លោកនាយករដ្ឋមន្រ្តី ហ៊ុន សែន នឹងអញ្ជើញជាអធិបតីក្នុងពិធីបុណ្យទន្លេលើកទី៦នៅខេត្តបាត់ដំបង

លោកនាយករដ្ឋមន្រ្តី ហ៊ុន សែន បានថ្លែងថា នៅក្នុងឱកាសនៃពិធីបុណ្យទន្លេលើកទី៦នៅខេត្តបាត់ដំបងលោកនឹងអញ្ជើញចូលរួមវិញដោយសារមូលហេតុកិច្ចប្រជុំកំពូលអាស៊ាន-សហរដ្ឋអាមេរិកត្រូវបានប្រកាសពន្យារពេលដោយលោកប្រធានាធិបតី ដូណាល់ ត្រាំ។ លោកបានថ្លែងដូចនេះនៅព្រឹកថ្ងៃចន្ទទី២ ខែមីនា ឆ្នាំ២០២០ ក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រជូននិស្សិតសាកលវិទ្យាល័យអាស៊ីអឺរ៉ុបចំនួន ១,៥៨៩នាក់ ក្នុងនោះនារី ៦១៦នាក់ នៅវិទ្យាស្ថានជាតិអប់រំ រាជធានីភ្នំពេញ។

លោកនាយករដ្ឋមន្រ្តី ហ៊ុន សែន បានបញ្ជាក់ថា កាលពីមុនលោកធ្លាប់ចាត់តាំងលោកឧបនាយករដ្ឋមន្រ្តី ស ខេង ធ្វើជាតំណាងឱ្យចូលរួមជាអធិបតីប៉ុន្តែដោយសារការប្រកាសពន្យារពេលកិច្ចប្រជុំអាស៊ាន-សហរដ្ឋអាមេរិកលោកត្រូវអញ្ជើញទៅចូលរួមវិញ។

គួរបញ្ជាក់ថា ពិធីបុណ្យទន្លេលើកទី៦ ឆ្នាំ២០២០នេះ នឹងត្រូវធ្វើឡើងនៅខេត្តបាត់ដំបងក្រោមប្រធានបទ «ទន្លេនៃសន្តិសុខ ទន្លេនៃវិបុលភាព» ដែលនឹងប្រព្រឹត្តទៅចាប់ពីថ្ងៃ១៣-១៥ ខែមីនា ឆ្នាំ២០២០៕