នៅថ្ងៃទី១០ ខែមករា ឆ្នាំ២០២០ វេលាម៉ោង៨ព្រឹក នៅមូលដ្ឋានទ័ពអាកាស ស្ថិតនៅក្នុងអាកាសយានដ្ឋានអន្តរជាតិភ្នំពេញ មានរៀបចំនូវពីធីធ្វើលំហាត់សមយុទ្ធទ្រង់ទ្រាយធំ ស្ដីពី “សន្តិសុខ” ក្រោមអធិបតីភាពរបស់ លោកឧបនាយករដ្ឋមន្ត្រីប្រចាំការ ប៊ិន ឈិន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងជាប្រធានគណៈកម្មាធិការជាតិសន្តិសុខអាកាសចរស៊ីវិល និង លោកទេសរដ្ឋមន្ត្រី ឱម យ៉ិនទៀង អនុប្រធានគណៈកម្មាធិការជាតិសន្តិសុខអាកាសចរស៊ីវិល លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល និងជាអនុប្រធានប្រចាំការនៃគណៈកម្មាធិការជាតិសន្តិសុខអាកាសចរស៊ីវិល ព្រមទាំងមានការចូលរួមពីសំណាក់ លោក លោកស្រី ដែលជាសមាជិក សមាជិកានៃគណៈកម្មាធិការសម្រាប់សម្របសម្រួលការងាររៀបចំលំហាត់សមយុទ្ធ និងជួយសង្គ្រោះបន្ទាន់ពេលមានឧបទ្ទវហេតុធ្លាក់យន្តហោះនៅក្នុងនិងក្បែរអាកាសយានដ្ឋានអន្តរជាតិនៃព្រះរាជាណាចក្រកម្ពុជា។
ក្រោមម៌ាគាដ៏ត្រឹមត្រូវរបស់រាជរដ្ឋាភិបាលដឹកនាំដោយគណបក្សប្រជាជនកម្ពុជា អស់រយៈពេលជាង ៤ទស្សវត្សរ៍កន្លងមកនេះ បានធ្វើឱ្យប្រទេសកម្ពុជាមានការរីកចម្រើនលូតលាស់យ៉ាងឆាប់រហ័សលើគ្រប់វិស័យ។ ផ្ដើមចេញពីកត្តាសន្តិភាពពេញលេញដែលបានកសាងយ៉ាងលំបាកដោយ លោកនាយករដ្ឋមន្រ្ដី ហ៊ុន សែន គឺជាមូលដ្ឋានគ្រឹះដ៏រឹងមាំនិងសំខាន់បំផុតក្នុងការអភិវឌ្ឍសេដ្ឋកិច្ចនិងសង្គមនៅកម្ពុជា។ ជាមួយគ្នានេះ តាមរយៈការអនុវត្តនូវយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល នីតិកាលទី៦នៃរដ្ឋសភា កម្ពុជាបាននិងកំពុងកសាងនូវមូលដ្ឋានដើម្បីឈានឆ្ពោះទៅសម្រេចបាននូវចក្ខុវិស័យកម្ពុជាឆ្នាំ២០៥០ ដោយនឹងក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍន៍នៅឆ្នាំ២០៥០ ខាងមុខនេះ។
បច្ចុប្បន្ន អាកាសយានដ្ឋានអន្តរជាតិទាំង៣របស់កម្ពុជា ដែលរួមមានអាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិសៀមរាប និងអាកាសយានដ្ឋានអន្តរជាតិខេត្តព្រះសីហនុ ដែលជាច្រកទ្វារអន្តរជាតិ បាននិងកំពុងដើរតួនាទីយ៉ាងសំខាន់ក្នុងការលើកកម្ពស់កិត្យានុភាពរបស់កម្ពុជាលើឆាកអន្តរជាតិ ក៏ដូចជាការធ្វើសមាហរណកម្មកម្ពុជាទៅក្នុងតំបន់និងពិភពលោក ព្រមទាំងបានដើរតួនាទីយ៉ាងសំខាន់ក្នុងការរួមចំណែកដល់ការអភិវឌ្ឍនិងជំរុញកំណើនសេដ្ឋកិច្ចជាតិ។ ជាក់ស្ដែងថ្មីៗនេះ អាកាសយានដ្ឋានអន្តរជាតិភ្នំពេញ បានទទួលនូវជ័យលាភីជាអាកាសយានដ្ឋានល្អបំផុតទាក់ទងនឹងកំណើនអ្នកដំណើរប្រកបដោយចីរភាពក្នុងតំបន់អាស៊ីប៉ាស៊ីហ្វិក សម្រាប់ឆ្នាំ២០១៩។
ស្របតាមស្មារតីនៃលិខិតបទដ្ឋានគតិយុត្តជាធរមាន ជាអាទិ៍ច្បាប់ស្ដីពីសន្តិសុខអាកាសចរស៊ីវិលនៃព្រះរាជាណាចក្រកម្ពុជា អនុក្រឹត្យស្ដីពីការគ្រប់គ្រងអាកាសយានដ្ឋានអន្តរជាតិ បទបញ្ជារបស់រាជរដ្ឋាភិបាលស្ដីពីការពង្រឹងសន្តិសុខនិងសុវត្ថិភាពនៅតាមអាកាសយានដ្ឋានអន្តរជាតិនៃព្រះរាជាណាចក្រកម្ពុជា និងជាពិសេសសារាចរណែនាំរបស់រាជរដ្ឋាភិបាល លេខ០៣ សរណន. ចុះថ្ងៃទី២២ ខែមិថុនា ឆ្នាំ២០១១ ស្ដីពីការគ្រប់គ្រងគ្រោះអាសន្ននៅក្នុងនិងក្បែរអាកាសយានដ្ឋាននៃព្រះរាជាណាចក្រកម្ពុជា តម្រូវឱ្យមានការធ្វើលំហាត់សមយុទ្ធជាប្រចាំ ក្នុងគោលបំណងធានាសន្តិសុខនិងសុវត្ថិភាពនៃប្រតិបត្តិការអាកាសចរស៊ីវិល សណ្ដាប់ធ្នាប់សាធារណៈ និងសុខុមាលភាពជូនអ្នកដំណើរជាតិនិងអន្តរជាតិ ពិសេសដើម្បីបង្ការនិងត្រៀមខ្លួនរួចជាស្រេចក្នុងការឆ្លើយតបជាបន្ទាន់ចំពោះគ្រោះអាសន្ននានាដែលអាចកើតមានជាយថាហេតុនៅក្នុងនិងនៅក្បែរអាកាសយានដ្ឋាន សំដៅកាត់បន្ថយផលប៉ះពាល់លើអាយុជីវិតមនុស្ស អ្នកដំណើរ ឋបណីយភណ្ឌអាកាសយានដ្ឋាន និងប្រតិបត្តិករក្រុមហ៊ុនអាកាសចរណ៍នៅក្នុងព្រះរាជាណាចក្រកម្ពុជា។ ការធ្វើលំហាត់សមយុទ្ធទ្រង់ទ្រាយធំរបស់អាកាសចរស៊ីវិល ត្រូវបានកំណត់ឱ្យធ្វើនៅក្នុងនិងជុំវិញបរិវេណអាកាសយានដ្ឋានអន្តរជាតិ និងត្រូវអនុវត្តជាទៀងទាត់រៀងរាល់២ឆ្នាំម្ដងចំពោះសមយុទ្ធទ្រង់ទ្រាយធំ ១ឆ្នាំម្ដងសម្រាប់លំហាត់សមយុទ្ធតាមផ្នែក និង៦ខែម្ដងសម្រាប់លំហាត់សមយុទ្ធដែលបង្ហាញលើតុ។
លំហាត់សមយុទ្ធទ្រង់ទ្រាយធំ ដែលប្រព្រឹត្តទៅនៅអាកាសយានដ្ឋានអន្តរជាតិភ្នំពេញ នៅឆ្នាំ២០២០នេះ គឺជាលើកទីមួយដែលផ្ដោតលើប្រធានបទ “សន្តិសុខ” ដែលបណ្ដាឆ្នាំកន្លងមកការធ្វើលំហាត់សមយុទ្ធបានផ្ដោតតែលើប្រធានបទស្ដីពី “សុវត្ថិភាព” ក្នុងវិស័យអាកាសចរស៊ិវិលប៉ុណ្ណោះ។ លំហាត់សមយុទ្ធទ្រង់ទ្រាយធំនេះ ត្រូវបានរៀបចំឡើងក្នុងគោលបំណងដើម្បីវាយតម្លៃលើផែនការគ្រប់គ្រងគ្រោះអាសន្ន ត្រួតពិនិត្យទៅលើហេដ្ឋារចនាសម្ព័ន្ធនៅបន្ទប់គ្រប់គ្រងគ្រោះអាសន្ន ក៏ដូចជាត្រួតពិនិត្យលើក្រុមការងារគ្រប់គ្រងពេលមានអាសន្នកើតឡើង ជាអាទិ៍ការដឹកនាំបញ្ជាចាត់ចែង និងការសម្រេចចិត្តក្នុងការជួយសង្គ្រោះជនរងគ្រោះដែលកើតចេញពីឧបទ្ទវហេតុនានាដែលកើតនៅក្នុងនិងនៅក្បែរអាកាសយានដ្ឋានអន្តរជាតិ។ ទន្ទឹមនឹងនេះ ការធ្វើលំហាត់សមយុទ្ធនេះក៏ជាការវាយតម្លៃលើប្រព័ន្ធផ្សព្វផ្សាយជូនសាធារណជនជាតិនិងអន្តរជាតិផងដែរ។
លំហាត់សមយុទ្ធទ្រង់ទ្រាយធំនេះ រួមមាន១២ព្រឹត្តិការណ៍សេណារីយ៉ូ(Scenario) និងមានការចូលរួមពីសំណាក់អង្គភាពអន្តរាគមន៍មកពីខាងក្រៅ រួមមានដូចជា កងពលតូច“ង៧០” កងកម្មង់ដូ៩១១ កងកម្លាំងពិសេសប្រឆាំងភេរវកម្ម និងទ័ពអាកាស ព្រមទាំងកងកម្លាំងមានសមត្ថកិច្ចនិងបុគ្គលិកភា្នក់ងារឯកជនដែលកំពុងបម្រើការក្នុងអាកាសយានដ្ឋានអន្តរជាតិភ្នំពេញផងដែរ។
ការធ្វើលំហាត់សមយុទ្ធទ្រង់ទ្រាយធំ ស្ដីពី “សន្តិសុខ” បានបញ្ចប់ដោយរលូននិងជោគជ័យ នៅវេលាម៉ោង១០និង០០នាទី៕
No comments:
Post a Comment