ទិវាលាងសំអាតដៃ និងទិវាអនាម័យនៅតាមគ្រឹះស្ថានសិក្សាក្នុងសាលាបឋមសិក្សាស្វាយជ្រំ

ស្វាយរៀង៖ នៅថ្ងៃទី៩ ខែធ្នូ ឆ្នាំ២០១៩នេះ លោក សេង សិលា អភិបាលរង តំណាង ម៉ែន វិបុល អភិបាលខេត្តស្វាយរៀង បានអញ្ជើញចូលរួមក្នុងទិវាលាងសំអាតដៃ និងទិវាអនាម័យនៅតាមគ្រឹះស្ថានសិក្សា ស្ថិតនៅសាលាបឋមសិក្សាស្វាយជ្រំ ក្រោមអធិបតីភាពលោកស្រី គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡាតំណាងលោក ហង់ ជូន ណារ៉ុន ។

ពិធីនេះមានការចូលរួមពីលោក លោកស្រី ជាថ្នាក់ដឹកនាំក្រសួង លោក ប្រធានមន្ទីរអប់រំ យុវជន និងកីឡាខេត្តស្វាយរៀង លោក លោកស្រី ប្រធានមន្ទីរអប់រំយុវជន និងកីឡារាជធានី ខេត្តទាំង២៥ លោកអភិបាលស្រុកស្វាយជ្រំ លោក លោកស្រី ប្រធានការិយាល័យអប់រំ យុវជន និងកីឡាក្រុង ស្រុកទាំង៨ នាយក នាយិកាសាលានានាក្នុងស្រុកស្វាយជ្រំ លោកគ្រូ អ្នកគ្រូ សិស្សានុសិស្សសាលាបឋមសិក្សាស្វាយជ្រំ អាជ្ញាធរដែនដី និងមាតាបិតាសិស្ស។

មានប្រសាសន៍ក្នុងឱកាសនោះដែរលោកស្រី បានកោតសរសើរចំពោះថ្នាក់ដឹកនាំមន្ទីរ ការិយាល័យអប់រំ យុវជន និងកីឡាស្រុកស្វាយជ្រំ និងសាលាបឋមសិក្សាស្វាយជ្រំ និងអង្គការយូនីសេហ្វដែលគាំទ្រក្នុងការរៀបចំពិធីនេះ។

លោកស្រី បានផ្តាំផ្ញើប្អូនៗឱ្យលាងសំអាតដៃនឹងសាប៊ូ មុនញុំាអាហារ-ចំណី និងក្រោយពេលចេញពីបង្គន់។ បន្ទាប់មកលោកស្រី បានអញ្ជើញទស្សនាសួនជីវចម្រុះ អាហារដ្ឋាន បណ្ណាល័យសតវត្សទី២១ និងទីធ្លាសាលាផងដែរ៕