែលកើតចេញពីការបោះឆ្នោត និងបានអនុវត្តផ្ទុយទាំងស្រុងពីច្បាប់បោះ
ឆ្នោត។ នេះជាការលើកឡើងរបៀបខ្វះក្រមសីលធម៌ របស់អ្នកនយោបាយ
ហើយដែលជាចរឹតរបស់មេដឹកនាំគណបក្សប្រឆាំងដែលតែងតែ
បានប្រើប្រាស់នូវវប្បធម៌មិនគោរពច្បាប់ម្តងហើយម្តងទៀត។ ចំណុចនេះ សង្ឃឹមថា សកម្មជនគណបក្សប្រជាជនកម្ពុជានៅខេត្តដែលមេដឹកនាំបក្សប្រឆាំងលើកឡើងនោះ
នឹងដាក់ពាក្យបណ្តឹងទៅ គ ខ ប របស់ខ្លួនដើម្បីអនុវត្តច្បាប់ជាមិនខាន។
ការបោះឆ្នោតជ្រើសរើសក្រុមប្រឹក្សាអាណត្តិទី២
គឺជាការបោះឆ្នោតអសកល ដែលមានអង្គបោះឆ្នោតត្រូវចូលរួមត្រឹមតែ១១.៩៥៣នាក់ប៉ុណ្ណោះ
ហើយបេក្ខជនដែលត្រូវឈរឈ្មោះ គឺមានសរុប៧២១៥នាក់ ដូច្នេះហើយ
ទើបការឃោសនារកសម្លេងឆ្នោតគឺត្រូវផ្តោតសំខាន់ទៅលើសមាជិកនៃអង្គបោះឆ្នោត
ដែលអាចឲ្យគណបក្សនយោបាយធ្វើនៅតាមស្នាក់ការគណបក្សរបស់ខ្លួន។ ដូច្នេះហើយ
ទើបគណបក្សប្រជាជនកម្ពុជា សម្រេចធ្វើការឃោសនានៅតាមទីស្នាក់ការរបស់ខ្លួននៅតាមមូលដ្ឋាន
និងមិនធ្វើនៅតាមទីសាធារណៈ ដើម្បីអនុវត្តតាមការណែនាំរបស់ គ ជ ប។
ម៉្យាងទៀត ការធ្វើនៅទីស្នាក់ការរបស់ខ្លួន
គឺមិនធ្វើឲ្យមានការប៉ះពាល់ដល់សណ្តាប់ធ្នាប់សាធារណៈ ជាពិសេស
ប៉ះពាល់ដល់ការប្រកបរបរទទួលទានប្រចាំថ្ងៃរបស់ប្រជាពលរដ្ឋ។ នេះក៏ជាការគិតគូរទៅដល់ជីវភាពប្រជាជន
និងជាវប្បធម៌របស់ថ្នាក់ដឹកនាំគណបក្សប្រជាជន
ដែលមានតាំងពីថ្ងៃរំដោះ ៧មករា ឆ្នាំ១៩៧៩ មកម្លេះ។
តាមពិតគណបក្សសង្គ្រោះជាតិ
មិនដែលបានកសាងនូវសមិទ្ធផលអ្វីជូនប្រជាពលរដ្ឋ
និងប្រទេសជាតិសោះឡើយ ក្រៅតែពីការលើកឡើងនូវការសន្យាដដែលៗនៅចំពោះមុខម្ចាស់ឆ្នោត
ហើយមិនទាន់សម្រេចបានលទ្ធផលអ្វីបន្តិចបន្តួចនោះទេ។ ជំនាញរបស់មេបក្សទាំងពីរ
ទាំងលោក កឹម សុខា និងលោក សម រង្ស៊ី គឺគ្មានអ្វីក្រៅតែពីការប្រកូកប្រកាសប្រជាពលរដ្ឋឲ្យមកធ្វើបាតុកម្ម
និងបង្កឲ្យមានអស្ថេរភាពសង្គមម្តងហើយម្តងទៀតតែប៉ុណ្ណោះ។ ជាក់ស្តែង
នៅពេលដែលមានវត្តមានរបស់ពួកគេនៅក្នុងប្រទេសម្តងៗ លោក កឹម សុខា
និងលោក សម រង្ស៊ី គឺតែងតែធ្វើព្យុះ ធ្វើភ្លៀង បង្កចលាចលក្នុងសង្គម
ធ្វើឲ្យប្រជាពលរដ្ឋមានការភ័យខ្លាចក្នុងការរកស៊ី
គម្រាមដល់អ្នកដែលមកបណ្តាក់ទុននៅកម្ពុជា
ថានឹងលុបចោលនូវកិច្ចសន្យានានា នៅពេលដែលបក្សគេបានឡើងកាន់អំណាច
និងបង្កដល់ការរំខានពេលវេលាក្នុងការធ្វើស្រែចម្ការរបស់កសិករ ជាដើម។
មិនតែប៉ុណ្ណោះ គឺមេដឹកនាំគណបក្សប្រឆាំងនេះហើយ ដែលបានធ្វើឲ្យមានការខាតបង់ផ្នែកហិរញ្ញវត្ថុជាច្រើនដល់តំណាងរាស្ត្រជាប់ឆ្នោតទាំង
៥៥ នាក់របស់ខ្លួន ដោយសារតែការខកខានមិនបានបើកប្រាក់ខែ ក្នុងការធ្វើពហិការមិនចូលសភា
ហើយស្ថានភាពនេះពិតជាបង្កឲ្យមានអ្នកតំណាងរាស្ត្ររបស់ខ្លួន ខកចិត្តជាក់ជាមិនខាន
ម្លោះហើយតំណាងរាស្ត្រទាំងនោះចេះតែស៊ូទ្រាំបៀមទុក្ខ ឈរមើលការធ្វើមាន
ធ្វើបានរបស់មេបក្សទាំងពីរយ៉ាងឈឺចាប់។
ដូច្នេះ
ការបណ្ដែតបណ្ដោយអោយអ្នកនយោបាយមួយក្ដាប់តូចបំផុស
និងញុះញង់ប្រជាជនអោយប្រព្រឹត្តអំពើហិង្សា បិទផ្លូវ ស្ទះចរាចរសាធារណៈ
និងអាចឈានទៅដល់ការវាយបំផ្លាញទ្រព្យសម្បត្តិរដ្ឋ និងឯកជន
តើនោះជាប្រជាធិបតេយ្យឬ? ប្រជាធិបតេយ្យ វាមានអត្ថន័យទូលំទូលាយ ប៉ុន្ដែ
វាក៏ងាយក្លាយទៅជាអនាធិបតេយ្យ ប្រសិនបើគេមិនកំណត់ឲ្យបានច្បាស់លាស់អំពីអត្ថន័យ
និងនិយមន័យរបស់វាទេនោះ។ ២បូកនឹង២ស្មើ៤ ប៉ុន្ដែ៣បូកនឹង១ ក៏ស្មើ៤ដែរ។
ការប្រកាសរបស់មេដឹកនាំគណបក្សសង្គ្រោះជាតិ ដែលបង្ខំឱ្យសម្តេចតេជោ
ហ៊ុន សែន នាយករដ្ឋមន្ត្រីស្របច្បាប់របស់កម្ពុជាត្រូវចុះចេញពីតំណែង
គឺជាទង្វើបំពានច្បាប់ ជាការធ្វើរដ្ឋប្រហាររដ្ឋធម្មនុញ្ញ
វាមានតម្លៃស្មើនឹងការយកច្បាប់ព្រៃមកអនុវត្តនៅកម្ពុជា។
ដូច្នេះ រាជរដ្ឋាភិបាលមានកាតព្វកិច្ចពេញលេញ
ជាអ្នកទទួលខុសត្រូវក្នុងការថែរក្សា និងការពារដាច់ខាតនូវសុខសន្ដិភាព ធានាឲ្យបាននូវសុវត្ថិភាព សណ្ដាប់ធ្នាប់សង្គម
ដើម្បីឧត្តមប្រយោជន៍ជាតិ និងមាតុភូមិ
គឺមានសិទ្ធិក្នុងការចាត់វិធានការផ្លូវច្បាប់គ្រប់ពេល
ដើម្បីធានាស្ថេរភាពនយោបាយ និងសន្តិសុខជាតិ ហើយនៅពេលដែលមានសុខសន្ដិភាព រដ្ឋធានាបាននូវសុវត្ថិភាព
សណ្ដាប់ធ្នាប់សង្គម នោះប្រជាធិបតេយ្យនឹងកើតមានយ៉ាងពិតប្រាកដ៕
No comments:
Post a Comment