ប្រជាពលរដ្ឋមកពីទូទាំង១៣ភូមិ ក្នុងឃុំកុមារាជាទទួលបានការ​ពិនិត្យព្យាបាលជំងឺទូទៅ និងពិនិត្យជំងឺមាត់ធ្មេញ​ដោយឥតគិតថ្លៃពីអង្គការ CBN Cambodia

តាកែវ៖ នៅថ្ងៃទី១៨ ខែធ្នូ ឆ្នាំ២០១៦នេះ អង្កការ CBN Cambodia (Christian Broadcasting Network) ដែលធ្វើការផ្តោតលើកិច្ចការងារមនុស្សធម៌ ដឹកនាំដោយលោកស្រីវេជ្ជបណ្ឌិត ឃន សុភា និងក្រុមគ្រូពេទ្យជាច្រើនរូបទៀត បានចុះពិនិត្យព្យាបាលជំងឺទូទៅ និងជំងឺមាត់ធ្មេញ ជូនដល់ប្រជាពលរដ្ឋមកពីទូទាំង១៣ភូមិ ក្នុងឃុំកុមារាជា ស្រុកបាទី ខេត្តតាកែវ។
ការចុះផ្តល់សេវាសុខភាពជូនដល់ប្រជាពលរដ្ឋនៅក្នុងឃុំកុមារាជានេះ គឺធ្វើឡើងតបតាមការ ស្នើសុំ និងកិច្ចសហការរបស់ក្រុមការងារថ្នាក់ចុះជួយឃុំកុមារាជា ដែលមាន លោក ស្វាយ ស៊ីថា រដ្ឋលេខាធិការ និងជាប្រធានអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី ជាប្រធានក្រុមការងារ និងដោយមានការចូលរួម និងសម្របសម្រួលពីអាជ្ញាធរមូលដ្ឋានក្នុងឃុំផងដែរ។
ការចុះផ្តល់សេវាសុខភាពជូនប្រជាពលរដ្ឋ ទូទាំង១៣ភូមិ ក្នុងឃុំកុមារាជា ដោយមិនគិតថ្លៃនេះ ធ្វើឡើងរយៈពេល២ថ្ងៃ គឺចាប់ពីថ្ងៃទី១៨ ដល់ថ្ងៃទី១៩ ខែធ្នូ ឆ្នាំ២០១៦ ហើយសម្រាប់កម្មវិធីចុះពិនិត្យព្យាបាលនៅថ្ងៃទី១នេះ តំណាងក្រុមការងារថ្នាក់ជាតិ គឺដឹកនាំដោយលោក រ័ត្ន សណ្តាប់ និងលោក លី គាំ ប្រធានក្រុមការងារតាមភូមិ ក្នុងឃុំកុមារាជា ព្រមទាំងក្រុមការងារចុះជួយឃុំកុមារាជាមួយចំនួនទៀតផងដែរ។
លោក ប៉ុល ដុស ប្រធានក្រុមប្រឹក្សាឃុំកុមារាជា បានលើកឡើងថា ការចុះពិនិត្យព្យាបាល និងផ្តល់សេវាសុខភាពជូនប្រជាពលរដ្ឋនៅពេលនេះ គឺជាការសម្រាលនូវការលំបាកមួយផ្នែកជូនប្រជាពលរដ្ឋដែលខ្វះខាត និងមានជំងឺ ហើយលោកក៏សូមអរគុណ និងជូនពរដល់អង្គការ CBN Cambodia ឱ្យដំណើរការទៅកាន់តែបានល្អប្រសើរថែមទៀត។
ជាមួយគ្នានេះ លោក អ៊ុ ញ្ញាណពិសិដ្ឋ នាយកអង្គការ CBN Cambodia បានមានប្រសាសន៍ថា លោកមានក្តីសោមនស្សរីករាយ ដែលបានអញ្ជើញមកពិនិត្យ និងព្យាបាលជំងឺជូនប្រជាពលរដ្ឋក្នុងឃុំកុមារាជា ស្រុកបាទី ខេត្តតាកែវ នាពេលនេះ។ លោកនាយក បានឱ្យដឹងថា សម្រាប់ការពិនិត្យ និងព្យាបាលនៅថ្ងៃនេះ ក្រុមការងាររបស់លោកមាន វេជ្ជបណ្ឌិតជំងឺទូទៅចំនួន៤រូប ហើយសម្រាប់ជំងឺមាត់ធ្មេញមានវេជ្ជបណ្ឌិតចំនួន២រូប។ នាយកអង្គការ CBN Cambodia បានបញ្ជាក់ថា អង្គការរបស់លោក បានដំណើរការនៅប្រទេសកម្ពុជាជាង១០មកឆ្នាំហើយ ហើយការចុះព្យាបាលជំងឺជូនប្រជាពលរដ្ឋម្តងៗ មានប្រជាពលរដ្ឋចំនួនពី១០០០ ទៅ១២០០០នាក់។ លោកបានបន្តថា គោលដៅរបស់អង្គការ CBN Cambodia គឺចុះតាមបណ្តាខេត្តនានា ដែលប្រជាពលរដ្ឋមានការខ្វះខាត និងត្រូវការសេវាសុខភាពចាំបាច់។ លោក អ៊ុ ញ្ញាណពិសិដ្ឋ ក៏បានឱ្យដឹងទៀតថា អង្គការរបស់លោក ទទួលបានមូលនិធិពីប្រជាជនអាមេរិក សំរាប់ដំណើរការកិច្ចការមនុស្សធម៌នេះ។ ជាចុងក្រោយ លោក អ៊ុ ញ្ញាណពិសិដ្ឋ ក៏បានអំពាវនាវឱ្យប្រជាពលរដ្ឋយកចិត្តទុកដាក់ថែរក្សាសុខភាពឱ្យបានល្អ ហើយបើមានតំរូវការចាំបាច់ក្នុងការពិនិត្យព្យាបាលនោះ ក្រុមការងាររបស់លោកនឹងមកទីនេះម្តងទៀត៕

អ្នកសុំទានមួយ​ចំនួនអាចជាគោល​ដៅ​នៃ​ការ​កេង​ចំណេញ​នយោបាយ និង​ប៉ះពាល់​ដល់សណ្តាប់​ធ្នាប់សាធារណៈ

ភ្នំពេញ៖ នៅថ្ងៃទី១៨ ខែធ្នូ ឆ្នាំ២០១៦នេះ មានប្រជាពលរដ្ឋខ្មែរម្នាក់ បានបង្ហោះផ្សាយនៅលើបណ្តាញសង្គមហ្វេសប៊ុករបស់ខ្លួន ដោយលើកឡើងអំពីបញ្ហាអ្នកសុំទាន នៅតាមផ្លូវសាធារណៈ ជាពិសេសការសុំទានក្នុងរូបភាពវេទនា ដែលត្រូវបានរៀបចំឡើងដោយក្រុមជនឱកាសនិយម យកការសុំទានធ្វើជាមុខរបរ។
អ្នកបង្ហោះសារលើបណ្តាញសង្គមហ្វេសប៊ុកនោះ បានសរសេររៀបរាប់ថា «សណ្តានចិត្តបងប្អូនយើងដែលគិតគូរ និងជួយដល់បងប្អូនដែលក្រីក្រលំបាក ជាពិសេសបងប្អូនអ្នកសុំទានតាមផ្លូវសាធារណ: គឺជាគុណធម៌ដ៏ល្អប្រពៃ។ កន្លងមក មានអ្នកទីទ័លក្រដែលត្រូវបង្ខំចិត្តសុំទានដើម្បីដោះទ័លម្តងមួយគ្រា ហើយក៏មានបងប្អូនយើងមួយចំនួនដែលបានចាប់យកការសុំទាននេះជាអាជីពដែរ។ ត្រង់ចំណុចនេះ បងប្អូនខ្លះបន្តសុំទានជាអាជីព ដោយសារតែមិនមាន ឬមិនអាចធ្វើអ្វីផ្សេងទៀតបាន។ ប៉ុន្តែបងប្អូនយើងខ្លះទៀត គឺមិនចង់ទៅធ្វើការងារអីសោះ ក្រៅតែពីការសុំទាន ព្រោះវាងាយស្រួល ហើយមានសេរីភាព មិនដូចធ្វើការអោយគេនោះទេ ដែលត្រូវមានម៉ោងមានពេលត្រឹមត្រូវ។ ជាងនេះទៀត បងប្អូនខ្លះទៀតក៏បានបង្កើតអោយមានស្ថានភាពវេទនាភ្នែកកាន់តែខ្លាំង ដើម្បីងាយសុំទាន និងសុំទានបានកាន់តែច្រើនថែមទៀតផង ដូចជាមនុស្សពេញវ័យបីទារកមកសុំទាន, មនុស្សពេញវ័យអូសរទេះអ្នកជំងឺធ្ងន់ធ្ងរមកសុំទានឬមនុស្សពេញវ័យរៀបចំអោយក្មេងៗបីទារកមកសុំទាន។ល។ ដើម្បីរកលុយមកចិញ្ចឹមពួកខ្លួនដែលដេកទំនេរ ឬលេងល្បែងស៊ីសងទៅវិញ គឺក្រុមនេះហើយដែលយើងត្រូវផ្តល់ដំណោះស្រាយ ដើម្បីជួយផង និងចាត់វិធានការផង ដើម្បីទប់ស្កាត់សកម្មភាពហួសហេតុមួយចំនួន»។
គណនីហ្វេសប៊ុកដដែលនេះ បានបញ្ចេញជាយោបល់ជុំវិញរឿងនេះថា «ខ្ញុំគិតថា យើងមិនគួរហាមឃាត់ពួកគាត់មិនអោយសុំទានដោយចំហរនោះទេ ព្រោះគាត់ក៏មានសិទ្ធិសេរីភាពជ្រើសយកការសុំទាននេះជាអាជីពចិញ្ចឹមជីវិតដែរ។ នៅស្រុកណាក៏មានអ្នកសុំទានដែរ។ នៅអាមេរិក បារាំង ជប៉ុន អូស្ត្រាលី។ល។ សុទ្ធតែនៅមានអ្នកសុំទាន»។ ប៉ុន្តែយើងអាចរៀបចំអប់រំពួកគាត់ កុំអោយប្រើពលកម្មកុមារ ឬរបៀបសុំទានដែលវេទនាភ្នែកពេក សម្រាប់ការសុំទានរបស់ពួកគាត់ ឧទាហរណ៍ វិធានការហាមការសុំទានដោយប្រើទារក ឬកុមារតូច ឬកូនក្មេង ឬចាស់ជរាដែលមានជំងឺប្រចាំកាយធ្ងន់ធ្ងរ នៅតាមផ្លូវថ្នល់ជាដើម។ល។ តើបងប្អូនយល់យ៉ាងណាដែរ?» ទាំងនេះសុទ្ធតែជាគំនិតដែលត្រូវបានបង្ហោះលើទំព័រហ្វេសប៊ុកផ្ទាល់ខ្លួនរបស់គាត់។

សូមបញ្ជាក់ថា ករណីនៃការសុំទាននេះ ក៏គួរតែសាលារាជធានីភ្នំពេញ ធ្វើការណែនាំ និងរៀបចំឲ្យមានសណ្តាប់ធ្នាប់ ផងដែរ ពីព្រោះសកម្មភាពនេះវាបានប៉ះពាល់ធ្ងន់ធ្ងរដល់គោលនយោបាយ កាត់បន្ថយភាពក្រីក្ររបស់រាជរដ្ឋាភិបាលដែលបាននិងកំពុងយកចិត្តទុកដាក់ខ្ពស់បំផុតលើបញ្ហានេះ ។ ម៉្យាងវិញទៀត ការយកវិធីសុំទានធ្វើជាមុខរបរ គឺជាសកម្មភាពមិនសមរម្យនោះទេ ។ ផ្ទុយទៅវិញពលរដ្ឋ និងក្រុមមនុស្សមួយចំនួនតូចទាំងនោះ គួរត្រូវបានរៀបចំឲ្យមានរបៀបរៀបរយ។ មួយវិញទៀតអ្នកសុំទានទាំងនេះ គឺមិនអាចបង្ហាញថា ខ្មែរនៅតែក្រលំបាកវេទនាបែបនេះឡើយ តែវាបានធ្វើឲ្យប៉ះពាល់ដល់សណ្តាប់ធ្នាប់សាធារណៈ ភ្ញៀវទេសចរជាតិ និងអន្តរជាតិ និងក៏អាចនាំឲ្យមានការបកស្រាយភ័ន្តច្រឡំពីកម្ពុជាលើបញ្ហានេះផងដែរ មិនត្រឹមតែប៉ុណ្ណោះទេ ក៏អាចមានជនឱកាសនិយមខ្លះ ឆ្លៀតថតផ្តិតយករូបភាពដ៏តិចតួចនេះ បង្ហោះផ្សព្វផ្សាយបំភ្លៃសភាពការណ៍ពិតនៃប្រទេសកម្ពុជា ដើម្បីធ្វើអាជីវកម្មផងដែរ៕

អាជ្ញាធរជាតិអប្សរា​បិទ​វគ្គបណ្តុះបណ្តាល​​ស្តីពីជំនាញ​បច្ចេក​ទេស​​សង្គ្រោះ​បឋម​​បន្ទាប់​ពី​បាន​បណ្តុះបណ្តាល​​រយៈពេល​៤ថ្ងៃរួចមក

នៅរសៀលថ្ងៃទី១៧ ខែធ្នូ ឆ្នាំ២០១៦ អាជ្ញាធរជាតិអប្សរាបានបិទវគ្គបណ្តុះបណ្តាលស្តីពីជំនាញបច្ចេកទេសសង្គ្រោះបឋមដោយមានចែកវិញ្ញាបនបត្រជូនសិក្ខាកាមចំនួន៤៤នាក់ មានដូចជា ភ្នាក់ងារទេសចរណ៍ មន្ត្រីនគរបាលការពារបេតិកភណ្ឌ នគរបាលទេសចរណ៍ នគរបាលចរាចរណ៍ និងមន្ត្រីបុគ្គលិកមកពីនាយកដ្ឋាននានានិងអង្គភាពចំណុះអាជ្ញាធរជាតិអប្សរាមួយចំនួនទៀតក្រោមអធិបតីភាពលោក ហុក ប៉េងសែ អគ្គនាយករងតំណាងឯកឧត្តមបណ្ឌិត ស៊ុំ ម៉ាប់ អគ្គនាយកអាជ្ញាធរជាតិអប្សរា នៅប្រាសាទអង្គរវត្ត។ វគ្គបណ្តុះបណ្តាលនេះបានរៀបចំឡើងតាំងពីថ្ងៃទី១៣ ខែធ្នូ ដល់ថ្ងៃទី១៧ ខែធ្នូ ឆ្នាំ២០១៦ រវាងអាជា្ញធរជាតិអប្សរា និងក្រុមគ្រូពេទ្យជំនាញThe CPR HERO Training Center មកពីសហរដ្ឋអាមេរិក ។

ថ្លែងក្នុងឱកាសបិទវគ្គបណ្តុះបណ្តាលនោះលោក ហុក ប៉េងសែ បានលើកឡើងថា វគ្គបណ្តុះបណ្តាលនេះពិតជាមានសារៈសំខាន់ខ្លាំងណាស់សម្រាប់សិក្ខាកាម ព្រោះចំណេះដឹងនេះមិនត្រឹមតែអាចជួយភ្ញៀវទេសចរបានប៉ុណ្ណោះទេ ប៉ុន្តែថែមទាំងអាចជួយបងប្អូនសាច់ញាតិ និងអ្នកស្រុកអ្នកភូមិរបស់ពួកគាត់បានទៀត  ផង។ លោកសង្ឃឹមថា សិក្ខាកាមទាំងអស់ដែលបានចូលរួមវគ្គបណ្តុះបណ្តាលនេះរួចហើយនឹងយកចំណេះដឹងនេះទៅអនុវត្តឲ្យមានប្រសិទ្ធភាពដើម្បីធ្វើឱ្យប្រសើរឡើងនូវសេវាកម្មទេសចរណ៍ក្នុងតំបន់អង្គរ នឹងជួយអប់រំបន្តដល់អ្នកផ្សេងទៀត។ ជាមួយគ្នានោះដែរ លោកក៏បានអរគុណចំពោះក្រុមគ្រូពេទ្យមកពីសហរដ្ឋអាមេរិកដែលបានខំប្រឹងចំណាយកម្លាំងកាយចិត្ត និងពេលវេលាដ៏មានតម្លៃមកជួយបណ្តុះបណ្តាលសិក្ខាកាមកម្ពុជា។

លោក MICHAEL QUOCMINH PHAM ប្រធានក្រុមការងារ The CPR HERO Training Center នឹងជាអ្នកបណ្តុះបណ្តាលផ្ទាល់បានលើកឡើងថា លោកពិតជាមានភាពសប្បាយរីករាយខ្លាំងណាស់ នៅពេលបានឃើញសិក្ខាកាមរៀនរហ័សយល់នឹងខិតខំយកចិត្តទុកដាក់រៀន ព្រមទាំងចូលរួមអនុវត្តទ្រឹស្តីយ៉ាងសស្រាក់សស្រាំ   ។    ថ្វីដ្បិតវគ្គបណ្តុះបណ្តាលនេះនិយាយជាភាសាអង់គ្លេស នឹងមានសម្រួលជាភាសាខ្មែរខ្លះៗក្តី ក៏ប៉ុន្តែគុណភាពនៃការសិក្សានេះមានលក្ខណៈស្តង់ដារដូចជាការសិក្សានៅសហរដ្ឋអាមេរិកដែរ។ លោកក៏បានអរគុណចំពោះអាជ្ញាធរជាតិអប្សរា ដែលបានផ្តល់ឱកាសឱ្យក្រុមគ្រូពេទ្យរបស់លោកបានផ្ទេរចំណេះដឹង នឹងដកស្រង់បទពិសោធន៍ពីកម្ពុជា។

លោក សេ សូវ នគរបាលការពារបេតិកភណ្ឌបានលើកឡើងថា លោកពិតជាសប្បាយរីករាយណាស់ ដែលបានចូលរួមរៀនវគ្គបណ្តុះបណ្តាលជំនាញបច្ចេកទេសសង្គ្រោះបឋមដ៏មានសារៈសំខាន់ និងមានតម្លៃនេះ ។ វគ្គបណ្តុះបណ្តាលនេះ បានផ្តល់នូវចំណេះដឹង និងបទពិសោធន៍ថ្មីៗជាច្រើនដល់លោក ហើយលោកប្តេជ្ញាថានឹងយកមេរៀននេះទៅអនុវត្ត នឹងជួយផ្សព្វផ្សាយដល់អ្នកដទៃទៀត ដើម្បីពង្រឹងគុណភាពសេវាកម្មទេសចរណ៍ក្នុងតំបន់អង្គរឱ្យកាន់តែល្អប្រសើរឡើងថែមទៀត ។ លោកសូមអរគុណចំពោះថ្នាក់ដឹកនាំអាជ្ញាធរជាតិអប្សរាដែលបានផ្តល់ឱកាសឱ្យរូបលោកបានចូលរួមវគ្គបណ្តុះបណ្តាលជំនាញបច្ចេកទេសសង្រ្គោះបឋមនេះ។

សូមបញ្ជាក់ថា បន្ទាប់ពីបញ្ចប់វគ្គបណ្តុះបណ្តាលជំនាញបច្ចេកទេសសង្រ្គោះបឋមនេះហើយ នៅថ្ងៃទី១៩ ខែធ្នូ ឆ្នាំ២០១៦ ក្រុមគ្រូពេទ្យនេះនឹងចុះទៅពិនិត្យសុខភាពជូនប្រជាពលរដ្ឋប្រមាណជា១០០នាក់នៅភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប មុននឹងវិលត្រឡប់ទៅសហរដ្ឋអាមេរិកវិញ៕

សំឡេងប្រជាជន ៖ គណបក្សសង្គ្រោះជាតិ យកលុយដែលជាញើសឈាមរបស់ប្រជាជនទៅណាអស់ហើយ?

(ភ្នំពេញ) ៖ នៅឆ្នាំ២០១៥ គណបក្សសង្គ្រោះជាតិ បានប្រកូកប្រកាសរៃអង្គាសលុយពីប្រជាជន សុំផង ប្រកាសលក់ភាគហ៊ុនផង ដើម្បីប្រមូលលុយតាមគ្រប់រូបភាព និងតាមគ្រប់មធ្យោបាយថា ដើម្បីយកទៅធ្វើទូរទស្សន៍។

២ឆ្នាំបានកន្លងផុតទៅហើយ! តើលុយដែលជាញើសរបស់ឈាមប្រជាជន នៅទីណា? តើ លុយ នៅសល់ប៉ុន្មាន? ហើយ ឯណាទូរទស្សន៍ដែលថា នឹងកើតក្នុងឆ្នាំ២០១៦?

តាមរយៈគម្រោងធ្វើទូរទស្សន៍នេះ ពិតជាអាចឆ្លុះបញ្ចាំងយ៉ាងច្បាស់ពី អសមត្ថភាពរបស់លោក សម រង្សីុ ផងនិងភាពកំសោយរបស់គណបក្សសង្គ្រោះជាតិផង។ ពូកែណាស់លើការរិះគន់កម្ទេច! តែដល់សាច់ការដែលជាការទទួលខុសត្រូវរបស់ខ្លួនឯងវិញ គឺមិន ផេះ ទេ។

បើគ្រាន់តែទូរទស្សន៍មួយ ចាត់ចែងមិនច្បាស់លាស់ និងធ្វើមិនចេញជាសាច់ការអ្វីផង តើមានសមត្ថភាពអ្វី នឹងស្រម័យទៅដឹកនាំកិច្ចការជាតិរាប់ជំពូក? សូមកំុយកលេសថា គេលើករឿងនេះមកវាយប្រហារ ប៉ុន្តែនេះវាបង្ហាញអំពីភាពអសមត្ថភាពរបស់ សង្គ្រោះជាតិ ដែលសូម្បីតែការចាត់ចែងការងារតូចមួយមិនកើតផងនោះ។

បក្សសង្គ្រោះជាតិ រួមទាំងទណ្ឌិត សម រង្សីុ និង លោក កឹម សុខា ផង គួរទទួលស្គាល់ថា ខ្លួនគ្មានសមត្ថភាពចាត់ចែង គ្មានធនធានមនុស្ស ហើយក៏ត្រូវតែហ៊ានបង្ហាញភាពខ្មាសអៀនក្នុងជីវិតជាចំហរថា ការងារទូរទស្សន៍តូចមួយនេះ គឺបរាជ័យហើយ?

ប្រជាជនកម្ពុជា ក៏មានការវិនិច្ឆ័យរួចហើយដែរថា សមត្ថភាពនិងការដឹកនាំ គឺគេវាយតម្លៃលើលទ្ធផលជាក់ស្តែង មិនមែននៅលើលេស ការសន្យាខ្យល់ និងការដោះសារនោះទេ។ តើមេដឹកនាំ សង្គ្រោះជាតិ ជានិមិត្តរូបនៃមនុស្សបោកប្រាស់ និងចោលម្សៀតគ្មានបានការ?

សូមកុំភ្លេច! ដើម្បីកុំឲ្យមានកម្មពារវេរាឆ្លងទៅជាតិក្រោយ ហើយបើធ្វើទូរទស្សន៍មិនកើត ត្រូវតែសងលុយដែលជាញើសឈាមឲ្យមកប្រជាជនវិញឲ្យគ្រប់ចំនួន ៕

ដោយ ៖ សេនាជាតិ

ផ្ទះ ២០​ខ្នង ត្រូវ​បានប្រគល់​ជូន​អតីតយុ​ទ្ធជន​ក្នុងខេត្តតា​កែវ កំពត និងកំពង់​ស្ពឺ ឆ្នាំ២០​១៦​នេះ

កំពង់ស្ពឺ៖  សមាគមអតីតយុទ្ធជនកម្ពុជា ដែលមានលោក ហ៊ុន សែន ជាប្រធានបានផ្តល់ផ្ទះសរុប ២០ ខ្នងជូនអតីតយុទ្ធជននៅក្នុងខេត្តតាកែវ កំពត និងកំពង់ស្ពឺ បន្ទាប់ពីរកឃើញថា ពួកគាត់មានជីវភាពខ្វះខាត និងគ្មានផ្ទះសម្បែងស្នាក់នៅ នៅក្នុងឆ្នាំ២០១៦នេះ ។

របាយការណ៍បានបញ្ជាក់ថា «តាមរយៈដំណើរចុះសួរសុខទុក្ខដោយផ្ទាល់ពីលោក គន់ គីម បានធ្វើឲ្យអតីតយុទ្ធជនមានភាពកក់ក្តៅ ហើយមិនធ្វើឲ្យបងប្អូនអតីតយុទ្ធជនមានអារម្មណ៍ថា ពួកគេឯកោនោះឡើយ ឬមានអារម្មណ៍ថា ពួកគេត្រូវបានគេបំភ្លេចចោលតទៅទៀត»។

របាយការណ៍បានបញ្ជាក់ទៀតថា តាមដំណើរចុះសួរសុខទុក្ខរបស់នាយឧត្តមសេនីយ៍ គន់ គីម ដឹងកាន់តែច្បាស់ពីសុខទុក្ខ និងផលលំបាក របស់អតីតយុទ្ធជន ហើយក៏បានជួយដោះស្រាយទុក្ខលំបាករបស់អតីតយុទ្ធជនបានច្រើនថែមទៀតផង។ បើតាមរបាយការណ៍សមាគម អតីតយុទ្ធជន បានជួយសាងសង់ផ្ទះជូនអតីតយុទ្ធជនគ្មានលំនៅឋានចំនួន ២០ខ្នងជួនអតីតយុទ្ធជនគ្មានលំនៅឋាននៅក្នុងខេត្តតាកែវ កំពង់ស្ពឺ និងកំពត។ ក្នុងនោះខេត្តកំពតសាងសង់ជូនអតីតយុទ្ធជន ១៣ខ្នង ខេត្តតាកែវសាងសង់ជូន ៣ខ្នង និងខេត្តកំពង់ស្ពឺ សាងសង់ជូន ៤ខ្នង។

របាយការណ៍ បានបញ្ជាក់ថា ការបើកផ្តល់មរណសង្រ្គោះជូនគ្រួសារសព មិនមានការយឺតយ៉ាវ ឬ ជំពាក់ប្រាក់សព ដូចមុនទៀតឡើយ។ ជាមួយនោះ សមាគម បានផ្តល់ថវិកាបំរុងឲ្យសមាគមខេត្ត៣ ( កំពង់ស្ពឺ តាកែវ កំពត ) ប្រមាណពី ២០ ទៅ ៤០ លានរៀលសម្រាប់ ត្រៀមដោះស្រាយបើកផ្តល់ជូនគ្រួសារសពឲ្យទាន់ពេលវេលា ករណីមានអតីតយុទ្ធជនមរណភាពលើសពីថវិកាកំណត់។

ទោះបីលទ្ធផលការងារក្នុងឆ្នាំ២០១៦ទទួលបានលទ្ធផលល្អយ៉ាងណាក្តី នៅក្នុងកិច្ចប្រជុំរសៀលថ្ងៃទី១៥ ខែធ្នូ លោក គន់ គីម អគ្គលេខាធិការសមាគមអតីតយុទ្ធជនកម្ពុជា បន្តណែនាំឱ្យថ្នាក់ដឹកនាំសមាគមគ្រប់ថ្នាក់ ពង្រឹងសកម្មភាព សមាគមឲ្យបានជាប់ជាប្រចាំ ពិសេសបន្តការចុះសួរសុខទុក្ខអតីតយុទ្ធជនតាមគ្រួសារនីមួយៗ ដើម្បីស្វែងយល់ពីស្ថានភាពជីវភាព សុខភាព និងជួយអន្តរាគមន៍ ដោះស្រាយទុក្ខកង្វល់របស់អតីតយុទ្ធជន។

លោក គន់ គីម ក៏បានណែនាំមេឃុំ និងប្រធានប៉ុស្តិ៍រដ្ឋបាល ជាប្រធានសាខា ឃុំ ត្រូវបន្តធ្វើអំពើល្អ ហើយខិតខំសហការ និង បង្កលទ្ធភាពឲ្យអតីតយុទ្ធជន បានទទួលសេវាសាធារណៈផ្សេងៗ ហើយក៏ត្រូវចុះពិនិត្យ និងវាយតម្លៃអតីតយុទ្ធជន និងគ្រួសារ ដែលក្រីក្រ ទ័លលំបាកពិតប្រាកដ ហើយរៀបចំបញ្ជីត្រឹមត្រូវ បញ្ជូនទៅអគ្គលេខាធិការដ្ឋាន ដើម្បីស្នើសុំសម្តេចតេជោ ផ្តល់ជាផ្ទះស្នាក់នៅ ឬ ផ្តល់ដីសម្បទានសង្គមកិច្ចជូនដល់អតីតយុទ្ធជន៕

លោក ហ៊ុន សែន បូជាកម្លាំងកាយ កម្លាំងចិត្តបម្រើជាតិ មាតុភូមិដោយមិនគិតពីការនឿយហត់

(ភ្នំពេញ)៖ នៅថ្ងៃទី១៦ ខែធ្នូ ឆ្នាំ២០១៦នេះ នៅក្នុងទំព័រហ្វេសប៊ុករបស់លោកនាយករដ្ឋមន្រ្តី ហ៊ុន សែន បានបង្ហោះនូវសារមួយចំនួនដោយបញ្ជាក់ពីការខិតខំប្រឹងប្រែងរបស់រូបលោកក្នុងការបំពេញកិច្ចការងារបម្រើជាតិមាតុភូមិអស់រយៈពេលជាង៣០ឆ្នាំកន្លងមកនេះ។

លោកនាយករដ្ឋមន្រ្តី ហ៊ុន សែន បានសរសេរថា «ជាង ៣០ ឆ្នាំមកនេះ សម្តេចតេជោ ហ៊ុន សែន បានខិតខំបម្រើប្រជាពលរដ្ឋទាំងយប់ថ្ងៃ ដោយគ្មានគិតពីការនឿយហត់ឡើយ ព្រោះសុខទុក្ខរបស់ពលរដ្ឋ គឺជាសុខទុក្ខរបស់ សម្តេចតេជោផ្ទាល់។ ពេលនេះប្រជាពលរដ្ឋបាន រស់នៅយ៉ាងសុខសាន្តក្រោមម្លប់សន្តិភាព ហើយប្រទេសជាតិយើង ក៏កំពុងរីកចម្រើនជាបន្តបន្ទាប់ ក្រោមស្នាដៃដឹកនាំដ៏ពូកែវៃឆ្លាតរបស់សម្តេចតេជោ ហ៊ុន សែន ។សូមជូនពរបងប្អូនប្រជាពលរដ្ឋជួបតែសេចក្តីសុខ ជោគជ័យ និងសំណាងល្អគ្រប់ៗគ្នា»។

គួរបញ្ជាក់ផងដែរថា ចាប់តាំងពីរំដោះប្រទេសកម្ពុជា ចេញពីរបបប្រល័យពូជសាសន៍រួចមក លោកនាយករដ្ឋមន្រ្តី ហ៊ុន សែន បានលះបង់គ្រប់បែបយ៉ាង រួមទាំងជីវិតលោកផ្ទាល់ ដើម្បីនាំមកនូវការផ្លាស់ប្តូរមុខមាត់ជាតិ នាំមកនូវសុខសន្តិភាព និងការអភិវឌ្ឍរហូតមក ដល់សព្វថ្ងៃ ក្រោមនយោបាយឈ្នះ ឈ្នះ ក្នុងការបង្រួបបង្រួមជាតិ៕

សេចក្តីស្រឡាញ់ គឺជារបស់ដែលយើងម្នាក់ៗអាចផ្តល់ឱ្យគ្នា ជាពិសេសសេចក្តីស្រឡាញ់ដោយមិនរើសអើងជាមួយបងប្អូនកូនក្មួយពិការ

(ភ្នំពេញ)៖ ខាងលើនេះជាខ្លឹមសារដែលបានបង្ហោះនៅក្នុងទំព័រហ្វេសប៊ុករបស់លោកនាយករដ្ឋមន្រ្តី ហ៊ុន សែន កាលពីយប់ថ្ងៃទី១៥ ខែធ្នូ ឆ្នាំ២០១៦ វេលាម៉ោង ២០ និង២៩នាទី ដែលជាសារមួយដ៏មានអត្ថន័យប្រកបដោយគុណធម៌ជ្រាលជ្រៅ ដែលលោកផ្ញើជូនជនរួមជាតិ ជាពិសេសជនពិការកម្ពុជា ដែលបានបញ្ជាក់ពីទឹកចិត្តស្រឡាញ់រាប់អានដ៏ស្មោះចំពោះជនពិការគ្រប់រូប។

នៅក្នុងទំព័រហ្វេសប៊ុករបស់លោកបានបង្ហោះខ្លឹមសារទាំងស្រុងថា៖ «សេចក្តីស្រឡាញ់ គឺជារបស់ដែលយើងម្នាក់ៗអាចផ្តល់អោយគ្នាទៅវិញទៅមកបានគ្រប់ពេលទាំងអស់ ជាពិសេសសេចក្តីស្រឡាញ់ដោយមិនរើសអើងជាមួយបងប្អូនកូនក្មួយពិការ។ ព្រោះគ្មាននរណា ម្នាក់ចង់ក្លាយខ្លួនជាជនពិការឡើយ។ អរគុណជនរួមជាតិដែលបានផ្តល់ក្តីស្រឡាញ់ និងកម្លាំងចិត្តដល់ជនពិការដោយគ្មានការរើសអើង»។
គួររម្លឹកដែរថា ចំពោះកម្ពុជា គឺដោយសារសង្រ្គាម និងរបបវិនាសកម្មប៉ុលពត បានបន្សល់ទុកនូវស្រ្តីមេម៉ាយ កុមារកំព្រា និងជនពិការយ៉ាងច្រើន។ រាជរដ្ឋាភិបាលកម្ពុជា បានយកចិត្តទុកដាក់ផ្តល់កម្មសិទ្ធិដីធ្លី និងផ្ទះសម្បែងដើម្បីជួយជនពិការ និងក្រុមគ្រួសារបានទទួលសេវាសង្គមដូចៗគ្នាដោយគ្មានការរើសអើង។
គួរបញ្ជាក់ផងដែរថា ដើម្បីសម្រួលដល់ជីវភាពជនពិការ លោក ហ៊ុន សែន ក៏បានសម្រេចផ្តល់ទីតាំងរមណីយដ្ឋាន ”វត្តភ្នំ” ដែលមានសន្តិសុខល្អសម្រាប់ក្រុមពិការមានឱកាសសម្តែងសិល្បៈនៅក្នុងរាជធានីភ្នំពេញផងដែរ៕