"ឆ្លុះកញ្ចក់ មុជទឹក ដុស​ក្អែល និង​ព្យាបាល" គឺជា​របៀប​នៃ​កំណែ​ទម្រង់​ដ៏មាន​ប្រសិទ្ធិ​ភាព​របស់​គណ​បក្ស​ប្រជាជន​កម្ពុជា

សន្និបាតគណៈកម្មាធិការកណ្ដាលគណបក្សប្រជាជនកម្ពុជា​ លើកទី៣៩ អាណត្ដិទី៥ រយៈពេល​២ថ្ងៃចាប់ពីថ្ងៃទី៩ ខែមករា ដល់ថ្ងៃទី១០ ខែមករា ឆ្នាំ២០១៦ ក្រោមអធិបតីភាព សម្ដេចអគ្គ​មហាសេនាបតីតេជោ ហ៊ុន សែន ប្រធានគណបក្ស និងសម្ដេចអគ្គមហាពញាចក្រី ហេង សំរិន ប្រធានកិត្ដិយសគណបក្សបានទទួលលទ្ធផលជាច្រើន ប៉ុន្តែគណបក្សបានលើកយក​នូវចំណុច​អាទិភាព​ចំនួន៩យកមកបង្ហាញរួមមាន៖

ទី១. អង្គសន្និបាតបានពិនិត្យយ៉ាងល្អិតល្អន់ និងវាយតំលៃខ្ពស់ចំពោះលទ្ធផលនៃការ អនុវត្ដ​សេចក្ដី​​​​សម្រេច​ចិត្ដនៃមហាសន្និបាតវិសាមញ្ញតំណាងទូទាំងប្រទេស របស់គណបក្សនា ខែមករា ខែកុម្ភៈ ឆ្នាំ២០១៥ និងសន្និបាតគណៈកម្មាធិការកណ្ដាលលើកទី៣៨ អាណត្ដិទី៥ នាថ្ងៃទី២០ ខែមិថុនា ឆ្នាំ២០១៥។ ទី២.អង្គសន្និបាតគាំទ្រពេញទំហឹង​ចំពោះការ​ប្រឹង​ប្រែង​របស់រាជរដ្ឋា​ភិបាល នីតិកាលទី៥ នៃរដ្ឋសភា ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្រ្ដី ក្នុងការអនុវត្ដ​កម្មវិធី​នយោបាយ និងយុទ្ធសាស្រ្ដចតុកោណដំណាក់ទី៣ ដែល​សម្រេច​​បាននូវ​សមិទ្ធផលថ្មីៗ​ជាច្រើន​ជូនជាតិ និងប្រជាជន។

ទី៣.អង្គសន្និបាតបានពិនិត្យវាយតំលៃយ៉ាងល្អិតល្អន់ទាំងចំណុចខ្លាំង និងចំណុចខ្វះខាត​នៃការងារ​កសាងពង្រឹងគណបក្សលើគ្រប់វិស័យ ព្រមទាំងបានដាក់ចេញនូវទិសដៅ​ភារកិច្ច​សំខាន់ៗ សំដៅបន្ដអនុវត្ដដោយជោគជ័យនូវសេចក្ដីសម្រេចចិត្ដ នៃមហាសន្និបាតវិសាមញ្ញ​តំណាង​ទូទាំងប្រទេសនាដើមឆ្នាំ២០១៦ ត្រៀមលក្ខណៈសម្បត្ដិដើម្បីឆ្ពោះទៅកាន់​ការបោះឆ្នោត​​​ជ្រើសរើសក្រុមប្រឹក្សាឃុំ-សង្កាត់អាណត្ដិទី៤ នាឆ្នាំ២០១៧ និងបន្ដឈានឆ្ពោះ​ទៅកាន់ការ​បោះឆ្នោត​ជ្រើសតាំងតំណាងរាស្រ្ដនីតិកាលទី៦ នាឆ្នាំ២០១៨ខាងមុខ។

ទី៤. អង្គសន្និបាតបានណែនាំដល់ថ្នាក់ដឹកនាំគណបក្សគ្រប់ថ្នាក់ និងមន្រ្ដីគណបក្ស​គ្រប់រូប​ត្រូវលើកកម្ពស់ស្មារតីទទូលខុសត្រូវ បន្ដចូលរួមអនុវត្ដនូវកំណែទម្រង់ដ៏ទូលំទូលាយ ស៊ីជម្រៅ និងគ្រប់ជ្រុងជ្រោយប្រកបដោយប្រសិទ្ធភាព មានលក្ខណៈពេញលេញ ស្មោះត្រង់ និងការតាំង​ចិត្ដ​ខ្ពស់តាមអភិក្រម "ឆ្លុះកញ្ចក់ មុជទឹក ដុសក្អែល និងព្យាបាល" ដែលជាការងារ​ដ៏មានសារៈ​សំខាន់បំផុត សម្រាប់ប្រទេសជាតិ និងគណបក្សប្រជាជនកម្ពុជា។

ទី៥. អង្គការសន្និបាតបន្ដជំរុញការអនុវត្ដ"កិច្ចព្រមព្រៀងស្ដីពីដំណោះស្រាយនយោបាយ ថ្ងៃ២២ ខែកក្កដា ឆ្នាំ២០១៤" និង"វប្បធម៌សន្ទនា" ដូចបានលើកក្នុងសេចក្ដីថ្លែងការណ៍​រួមរវាង​គណបក្ស​ទាំង២ ដែលមានអាសនៈក្នុងរដ្ឋសភា នាថ្ងៃទី៨ ខែឧសភា ឆ្នាំ២០១៥ និងថ្ងៃទី១០ ខែធ្នូ ឆ្នាំ២០១៥ ដោយឈរលើភាពស្មោះត្រង់ និងប្រឆាំងដាច់ខាតនូវទង្វើចាប់ដៃជាន់ជើង ដូចអ្នក​នយោបាយ​ទុច្ចរិតខ្លះ បានប្រព្រឹត្ដនាពេលកន្លងមក។

ទី៦. អង្គសន្និបាតលើកកម្ពស់ស្មារតីឯកភាពជាតិ ការពារដាច់ខាតរាល់សមិទ្ធផល​របស់​សង្គម​ជាតិដែលសម្រេចបានតាំងពីថ្ងៃជ័យជំនះ៧ មករា ឆ្នាំ១៩៧៩មក ក្នុងនោះខិតខំ​ពង្រឹង​សន្ដិភាព ស្ថិរភាពនយោបាយ សន្ដិសុខ សណ្ដាប់ធ្នាប់សង្គម ហើយរាំង​ស្កាត់រាល់សកម្មភាព​ណាដែល​អាច​នាំឲ្យប្រទេសជាតិធ្លាក់ក្នុងភាពច្របូកប្របល់។ ទី៧. អង្គសន្និបាតជំរុញ​ដំណើរការអភិវឌ្ឍ​សេដ្ឋកិច្ចឲ្យសម្រេចបានទិសដៅកំណើនក្នុងរង្វង់​៧ភាគរយ ក្នុងឆ្នាំ២០១៦នេះ ជាមួយនឹងការ​លើក​កម្ពស់សមធម៌ ក្នុងការទទួលបានផ្លែផ្កានៃ​កំណើន​សេដ្ឋកិច្ចសម្រាប់ប្រជាជន​គ្រប់ៗរូប ទាំងនៅទីជនបទ ទាំងនៅទីប្រជុំជន និងទីក្រុង។ 

ទី៨. អង្គសន្និបាតបានធ្វើការកត់សម្គាល់យ៉ាងយកចិត្ដទុកដាក់ ចំពោះសភាពការណ៍​ពិភពលោក ដែលកំពុងវិវត្ដន៍ស្មុគ្រស្មាញ ទាំងខាងសេដ្ឋកិច្ច យោធា នយោបាយ និងការទូត ព្រមទាំងមាន​បញ្ហាប្រឈមរួមធំៗជាច្រើន សម្រាប់គ្រប់ប្រជាជាតិ ប៉ុន្ដែទោះបីជាយ៉ាងនេះក្ដី ក៏ប្រទេស​ទាំងអស់​មាននិន្នាការរួមគឺការថែរក្សាសន្ដិភាព ស្ថិរភាព សន្ដិសុខ ដែលជាលក្ខខណ្ឌ​មិនអាចខ្វះ​បាន​សម្រាប់ការអភិវឌ្ឍប្រទេសជាតិ និងទី៩. អង្គសន្និបាតវាយតំលៃខ្ពស់ និងកោតសរសើរ​ចំពោះក្រុមការងារគណៈកម្មាធិការគណបក្សគ្រប់ថ្នាក់ គ្រប់ផ្នែក មន្រ្ដី និងសមាជិក សមាជិកា​គណបក្សគ្រប់រូប ដែលបានខិតខំប្រឹងប្រែងអនុវត្ដសម្រេចរាល់ភារកិច្ច ដែលគណបក្ស និងប្រជាជន​ប្រគល់ជូន។

ជាចុងក្រោយអង្គសន្និបាត បានអំពាវនាវដល់ជនរួមជាតិទាំងមូល និងគ្រប់មជ្ឈដ្ឋានក្នុងសង្គម សូមបន្ដរួមសាមគ្គីជាធ្លុងមួយ នៅក្រោមបាវចនា "ជាតិ សាសនា ព្រះមហាក្សត្រ" ដើម្បីសម្រេច​បាននូវសមិទ្ធផលធំៗថ្មីៗទៀត ក្នុងការកសាង និងការពារមាតុភូមិកម្ពុជា៕