កម្ពុជា រៀបចំសន្និសីទអន្ដរជាតិ ស្ដីពី «ព្រះពុទ្ធសាសនា​នៅអាស៊ីអាគ្នេយ៍»​ ដើម្បីអប់រំពុទ្ធបរិស័ទ​ធ្វើអំពើល្អ​ តាមគន្លង​ព្រះពុទ្ធសាសនា​

នៅថ្ងៃទី០៤ ខែកញ្ញា ឆ្នាំ២០១៨នេះ លោកទេសរដ្ឋមន្ដ្រី ហ៊ឹម ឆែម រដ្ឋមន្ដ្រីក្រសួងធម្មការ និងសាសនា បានអញ្ជើញជាអធិបតីភាព ក្នុងកម្មវិធីសន្និសីទអន្តរជាតិ ស្តីពី «ព្រះពុទ្ឋសាសនានៅអាស៊ីអាគ្នេយ៍» នៅសណ្ឋាគារភ្នំពេញ។ សន្និសីទនេះ ក៏មានការយាង និមន្ត និងអញ្ជើញចូលរួមវាគ្មិន មកពីបណ្តាប្រទេសអាស៊ាន ឥណ្ឌា អាស៊ីខាងត្បូង អាស៊ីបូព៌ា អន្តរភ្ញៀវជាតិ និងភ្ញៀវជាតិជាច្រើនរយអង្គ/នាក់។

ក្នុងពិធីនោះ លោកទេសរដ្ឋមន្ត្រី ហ៊ឹម ឆែម ក៏បានថ្លែងអំណរអរគុណដល់ ពុទ្ធិកសាកលវិទ្យាព្រះសីហនុរាជ និងស្ថានទូតឥណ្ឌាប្រចាំ នៅកម្ពុជា និងក្រុមប្រឹក្សាទំនាក់ទំនងវប្បធម៌ឥណ្ឌា ដែលបានសហការគ្នារៀបចំជាសន្និសីទអន្តរជាតិលើប្រធានបទ «ព្រះពុទ្ឋសាសនានៅអាស៊ីអាគ្នេយ៍» នាពេលនេះ។ លោកបានបន្ថែមទៀតថា កត្តាទាំងអស់នេះអាចប្រព្រឹត្តទៅ និងរៀបចំបានក៏ដោយសារប្រទេសកម្ពុជា គឺជាប្រទេសមួយមានសន្តិភាព ពេញលេញ ដែលជាកត្តានាំឲ្យប្រជាពុទ្ធបរិស័ទមានឱកាសរៀបចំនូវកម្មវិធីនេះឡើង។

ក្នុងន័យនេះ ព្រះពុទ្ធនៅកម្ពុជា ក៏បានតួយ៉ាងសំខាន់ ក្នុងការជួយដល់រាជរដ្ឋាភិបាលកម្ពុជាផងដែរ រួមមាន ការងារសង្គម ការងារមនុស្សធម៌ និងទំនាក់ទំនង រវាងព្រះពុទ្ធសាសនា នានានៅក្នុងតំបន់ និងនៅលើពិភពលោក។ ព្រះពុទ្ធសាសនា បានអប់រំឲ្យពុទ្ធបរិស័ទទាំងអស់ ធ្វើតែអំពើល្អជាកុសល អំពើបុណ្យ និងមិនកាប់សម្លាប់គ្នាឡើយ ហេតុនេះយើងទាំងអស់ដែលកាន់ព្រះពុទ្ធសាសនា ត្រូវតែបន្តថែរក្សា និងប្រតិបត្តិឲ្យកាន់តែប្រសើរឡើងបន្ថែមទៀត៕