ពិធីបើកការដ្ឋានស្តារអូរ ប្រឡាយទឹកកខ្វក់ចំនួន៥ខ្សែ ដើម្បីកែប្រែសោភ័ណ្ឌភាពក្រុងព្រះសីហនុឱ្យល្អប្រសើរ

ព្រះសីហនុ៖ នៅថ្ងៃទី៩ ខែធ្នូ ឆ្នាំ២០១៩នេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ញូន លោក គួច ចំរើន អភិបាល នៃគណ:អភិបាលខេត្តព្រះសីហនុ បានអញ្ជើញជាអធិបតី ក្នុងពិធីបើកការដ្ឋាន ស្តារអូរប្រឡាយទឹកកខ្វក់ ចំនួន៥ខ្សែ នៅក្រុងព្រះសីហនុ ដើម្បីកែប្រែសោភ័ណ្ឌភាពក្រុងអោយល្អប្រសើរ។

លោក គួច ចំរើន អភិបាល នៃគណៈអភិបាលខេត្តព្រះសីហនុ បានលើកឡើងពីផែនការជាយុទ្ធសាស្ត្រដើម្បីធ្វើយ៉ាងណាឲ្យការអនុវត្តន៍បានជោគជ័យ តាមរយៈស្មារតីសាមគ្គីគ្នា ចិត្តគំនិតតែមួយ សកម្មភាពតែមួយ នៅក្នុងទិសដៅដើម្បីសម្រេចបាននូវផែនការប្រកបដោយប្រសិទ្ធភាព និងដំណោះស្រាយល្អសម្រាប់ប្រជាពលរដ្ឋ។

លើសពីនេះ លោក គួច ចំរើន អភិបាលនៃគណៈអភិបាលខេត្តព្រះសីហនុ បានសំណូមពរដល់បងប្អូនប្រជាពលរដ្ឋទាំងអស់ ដែលសង់លំនៅឋានតាមអូរប្រឡាយ ឫដំបន់ដីជាប់ប្រឡាយទាំង៥ ទីតាំង សូមចូលរួមជាមួយអាជ្ញារធរ ក្នុងស្មារតីយោគយល់អធ្យាស្រ័យ ដើម្បីធ្វើយ៉ាងណាឲ្យផែនការនៃការស្តាររអូរប្រឡាយទឹកកខ្វក់ ចំនួន៥ខ្សែ (អូរឈើទាល អូរអេម៉ារីអូ អូរសំអាត អូរអណ្តូងអ៊ុនតាក់ អូរស្ពានឆេះ) នៅក្រុងព្រះសីហនុ ខេត្តព្រះសីហនុ ទទួលបានភាពជោគជ័យ ដើម្បីរំដោះទឹកកខ្វក់ចេញ ពិសេសរំដោះទឹកជំនន់នៅរដូវវស្សាអោយបានទាន់ពេលវេលា ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ញូន បានមានប្រសាសន៍ថា អូរប្រឡាយទឹកកខ្វក់ ចំនួន៥ខ្សែ នៅក្រុងព្រះសីហនុ នឹងត្រូវស្តារឲ្យរួចជាស្ថាពរ ត្រឹមថ្ងៃទី៣០ ខែមីនា ឆ្នាំ២០២០ ដើម្បីធ្វើយ៉ាងណាធានាឲ្យបាននូវការរំដោះទឹកកខ្វក់ចេញពីប្រឡាយទាំងប្រាំ ដើម្បីបរិស្ថានស្អាត។