ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្ដី រដ្ឋមន្រ្ដីទទួលបន្ទុកទីស្ដីការគណៈរដ្ឋមន្រ្ដីនាព្រឹកថ្ងៃទី៣ ខែវិច្ឆិកាឆ្នាំ២០១៣ បានសម្ដែងការកោតសរសើរចំពោះនាយ និងពលទាហាន ដែលកំពុងឈរជើងនៅតាមបណ្ដោយព្រំដែនទាំងអស់ដែលបានគោរព អនុវត្តនិងឆ្លើយតបបានទាន់ពេលវេលារាល់បទបញ្ជាររបស់រាជរដ្ឋាភិបាលដើម្បីបុព្វហេតុកិច្ចការពារជាតិមាតុភូមិ។
នៅក្នុងឱកាសជួបសំណេះសំណាលសួរសុខទុក្ខនាយទាហាន នាយទាហានរង និងពលទាហាន កងយោធពលខេរៈភូមិន្ទដែលកំពុងឈរជើងប្រចាំការទិសប្រាសាទព្រះវិហារ និងបន្ទាប់ពីឯកឧត្តមនាយឧត្តមសេនីយ ហ៊ីង ប៊ុនហៀង អគ្គមេបញ្ជារការរងនៃកងយោធពលខេមរភូមិន្ទ បានរាយការណ៏អំពីសភាពការណ៏ទូទៅនៅតាមបណ្ដាយព្រំដែនកម្ពុជា-ថៃរួចមក ឯកឧត្តមបណ្ឌិតសភាចារ្យ សុខ អាន ក៏បានមានប្រសាសន៏ជម្រាបជូនកងកម្លាំងប្រដាប់អាវុធទាំងអស់ដែលមានវត្តមាននាក្នុងឱកាសនោះ ទាក់ទងនឹងតុលាការយុត្តិធម៌អន្តរជាតិទីក្រុងឡាអេ ដែលនឹងត្រូវធ្វើការបកស្រាយសាលដីការឡាអេ (I.C.J) ឆ្នាំ១៩៦២ រឿងក្ដីប្រាសាទព្រះវិហារ នៅថ្ងៃទី១១ ខែវិច្ឆិកា ឆ្នាំ២០១៣ ខាងមុខតាមការស្នើរសុំពីភាគីកម្ពុជាផងដែរ។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា៖ យោងតាមស្មារតីនិងតាមរយៈជំនួបពិភាក្សារវាងប្រមុខរាជរដ្ឋាភិបាលនៃប្រទេសទាំងពីរ (កម្ពុជា‑ថៃ)ជាច្រើនលើកច្រើនសារ សម្ដេចអគ្គមហាសេនាបតីតេជោ ហ៊ុន សែន និង លោកជំទាវ យីងឡាក់ ស៊ីណាវ៉ាត់ បានប្តេជ្ញាចិត្តរួចហើយថា ទោះជាក្នុងករណីដែលការបកស្រាយរបស់តុលាការយុត្តិធម៏អន្ដរជាតិក្រុងឡាអេ (I.C.J) មានអំណោយផលដល់ប្រទេសកម្ពុជា ឬមានអំណោយផលដល់ប្រទេសថៃយ៉ាងណាក៏ដោយគឺភាគីទាំង២ត្រូវតែគោរពតាម ហើយការបកស្រាយនេះដែរ គឺមិនមានផលប៉ះពាល់ដល់ទំនាក់ទំនងល្អរវាងប្រទេសទាំងពីរ ប្រជាពលរដ្ឋនៃប្រទេសទាំងពីរ ក៏ដូចជាការទំនាក់ទំនងសហប្រតិបតិ្ដការលើគ្រប់វិស័យរវាងប្រទេសទាំងពីរនោះឡើយ។
ឯកឧត្តមបណ្ឌិតសភាចារ្យ សុខ អាន បានមានប្រសាសន៏បញ្ជក់ថា អ្វីដែលជាបំណងប្រាថ្នារបស់ប្រមុខរាជរដ្ឋាភិបាលនៃប្រទេសទាំងពីរចង់បាននោះ គឺការបញ្ជៀសនូវកំទេចភ្លើងមួយដែលនាំឲ្យក្លាយទៅអណ្ដាតភ្លើងឆាបឆេះបង្ករឲ្យទៅជាសង្គ្រាមបាន។
គួរបញ្ជាក់ថា៖ អំណោយដែលឯកឧត្តមបណ្ឌិតសភាចារ្យឧបនាយករដ្ឋមន្រ្ដី សុខ អាន យកទៅប្រគល់ជូនដល់កងយោធពលខេរៈភូមិន្ទ ដែលកំពុងឈរជើងនៅទិសប្រាសាទព្រះវិហារក្នុងពិធីសំណេះសំណាលនាពេលនេះរួមមាន៖ អង្ករ មី ត្រីខកំប៉ុង ទឹកបរិសុទ្ធ ទឹកត្រី ទឹកស៊ីអ៊ីវ ទឹកដោះគោ ស្ករសរ ព្រមទាំងថវិកាផងដែរ៕
No comments:
Post a Comment