កែប៖ នៅថ្ងៃទី២៧ ខែតុលា ឆ្នាំ២០២០ លោក សោម ពិសិដ្ឋ អភិបាលខេត្តកែប បានអញ្ជេីញជាអធិបតីភាពក្នុងពិធីផ្សព្វផ្សាយនិងផ្តល់ប័ណ្ណសរសេីរមេត្រីភាពបរិស្ថាន ដល់វិស័យឯកជនក្នុងខេត្ត។
ពិធីផ្សព្វផ្សាយនេះក៏មានការចូលរួមពីតំណាងក្រសួងបរិស្ថាន អភិបាលរងខេត្ត ប្រធាន អនុប្រធានមន្ទីរអង្គភាពជុំវិញខេត្ត ក្រុងស្រុក យុវជនគ្រប់ប្រភេទ នៅសាលប្រជុំធំសាលាខេត្តកែប។
ការផ្តល់រង្វាន់លើកទឹកចិត្តមេត្រីភាពបរិស្ថានដល់រូបវន្តបុគ្គល និងនីតិបុគ្គលនាឱកាសនេះ គឺជាគោលនយោបាយមួយរបស់រាជរដ្ឋាភិបាល ដេីម្បីលេីកទឹកចិត្ត ក្នុងការថែរក្សាបរិស្ថាន តាមរយៈការទុកដាក់ និងប្រេីប្រាស់សំរាមបានត្រឹមត្រូវ ។
រូបវន្តបុគ្គល និងនីតិបុគ្គល គ្រឹះស្ថានសិក្សា សាលារៀន សាកលវិទ្យាល័យ រដ្ឋបាលសាលាខេត្ត សហគមន៍តំបន់ការពារធម្មជាតិ វត្តអារាម……ដែលបានចូលរួម និងមានស្នាដៃល្អក្នុងការអនុវត្តសកម្មភាពប្រតិបត្តិមេត្រីភាពបរិស្ថាន បានប្រតិបត្តិមេត្រីភាពបរិស្ថាន ក្នុងការចូលរួមកិច្ចគាំពារបរិស្ថាន ការអភិរក្សជីវៈចម្រុះ និងការរស់នៅប្រកបដោយចីរភាព នឹងទទួលបានប័ណ្ណសរសេីរមេត្រីភាពបរិស្ថាន តាមរយៈការវាយតម្លៃដោយគណកម្មការវាយតម្លៃ។
លោក សោម ពិសិដ្ឋ បានចាត់ទុកថា នេះជាចលនាការចូលរួមប្រតិបត្តិមេត្រីភាពបរិស្ថាន និងការលើកទឹកចិត្ត ជាការលើកទឹកចិត្តក្នុងការចូលរួមចំណែកថែក្សា និងគាំពារបរិស្ថាន ក្រសួងបរិស្ថាន និងរដ្ឋបាលខេត្តកែប ក៏បានរៀបចំឱ្យមានយន្តការ និងនីតិវិធីក្នុងការផ្តល់រង្វាន់លើកទឹកចិត្តមេត្រីភាពបរិស្ថានដល់រូបវន្តបុគ្គលនិងនីតិបុគ្គលដែលបានប្រតិបត្តិមេត្រីបរិស្ថាន និងជាគំរូល្អដល់វិស័យសាធារណៈ វិស័យឯកជន សង្គមស៊ីវិល។
លោកបានបញ្ចាក់ដែរថា នៅក្នុងផែនការសកម្មភាពបន្ត រដ្ឋបាលខេត្ត ដោយមានការគាំទ្របច្ចេកទេស ពីក្រសួងបរិស្ថាន បានដាក់ចេញនូវស្តង់ដារមេត្រីភាពបរិស្ថានសម្រាប់ជាមធ្យបាយក្នុងការផ្តល់រង្វាន់និងការលើកទឹកចិត្តមេត្រីភាពបរិស្ថានដល់រូបវន្តបុគ្គល និងនីតិបុគ្គល ជាពិសេសវិស័យឯកជនដែលមានស្នាដៃល្អក្នុងការរួមចំណែកថែរក្សាគុណភាពបរិស្ថាន។
ក្នុងនោះ លោកនៅតែក្រេីនរំលឹកថា បញ្ហាកូវីដ១៩ នៅតែមិនទាន់រលត់ពីផែនដីនៅឡេីយទេ ទោះបីកម្ពុជាយេីងមិនមានឆ្លងរីករាលដាលក្នុងសហគមន៍ក៏ដោយ សូមអោយបងប្អូនត្រូវមានអនាម័យ រក្សាគម្លាតសង្គម គោរតាមការណែនាំរបស់ក្រសួងសុខាភិបាល៕
No comments:
Post a Comment