សម្តេចតេជោ ហ៊ុន សែន បានថ្លែងក្នុង «កិច្ចប្រជុំប្រមុខដឹកនាំពីភពលោកស្តីពីសមភាពយ៉េនឌ័រ និងការលើកកម្ពស់សិទ្ធអំណាចស្រ្តី: ការប្តេជ្ញាចិត្តឆ្ពោះទៅរកវិធានការ»
នៅថ្ងៃទី២៧ ខែកញ្ញា ឆ្នាំ២០១៥ នៅទីក្រុងញូវយ៉កថា
ប្រទេសកម្ពុជាបានចូលរួមយ៉ាងសកម្មជាមួយបណ្តាប្រទេសសមាជិក នៃអង្គការសហប្រជាជាតិ
ក្នុងការអនុវត្តគោលនយោបាយ, យុទ្ធសាស្ត្រ, កម្មវិធី និងផែនការសកម្មភាពនានា សំដៅលើកកម្ពស់សមភាពយ៉េនឌ័រ
និងសិទ្ធអំណាចស្ត្រី ហើយសំរេចបាននូវ វឌ្ឍនភាពជាច្រើន តាមវិស័យសំខាន់ៗរួមមាន៖
-ការអនុម័តច្បាប់ និងក្របខណ្ឌនិយ័តកម្ម
ដើម្បីផ្តល់ការគាំពារ, លុបបំបាត់ការរើសអើងនិងកាត់បន្ថយអំពើហិង្សា លើស្ត្រី
និងក្មេងស្រី, ការលើកកម្ពស់សមភាពយ៉េនឌ័រ នៅក្នុងវិស័យអប់រំ តាមរយៈការបង្កើនការចុះឈ្មោះចូលរៀនរបស់ក្មេងស្រី
នៅកំរិតបឋមសិក្សា និងមធ្យមសិក្សា, ការលើកស្ទួយការចូលរួមរបស់ស្ត្រីក្នុងវិស័យសេដ្ឋកិច្ច
និងការបង្កើនភាពងាយស្រួលដល់ស្ត្រី ក្នុងការទទួលបានសេវាហិរញ្ញវត្ថុ សំដៅបង្កើនភាពឯករាជ្យ
ផ្នែកហិរញ្ញវត្ថុរបស់ស្ត្រី, ការលើកកម្ពស់ស្ថានភាពសុខភាពរបស់ស្ត្រី និងកុមារ
ពិសេសតាមរយៈការសំរេចបាននូវ គោលដៅអភិវឌ្ឍន៍សហស្សវត្សរ៍លើមរណភាពមាតា, និង ការលើកកម្ពស់ការចូលរួមរបស់ស្ត្រី
នៅក្នុងកិច្ចការនយោបាយ និងការសំរេចចិត្តលើកិច្ចការនានារបស់សង្គមជាតិ ក្នុងគ្រប់ស្ថាប័នជាតិ និងគ្រប់កំរិត ជាអាទិ៍ស្ថាប័ននីតិបញ្ញតិ្ត,
ស្ថាប័ននៃរាជរដ្ឋាភិបាល និងស្ថាប័នផ្សេងៗទៀត ទាំងនៅថ្នាក់ជាតិ និងថ្នាក់ក្រោមជាតិ។
នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានមានប្រសាសន៍ថា ឆ្នាំ២០១៥នេះ
គឺជាឆ្នាំប្រវត្តិសាស្ត្រមួយ សម្រាប់ពន្លឿនវឌ្ឍនភាពឆ្ពោះទៅរកសមភាពយ៉េនឌ័រ និងការលើកកម្ពស់សិទ្ធអំណាចស្ត្រី។
សម្តេចតេជោ បានសង្កត់ធ្ងន់ថា ជាការពិតកិច្ចប្រជុំនេះ នឹងក្លាយជាវេទិកាដ៏សំខាន់សំរាប់យើងទាំងអស់គ្នា
ក្នុងការបន្តខិតខំប្រឹងប្រែង និងប្តេជ្ញាចិត្តបន្ថែមទៀត ដើម្បីសំរេចនូវសមភាពយ៉េនឌ័រ
និងធ្វើឲ្យគោលដៅនេះ ក្លាយជាការពិតសំរាប់ស្រ្តី និងក្មេងស្រីទាំងអស់នៅទូទាំងពិភពលោក។
ជាមួយហេតុផលនេះ សម្តេចតេជោយល់ថា
យើងគួរបន្តផ្តោតអាទិភាពទៅលើការងារមួយចំនួនដូចជា៖ ១. ការបង្កើនការវិនិយោគទៅលើសមភាពយ៉េនឌ័រ,
២. ការធានានូវការការពារនូវសិទ្ធរបស់ស្ត្រី ព្រមទាំងការចូលរួមពេញលេញ និងស្មើភាពរបស់ស្ត្រី
នៅក្នុងការធ្វើសេចក្តីសំរេចចិត្តនៅគ្រប់កំរិត,
៣. ការពង្រឹងយន្តការគណនីភាព សំរាប់សមភាពយ៉េនឌ័រ និង ៤. ការបន្តលើកកម្ពស់ការចូលរួមរបស់ស្ត្រី ក្នុងសេដ្ឋកិច្ច និងបរិយាប័ន្នហិរញ្ញវត្ថុសំរាប់ស្ត្រី៕
No comments:
Post a Comment