វិទ្យាស្ថានជាតិស្រាវជ្រាវណារ៉ាប្រគល់វត្ថុបុរាណដែលបានពីកំណាយស្រាវជ្រាវ និងជួសជុលនៅតំបន់អង្គរជូនអាជ្ញាធរជាតិអប្សរា

នារសៀលថ្ងៃទី២៩ ខែសីហា ឆ្នាំ២០១៨ លោក Hiroshi SUGIYAMA ប្រធានគម្រោងវិទ្យាស្ថានជាតិស្រាវជ្រាវណារ៉ារបស់ប្រទេសជប៉ុន បាននាំយកវត្ថុបុរាណដែលបានពីការធ្វើកំណាយស្រាវជ្រាវនៅឡតានី និងការជួសជុលប្រាសាទតុបខាងលិច មកប្រគល់ជូនអាជ្ញាធរជាតិអប្សរា ដើម្បីរក្សាទុក។ វត្ថុបុរាណទាំងនេះមានបំណែកកុលាលភាជន៍ ដែលបានពីកំណាយស្រាវជ្រាវនៅឡតានី និងបំណែកតូចល្អិតធ្វើពី លោហធាតុដែលសង្ស័យថាជារបស់ដែលគេយកមកធ្វើពិធីបូជាអ្វីមួយនៅប្រាសាទតុបខាងលិច។ វិទ្យាស្ថានស្រាវជ្រាវជាតិណារ៉ា មានសេចក្តីរីករាយ ក្នុងការគោរពទៅតាមច្បាប់បេតិកភណ្ឌនៃប្រទេសកម្ពុជា និងមានមោទន ភាពណាស់ដែលបានចូលរួមចំណែកក្នុងថែរក្សា ការពារ ជួសជុល និងអភិរក្សនូវសំណង់បុរាណក្នុងតំបន់អង្គរព្រមទាំងការស្រាវជ្រាវនៅទីនេះផង។

លោក ហង់ ពៅ អគ្គនាយករងនៃអាជ្ញាធរជាតិអប្សរា ក្នុងពិធីទទួលនូវ វត្ថុទាំងនោះបានកត់សម្គាល់ថា វិទ្យាស្ថានជាតិស្រាជ្រាវណារ៉ា របស់ប្រទេសជប៉ុន គឺជាស្ថាប័នអន្តរជាតិទី១ដែលបានប្រគល់ នូវបុរាណវត្ថុដល់អាជ្ញាធរជាតិអប្សរាក្រោយធ្វើការស្រាវជ្រាវរួចរាល់។

ការប្រគល់វត្ថុបុរាណទាំងនោះមកអាជ្ញាធរជាតិអប្សរានាពេលនេះគឺតបតាមការអំពាវនាវរបស់លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា ដែលលោកស្រី បានអំពាវនាវនាឱកាសជួបប្រជុំជាមួយស្ថាប័នអន្តរជាតិបំពេញភារកិច្ចក្នុងរមណីយដ្ឋានអង្គរឱ្យបញ្ជូនវត្ថុបុរាណនានាដែលប្រទះឃើញក្នុងពេលធ្វើកំណាយស្រាវជ្រាវឬជួសជុលមកអាជ្ញាធរជាតិអប្សរាដើម្បីចុះបញ្ជីសារពើភណ្ឌក្នុងក្របខណ្ឌជាតិនៃក្រសួងវប្បធម៌និងវិចិត្រសិល្បៈ។

លោក ហង់ ពៅ បន្តទៀតថា វត្ថុទាំងនេះនឹងត្រូវរក្សាទុកនៅអាជ្ញាធរជាតិ អប្សរាដើម្បីសិក្សាអំពីប្រវត្តិ ចុះបញ្ជីសារពើភណ្ឌ និងធ្វើការជួសជុល អភិរក្សនូវបុរាណវត្ថុសិល្បៈទាំងនេះឱ្យបានល្អប្រសើរ។ លោកក៏បានថ្លែងអំណរគុណដ៏ជ្រាលជ្រៅចំពោះវិទ្យាស្ថានជាតិស្រាវជ្រាវណារ៉ា ដែលមានកិច្ចសហការដ៏ល្អជាមួយអាជ្ញាធរជាតិអប្សរាជាច្រើនឆ្នាំ លើកិច្ចការអភិរក្សនិងជួសជុលប្រាសាទក្នុងតំបន់អង្គរ ការស្រាវជ្រាវ ការបណ្តុះបណ្តាលធនមនុស្ស និងការផ្តល់ការងារដល់អ្នកជំនាញខ្មែរ ផងដែរ៕