(ភ្នំពេញ)៖ រឿងហ្លួងព្រះស្តេចកនដែលត្រៀមដាក់បញ្ចាំងនៅតាមបណ្ដារោងភាពយន្ដនានានៅកម្ពុជានោះ គឺបានបង្ហាញពីវប្បធម៌ខ្មែរដ៏អស្ចារ្យ ដើម្បីឱ្យកូនចៅ ជំនាន់ក្រោយ គួរយកតម្រាប់តាម និងប្រតិបត្ដិនៅក្នុងសង្គមបច្ចុប្បន្ន។ លោកស្រីម៉ែន សំអន ឧបនាយករដ្ឋមន្ដ្រី រដ្ឋមន្ដ្រីក្រសួងទំនាក់ទំនងជាមួយរដ្ឋសភា ព្រឹទ្ធ សភា និងអធិការកិច្ច តំណាងលោកនាយករដ្ឋមន្រ្តី ហ៊ុន សែន បានថ្លែងបែបនេះ ក្នុងឱកាសអញ្ជើញជាអធិបតីសម្ពោធចាក់បញ្ចាំងខ្សែភាពយន្តរឿង «ហ្លួងព្រះស្តេចកន» របស់ផលិតកម្មត្រីសូល៍ភាពយន្ដខ្មែរ នៅសាលមហោស្រពចតុមុខ នៅរាត្រីថ្ងៃទី១៧ ខែសីហា ឆ្នាំ២០១៧។
លោកស្រី ម៉ែន សំអន បានបញ្ជាក់ថា វណ្ណកម្មភាពយន្តរឿង «ហ្លួងព្រះស្តេចកន» ដែលស្នាដៃនិពន្ធកូនខ្មែរដោយសំរិតសំរាំងដាក់បញ្ចាំង នៅពេលនេះ ដើម្បីបម្រើអារម្មណ៍ទស្សនិកជនផង និងដើម្បីទុកជាឯកសារភាពយន្ដ សម្រាប់ការសិក្សាស្រាវជ្រាវផ្នែកប្រវត្តិសាស្ត្រ។ ប្រជាជនកម្ពុជា បានទទួលនូវមរតកសម្បត្តិសិល្បៈវប្បធម៌ដ៏សម្បូរបែប ទាំងវប្បធម៌រូបី និងអរូបី ហើយការផ្សព្វផ្សាយសម្បត្តិសិល្បៈវប្បធម៌ ទាំងនេះតាមរយៈភាពយន្ត គឺជាមធ្យោបាយដ៏ប្រសើរបំផុតសម្រាប់ ផ្ទេរមរតកដ៏ថ្លៃថ្លានេះទៅឱ្យកូនចៅជំនាន់ក្រោយសម្រាប់ការសិក្សាស្វែងយល់ និងស្គាល់នូវអ្វីដែលជាការពិតនៃប្រវត្តិសាស្រ្ត។
លោកស្រី ម៉ែន សំអន បានបន្ដថា យើងនៅចាំបានថា ក្នុងអំឡុងទសវត្សទី៦០ និងដើមទសវត្សទី៧០ ភាពយន្តខ្មែរមានការរីកចម្រើនគួរឱ្យកត់សម្គាល់ និងបានបង្កឱកាសល្អសម្រាប់កម្ពុជា ធ្វើការផ្លាស់ប្តូរបទពិសោធន៍ល្អៗជាមួយ ប្រទេសនានាក្នុងតំបន់។ ប៉ុន្តែសង្គ្រាមដែលអូសបន្លាយជាងបីទសវត្សបាន បញ្ឈប់ដំណើរការរីកចម្រើនរបស់កម្ពុជា ក្នុងនោះក៏មានវិស័យភាពយន្តផងដែរ ហើយបានបង្កការលំបាកដល់កម្ពុជាក្នុងការកសាង និងអភិវឌ្ឍវិស័យនេះឡើងវិញ។ បច្ចុប្បន្នក្រោមការដឹកនាំរបស់រាជរដ្ឋាភិបាលកម្ពុជា វិស័យភាពយន្តរបស់យើងកំពុងមានការវិវត្តរីកចម្រើនជាលំដាប់ ដែលអាចឆ្លើយតបបានទៅនឹងសេចក្តីត្រូវការនៃទីផ្សារក្នុងស្រុក៕
No comments:
Post a Comment