វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តស្វាយរៀង នៅស្រុករំដួល

ស្វាយរៀង៖ នៅថ្ងៃទី៥ ខែធ្នូ ឆ្នាំ២០១៩ លោក ភិន ឆាំ សមាជិកក្រុមប្រឹក្សាខេត្ត តំណាងលោក ជុំ ហាត ប្រធានក្រុមប្រឹក្សាខេត្ត និងលោក តូច ប៉ូលីវ៉ា អភិបាលរងខេត្តស្វាយរៀង តំណាងលោកអភិបាលខេត្ត បានអញ្ជើញជាអធិបតីក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តស្វាយរៀង នៅស្រុករំដួល ដោយមានការអញ្ជើញចូលរួមពីសមាជិកក្រុមប្រឹក្សាខេត្ត លោក លោកស្រីប្រធាន អនុប្រធានមន្ទីរ អង្គភាព ស្ថាប័ន ពាក់ព័ន្ធនានាជុំវិញខេត្ត លោក លោកស្រីគណៈអភិបាលស្រុករំដួល លោក លោកស្រីក្រុមប្រឹក្សាស្រុករំដួល លោក លោកស្រីមន្រ្តីសាលាខេត្ត សាលាស្រុករំដួល តំណាងកងកម្លាំងទាំង៣ លោក លោកស្រីក្រុមប្រឹក្សាឃុំទាំង១០ លោក លោកស្រីមេភូមិ ទាំង៧៨ ក្នុងស្រុករំដួល បងប្អូនប្រជាការពារ និងបងប្អូនប្រជាពលរដ្ឋសរុបចំនួន ៣៦៩នាក់ ស្រី ៦៧នាក់។

ក្នុងវេទិការនោះដែល លោកអភិបាលរងខេត្ត បានលើកឡើងពីសមិទ្ធិផលនានារបស់ខេត្ត និងបញ្ហាប្រឈមមួយចំនួនដូចជា៖
– បញ្ហាគ្រោះថ្នាក់ចរាចរណ៍ និងការប្រើប្រាស់និងជួញដូរគ្រឿងញៀនខុសច្បាប់នៅតែបន្តកើតមាន
– ការផ្ទេរមុខងារមួយចំនួនមកឱ្យរដ្ឋបាលក្រោមជាតិនៅមិនទាន់បានពេញលេញគឺមានការខ្វះខាតថវិកា ខ្វះធនធានមនុស្ស និងខ្វះលិខិតដ្ឋានបទដ្ឋានគតិយុត្តិគាំទ្រ
– កើតមានគ្រោះមហន្តរាយធម្មជាតិដូចជា ការរាំងស្ងួត ទឹកជំនន់ ខ្យល់កន្ត្រាក់ ដែលធ្វើប៉ះពាល់ដល់ការបង្កបង្កើនផលស្រូវ និងការរស់នៅរបស់បងប្អូនប្រជាពលរដ្ឋ
– ទំនាស់ដីធ្លី ការរំលោភកាន់កាប់ដីព្រែក បឹង អូរ និងដីចំណីថ្នល់នៅតែបន្តកើតមាន។
– ការគ្រប់គ្រងកាកសំណល់នៅតាមទីប្រជុំជន និងនៅតាមរោងចក្រ សហគ្រាសមិនបានអនុវត្តត្រឹមត្រូវតាមលក្ខណៈបច្ចេកទេស និងការចូលរួមនៅមានកម្រិត
– នៅតាមស្រុក-ក្រុង មួយចំនួនមិនទាន់មានទីលានចាក់សំរាម ទៅតាមលក្ខណៈបច្ចេកទេស និងគ្មានក្រុមហ៊ុនប្រមូលសំរាម

ចំណុចដែលគួរអោយកត់សម្គាល់នោះគឺគណៈអធិបតី លោក លោកស្រីប្រធាន អនុប្រធានមន្ទីរ អធិការដ្ឋាននគរបាលស្រុកបានទទួលយកសំណូមពរ និងបញ្ហាប្រឈម ហើយបានដោះស្រាយនៅចំងល់ដែលបងប្អូនប្រជាពលរដ្ឋបានលើកឡើងរួមមាន៖
– កង្វះខាតអគ្គិសនីប្រើប្រាស់តាមភូមិ នៅឃុំសង្កែ ពងទឹក បុសមន ជ្រុងពពេល ថ្នាធ្នុង
– បញ្ហាការបោះចោលសម្រាម គ្មានសណ្ដាប់ធ្នាប់ ពាសវាលពាសកាល និងស្នើអោយមន្ទីរបរិស្ថានជួយរកទីលានសមរម្យដើម្បីចាក់សម្រាម
– ជួយពន្លឿនការជីកប្រឡាយរងចេញពីប្រឡាយមេ កីចក
– ស្នើសុំផ្លូវចូលក្នុងភូមិ និងដាក់លូ
– ការធ្វើអត្តសញ្ញាណបណ្ណមិនទាន់បាន និងនីតិវិធីធ្វើអត្តសញ្ញាណបណ្ណដែលបាត់ ត្រូវរាយការណ៍ ឬដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាលឃុំ
– របៀបរបបសុំដាក់ពាក្យកែតម្រូវសំបុត្រកំណើតដែលមានការខុស៕