ផ្អែកតាមលិខិតផ្លូវការ របស់អគ្គស្នងការនគរបាលជាតិ នៃក្រសួងមហាផ្ទៃ ចុះថ្ងៃទី ១៥ ខែសីហា ឆ្នាំ២០១៥នេះ បានបញ្ជាក់ថា ការឃាត់ខ្លួនឯកឧត្តម ហុង សុខហួរ ធ្វើឡើងក្នុងក្របខ័ណ្ឌនៃបទល្មើសជាក់ស្តែង ស្របតាមក្រមនីតិវីធីព្រហ្មទណ្ឌ នៃព្រះរាជាណាចក្រកម្ពុជា និងស្របតាមរដ្ឋធម្មនុញនៃព្រះរាជាណាចក្រកម្ពុជាត្រង់មាត្រា១០៤ថ្មី និងច្បាប់ស្តីពីលក្ខន្តិកៈសមាជិកព្រឹទ្ធសភាត្រង់មាត្រា១២។
បន្ទាប់ពីមានការចាប់ខ្លួន ឯកឧត្តម ហុង សុខហួរ សមាជិកព្រឹទ្ធសភារបស់គណបក្សសង្គ្រោះជាតិ នៅព្រឹកថ្ងៃទី១៥ ខែសីហា ឆ្នាំ២០១៥នេះ ពីសំណាក់កម្លាំងនគរបាលជាតិ ឯកឧត្តមនាយឧត្តមសេនីយ៍នេត សាវឿន អគ្គស្នងការនគរបាលជាតិ បានផ្ញើលិខិតផ្លូវការមួយច្បាប់ ដោយរៀបរាប់អំពីការចាប់ឃាត់ខ្លួន ឯកឧត្តម ហុង សុខហួរ ជូនឯកឧត្តម នៃ ប៉េណា ប្រធានស្តីទីព្រឹទ្ធសភានៃកម្ពុជា។
ក្នុងលិខិតនោះ បានសរសេររៀបរាប់ថា អគ្គស្នងការដ្ឋាននគរបាលជាតិ នាព្រឹកថ្ងៃទី១៥ ខែសីហា ឆ្នាំ២០១៥ វេលាម៉ោង០៦និង០៥នាទី នៅផ្ទះលេខ២០១១ ភូមិគោកឃ្លៀង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ កងកម្លាំងនគរបាលបានធ្វើការឃាត់ខ្លួនឯកឧត្តម ហុង សុខហួរ សមាជិកព្រឹទ្ធសភា មកកាន់ស្នងការដ្ឋាននគរបាលរាជធានីភ្នំពេញ។
អង្គហេតុនៃការឃាត់ខ្លួន គឺកាលពីថ្ងៃទី១២ ខែសីហា ឆ្នាំ២០១៥ នៅក្នុងគេហទំព័រ Facebook របស់ ឯកឧត្តម សម រង្ស៊ី បានបង្ហោះផ្សព្វផ្សាយនូវវីដេអូឃ្លីបមួយមានរយៈពេល១១នាទី ហើយវីដេអូឃ្លីបនេះ បានបន្តផ្សព្វផ្សាយរហួតដល់ព្រឹកថ្ងៃទី១៣ ខែសីហា ឆ្នាំ២០១៥។ នៅក្នុងវីដេអូឃ្លីបនេះ ឯកឧត្តម ហុង សុខហួរ បានធ្វើការបកស្រាយអះអាងអំពីខ្លឹមសារប្រការ៤ នៃសន្ធិសញ្ញា ឆ្នាំ១៩៧៩ ថា សម្តេចពញ្ញាចក្រី ហេង សំរិន ដែលជាប្រមុខរដ្ឋបានចុះហត្ថលេខា ជាមួប្រមុខរដ្ឋរបស់ប្រទេសវៀតណាម នៅថ្ងៃទី១៨ ខែកុម្ភៈ ឆ្នាំ១៩៧៩ ថា ប្រទេសទាំងពីរឯកភាពគ្នារំលាយព្រំដែនរដ្ឋទាំងពីរ ព្រមទាំបានលើកអត្ថបទនៃសន្ធិសញ្ញានេះដាក់បញ្ចូលក្នុងវីដេអូឃ្លីបនេះទៀត។ ឃ្លីបវីដេអូនេះបានបង្ហាញខ្លឹមសារប្រការ៤ នៃសន្ធិសញ្ញាដោយមានគូសគំនូសពណ៌លឿងពីលើថា ភាគីទាំងពីរសុខចិត្តដោះស្រាយតាមកិច្ចចរចារដោយសន្តិវិធីនូវទំនាស់ជាយថាហេតុ ក្នុងទំនាក់ទំនងទ្វេភាគីរបស់ខ្លួន។ ភាគីទាំងពីរបានធ្វើការចរចារដើម្បីចុះហត្ថលេខា សម្រាប់រំលាយព្រំដែនជាតិប្រទេសទាំងពីរ ដោយអាស្រ័យលើព្រំដែននាពេលបច្ចុប្បន្ន ហើយភាគីទាំងពីរសម្រេចចិត្តមុតមាំ ដើម្បីកែប្រែព្រំដែននេះឲ្យទៅជាព្រំដែនសន្តិភាព មិត្តភាព និងស្ថិតស្ថេរវាងប្រទេសទាំងពីរ។
ដោយឡែក ខ្លឹមសារដើមពិតប្រាកដ ត្រង់មាត្រា៤ នៃសន្ធិសញ្ញាសន្តិភាព មិត្តភាព និងសហប្រតិបត្តិការ រវាងសារធារណៈរដ្ឋប្រជាមានិតកម្ពុជា និងសារធារណៈរដ្ឋសង្គមនិយមវៀតណាមចែងថា ភាគីទាំងពីរបានសន្យាថានឹងដោះស្រាយរាល់ការទំនាស់ អាចកើតឡើងក្នុងការទំនាក់ទំនងជាមួយគ្នា តាមរយៈការចរចារដោយសន្តិវិធី។ ភាគីទាំងពីរនឹងធ្វើការចរចារ ដើម្បីចុះហត្ថលេខាលើសន្ធិសញ្ញាកំណត់នូវព្រំដែនរដ្ឋ រវាងប្រទេសទាំងពីរលើមូលដ្ឋានខ្សែព្រំដែននាពេលបច្ចប្បន្ននេះ ហើយប្តេជ្ញាចិត្តកសាងខ្សែព្រំដែននោះទៅជាខ្សែព្រំដែនសន្តិភាព មិត្តភាពដ៏យួអង្វែងរវាងប្រទេសទាំងពីរ។
ការឃាត់ខ្លួនឯកឧត្តម ហុង សុខហួរ ធ្វើឡើងក្នុងក្របខ័ណ្ឌនៃបទល្មើសជាក់ស្តែង ស្របតាមក្រមនីតិវីធីព្រហ្មទណ្ឌ នៃព្រះរាជាណាចក្រកម្ពុជា និងស្របតាមរដ្ឋធម្មនុញនៃព្រះរាជាណាចក្រកម្ពុជាត្រង់មាត្រា១០៤ថ្មី និងច្បាប់ស្តីពីលក្ខន្តិកៈសមាជិកព្រឹទ្ធសភាត្រង់មាត្រា១២៕
No comments:
Post a Comment