អំណោយជាគ្រឿងឧបភោគបរិភោគត្រូវបានផ្តល់ជូនប្រជាពលរដ្ឋជួបការលំបាកចំនួន២០០គ្រួសារ

កំពង់ឆ្នាំង៖ នៅថ្ងៃទី៨ ខែធ្នូ ឆ្នាំ២០១៩ នៅភូមិតាជេស ឃុំតាជេស ស្រុកកំពង់ត្រឡាច ខេត្តកំពង់ឆ្នាំង លោកស្រី មាន សំអាន ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារបណ្ដុះបណ្ដាលវិជ្ជាជីវៈ និងកិច្ចការនារីនៃព្រឹទ្ធសភា លោកស្រី តុង ណារី សមាជិកក្រុមលេខាសម្ដេច និងជាប្រធានប្រតិបត្តិសម្ព័ន្ធយុវជនស្រឡាញ់សន្តិភាព រួមជាមួយប្រតិភូសមាគមមិត្តភាព វៀតណាមតៃនិញ បាននាំយកអំណោយមនុស្សធម៌ចែកជូនដល់ប្រជាពលរដ្ឋដែលមានជីវភាពខ្វះខាតជួបការលំបាកចំនួន ២០០ គ្រួសារ។

ក្នុងឱកាសនោះផងដែរលោកស្រី មាន សំអាន បានផ្តាំផ្ញើដល់បងប្អូនប្រជាពលរដ្ឋសូមថែទាំសុខភាពឱ្យបានល្អ ដោយ រស់នៅស្អាត ហូបស្អាត និងដាំបន្លែបង្ការជុំវិញផ្ទះ សម្រាប់អាហារ ប្រចាំថ្ងៃផងដែរ ជាពិសេសតាមផ្ទះនីមួយ ត្រូវតែមានបង្គន់អនាម័យហើយនៅអំឡុងពេលនេះជារដូវរងារ និងធ្លាក់ខ្យល់ផងនោះ ត្រូវប្រុងប្រយ័ត្នចំពោះភ្លើងចង្រ្កាន ការដុតធូបទៀន ដែលអាចបង្ករជាអគ្គិភ័យដោយយថាហេតុ។

គួបញ្ជាក់ផងដែរថា៖ ក្នុងពីធីសំណេះសំណាល និងចែកអំណោយនោះ គ្រួសារនីមួយៗ ទទួលបានអំណោយរួមមាន៖ ភួយ ១, មី ១កេះ, ទឹកដោះគោ ១កំប៉ុង និង ស្ករស ១ គីឡូ៕