ដើម្បីផ្តល់ភាពងាយស្រួលដល់ភ្ញៀវទេសចរណ៏
ដែលអញ្ជើញមកទស្សនាប្រាង្គប្រាសាទអង្គរ អាជ្ញាធរ ជាតិអប្សរាមានគម្រោងរៀបចំមជ្ឈមណ្ឌលទទួលភ្ញៀវមួយ
នៅទីលានពីមុខប្រាសាទអង្គរតូច ដែល គម្រោងនេះ ទទួលបានការគាំទ្រ ពីគណៈកម្មាធិការ
អាយ ស៊ី ស៊ី-អង្គរ
(ICC-ANGKOR)ផងដែរ។
ផ្តល់បទសម្ភាសន៏នៅក្រៅកិច្ចប្រជុំបច្ចេកទេសរបស់គណៈកម្មាធិការ
អន្តរជាតិ សម្របសម្រួលកិច្ចគាំពារនិងអភិវឌ្ឍន៍តំបន់អង្គរ
(ICCអង្គរ)លើកទី២៤នៅខេត្តសៀមរាបអង្គរ ឯកឧត្ដម
អ៊ុក សូម៉េត អគ្គនាយករង អាជ្ញាធរជាតិអប្សរាបានប្រាប់អ្នកសារព័ត៌មានថា
នៅក្នុងកិច្ចពិភាក្សានៃកិច្ចប្រជុំបច្ចេកទេសនេះ មន្ត្រីជំនាញអាជ្ញាធរជាតិអប្សរាបានធ្វើបទបង្ហាញ
ពីគម្រោងការរៀបចំទីលានមណ្ឌលបដិសណ្ឋារកិច្ច នៅមុខប្រាសាទអង្គរតូច ដើម្បីជួយសម្រួល ក្នុងការផ្តល់ព័ត៌មាន និងសេវាកម្មផ្សេងៗមួយចំនួនទៀត
ដោយមានការឯកភាពគាំទ្រទាំងស្រុងពីរកិច្ចប្រជុំនេះ។
ឯកឧត្ដម
អ៊ុក សូម៉េត បានឱ្យដឹងថាគម្រោងសាងសង់ទីលានមណ្ឌលបដិសណ្ឋាកិច្ចនេះ
គ្រោងនឹងធ្វើ ឡើងនៅពីមុខប្រាសាទអង្គរតូច លើទំហំផ្ទៃដីប្រមាណ២ហិកតា ក្នុងតម្លៃទឹកប្រាក់វិនិយោគប្រមាណ ១០លានដុល្លារអាមេរិក
សំរាប់ឱ្យភ្ញៀវទេសចរជាតិនិងអន្តរជាតិចូលសំរាកដើម្បីទទួលបានពត៌មានផ្សេងៗ ពីទិសដែលត្រូវទៅទស្សនាកំសាន្តនៅក្នុងតំបន់រមណីយដ្ឋានប្រវត្តិសាស្ត្រអង្គរ។
ឯកឧត្តមមាន ប្រសាសន៏ ថាទីលានសម្រាប់ទទួលភ្ញៀវនេះ មានភាពចាំបាច់ណាស់សម្រាប់ទេសចរ
នៅពេលមាន អាកាសធាតុមិនអំណោយផល ដូចជា ភ្លៀង ខ្យល់ ក្តៅ ជាដើម ដើម្បីភ្ញៀវគេអាចចូលជ្រកសំរាកនៅទីនេះបាន។
ទីលាននេះក៏នឹងមានរៀបចំនូវតូបលក់ សៀវភៅឯកសារប្រវត្តសាស្រ្តស្តីពី ប្រាសាទអង្គរ វត្ថុអនុស្សាវរីយ៏ និងមានអាហារដ្ឋានលក់ដូរភេសជ្ជះសម្រាប់បំរើជូនភ្ញៀវផងដែរ។
តាមការអះអាងពីមន្រ្តីជាន់ខ្ពស់របស់អាជ្ញាធរជាតិអប្សរា
បានអោយដឹងថា គម្រោងទីលាន
បដិសណ្ឋាកិច្ច ភ្ញៀវនេះ អជ្ញាធរបានសិក្សាពីផលប៉ះពាល់យ៉ាងល្អិតល្អន់រួចហើយ
គឺយើងធ្វើយ៉ាងណារៀបចំបរិស្ថាន ទីតាំងនេះឲ្យបានល្អប្រសើរឡើងវិញ
ដោយមាន ដំាដើមឈើជំនួសដើមឈើងាប់ៗឡើងវិញឲ្យបានក្រាស់ និង រៀបចំ ចំណតរថយន្ត
បង្គន់អនាម័យ ដោយធ្វើយ៉ាងណាចៀសវាងមិនឲ្យបង្ករផលប៉ះពាល់ចំពោះបរិស្ថាននិងប្រាសាទ ព្រមទំាងផលប្រយោជន៏របស់ប្រជាពលរដ្ឋនៅក្នុងតំបន់អង្គរទាំងមូល។
អត្ថបទ៖
ប្រាក់ សុវណ្ណតារា
No comments:
Post a Comment