សម្ដេចវិបុលសេនាភក្ដី សាយ ឈុំ ជួបសំណេះសំណាល និងពិសាអាហារថ្ងៃត្រង់ជាមួយមន្រ្តីចូលនិវត្តន៍ នៃក្រសួងកសិកម្ម រុក្ខាប្រម៉ាញ់ និងនេសាទ

សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា ជួបសំណេះសំណាលនិងពិសាអាហារថ្ងៃត្រង់ជាមួយមន្រ្តីចូលនិវត្តន៍នៃក្រសួងកសិកម្មរុក្ខាប្រម៉ាញ់និងនេសាទ នៅថ្ងៃទី ១៨ ខែសីហា ឆ្នាំ២០១៦។
សម្ដេចភក្ដី បានថ្លែងអំណរគុណដល់មន្ត្រីចូលនិវត្តន៍ទាំងអស់ ដែលបានជួយជ្រោមជ្រែងសម្ដេចឲ្យសម្រេចបាននូវលទ្ធផលការងារជាវិជ្ជមានក្នុងពេលដែលសម្ដេចទទួលតំណែងជារដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទ ពីឆ្នាំ១៩៨៦ ដល់ឆ្នាំ១៩៨៨ ។
សម្ដេចវិបុលសេនាភក្ដី សាយ ឈុំ ក៏បានសំណូមពរឲ្យមន្ត្រីចូលនិវត្តន៍ទាំងអស់ បន្តចូលរួមចំណែកក្នុងការកសាង និងអភិវឌ្ឍន៍វិស័យកសិកម្ម តាមសមត្ថភាព និងលទ្ធភាពរៀងៗខ្លួន សំដៅកសាងកម្ពុជាជាប្រទេសរីកចម្រើននៅក្នុងតំបន់ មានអរិយធម៌ មានសេចក្ដីស្រលាញ់ ហើយមិនមានការកើតឡើងវិញនូវសង្គ្រាម របបប្រល័យពូជសាសន៍ និងការបែកបាក់ផ្ទៃក្នុងជាតិដូចពីអតីតកាលទៀតឡើយ។ ជំនួបនេះ បានប្រព្រឹត្តទៅក្នុងបរិយាកាសសប្បាយរីករាយ និងសាមគ្គីជិតស្និទ្ធ។
នាឱកាសនោះផងដែរ សម្ដេចភក្ដីក៏បានជួប និងថតរូបទុកជាអនុស្សាវរីយ៍ជាមួយអ្នកដឹកនាំ សាស្ត្រាចារ្យ និងនិស្សិតនៃវិទ្យាស្ថានអន្តរជាតិអាស៊ាន ដែលអញ្ជើញមកទស្សនកិច្ច សិក្សានៅព្រឹទ្ធសភា ៕