ពន្លាជាតិកម្ពុជាជាតិកម្ពុជា បានទទួលពានរង្វាន់ប្រាក់ ក្នុងពិព័រណ៍ពាណិជ្ជកម្មពិភពលោកឆ្នាំ២០១៥ នៅទីក្រុងមីឡាន ប្រទេសអ៊ីតាលី

យោងតាមសេចក្តីប្រកាសព័ត៌មានរបស់ក្រសួងពាណិជ្ជកម្ម បានឲ្យដឹងនៅថ្ងៃទី២១ ខែធ្នូ ឆ្នាំ២០១៥នេះថា ពន្លាជាតិកម្ពុជា បានទទួលពានរង្វាន់ប្រាក់ ចំពោះការបង្កើតប្រធានបទពិព័រណ៍ប្រកបដោយភាពច្នៃប្រឌិត «ដំណាំស្រូវដាំ នៅលើដែនដីវប្បធម៌ដ៏សម្បូរបែប» ដែលសិ្ថតក្រោមប្រធានបទរបស់ពិព័រណ៍ពិភពលោក «ចិញ្ចឹមភពផែនដី ផ្តល់ថាមពល សម្រាប់ជីវិត» សម្រាប់ឆ្នាំ២០១៥។ ពន្លាជាតិ ដែលមានផ្ទៃក្រលា២៥០ ម៉ែត្រក្រឡា បានបញ្ជាក់ពីសារៈសំខាន់ស្តីពីផលិតកម្មដំណាំស្រូវ នៅលើដែនដី វប្បធម៌ដ៏សម្បូរបែបរបស់ប្រទេសកម្ពុជា។

ក្រសួងបានបញ្ជាក់ទៀតថា ពានរង្វាន់នេះបញ្ជាក់ពីការទទួលស្គាល់មុខមាត់កម្ពុជា លើឆាកអន្តរជាតិ និងនាំមកនូវមោទនភាពជាតិសម្រាប់កម្ពុជា ក្នុងការចូលរួមពិព័រណ៍ពិភពលោកឆ្នាំ២០១៥។ ពន្លាជាតិកម្ពុជា បានទទួលស្វាគមន៍អ្នកចូលរួមទស្សនាពិព័រណ៍ជាង ២លាននាក់ សម្រាប់រយៈពេល ៦ខែនៅក្នុងការតាំងពិព័រណ៍នៅទីក្រុងមីឡាន ប្រទេសអ៉ីតាលី។

ក្រសួងពាណិជ្ជកម្ម នឹងបើកសន្និសីទព័ត៌មានមួយបង្ហាញពីជោគជ័យនេះ នៅថ្ងៃព្រហស្បតិ៍ ទី២៤ ខែធ្នូ ឆ្នាំ២០១៥ខាងមុខនេះ នាក្រសួងពាណិជ្ជកម្ម ក្រោមអធិបតីភាពលោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងពាណិជ្ជកម្ម ដោយផ្តោតលើការរចនាពន្លាជាតិ និងសេចក្តីលម្អិតស្តីពីប្រធានបទ «ចិញ្ចឹមភពផែនដី ផ្តល់ថាមពល សម្រាប់ជីវិត» ក្នុងពិព័រណ៍ពិភពលោកឆ្នាំ២០១៥។

 ប្រទេសកម្ពុជាទទួលបាន «ពានរង្វាន់ប្រាក់ (Silver Award)» ពីពិព័រណ៍ពាណិជ្ជកម្មពិភពលោក និងពិព័រណ៍ពាណិជ្ជកម្មអន្តរជាតិឆ្នាំ២០១៥ ដែលប្រារព្ធឡើងនៅទីក្រុងមីឡាន ប្រទេសអ៉ីតាលី ដោយមានការចូលរួមប្រកួតប្រជែងពីបណ្តាប្រទេសនានាចំនួន៩១ នៅលើពិភពលោក។

ប្រទេសកម្ពុជាបានចូលរួមប្រកួតប្រជែងជាមួយ ៩១ប្រទេស។ ជាលទ្ធផលកម្ពុជា ជាប្រទេសតែមួយគត់ក្នុងតំបន់អាស៊ាន ដែលមានមោទនភាពយ៉ាងក្រៃលែងទទួលបានពានរង្វាន់ប្រាក់ ០១គ្រឿង (Silver Award) ពីគណៈកម្មការរៀបចំពិព័រណ៍ពិភពលោក និងការិយាល័យពិព័រណ៍អន្តរជាតិ (BIE)៕