យោងតាមសេចក្តីប្រកាសព័ត៌មាន របស់អគ្គលេខាធិការដ្ឋាន រដ្ឋសភា ចុះថ្ងៃទី១៣ ខែសីហា ឆ្នាំ២០១៥ បានឲ្យដឹងថា ឯកឧត្តមបណ្ឌិត ងួន ញ៉ិល អនុប្រធានទី២រដ្ឋសភា និងជាប្រធានក្រុមសភាជាតិកម្ពុជា នៃសភាតំបន់អាស៊ី (APA) នឹងដឹកនាំគណៈប្រតិភូជាន់ខ្ពស់សភាកម្ពុជា ចូលរួមកិច្ចប្រជុំគណៈកម្មាធិការអចិន្ត្រៃយ៍កិច្ចការសេដ្ឋកិច្ច និងការអភិវឌ្ឍប្រកបដោយចីរភាព របស់សភាតំបន់អាស៊ី នៅទីក្រុងហ្សាកាតា នៃសាធារណរដ្ឋឥណ្ឌូនេស៊ី ចាប់ពីថ្ងៃទី១៧ ដល់ថ្ងៃទី ២១ ខែសីហា ឆ្នាំ២០១៥។
កិច្ចប្រជុំគណៈកម្មាធិការអចិន្ត្រៃយ៍កិច្ចការសេដ្ឋកិច្ច និងការអភិវឌ្ឍប្រកបដោយចីរភាព នឹងផ្តោតជាសំខាន់លើការពិភាក្សា ជុំវិញសេចក្តីព្រាងសេចក្តីសម្រេចដែលបានរៀបចំរួចចំនួន៥ ដើម្បីដាក់ជូនកិច្ចប្រជុំក្រុមប្រឹក្សាប្រតិបត្តិលើកទី១ ធ្វើការពិនិត្យ មុននឹងដាក់ជូនមហាសន្និបាតលើកទី៨ ដែលនឹងប្រារព្ធធ្វើនៅព្រះរាជាណាចក្រកម្ពុជា នាខែធ្នូ ឆ្នាំ២០១៥ ខាងមុខ ដើម្បីធ្វើការអនុម័ត។
នៅក្នុងកិច្ចប្រជុំគណៈកម្មាធិការអចិន្ត្រៃយ៍កិច្ចការសេដ្ឋកិច្ច និងអភិវឌ្ឍប្រកបដោយចីរភាពនោះនឹងលើកយកចំណុច៥មកធ្វើការពិភាក្សាដែលរួមមាន៖ សេចក្តីព្រាងសេចក្តីសម្រេចស្តីពីកិច្ចការហិរញ្ញវត្ថុ ការធានាទៅលើកិច្ចខិតខំប្រឹងប្រែងដើម្បីកំណើនសេដ្ឋកិច្ច, សេចក្តីព្រាងសេចក្តីសម្រេចស្តីពីបញ្ហាបរិស្ថាន ការឡើងកំដៅលើផែនដី ការប្រែប្រួលអាកាសធាតុ ការដាំដើមឈើរាប់លានដើម នៅពាសពេញតំបន់អាស៊ី, សេចក្តីព្រាងសេចក្តីសម្រេចស្តីពីការលុបបំបាត់ភាពក្រីក្រ, សេចក្តីព្រាងសេចក្តីសម្រេចស្តីពីសមារណកម្មទីផ្សារថាមពលនៅក្នុងតំបន់អាស៊ី និងសេចក្តីព្រាងសេចក្តីសម្រេចស្តីពីតួនាទីរបស់សមាជិកសភាតំបន់អាស៊ី ក្នុងការអនុម័តសេចក្តីសម្រេចដើម្បីគាំទ្រ ដល់ការអនុវត្តគោលដៅអភិវឌ្ឍន៍ប្រកបដោយចីរភាព។
គួរបញ្ជាក់ថា គណៈកម្មាធិការអចិន្ត្រៃយ៍កិច្ចការសេដ្ឋកិច្ច និងការអភិវឌ្ឍប្រកបដោយចីរភាព ជាគណៈកម្មាធិការមួយ ដែលសភាអាស៊ី (APA) បានបង្កើតឡើង ក្នុងនោះរួមមាន គណៈកម្មាធិការប្រតិបត្តិ, គណៈកម្មាធិការអចិន្ត្រៃយ៍ការងារវប្បធម៌ សង្គម និងគណៈកម្មាធិការអចិន្ត្រៃយ៍ការងារនយោបាយជាដើម។ បច្ចុប្បន្ននេះ សភាតំបន់អាស៊ី (APA) មានសមាជិកពេញសិទ្ធិចំនួន៤២ប្រទេស និងប្រទេសសមាជិកសង្កេតការណ៍ចំនួន១៦ ព្រមទាំងអង្គការសង្កេតការណ៍ចំនួន១០អង្គការ៕
អត្ថបទ៖ ច័ន្ទ ទេវី
No comments:
Post a Comment