កម្ពុជាគ្រោងនឹងនាំចេញផលិតផលនានាចូលទៅទីផ្សារប្រទេសចិន

នៅថ្ងៃទី២៩ ខែកុម្ភៈ ឆ្នាំ២០១៦នេះ​រដ្ឋមន្រ្ដីក្រសួងពាណិជ្ជកម្មបានអះអាងថា ក្រសួងពាណិជ្ជកម្មកម្ពុជាកំពុងតែចរចា ស្នើសុំឱ្យភាគី ចិនពិនិត្យ និងពិចារណាបន្ថែមទៀតលើផលិតផលម្រេច ស្វាយចន្ទី ចេក និងកៅស៊ូពីកម្ពុជា សម្រាប់នាំចូលទៅកាន់ទីផ្សារប្រទេសចិន។
ថ្លែងបា្រប់អ្នកសារព័ត៌មានបន្ទាប់ពីចូលរួមបើកក្នុងកម្មវិធីអ៊ិម អូ ស៊ី ១០១ វគ្គផ្ដាច់ព្រ័ត្រស្ដីពីការ ធ្វើបទ បង្ហាញអំពីគំនិតអាជីវកម្មទៅកាន់វិនិយោគិន កាលពីចុងសប្ដាហ៍នេះ នៅទីស្ដីការ ក្រសួង ពាណិជ្ជកម្ម ឯកឧត្តម ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដីក្រសួង ពាណិជ្ជកម្ម បានមាន ប្រសាសន៍ ថា រហូតមកដល់ពេលនេះ ក្រសួងកំពុងខិតខំប្រឹងប្រែងចរចាជាមួយភាគីចិន ដើម្បីឱ្យរដ្ឋាភិបាលចិនទទួលយកផលិតផលម្រេច ស្វាយ ចន្ទី ចេក និងកៅស៊ូ ដែលជាផលិត របស់កម្ពុជា សម្រាប់នាំចូលទៅកាន់ប្រទេសចិន។
ឯកឧត្តមបានបញ្ជាក់ថា កន្លងមកភាគីចិន បានកំណត់កូតាឱ្យកម្ពុជាសម្រាប់នាំចេញផលិតផល ទៅកាន់ទីផ្សារប្រទេសចិន ដែលភាគីចិនបានផ្ដល់កូតាឱ្យកម្ពុជាធ្វើការនាំចូល នូវផលិតផលអង្ករ ចំនួន១០ម៉ឹន តោនក្នុងមួយឆ្នាំ។ ប៉ុន្ដែចំពោះផលិតផលម្រេច និងផលិតផលផ្សេងទៀត ភាគី ទាំងពីរ នៅមិនទាន់បានកំណត់ កូតាផ្ដល់ឱ្យកម្ពុជានៅឡើយនោះទេ។
ឯកឧត្តមទេសរដ្ឋមន្រ្ដីបានបន្ដទៀតថា បច្ចុប្បន្ននេះ ចិនបានអនុញ្ញាតឱ្យផលិត ផលរបស់កម្ពុជា ដែល អាចនាំចូលទៅត្រង់ ក្នុងទីផ្សារក្នុងប្រទេសចិនតែម្ដងរួមមានអង្ករ ដំឡូងមី និងពោត ក្រហម។ ជាមួយគ្នានេះ ចំពោះផលិតផលម្រេចកំពត ត្រូវបានប្រទេសជាច្រើន នៅលើសកល លោកទទួលស្គាល់ថាជាប់ចំណាត់ថ្នាក់ លេខ១ ដែលជាផលិតផលរបស់កម្ពុជា ហើយគិតមក ដល់ពេលនេះ ម្រេចកំពតត្រូវបានធ្វើការនាំចេញ ទៅក្រៅប្រទេស ដែលមានចំនួនសរុប ប្រមាណ៥០តោន ក្នុងមួយឆ្នាំៗ។
តែទោះបីជាយ៉ាងក៏ដោយ ឯកឧត្តមទេស រដ្ឋមន្រ្ដីបានអះអាងថា បើទោះជាបណ្ដាប្រទេសមួយ ចំនួនកំពុងតែមានការថយចុះចំពោះការនាំចេញផលិតផលរបស់ខ្លួនទៅក្រៅប្រទេស និងបញ្ហា សេដ្ឋកិច្ចពិភព លោកកំពុងជួបប្រទះនូវវិបត្ដិយ៉ាងណាក្ដី ប៉ុន្ដែការនាំចេញគ្រប់ ផលិតផល របស់កម្ពុជាទៅកាន់ទីផ្សារក្រៅ ប្រទេសនាពេលបច្ចុប្បន្ននេះ ស្ថានភាពនៅមិនមាន ជួបនូវបញ្ហា អ្វីកើតឡើងនោះទេ គឺការនាំចេញកំពុងមាន ការរីកចម្រើន និងមានកំណើនជាធម្មតា។
សូមបញ្ជាក់ថា នៅក្នុងឆ្នាំ២០១៦នេះ រាជរដ្ឋាភិបាលកម្ពុជាកំពុងតែធ្វើការចរចាជាមួយភាគីចិន ស្ដីពី ភោត្ដគ្រាមអនាម័យ ពាក់ព័ន្ធ នឹងការនាំចេញផលិតផលពីកម្ពុជាជា ច្រើនមុខបន្ថែមទៀត ដូចជាម្រេច ស្វាយ ចន្ទី ចេក និងកៅស៊ូ ដើម្បីនាំចូលទៅកាន់ទីផ្សារប្រទេសចិន៕