(សូមទស្សនាវីដេអូ) ទស្សនៈមិត្តអ្នកអាន៖ ពាលស៊ីពាល

(សូមទស្សនាវីដេអូ)៖ លោក យ៉ែម បុញ្ញឫទ្ធិ និងកញ្ញា កឹម មនោវិទ្យា លើកឡើងថា សន្និសីទសម្រេចឱ្យ សម រង្ស៊ី ធ្វើជាប្រធានស្តីទី អតីតគណបក្សសង្រ្គោះជាតិ ជាការធ្វើបក្សប្រហារ

គណៈមេធាវី ព្រមានចាត់វិធានការចំពោះលោក ហ៊ាង ឫទ្ធី ដែលបន្លំខ្លួនធ្វើជាមេធាវី

លោក សួន វិសាល ប្រធានគណៈមេធាវី បានបញ្ជាក់ប្រាប់បណ្តាញព័ត៌មាន Fresh News នៅព្រឹកថ្ងៃទី១៥ ខែវិច្ឆិកា ឆ្នាំ២០១៨នេះថា គណៈមេធាវី កំពុងពិនិត្យលទ្ធភាពដើម្បីចាត់វិធានការលើ លោក ហ៊ាង ឫទ្ធី ដែលបានបន្លំខ្លួនជាមេធាវី។ ប្រតិកម្មរបស់គណៈមេធាវី បានធ្វើឡើងបន្ទាប់ពី លោក ហ៊ាង ឫទ្ធី អតីតប្រធានគណបក្សសំបុកឃ្មុំ បានប្រើប្រាស់តួនាទីជាមេធាវី នៅលើប្រព័ន្ធផ្សព្វផ្សាយ ខណៈដែលលោកមិនមែនជាមេធាវី ដែលមានឈ្មោះ នៅក្នុងបញ្ជីគណៈមេធាវីនោះឡើយ។

លោក សួន វិសាល បានអះអាងថា លោក ហ៊ាង ឫទ្ធី អាចកំពុងធ្វើខុសនឹងច្បាប់បើសិនរកឃើញថា លោកក្លែងបន្លំជាមេធាវី។ លោកអះអាងថា ជនដែលក្លែងបន្លំជាមេធាវីអាចរកការពិន័យ និងខុសនឹងច្បាប់ព្រហ្មទណ្ឌរបស់ព្រះរាជាណាចក្រកម្ពុជាផងដែរ។ លោកបញ្ជាក់ថា មេធាវីដែលស្របច្បាប់ម្នាក់ លុះត្រាតែឆ្លងកាត់ការប្រឡង និងការពិនិត្យលក្ខណៈសម្បត្តិពីក្រុមប្រឹក្សាមេធាវី ហើយឈ្មោះរបស់គាត់ត្រូវបញ្ចូលទៅក្នុងបញ្ជីគណៈមេធាវី។

សូមបញ្ជាក់ថា ប្រតិកម្មរបស់គណៈមេធាវី ចំពោះលោក ហ៊ាង ឫទ្ធីនេះ ក៏បានធ្វើឡើងបន្ទាប់ពីវិទ្យុអាស៊ីសេរី នៅយប់ថ្ងៃទី១៣ ខែវិច្ឆិកា ឆ្នាំ២០១៨ បានហៅ លោក ហ៊ាង ឫទ្ធី ថាជា «បណ្ឌិតមេធាវី ហ៊ាង ឫទ្ធី» ផងដែរ។

លោក គឹម សន្តិភាព អ្នកនាំពាក្យក្រសួងយុត្តិធម៌ នៅថ្ងៃទី១៤ ខែវិច្ឆិកា ឆ្នាំ២០១៨នេះ បានចេ​ញមកប្រដៅ អ្នកច្បាប់ម្នាក់ឈ្មោះ ហ៊ាង ឫទ្ធី ដែលមិនយល់ច្បាស់អំពីច្បាប់ពាក់ព័ន្ធនឹងនីតិវិធីតុលាការក្នុងការដាក់ជនត្រូវចោទឱ្យស្ថិតនៅក្រោមការត្រួតពិនិត្យតាមផ្លូវតុលាការ។ លោក គឹម សន្តិភាព បានលើកឡើងយ៉ាងដូច្នេះថា៖ «បើសូម្បីតែខ្លឹមសារនៃមាត្រា២២៣ នៃក្រមនីតិវិធីព្រហ្មទណ្ឌកំណត់អំពីអំណាចរបស់ចៅក្រមស៊ើបសួរ ក្នុងការសម្រេចដាក់ឱ្យជនត្រូវចោទស្ថិតក្រោមការត្រួតពិនិត្យតាមផ្លូវតុលាការ សរសេរច្បាស់លាស់បែបនេះហើយ ក៏លោក ហ៊ាង ប្ញទ្ធី មើលមិនទាំងយល់ផង រីឯរវាងរបបឃុំខ្លួន និងរបបដាក់ក្រោមការត្រួតពិនិត្យតាមផ្លូវតុលាការ ក៏លោកចែកមិនដាច់ផងនោះ គឺបង្ហាញច្បាស់ថា លោកបណ្ឌិតពិតជាពុំទាន់មានសមត្ថភាពក្នុងការវិភាគរឿងផ្សេងទៀតឡើយ !»។ ប្រតិកម្មអ្នកនាំពាក្យក្រសួងយុត្តិធម៌ បានធ្វើឡើងបន្ទា​ប់ពីលោក​ ហ៊ាង ឫទ្ធី តាមរយៈកិច្ចសម្ភាសជាមួយ វិទ្យុអាស៊ីសេរី បានរិះគន់ចំ​ពោះ​ចំណាត់ការតុលាការ ក្នុងការដាក់ លោក កឹម សុខា ឱ្យស្ថិតនៅក្រោមការត្រួតពិនិត្យតាមផ្លូវតុលាការដែលធ្វើឱ្យលោកហាក់ជាប់ឃុំនៅក្នុងផ្ទះ៕

នាយករដ្ឋមន្រ្តីសិង្ហបុរី រៀបចំ​ពិធី​លៀងសាយភោជន៍​ជាមហាកិត្តិយសដ៏ខ្ពង់ខ្ពស់បំផុតជូនបណ្តាមេដឹកនាំអាស៊ាន​

នៅរាត្រីថ្ងៃទី១៤​ ខែវិច្ឆិកា​ ឆ្នាំ​២០១៨ លោក លី ស៊ានឡុង នាយករដ្ឋមន្រ្តីសិង្ហបុរី និងជាប្រធានកិច្ចប្រជុំកំពូល អាស៊ានលើកទី៣៣ និងលោកស្រី បានប្រារព្ធពិធីលៀងសាយភោជន៍ជាមហាកិត្តិយសដ៏ខ្ពង់ខ្ពស់បំផុត ថ្វាយនិងជូនប្រមុខរដ្ឋ ប្រមុខរដ្ឋាភិបាលនៃប្រទេសអាស៊ាន និងប្រទេសជាដៃគូទាំងអស់របស់អាស៊ាន ព្រមទាំងរដ្ឋមន្រ្តីអាស៊ាន និងគណៈប្រតិភូទាំងអស់ ដែលមានវត្តមានអញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនានា នៅសាធារណរដ្ឋសិង្ហបុរី។

លោក លី ស៊ានឡុង នាយករដ្ឋមន្រ្តីសិង្ហបុរី ប្រធានកិច្ចប្រជុំកំពូលអាស៊ានលើកទី៣៣ មានប្រសាសន៍ថា យើងបានចំណាយពេលវេលាដ៏យូរ ក្នុងការរួមគ្នាកសាងសហគមន៍អាស៊ានមួយកាលពីឆ្នាំ២០១៥ ហើយសម្រាប់អនាគតទៅមុខយើងនឹងខិតខំរួមគ្នាបន្តទៀត យើងនឹងបន្តខិតខំរួមគ្នាបន្ថែមទៀត ក្នុងការដោះស្រាយនូវរាល់បញ្ហាប្រឈមនានា ដើម្បីអនាគតដ៏រុងរឿងរបស់តំបន់ ពិសេសដើម្បីប្រជាពលរដ្ឋរបស់យើងទាំងអស់គ្នា។

លោក​ លី​ ស៊ានឡុង​ បានមានប្រសាសន៍បន្តទៀតថា ក្រោមប្រធានបទ ការកសាងនវានុវត្តន៍ និងភាពរឹងមាំរបស់អាស៊ាន យើងនឹងបន្តធ្វើការពិភាក្សារបស់យើងឲ្យកាន់តែស៊ីជម្រៅថែមទៀត នៅព្រឹកថ្ងៃទី២៨មេសា ដើម្បីបម្រើប្រយោជន៍តំបន់​ និងប្រជាជននៃយើងទាំងអស់គ្នា។ បណ្តាមេដឹកនាំទាំងអស់ ក៏បានតាមដានទស្សនានូវរបាំចម្រៀង របស់ក្រុមសិល្បៈមហាជន របស់ប្រទេសសិង្ហបុរីផងដែរ។

លោក លី ស៊ានឡុង ក៏បានថ្លែងទៅកាន់បណ្តាមេដឹកនាំទាំងអស់ ដែលមានវត្តមានក្នុងពិធីលៀង សាយភោជន៍ជាមហាកិត្តិយសនោះថា លោកពិតជាមានការសប្បាយរីករាយខ្លាំងណាស់ ដែលសិង្ហបុរីសម្រេចបាននូវសមិទ្ធផលដ៏ធំធេង ក្នុងរយៈពេល១ឆ្នាំកន្លងមក ក្នុងនាមជាប្រធាន អាស៊ានប្តូរវេន។ លោកក៏បានប្រសិទ្ធពរជ័យបវរមហាប្រសើរជូនបណ្តាមេដឹកនាំទាំងអស់ ទទួលបាននូវភាពជោគជ័យខ្ពង់ខ្ពស់ថែមទៀត ក្នុងបុព្វហេតុនៃការបម្រើប្រទេស​ និងប្រជាជនទាំងអស់ ទាំងនៅក្នុងតំបន់​ និងក្រៅតំបន់ ៕

លោកនាយករដ្ឋមន្ត្រី ហ៊ុន សែន អញ្ជើញចូលរួមកិច្ចប្រជុំកំពូលអាស៊ាន-ជប៉ុនលើកទី២០

នៅរសៀលថ្ងៃទី ១៤ ខែវិច្ឆិកា ឆ្នាំ២០១៨ ប្រមុខរដ្ឋ/ប្រមុខរដ្ឋាភិបាលនៃប្រទេសអាស៊ាន បានយាង​ និងអញ្ជើញចូលរួម ក្នុងពិធីបើកកិច្ចប្រជុំកំពូលអាស៊ាន-ជប៉ុនលើកទី២១ ជាមួយលោក ស៊ិនហ្សូ អាបេ នាយករដ្ឋមន្រ្តីជប៉ុន។ ប្រមុខរដ្ឋ/ប្រមុខរដ្ឋាភិបាល នៃប្រទេសអាស៊ានទាំងអស់ បានសំដែងនូវការតស្វាគមន៍យ៉ាងកក់ក្តៅចំពោះ លោក ស៊ិនហ្សូ អាបេ នាយករដ្ឋមន្រ្តីជប៉ុន ក្នុងកិច្ចប្រជុំកំពូលអាស៊ាន-ជប៉ុនលើកទី២១ ដ៏មានសារសំខាន់នេះ។

ប្រមុខរដ្ឋ/ប្រមុខរដ្ឋាភិបាល នៃប្រទេសអាស៊ានទាំងអស់ បានសំដែងនូវសេចក្តីសោមនស្សរីករាយយ៉ាងខ្លាំង ដែលបាន ឃើញកិច្ចសហប្រតិបត្តិការអាស៊ាន-ជប៉ុន មានវឌ្ឍនភាពគួរឲ្យកត់សំគាល់ក្នុងរយៈ​ពេល៤៥ ឆ្នាំកន្លងមក។

ក្នុងស្មារតីនេះមេដឹកនាំអាស៊ានទាំងអស់ បានស្វាគមន៍ និងគាំទ្រចំពោះការចេញ ផ្សាយសេចក្តីប្រកាសរួម ស្តីពីកិច្ចប្រជុំកំពូលអាស៊ាន-ជប៉ុនលើកទី២១ ដើម្បីអបអរសាទរខួប លើកទី៤៥ នៃមិត្តភាពនិងកិច្ចសហប្រតិបត្តិការអាស៊ាន-ជប៉ុន។

ជាមួយគ្នានេះមេដឹកនាំអាស៊ាន ក៏បានគាំទ្រនូវការបន្តធ្វើការយ៉ាងជិតស្និទ្ធរវាងសមាជិកអាស៊ាន និងជប៉ុន ដើម្បីអនុវត្តការកែសម្រួល ផែនការអនុវត្តចក្ខុវិស័យស្តីពីមិត្តភាព និងកិច្ចសហប្រតិបត្តិការអាស៊ាន-ជប៉ុន ដែល ត្រូវបានអនុម័តកាលពីខែសីហាឆ្នាំ២០១៧ ឲ្យបានពេញ លេញ និងប្រកបដោយប្រសិទ្ធភាពសំដៅ ពង្រឹង​ និងពង្រីកកិច្ចសហប្រតិបត្តិការ និងភាពជាដៃគូយុទ្ធសាស្រ្តរវាងអាស៊ាន និងជប៉ុន ឲ្យកាន់តែស៊ីជម្រៅថែមទៀត។

នៅក្នុងកិច្ចប្រជុំកំពូលនោះដែរ មេដឹកនាំអាស៊ាន និងជប៉ុន បានសំដែងនូវការរីករាយដោយបានឃើញកំណើន នៃទំហំពាណិជ្ជកម្មអាស៊ាន-ជប៉ុន មានទឹកប្រាក់ រហូតដល់ ២១៧,៩ប៊ីលានដុល្លាអាមេរិក ក្នុងឆ្នាំ២០១៧។ ការណ៍នេះបានបញ្ជាក់ឲ្យឃើញយ៉ាងច្បាស់ថា ជប៉ុននៅតែជាដៃគូសេដ្ឋកិច្ចដ៏សំខាន់របស់អាស៊ាន។

ដូចគ្នា និងបណ្តាមេដឹកនាំអាស៊ានដទៃ​ទៀតនោះដែរ លោកនាយករដ្ឋមន្រ្តី ហ៊ុន សែន មានប្រសាសន៍ថា ក្នុងស្មារតីនៃការបង្កើនទំហំ ក៏ដូចជាពង្រីកវិសាលភាពនៃពាណិជ្ជកម្មអាស៊ាន ជប៉ុន កម្ពុជាសូមស្វាគមន៍ការចុះហត្ថលេខាលើពិធី​សារទី១ ដើម្បីធ្វើវិសោធនកម្មកិច្ចព្រម​ព្រៀង ស្តីពីភាពជាដៃគូសេដ្ឋកិច្ចទូលំ ទូលាយរវាងអាស៊ាន និងជប៉ុន។

លើសពីនោះទៅទៀត កម្ពុជាសូមវាយ​តម្លៃខ្ពស់ ចំពោះការរួមចំណែកដ៏សំខាន់របស់ជប៉ុន ក្នុងការកសាង សហគមន៍អាស៊ាន និងការធ្វើសមាហរណកម្មអាស៊ាន តាមរយៈមូលនិធិជប៉ុនសម្រាប់សមាហរណកម្មអាស៊ាន ក៏ដូចជាក្នុងការបន្តគាំទ្រដល់ការអនុវត្ត ផែនការមេតភ្ជាប់អាស៊ាន ២០២៥ និងផែនការការងារទី៣ នៃគំនិតផ្តួចផ្តើមសម្រាប់សមាហរណកម្មអាស៊ាន២០១៦-២០២០ ដើម្បីកាត់បន្ថយគម្លាត់អភិវឌ្ឍន៍ក្នុងតំបន់ ជាពិសេសការគាំទ្រដល់ការកសាងធនធានមនុស្សរបស់អាស៊ាន និងការលើកកម្ពស់ទំនា​ក់ទំនងរវាងប្រជាជន និងប្រជាជន។

ក្នុងកិច្ចប្រជុំនោះដែរ មេដឹកនាំអាស៊ាន ក៏បានកោតសរសើរចំពោះការគាំទ្ររបស់ ជប៉ុន ដល់មជ្ឈភាពអាស៊ាន និងបានកត់ សំគាល់នូវយុទ្ធសាស្រ្តឥណ្ឌូប៉ាស៊ីហ្វីក បើកទូលាយ និងចំហរបស់ជប៉ុន ព្រម ទាំងបានលើកទឹកចិត្តឲ្យបន្តកិច្ចសន្ទនា ដើម្បីបង្កើតការយោគយល់ឲ្យកាន់តែប្រសើរឡើង។

នៅក្នុងកិច្ចប្រជុំកំពូលអាស៊ាន ជប៉ុន លើកទី២១នោះដែរ មេដឹកនាំនៃប្រទេសអាស៊ាន ជប៉ុន បានឯកភាពគ្នា ក្នុងការឈានទៅចេញសេចក្តីប្រកាសរបស់ ប្រធានកិច្ចប្រជុំកំពូលអាស៊ាន ជប៉ុន លើកទី២១។ សេចក្តីប្រកាសរួមកិច្ចប្រជុំកំពូលអាស៊ាន ជប៉ុន លើកទី២១ ដើម្បីអបអរសាទរខួបអនុស្សាវរីយ៍៤៥ឆ្នាំ នៃមិត្តភាព និងកិច្ចសហប្រតិបត្តិការអាស៊ាន ជប៉ុន។ របាយការណ៍សង្ខេប ស្តីពីវឌ្ឍនភាពនៃការអនុវត្ត សេចក្តីថ្លែងការចក្ខុវិស័យ អំពីមិត្តភាព និងកិច្ចសហប្រតិបត្តិការអាស៊ាន ជប៉ុន និងពិធីសារទី១ នៃកិច្ចព្រមព្រៀងស្តីពីភាពជាដៃគូសេដ្ឋ កិច្ចទូលំទូលាយរវាងអាស៊ាន និងជប៉ុន៕

ការបង្កើតតំបន់ពាណិជ្ជកម្មសេរីទូលំទូលាយ​មានសារសំខាន់ណាស់ ក្នុងការធ្វើឲ្យសេដ្ឋកិច្ចតំបន់អាស៊ី ក្លាយជាប៉ូលសេដ្ឋកិច្ចស្នូល

នៅរសៀលថ្ងៃទី១៤​ ខែវិច្ឆិកា​ ឆ្នាំ​២០១៨​ ប្រមុខរដ្ឋ/ប្រមុខរដ្ឋាភិបាលនៃប្រទេសអាស៊ាន បានយាងនិងអញ្ជើញចូល រួមកិច្ចប្រជុំកំពូលស្តីពីភាពជាដៃគូសេដ្ឋកិច្ចតំបន់ទូលំទូលាយលើកទី២ ដែលមានការអញ្ជើញចូលរួមពីបណ្តាមេដឹកនាំ នៃប្រទេសអាស៊ី និងអឺរ៉ុបជាច្រើនរូប។

ប្រមុខរដ្ឋ/ប្រមុខរដ្ឋាភិបាលនៃប្រទេសអាស៊ាន បានធ្វើការអបអរសាទរដល់បណ្តារដ្ឋមន្រ្តី នៃប្រទេស ជាដៃគូសេដ្ឋកិច្ចទូលំទូលាយ ដែលសម្រេចបាននូវលទ្ធផលជាដុំកំភួន ក្នុងការឈានទៅបង្កើត តំបន់ពាណិជ្ជកម្មសេរីដ៏ធំនៅក្នុងតំបន់អាស៊ី ក៏ដូចជានៅលើពិភពលោក។

មេដឹកនាំទាំងអស់ក៏បានចាត់ទុកដែរថា ការប្រែប្រួលភូមិសាស្រ្តនយោបាយ និងសេដ្ឋកិច្ចពិភពលោក ការបង្កើតតំបន់ពាណិជ្ជកម្មសេរីទូលំទូលាយនេះ ពិតជាមានសារសំខាន់ខ្លាំងណាស់ ក្នុងការធ្វើឲ្យសេដ្ឋកិច្ចក្នុងតំបន់អាស៊ី ក្លាយទៅជាប៉ូលសេដ្ឋកិច្ចស្នូល ជួយរក្សាស្ថិរភាពនយោបាយ និងស្ថិរភាពសេដ្ឋកិច្ច សកលលោក ព្រមទាំងអាចជួយទប់ស្កាត់នូវនយោបាយគាំពារនិយម និងការរីករាលដាលនៃសង្រ្គាមពាណិជ្ជកម្ម។

ថ្លែងទៅកាន់មេដឹកនាំនៃប្រទេសជាដៃគូសេដ្ឋកិច្ចទូលំទូលាយ លោកនាយករដ្ឋមន្រ្តី ហ៊ុន សែន មានប្រសាសន៍ថា ថ្វីត្បិតកម្ពុជាជាប្រទេសអភិវឌ្ឍន៍តិចតួច កម្ពុជាសូមជំរុញឲ្យក្រុមអ្នកចរចាខិតខំពុះ ពារនូវឧបសគ្គតាមវិស័យនីមួយៗ ឲ្យបញ្ចប់ការចរចាតាមអាណត្តិដែលផ្តល់ ដោយថ្នាក់ដឹកនាំនៃប្រទេស សេដ្ឋកិច្ចទូលំទូលាយ ទោះជាកម្ពុជាត្រូវធ្វើការកែទម្រង់លិខិតបទដ្ឋាន មួយចំនួន និងត្រូវផ្តល់នូវការ សម្របសម្រួលជាច្រើន ជាមួយបណ្តាប្រទេសដៃគូដ៏ទៃទៀត ក៏ដោយ។​ កម្ពុជានៅតែរក្សាជំហរ និងឯកភាពជាមួយថ្នាក់ដឹកនាំនៃប្រទេសសេដ្ឋកិច្ចទូលំទូលាយ ទាំងអស់ថា កិច្ចព្រមព្រៀង នៃប្រទេសសេដ្ឋកិច្ចទូលំទូលាយ ត្រូវតែជាកិច្ចព្រមព្រៀងដែលមាន លក្ខណៈទំនើប គ្រប់ជ្រុងជ្រោយ មានគុណភាពខ្ពស់ និងផ្តល់ផលប្រយោជន៍ឲ្យគ្រប់សមាជិកទាំងអស់ ទោះបីជាផលប្រយោជន៍នោះមិនទទួលបានចំណែកស្មើៗគ្នា ដោយសារភាពខុសគ្នានៃទំហំ និងស្ថានភាពសេដ្ឋកិច្ច ព្រមទាំងដោយសារកម្រិតនៃសមត្ថភាពប្រកួតប្រជែងមិនដូចគ្នាក៏ដោយ។

មេដឹកនាំទាំងអស់ ដែលមានវត្តមានអញ្ជើញចូលរួមក្នុង កិច្ចប្រជុំកំពូលស្តីពីភាពជាដៃគូសេដ្ឋកិច្ច តំបន់ទូលំទូលាយ បានឯកភាពគ្នាឈានទៅចេញសេចក្តីប្រកាសរបស់ប្រធានកិច្ចប្រជុំ និងរបាយការណ៍ រដ្ឋមន្រ្តីកិច្ចប្រជុំថ្នាក់ដឹកនាំ នៃភាពជាដៃគូសេដ្ឋកិច្ចទូលំទូលាយក្នុងតំបន់ ៕

កម្ពុជាគាំទ្រចំពោះសំណើររបស់រុស្សី ក្នុងការតម្លើងទំនាក់ទំនងដៃគូសន្ទនា អាស៊ាន-រុស្សី ឲ្យទៅជាដៃគូសន្ទនាយុទ្ធសាស្រ្ត

នៅរសៀលថ្ងៃទី១៤​ ខែវិច្ឆិកា​ ឆ្នាំ​២០១៨​ ប្រមុខរដ្ឋ/ប្រមុខរដ្ឋាភិបាលនៃប្រទេសអាស៊ាន បានយាងនិងអញ្ជើញ ចូលរួម ក្នុងពិធីបើកកិច្ចប្រជុំកំពូលអាស៊ាន-រុស្សីលើកទី៣ ជាមួយលោក វ៉្លាឌីមៀ ពូទីន ប្រធានាធិបតីនៃសហព័ន្ធរុស្ស៉ី។

ប្រមុខរដ្ឋ/ប្រមុខរដ្ឋាភិបាល នៃប្រទេសអាស៊ានទាំងអស់ បានសំដែងនូវការស្វាគមន៍យ៉ាងកក់ក្តៅចំពោះ លោក វ៉្លាឌីមៀ ពូទីន ប្រធានាធិបតីនៃសហព័ន្ធរុស្សី ក្នុងកិច្ចប្រជុំកំពូលអាស៊ាន-រុស្ស៊ី​លើកទី៣ ដ៏មានសារសំខាន់នេះ។ បណ្តាមេដឹកនាំអាស៊ានបានចាត់ទុកថា វត្តមានរបស់លោកប្រធានាធិបតី រុស្ស៊ី​ មិនត្រឹមតែឆ្លុះបញ្ចាំងពីការយកចិត្តទុកដាក់យ៉ាងខ្លាំងរបស់រុស្ស៉ី ចំពោះទំនាក់ទំនង អាស៊ាន-រុស្សី ប៉ុណ្ណោះទេ ប៉ុន្តែបានរិតចំណងទាក់ទងនេះ ឲ្យកាន់តែស្អិតរមួត​ និងស៊ីជំរៅថែមទៀត។

ថ្លែងបទអន្តរាគមន៍ទៅកាន់បណ្តាមេដឹកនាំអាស៊ាន រុស្សី លោកនាយករដ្ឋមន្រ្តី ហ៊ុន សែន មានប្រសាសន៍ថា លោកសូមវាយតម្លៃខ្ពស់ចំពោះវឌ្ឍនភាពគួរឲ្យកត់សំគាល់ នៃកិច្ចសហប្រតិបត្តិការ អាស៊ាន-រុស្សី ជាពិសេសបន្ទាប់ពីការរៀបចំដោយជោគជ័យ នូវកិច្ចប្រជុំកំពូលរំលឹកខួបអនុស្សាវរីយ៍ អាស៊ាន-រុស្សី កាលពីឆ្នាំ២០១៦ នៅទីក្រុងសូឈី សហព័ន្ធរុស្សី។ សុន្ទរកថារបស់លោកនាយករដ្ឋមន្រ្តី ក៏បានជំរុញភាគីទាំងពីរខិតខំបន្ថែមទៀត ដើម្បីសម្រេចបានតាមផែនការសកម្មភាពគ្រប់ជ្រុងជ្រោយ អាស៊ាន-រុស្សី ឆ្នាំ២០១៦-២០២០ ដើម្បីបង្កើនល្បឿន​ និងជំរុញ កិច្ចសហប្រតិបត្តិការទ្វេភាគី ឲ្យកាន់តែស៊ីជម្រៅថែមទៀត។

លោកនាយករដ្ឋមន្រ្តី​ ហ៊ុន​ សែន​ បានមានប្រសាសន៍ថា កម្ពុជាយល់ឃើញថាគួររៀបចំឲ្យមាននូវ កិច្ចប្រជុំកំពូលរវាងថ្នាក់ដឹកនាំអាស៊ាន និងរុស្សី ឲ្យបានទៀងទាត់ដើម្បីពង្រឹង​ និងពង្រីកកិច្ចសហប្រតិបត្តិការ អាស៊ាន-រុស្សី ឲ្យកាន់តែស៊ីជំរៅ។ ក្នុងស្មារតីនេះ​ កម្ពុជាគាំទ្រចំពោះសំណើររបស់រុស្សី ក្នុងការតម្លើង ទំនាក់ទំនងដៃគូសន្ទនា អាស៊ាន-រុស្សី ឲ្យទៅជាដៃគូសន្ទនាយុទ្ធសាស្រ្ត។ ជាមួយ​ និងភាពមិនប្រាកដប្រជា ពីឥទ្ធិពលនៃ សង្រ្គាមពាណិជ្ជកម្ម ក៏ដូចជាការចចារកិច្ចព្រមព្រៀងពាណិជ្ជកម្មសេរីរបស់អាស៊ានមួយចំនួន បានឈានដល់ជិតទីបញ្ចប់នោះ កម្ពុជាយល់ឃើញថា ការសិក្សាសមិទ្ធលទ្ធផលរួមនៃតំបន់ពាណិជ្ជកម្ម សេរីគ្រប់ជ្រុងជ្រោយរវាងអាស៊ាន និងសហភាពអីរ៉ាស៊ី គួរត្រូវបានចាប់ផ្តើម និងជំរុញបញ្ចប់ឲ្យបានឆាប់ តាមដែលអាចធ្វើទៅបាន។

នៅក្នុងកិច្ចប្រជុំកំពូលអាស៊ាន-រុស្សីលើកទី៣ នេះដែរ មេដឹកនាំអាស៊ាន​ និងរុស្សី បានឯកភាពគ្នាឈាន ទៅចេញសេចក្តីប្រកាសរបស់ ប្រធានកិច្ចប្រជុំកំពូលអាស៊ាន-រុស្សីលើកទី៣។ សេចក្តីប្រកាសរបស់ថ្នាក់ដឹកនាំអាស៊ាន រុស្សី ស្តីពីកិច្ចសហប្រតិបត្តិការ ក្នុងវិស័យសន្តិសុខព័ត៌មាន ទំនាក់ទំនង​ និងបច្ចេកវិទ្យា និងក្នុងការប្រើប្រាស់បច្ចេកវិទ្យាព័ត៌មាន និងទំនាក់ទំនង។ សេចក្តីប្រកាសរួមរបស់ថ្នាក់ដឹកនាំអាស៊ាន រុស្សី ឆ្លុះ បញ្ចាំងអំពីវឌ្ឍនភាព ក្នុងការអនុវត្តសេចក្តីថ្លែងការណ៍ ទីក្រុងសូឈី ឆ្នាំ២០១៦ និងផែនការសកម្មភាពទូលំទូលាយរវាងអាស៊ាន និងសហព័ន្ធរុស្សី ឆ្នាំ២០១៦-២០២០។

អនុស្សារណៈ នៃការយោគយល់គ្នារវាងសហគមន៍ប្រជាជាតិអាស៊ីអាគ្នេយ៍ និងរដ្ឋាភិបាលនៃសហព័ណ្ធរុស្សី ស្តីពីកិច្ចសហប្រតិបត្តិការក្នុងវិស័យគ្រប់គ្រងគ្រោះមហន្តរាយ។ អនុស្សារណៈនៃការយោគយល់គ្នា រវាងសហគមន៍ប្រជាជាតិអាស៊ីអាគ្នេយ៍ និងគណៈកម្មការសេដ្ឋកិច្ចអាស៊ី អឺរ៉ុប (អឺរ៉ាស៊ី-Eurasain) ស្តីពីកិច្ចសហប្រតិបត្តិការសេដ្ឋកិច្ច។ បន្ទាប់មកបណ្តាមេដឹកនាំអាស៊ាន និងអឺរ៉ុប បានយាងនិងអញ្ជើញជា សាក្សី នៃពិធីចុះហត្ថលេខាលើអនុស្សារណៈយោគយល់គ្នា រវាងគណៈកម្មការសេដ្ឋកិច្ចអឺរ៉ុប-អាស៊ី និងអាស៊ាន ស្តីពីសហប្រតិបត្តិការសេដ្ឋកិច្ច ដែលចុះហត្ថលេខាដោយអគ្គលេខាធិការអាស៊ាន និងអគ្គលេខាធិការនៃ គណៈកម្មការសេដ្ឋកិច្ចអឺរ៉ុប-អាស៊ី ៕