EU សំឡឹង​មើលទំនាក់​ទំនង​ដ៏រ៉ឹងមាំ​ជាមួយអា​ស៊ាន ដោយ​ហ្វីលីពីន​ជាប្រធាន​

ទោះបីជាមានការអំពាវនាវរបស់ប្រធានាធិបតីលោក Rodrigo Duterte ថា «មិនមានការជ្រៀត ជ្រែក» នៅក្នុងកិច្ចការផ្ទៃក្នុងនៅតំបន់អាស៊ីអាគ្នេយ៍ទេ សហភាពអឺរ៉ុប (EU) កាលពីថ្ងៃចន្ទ បាននិយាយថា ខ្លួនបាននិងកំពុងសំឡឹងមើលដើម្បីពង្រឹងបន្ថែមទៀតនូវទំនាក់ទំនងរបស់ខ្លួនជាមួយអាស៊ាន ជាពិសេសដោយមានហ្វីលីពីន ជាប្រធាននៃកិច្ចប្រជុំកំពូលក្នុងតំបន់នៅឆ្នាំនេះ។

ដោយថ្លែងអំឡុងពេលចាប់ផ្តើមនៃសៀវភៅរំឭករបស់ EU ដែលមានចំណងជើងថា “Ties That Bind” នៅក្នុងទីក្រុង Makati ដែលឯកអគ្គរដ្ឋទូត EU ប្រចាំនៅហ្វីលីពីន លោក Franz Jessen បាននិយាយថា គណៈប្រតិភូ EU ដែលបានប្រារព្ធខួបលើកទី២៥ ឆ្នាំរបស់ខ្លួននៅក្នុងប្រទេសនេះកំពុងតែសម្លឹងមើលដើម្បី «ជំរុញថែមទៀតនូវទំនាក់ទំនងរបស់ខ្លួនជាមួយអាស៊ាន រួមមានទាំង ហ្វីលីពីន ដូចដែលខ្លួនបានព្យាយាមដើម្បីរក្សាតំណែងក្នុងតំបន់ និងសកលរបស់ខ្លួនផងដែរ»។

លោក Jessen បានប្រាប់អ្នកសារព័ត៌មាននៅសណ្ឋាគារ Dusit Thani ថា «ទំនាក់ទំនងរបស់យើងជាមួយហ្វីលីពីនកំពុងដោះស្រាយឡើងវិញជុំវិញទំនាក់ទំនងពីរ គឺទំនាក់ទំនងទ្វេភាគីរបស់យើង និងមួយផ្សេងទៀតនោះ ដែលសំខាន់ខ្លាំងណាស់ គឺទំនាក់ទំនងរវាង EU-អាស៊ាន។ យើងធ្វើការជាមួយនឹងហ្វីលីពីននៅក្នុងតំបន់ទាំងពីឱ្យកាន់តែជិតស្និទ្ធ»។

គាត់បាននិយាយថា «ខ្ញុំមើលឃើញថា EU អាចដើរតួនាទីកាន់តែសំខាន់ថែមទៀត ដោយ សារតែហ្វីលីពីនមានតួនាទីជាប្រធាន ហើយយើងក្រឡេកមើលអាស៊ាន ជាស្ថាប័នសម្ព័ន្ធមិត្តរបស់ យើង។ ដូច្នេះយើងមានការសប្បាយចិត្តខ្លាំងណាស់ ដើម្បីធ្វើការរួមគ្នាជាមួយហ្វីលីពីនក្នុងការជំរុញរបៀបវារៈក្នុងក្របខណ្ឌអាស៊ាន»។

កាលពីថ្ងៃអាទិត្យ ហ្វីលីពីនបានចាប់ផ្តើមដំណើរការជាផ្លូវការជាប្រធានអាស៊ានឆ្នាំ២០១៧ ដោយលោកប្រធានាធិបតី Duterte បានសង្កត់ធ្ងន់ថា «មិនមានការជ្រៀតជ្រែក» ដូចដែលគាត់បានជំរុញឱ្យមហាអំណាចធំៗ កុំឱ្យជ្រៀតជ្រែកកិច្ចការក្នុងតំបន់។ រួមមានអាមេរិក និងអង្គការសហប្រជាជាតិ ដែល EU បានទទួលរងពីការប្រើពាក្យប្រមាថតិះដៀលខ្លាំងរបស់លោក Duterte បន្ទាប់ពីការអំពាវនាវឱ្យបញ្ឈប់ការសម្លាប់ក្រៅប្រព័ន្ធតុលាការនៅក្នុងប្រទេសនេះ ចំពេលដែលសង្រ្គាមរបស់រដ្ឋាភិបាលលើថ្នាំញឿន។

លោក Jessen បាននិយាយថា គណៈប្រតិភូ EU នឹងផ្តោតការគាំទ្រ និងធនធានរបស់ខ្លួនលើផែនការអភិវឌ្ឍរបស់ហ្វីលីពីន ការគាំទ្រសម្រាប់ដំណើរការសន្តិភាពនៅក្នុងទីក្រុង Mindanao ការអនុវត្តន៍កម្មវិធីក្នុងវិស័យតុលាការ ថាមពល និងសុខភាព និងការបញ្ចូលកម្មវិធីថ្មីនៅក្នុងពាណិជ្ជកម្ម ជីវចម្រុះ សង្គមស៊ីវិល និងសិទ្ធិមនុស្ស។

ឯកអគ្គរដ្ឋទូតបានបន្ថែមថា «ពាណិជ្ជកម្មគឺជាវិស័យជាក់ស្តែងមួយដែលឆ្លុះបញ្ចាំងពីការកើន ឡើងរបស់យើង និងទំនាក់ទំនងធ្វើឱ្យកាន់តែស៊ីជម្រៅ។ ពាណិជ្ជកម្មទ្វេភាគីដែលមានតម្លៃ ២,៥ ពាន់លានអឺរ៉ូនៅឆ្នាំ១៩៩០ បានកើនឡើងជិតដល់ ១៣ ពាន់លានអឺរ៉ូនៅឆ្នាំ២០១៥។ EU ក៏បានកើនឡើងនូវការវិនិយោគរបស់ខ្លួននៅក្នុងប្រទេសហ្វីលីពីន និងជាវិនិយោគិនបរទេសធំជាងគេបំផុតនៅក្នុងប្រទេសនេះផងដែរ»៕

ប្រភព : Inquirer ចុះថ្ងៃទី១៦ ខែមករា ឆ្នាំ២០១៧