បទវិចារណកថាៈ
អត្ថបទដោយ ឧត្តម សក្តិ
ល្មមដល់ពេលបក្សប្រឆាំងងាកមករកការចរចាវិញហើយ
ការវិលត្រលប់មកវិញនូវប្រក្រតីភាពនៃបរិយាកាសសង្គម
ក្រោយប្រតិបត្តិការពង្រឹងការអនុវត្តច្បាប់របស់អាជ្ញាធរមានសមត្ថកិច្ច ក្នុងគោលដៅដើម្បីធានាសន្តិសុខ
និងសណ្តាប់ធ្នាប់សាធារណៈ បន្ទាប់ពីការបង្កឲ្យមានភាពវឹកវរ ចលាចលតានតឹងនយោបាយតាមរយៈការញុះញង់ធ្វើបាតុកម្មហិង្សាដែលមានចរិតផ្តួលរំលំរាជរដ្ឋាភិបាលស្របច្បាប់
បានអូសបន្លាយជាងប្រាំខែមកហើយ ចាប់តាំងពីក្រោយការបោះឆ្នោត កាលពីថ្ងៃទី ២៨ ខែកក្កដា
ឆ្នាំ២០១៣ មកម្ល៉េះ។ តើផលប៉ះពាល់ដែលកើតចេញពីបាតុកម្មរបស់គណបក្សសង្រ្គោះជាតិ
ក្នុងអំឡុងពេលកន្លងមកនេះបាននាំមកនូវផលវិបាកអ្វីខ្លះដល់សង្គមជាតិ? តើស្ថានភាពសង្គមក្រោយប្រតិបត្តិការពង្រឹងការអនុវត្តច្បាប់របស់អាជ្ញាធរមានសមត្ថកិច្ច
មានការវិវត្តបែបណាហើយក្នុងពេលនេះ?
នរណាក៏បានដឹងដែរថា
បក្សប្រឆាំងក្នុងរយះកាលចុងក្រោយនេះ ដើម្បីតែមហិច្ឆតាច្បាមយកអំណាចក្រៅប្រពន្ធច្បាប់
បានតំរូវអោយពួកគេរៀបចំយុទ្ធសាស្ត្រនៃការធ្វើបាតុកម្មជារៀងរាល់ថ្ងៃ
និងជារៀងរហូតមិនមានពេលកំណត់ ក្នុងចេតនាបំផុសបំផុលចលនាបះបោរបែបអនាធិបតេយ្យ បំផ្លិចបំផ្លាញ
ទ្រព្យសម្បត្តិសាធារណៈ និងឯកជន បំពុលបរិយាកាសសន្តិសុខ សណ្តាប់ធ្នាប់សាធារណៈក្នុងគោលដៅផ្ដួលរំលំរាជរដ្ឋាភិបាល
តាមរូបភាពបដិវត្តន៍ពីមហាជនបែបហិង្សាកំរោលចូល។ ក្នុងទម្រង់នៃរូបភាពជាច្រើនបែបច្រើនយ៉ាង
រួមមានទាំងហិង្សាលើ សកម្មភាព ពាក្យសម្ដី សម្ភារៈ ដែលបានបង្កើតទ្បើងដោយគណបក្សសង្រ្គោះជាតិទាំងអស់នេះ
ត្រូវបានគេមើលឃើញយ៉ាងច្បាស់ថា បានបង្កឲ្យមានផលប៉ះពាល់ក្នុងការប្រកបរបរប្រចាំថ្ងៃរបស់បងប្អូនប្រជាពលរដ្ឋ
រំខានដល់ដំណើរនៃសង្វាក់ផលិតកម្មលើអាជីវកម្មគ្រប់ប្រភេទ ស្ទើរតែទាំងស្រុង ដែលកត្តាទាំងនេះជំរុញឲ្យមានអស្ថិរភាពនយោបាយ
អស្ថិរភាពសេដ្ឋកិច្ច និងឈានដល់ការបំផ្លាញកិត្យានុភាពជាតិយ៉ាងធ្ងន់ធ្ងរ។
ទោះស្ថិតក្នុងស្ថានភាពបែបនេះក៏ដោយចុះ
ក៏រាជរដ្ឋាភិបាលប្រជាធិបតេយ្យស្របច្បាប់ តែងតែមានការអត់ឱនខាងនយោបាយលើបក្សប្រឆាំង
ដែលតំណាងដោយសម្លេងនៃមតិភាគតិចក្នុងការសម្តែងមតិធ្វើការប្រមូលផ្តុំ
ដង្ហែក្បួនបាតុកម្ម ដែលគេតែងតែអះអាងថា ដោយសន្តិវិធិ និងអហិង្សា ស្របនឹងគោលការណ៍ច្បាប់ដែលបានកំណត់។
ប៉ុន្តែផ្ទុយទៅវិញ
សកម្មភាពរបស់ក្រុមប្រឆាំងហាក់ផ្គើនទៅនឹងច្បាប់ រំលោភលើរដ្ឋធម្មនុញ្ញ ដោយឆ្លៀតឱកាសយកសិទ្ធិទាំងអស់នេះបំពាន
នាំអោយប៉ះព៉ាល់ដល់សិទ្ធិសេរីភាព និងកិត្តិយសអ្នកដទៃ ដល់ទំនៀមទំលាប់ល្អរបស់សង្គមជាតិ
ដល់សណ្តាប់ធ្នាប់សាធារណៈ និងដល់សន្តិសុខជាតិ ។
បាតុកម្មរបស់កម្មករ-កម្មការិនី
ក្នុងរយៈពេលត្រឹមតែ ១៥ថ្ងៃ ប៉ុណ្ណោះ គ្រាដែលពួកគេមិនសុខចិត្ត
ចំពោះការដំឡើងប្រាក់ឈ្នួលតាមការញុះញង់របស់បក្សប្រឆាំងនោះ
បានធ្វើឲ្យរោងចក្រនៅកម្ពុជាខាតបង់ថវិកាប្រមាណជាជិត
៣០០លានដុល្លារ សម្រាប់ការនាំ
ចេញទៅកាន់ប្រទេសក្រៅ
និងសម្ពារៈ។ ព្រមជាមួយគ្នានេះ មានរោងចក្រមួយចំនួនដែលកំពុងបានដំណើរនៅក្នុងប្រទេសកម្ពុជាអស់រយៈពេលជាច្រើនឆ្នាំមកហើយនោះ
បានបង្វែរទិសដៅរបស់ខ្លួនទៅវិនិយោគនៅប្រទេសជិតខាង
ហើយអ្វីដែលជាការគួរឲ្យកត់សម្គាល់ជាងនេះទៅទៀតនោះ
មានរោងចក្រ ដែលមានគម្រោងមកវិនិយោគនៅកម្ពុជាដែរនោះ
ក៏បានផ្លាស់ប្តូរគំនិតទៅដាក់ទុនរកស៊ីនៅប្រទេសផ្សេងផងដែរ។
ដូចនេះការបោសសម្អាតតាមគោលដៅផ្សេងៗ
និងនៅទីលានប្រជាធិបតេយ្យ កាលពីថ្ងៃទី៤ មករា នេះ
ធ្វើឡើងដើម្បីរក្សាស្ថានការណ៍ឲ្យមានភាពស្ងប់ស្ងាត់
និងបញ្ចៀសកុំឲ្យមានសកម្មភាពអនាធិបតេយ្យនៅក្នុងសង្គម ដែលជាបំណងប្រាថ្នារបស់ប្រជាពលរដ្ឋគ្រប់រូបដែលប្រាថ្នាចង់បានភាពសុខសាន្ត
នៃសង្គមជាតិទាំងមូល។
ល្មមដល់ពេលដែលមេដឹកនាំគណបក្សប្រឆាំង
បញ្ឈប់សកម្មភាពបង្កគ្រោះថ្នាក់ដល់សង្គមជាតិ ហើយតម្កល់ផលប្រយោជន៍ជាតិជាធំ។
ល្បែងប្រជាធិបតេយ្យត្រូវលេងនៅក្នុងប្រព័ន្ធច្បាប់ដ៏រឹងមាំមួយ
ដែលមានការជឿទុកចិត្តគ្នា ដូចនេះគួរតែងាកមកចរចាដោយស្មោះត្រង់ជាមួយគណបក្សប្រជាជនកម្ពុជា
ដើម្បីរកដំណោះស្រាយមួយ ឈានដល់ការបញ្ចប់វិបត្តិនយោបាយ នាំទៅរកប្រក្រតីភាព
និងស្ថិរភាពនយោបាយឡើងវិញ ដើម្បីឧត្តមប្រយោជន៍ជាតិ។
No comments:
Post a Comment