ខ្មែរតែមួយ

Wednesday, June 24, 2015

គណបក្សប្រជាជនកម្ពុជា ប្រារព្ធខួប ៦៤ ឆ្នាំ ថ្ងៃបង្កើតគណបក្ស ថ្ងៃទី២៨ ខែមិថុនាខាងមុខ ដោយរំពឹងថា នឹងមានសមាជិកចូលរួមប្រមាណជាង១ម៉ឺននាក់

គណបក្សប្រជាជនកម្ពុជានឹងប្រារព្ធខួបអនុស្សាវរីយ៍ លើកទី៦៤ នៃថ្ងៃបង្កើតគណបក្ស នៅទីស្នាក់ការកណ្តាលគណបក្សប្រជាជនកម្ពុជា ( គ៨៥) នៅថ្ងៃទី២៨ ខែមិថុនា ឆ្នាំ២០១៥ខាងមុខ ដោយរំពឹងថា នឹងមានសកម្មជនចូលរួមប្រមាណជាង១ម៉ឺននាក់។ នេះបើតាមការថ្លែងឲ្យដឹងរបស់ ឯកឧត្តម សុខ ឥសាន្ត អ្នកនាំពាក្យគណបក្សប្រជាជនកម្ពុជានៅថ្ងៃទី២៤ ខែមិថុនា ឆ្នាំ២០១៥នេះ។

ឯកឧត្តម សុខ ឥសាន្ត បានមានប្រសាសន៍ប្រាប់គេហទំព័របណ្តាញព័ត៌មានរាជរដ្ឋាភិបាល GNN ថា អង្គមិទ្ទិញនោះ នឹងប្រារព្ធឡើងក្រោមអធិបតីភាពសម្តេចតេជោ ហ៊ុន សែន ប្រធានគណបក្សប្រជាជនកម្ពុជា សម្តេចអគ្គមហាពញាចក្រី ហេង សំរិន ប្រធានកិត្តិយសព្រមទាំងសម្តេចក្រឡាហោម ស ខេង និងសម្តេចវិបុលសេនាភក្តី សាយ ឈុំ អនុប្រធានគណបក្ស។

ឯកឧត្តម សុខ ឥសាន្ត បានឲ្យដឹងថា បញ្ហាសំខាន់នៃការប្រារព្ធខួបនេះ គឺចង់និយាយពីភាពដឹកនាំរបស់គណបក្សប្រជាជនកម្ពុជាតាមរយៈរាជរដ្ឋាភិបាលដែលមានសម្តេចតេជោ ហ៊ុន សែន ជានាយករដ្ឋមន្រ្តី ហើយសភាពការណ៍ថ្មីៗ សម្តេចតេជោទើបតែជាប់ឆ្នោតដោយសន្និបាតគណៈកម្មាធិការកណ្តាល ប្រគល់ភារៈកិច្ចជាប្រធានបក្សជូនសម្តេច។

ដូច្នេះ គោលបំណងសំខាន់នៃការប្រារព្ធខួប គឺក្នុងអត្ថន័យរំលឹកពីការដឹកនាំរបស់គណបក្ស ដែលបានដំណើរការរយៈពេល៦៤ឆ្នាំ និងក៏រំលឹកឡើងវិញនូវស្នាដៃដែលបក្សបានដឹកនាំតាំងពីកើតរហូតមកដល់ពេលនេះជូនសង្គមជាតិបានអីខ្លះ គឺគណបក្សប្រជាជនកម្ពុជាមានសមិទ្ធផលយ៉ាងច្រើន ដែលប្រជាជនចងចាំ។ ក្រៅពីនេះ មិទ្ទិញអនុស្សាវរីយ៍នេះ ក៏ដើម្បីពង្រឹងគោលជំហរ រួមកម្លាំងគ្នាសាមគ្គីគ្នាកសាងអភិវឌ្ឍន៍ប្រទេសជាតិឲ្យមានការរីកចំរើន ស្របទៅនឹងកម្មវិធីនយោបាយរបស់គណបក្សផងដែរ៕

គណៈអចិន្ត្រៃយ៍ នៃរដ្ឋសភាបញ្ចប់ការពិភាក្សាលើសេចក្តីព្រាងច្បាប់ សមាគម អង្គការមិនមែនរដ្ឋាភិបាល

គណៈអចិន្ត្រៃយ៍នៃរដ្ឋសភា ដែលមានសមាសភាព១៣រូប បានបញ្ចប់ការពិភាក្សា និងអនុម័ត ទៅលើសេចក្តីព្រាងច្បាប់ ស្តីពីសមាគម និងអង្គការមិនមែនរដ្ឋាភិបាលហើយ កាលពីថ្ងៃទី២៣ ខែមិថុនា ឆ្នាំ២០១៥ និងបានប្រគល់ជូនគណៈកម្មការជំនាញរបស់រដ្ឋសភាចំនួន៣ ធ្វើការត្រួតពិនិត្យ។ នេះបើតាមការប្រកាស របស់អគ្គលេខាធិការដ្ឋានរដ្ឋសភាចុះថ្ងៃទី ២៣ ខែមិថុនា ឆ្នាំ២០១៥ ។

សេចក្តីប្រកាសព័ត៌មានរបស់រដ្ឋសភា បានឲ្យដឹងថា គណៈកម្មការជំនាញទាំង៣ ដែលត្រួតពិនិត្យសេចក្តីព្រាងច្បាប់នេះ រួមមានគណៈកម្មការកិច្ចការបរទេស សហប្រតិបត្តិការ អន្តរជាតិ ឃោសនាការ និងព័ត៌មាន , គណៈកម្មការមហាផ្ទៃ ការពារជាតិ និងមុខងារសាធារណៈ និងគណៈកម្មការនីតិកម្ម និងយុត្តិធម៌ នៃរដ្ឋសភា។ គណៈកម្មការទាំង៣នេះ ត្រូវសហការគ្នាត្រួតពិនិត្យសេចក្តីព្រាងច្បាប់ NGO រួចបញ្ជូនរបាយការណ៍ មកកាន់គណៈអចិន្រ្តៃយ៍វិញ ។

ប្រធានក្រុមការងារថ្នាក់ជាតិចុះមូលដ្ឋានខេត្តតាកែវ ដឹកនាំប្រជុំត្រួតពិនិត្យការងារដែលបាន និងកំពុងធ្វើ និងលើកទិសដៅបន្តសំរាប់ដោះស្រាយបញ្ហាជូនប្រជាពលរដ្ឋ

នៅព្រឹកថ្ងៃទី២៤ ខែមិថុនា ឆ្នាំ២០១៥នេះ នៅទីស្តីការគណៈរដ្ឋមន្ត្រី ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី និងជាប្រធានក្រុមការងារថ្នាក់ជាតិចុះមូលដ្ឋានខេត្តតាកែវ បានដឹកនាំចុះត្រួតពិនិត្យការងារ ដែលបានអនុវត្តកន្លងមក និងការងារជាអាទិភាពដែលកំពុងធ្វើ ផ្តោតលើដំណើរការការងារសហគមន៍កសិកម្ម ការពង្រឹងអនុវត្តគោលនយោបាយភូមិឃុំមានសុវត្ថិភាព និងសកម្មភាពចុះជួយសម្រួលដោះស្រាយតម្រូវការជាក់ស្តែងជូនប្រជាពលរដ្ឋទៅដល់ខ្នងផ្ទះ។

ឯកឧត្តមឧបនាយករដ្ឋមន្ត្រី សុខ អាន បានជម្រុញឲ្យក្រុមការងារទាំងអស់ តាំងពីថ្នាក់ជាតិដល់ថ្នាក់ក្រោមជាតិត្រូវយកចិត្តទុកដាក់ខ្ពស់ ដោយបង្កើនសកម្មភាពចុះជួបសួរសុខទុក្ខ និងដោះស្រាយបញ្ហាដែលជាសំណូមពររបស់ប្រជាពលរដ្ឋ ឲ្យដល់ខ្នងផ្ទះនៅតាមមូលដ្ឋានភូមិឃុំ។ ជាមួយនឹងការប្រកាសអំពីការរៀបចំឲ្យដំណើរការនូវសហគមន៍កសិកម្មចំនួន ១៤សហគមន៍ នៅក្នុងស្រុកគិរីវង់ ដែលបានជួយសម្រួលដល់ប្រជាពលរដ្ឋបង្កើតបានជាក្រុមជួយគ្នាទៅវិញទៅមក ដោយពួកគាត់អាចខ្ចីប្រាក់ពីសហគមន៍ក្នុងអាត្រាការប្រាក់ទាបជាងមីក្រូហិរញ្ញវត្ថុនានានៅមូលដ្ឋាន និងប្រជាពលរដ្ឋបានទទួលនូវអត្ថប្រយោជន៍ជាច្រើនទៀតដូចជា មានលទ្ធភាពទិញជី ពូជស្រូវនិងធានានូវប្រាក់ចំណូលខ្ពស់មកវិញតាមរយៈកិច្ចសហការជាមួយសហព័ន្ធស្រូវអង្ករ ដែលបានជួយលើកកម្ពស់ជីវភាពរស់នៅរបស់ប្រជាពលរដ្ឋកាន់តែល្អប្រសើរ និងបានជម្រុញឲ្យគ្រប់ស្រុកទាំងអស់ក្នុងខេត្តតាកែវត្រូវសិក្សាដើម្បីបង្កើតសហគមន៍កសិកម្មឲ្យបានច្រើនថែមទៀត។ ក៏ប៉ុន្តែ ឯកឧត្តមឧបនាយករដ្ឋមន្ត្រី ក៏បានក្រើនរំលឹកផងដែរដល់ប្រជាពលរដ្ឋ សូមឈប់បន្តចាញ់ឧបាយកលរបស់ក្រុមប្រឆាំងមួយចំនួន ដែលដើរឃោសនាបោកប្រាស់ឲ្យប្រជាពលរដ្ឋទៅខ្ចីលុយពីស្ថាប័នមីក្រូហិរញ្ញវត្ថុមួយចំនួនដោយយកការប្រាក់ខ្ពស់ ហើយសន្យាថានៅពេលបក្សគេជាប់ឆ្នោតនឹងសងជំនួស គឺជាការបោកប្រាស់ ភូតកុហកទាំងស្រុង ពីព្រោះមីក្រូហិរញ្ញវត្ថុទាំងអស់នោះ គឺជារបស់ក្រុមហ៊ុនឯកជន មិនមែនជារបស់រដ្ឋទេ។

ឯកឧត្តមឧបនាយករដ្ឋមន្ត្រី សុខ អាន ក៏បានមានប្រសាសន៍ផងដែរអំពីការផ្សារភ្ជាប់ចលនាជាមួយប្រជាពលរដ្ឋជាពិសេស ជាមួយស្ត្រីទើបសម្រាលកូនរួច តាមរយៈការចុះចែកឃីតជាសំភារៈសម្រាប់ស្ត្រីជាមាតា និងទារកប្រើប្រាស់ ដោយក្រុមការងារថា្នក់ជាតិចុះមូលដ្ឋានសហការជាមួយ យុវជនសាខាកាកបាទក្រហមខេត្តស្រុក ឃុំ និងចូលរួមពីក្រុមយុវជនកាយរិទ្ធ សមាគមនារី យុវជនបក្ស ចុះទៅជួបសួរសុខទុក្ខដោយផ្ទាល់ជាមួយប្រជាពលរដ្ឋដោយត្រូវរៀបចំកម្មវិធីចុះឲ្យបានទៀងទាត់មួយខែម្តងៗ ធ្វើឲ្យបានទាំងជាង ១០០ឃុំ ក្នុងខេត្តតាកែវ និងស្វែងយល់ពីបញ្ហាជាក់ស្តែងជាច្រើនទៀតរបស់ប្រជាពលរដ្ឋដើម្បីយកមកពិនិត្យ និងរកលទ្ធភាពដោះស្រាយបន្ត៕

ឯកឧត្តមឧបនាយករដ្ឋមន្ត្រី សុខ អាន ប្រធានក្រុមការងារថ្នាក់ជាតិចុះមូលដ្ឋានខេត្តតាកែវ ក៏បានមានប្រសាសន៍ឲ្យដឹងផងដែរអំពីការបង្កើតបាន និងកំពុងដំណើរការនូវមូលនិធិគ្រូបង្រៀននៅកំរិតថ្នាក់ខេត្ត ស្រុក ឃុំ ដោយមិនចាំបាច់ដាក់បញ្ចាំផ្ទះ ឬដីធ្លីនោះទេ ដើម្បីសម្រួលទុក្ខធុរៈដល់គ្រូបង្រៀន គឺពួកគាត់អាចមានលទ្ធភាពខ្ចីប្រាក់ពីមូលនិធិគ្រូបង្រៀននេះយកទៅប្រើប្រាស់ដោះស្រាយការលំបាកចំពោះមុខ ដោយគ្រាន់តែសម្រេចពីគណៈគ្រប់គ្រងមូលនិធិ ដែលត្រូវបានជ្រើសរើសចេញពីនាយកសាលា និងគ្រូបង្រៀន ចំនួនប្រមាណ ៩រូប ដែលពួកគាត់ដឹងច្បាស់ពីសុខទុក្ខពិតប្រាកដរបស់គ្រូបង្រៀន និងតម្រូវការប្រឈមជាក់ស្តែង។

ក្រៅពីនេះ ឯកឧត្តមឧបនាយករដ្ឋមន្ត្រី សុខ អាន ក៏បានជម្រុញឲ្យក្រុមការងារទាំងថ្នាក់ជាតិ និងថ្នាក់ក្រោមជាតិត្រូវចូលរួមពង្រឹងការអនុវត្តនូវគោលនយោបាយភូមិឃុំមានសុវត្ថិភាព ដែលត្រូវទប់ស្កាត់ និងលប់បំបាត់ឲ្យអស់ពីមូលដ្ឋាននូវ ការចរាចរណ៍លក់ ចែកចាយគ្រឿងញៀន ការសេពគ្រឿងញៀន បញ្ហាល្បែងស៊ីសងគ្រប់ប្រភេទ បងតូចបងធំ ក្មេងទំនើង ដើម្បីធានាបាននូវភាពសុខសាន្តជូនដល់ប្រជាពលរដ្ឋ។ បន្ថែមពីលើនេះ ឯកឧត្តម ក៏បានក្រើនរំលឹកឲ្យក្រុមការងារ និងអាជ្ញាធរពាក់ព័ន្ធទាំងអស់ត្រូវយកចិត្តទុកដាក់ខ្ពស់ ក្នុងការផ្តល់សេវាសាធារណៈឲ្យបានល្អជូនដល់ប្រជាពលរដ្ឋ ដូចជាជួយសម្រួលដល់ការធ្វើឯកសារគតិយុត្តិផ្សេងៗនៅមូលដ្ឋាន ការធ្វើអត្តសញ្ញាណប័ណ្ណ អាត្រានុកូលដ្ឋាន សំបុត្រកំណើត សំបុត្រមរណៈភាព ។ល។ និងមន្ត្រីអនុវត្តការងារទាំងអស់មិនត្រូវទាលុយបន្ថែមពីប្រជាពលរដ្ឋនោះទេ តែជំនួសវិញគឺត្រូវខិតខំបំពេញការងារជូនប្រជាពលរដ្ឋ ដោយស្មោះត្រង់ និងឲ្យបានលឿនរហ័ស ទើបអាចឆ្លើយតប ទៅនឹងការអនុវត្តការផ្តល់សេវាសាធារណៈមានប្រសិទ្ធភាព។

នៅក្នុងឱកាសនេះដែរ ឯកឧត្តម ស្វាយ ស៊ីថា រដ្ឋលេខាធិការទីស្តីការគណៈរដ្ឋមន្ត្រី ប្រធានអង្គភាពព័ត៌មាន និងប្រតិកម្មរហ័ស និងជាប្រធានក្រុមការងារថ្នាក់ជាតិចុះជួយឃុំកុមាររាជា ក៏បានចែករំលែកនូវបទពិសោធន៍ការងារ វិធានការនៃការពង្រឹងការអនុវត្តសេវាសាធារណៈ ការធានានូវភាពកក់ក្តៅជូនប្រជាពលរដ្ឋដោយទប់ស្កាត់កុំឲ្យមានល្បែងស៊ីសង គ្រឿងញៀន ដូចអ្វីដែលអាជ្ញាធរមានសមត្ថកិច្ចក្នុងឃុំ នៃស្រុកបាទី បានសន្យាអនុវត្តឲ្យបានត្រឹមត្រូវ និងមានប្រសិទ្ធភាព និងលើកសំណូមពរមួយចំនួនដោយស្នើរឲ្យក្រុមការងារទាំងអស់ត្រូវចាប់ផ្តើមធ្វើការងារពីពេលនេះតទៅជាប្រចាំ និងខិតខំរកវិធីដោះស្រាយជាក់ស្តែងជូនប្រជាពលរដ្ឋដូចជាតម្រូវការទឹកប្រើប្រាស់ ការជួយដោះស្រាយទុក្ខលំបាកដល់គ្រូបង្រៀន និងកម្មករ និងគិតគូរដល់សុខទុក្ខដល់មនុស្សចាស់ជរា ដោយត្រូវខិតខំធ្វើអំពើល្អ និងដោយស្មារតីទទួលខុសត្រូវខ្ពស់បំផុតដើម្បីធានាថា ប្រជាពលរដ្ឋមានភាពជឿជាក់ និងមានទំនុកចិត្ត។

ឯកឧត្តមឧបនាយករដ្ឋមន្ត្រី សុខ អាន បានគាំទ្រយ៉ាងពេញទំហឹងនូវការលើកឡើង របស់ឯកឧត្តម ស្វាយ ស៊ីថា និងបានជំរុញឲ្យក្រុមការងារទាំងអស់ដកបទពិសោធន៍នេះ ដើម្បីពង្រឹងសមត្ថភាពខ្លួនក្នុងការអនុវត្តការងារឲ្យបានជោគជ័យ៕

អត្ថបទៈ អង្គភាពព័ត៌មាន និងប្រតិកម្មរហ័ស

សេចក្តីប្រកាសព័ត៌មានស្តីពីលទ្ឋផលនៃកិច្ចប្រជុំគណៈកម្មាធិការអចិន្រ្តៃយ៍នៃរដ្ឋសភា

សេចក្តីបំភ្លឺរបស់ទីស្ដីការគណៈរដ្ឋមន្ត្រី ចំពោះការទាមទាររបស់តំណាងរាស្រ្ត សុន ឆ័យ ឱ្យទីស្ដីការគណៈរដ្ឋមន្ដ្រី ធ្វើការសុំទោស

Tuesday, June 23, 2015

ពិធីបើកកិច្ចប្រជុំកំពូលកម្ពុជាឡាវមីយ៉ាន់ម៉ារវៀតណាមលើកទី៧

កិច្ចប្រជុំកំពូលកម្ពុជា ឡាវ មីយ៉ាន់ម៉ារ វៀតណាម (CLMV)លើកទី៧ បានប្រារព្ធពិធីបើកជាផ្លូវការនៅសាលសន្និសីទអន្តរជាតិមីយ៉ាន់ម៉ារ ក្នុងទីក្រុងណៃពិដោនៃសាធារណរដ្ឋសហភាព មីយ៉ាន់ម៉ារ កាលពីរសៀលថ្ងៃទី២២មិថុនា។

សម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ឯកឧត្តម ថងស៊ីន ថាំម៉ាវង្ស នាយករដ្ឋមន្រ្តី នៃសាធារណរដ្ឋប្រជាធិបតេយ្យប្រជាមានិតឡាវ ឯកឧត្តមង្វៀន តាន់យ៉ុង នាយករដ្ឋមន្រ្តីនៃសាធារណរដ្ឋសង្គមនិយមវៀតណាម ឯកឧត្តម ឡេ លួងមិញ អគ្គលេខាធិការអាស៊ាន ត្រូវបានការធ្វើគារវកិច្ចស្វាគមន៍យ៉ាងកក់ក្តៅបំផុត ពី ឯកឧត្តមថេន សេន ប្រធានាធិបតីនៃសាធារណរដ្ឋសហភាពមីយ៉ាន់ម៉ារ និងជាម្ចាស់ផ្ទះនៃ កិច្ចប្រជុំកំពូលកម្ពុជាឡាវមីយ៉ាន់ម៉ារវៀតណាមលើកទី៧។

នៅក្នុងសុន្ទរកថាបើកកិច្ចប្រជុំកំពូលCLMVលើកទី៧ ឯកឧត្តម ថេន សេន ប្រធានាធិបតីនៃ សាធារណរដ្ឋសហភាពមីយ៉ាន់ម៉ារ និងជាម្ចាស់ផ្ទះនៃកិច្ចប្រជុំកំពូល កម្ពុជា ឡាវ មីយ៉ាន់ម៉ារ វៀតណាម លើកទី៧ បានគូសបញ្ជាក់ពីការពិនិត្យឡើងវិញ នូវកិច្ចសហប្រតិបត្តិការ កម្ពុជា ឡាវ វៀតណាម និងការផ្លាស់ប្តូរនូវទស្សនៈវិស័យ ស្តីពីទិសដៅអនាគត នៃបណ្តាប្រទេស CLMV។

ឯកឧត្តមប្រធានាធិបតី ក៏បានថ្លែងនូវការកោតសរសើរ និងវាយតម្លៃខ្ពស់ដែលប្រទេសCLMV សំរេចបានបន្ទាប់ពីកិច្ចប្រជុំកំពូលCLMV លើកទី៦ ដែលធ្វើឡើងក្នុងប្រទេសឡាវ កាលពី ពេលកន្លងមក។

ដូចគ្នា និងសុន្ទរកថារបស់មេដឹកនាំនៃប្រទេសCLMV សម្តេចតេជោនាយករដ្ឋមន្រ្តី មាន ប្រសាសន៍ថា កិច្ចប្រជុំកំពូលលើកទី៧នេះ គឺជាឱកាសសម្រាប់យើងជាមេដឹកនាំ នៃប្រទេស CLMV ពិនិត្យឡើងវិញនូវការប្តេជ្ញាចិត្តរបស់យើង ក្នុងការពង្រឹងនិងពង្រីកកិច្ចសហប្រតិបត្តិ ការ CLMV លើវិស័យទាំង៩ រួមមាន វិស័យទេសចរណ៍ វិស័យពាណិជ្ជកម្ម និងវិនិយោគ វិស័យ អភិវឌ្ឍន៍ធនធានមនុស្ស វិស័យកសិកម្ម វិស័យឧស្សាហកម្ម វិស័យថាមពល វិស័យដឹកជញ្ជូន វិស័យបច្ចេកវិទ្យាព័ត៌មាន និងវិស័យទូរគមនាគមន៍ ក៏ដូចជាការផ្លាស់ប្តូរទស្សនៈសម្រាប់កិច្ចសហប្រតិបត្តិការរួមគ្នានាពេលអនាគត។

នៅក្នុងសុន្ទរកថាគន្លឹៈនោះដែរ សម្តេចតេជោនាយករដ្ឋមន្រ្តីមានប្រសាសន៍សង្កត់ធ្ងន់ថាឆ្នាំ២០១៥នេះ គឺជាបង្គោលគោចរមួយដ៏សំខាន់នៅក្នុងដំណើរការសមាហរណកម្មកាន់តែជិតស្និត នៅក្នុងតំបន់នោះគឺការចាប់ផ្តើមចូលជាធរមាននៃសហគមន៍សេដ្ឋកិច្ចអាស៊ាន។ សម្តេចតេជោយល់ថាតាមរយៈកិច្ចសហប្រតិបត្តិការCLMV ប្រទេសយើងទាំងបួនបានចូលរួមចំណែកយ៉ាងសកម្មនិងបានដើរតួនាទីយ៉ាងសំខាន់នៅក្នុងកិច្ចប្រឹងប្រែង ដើម្បីសម្រេចបាននូវការកសាងសហគមន៍សេដ្ឋកិច្ចអាស៊ានក្នុងឆ្នាំ២០១៥នេះ។

នៅក្នុងកិច្ចប្រជុំកំពូលCLMV លើកទី៧នេះ បណ្តាមេដឹកនាំនៃប្រទេសCLMV បានអនុម័តលើសេចក្តីថ្លែងការណ៍CLMV លើកទី៧លើវិស័យអាទិភាពសំខាន់ៗមួយចំនួន ក្នុងនោះរួមមានកិច្ចសហប្រតិបត្តិការពាណិជ្ជកម្ម និងវិនិយោគ ក្នុងនោះមេដឹកនាំនៃប្រទេសCLMV បានប្តេជ្ញាអនុវត្តកិច្ចព្រមព្រៀងទាំងឡាយដែលមានស្រាប់ក្នុងចំណោមប្រទេសCLMV ដើម្បីជម្រុញពាណិជ្ជកម្មនិងវិនិយោគ។

ជាមួយគ្នានេះ មេដឹកនាំទាំងអស់បានសំដែងនូវការកោតសរសើរចំពោះប្រទេសឡាវ និងវៀតណាម ដែលបានអនុវត្តការត្រួតពិនិត្យច្រកចេញចូលតែមួយនៅច្រកអន្តរជាតិ ដានសាវ៉ាន់ប្រទេសឡាវ និងឡាវ បានប្រទេសវៀតណាមបានទទួលជោគជ័យ និងបានឯកភាពពង្រីកការអនុវត្តការត្រួតពិនិត្យច្រកចេញចូលតែមួយនៅច្រកព្រំដែនអន្តរជាតិផ្សេងៗទៀត។

លើកិច្ចសហប្រតិបត្តិការដឹកជញ្ជូនមេដឹកនាំនៃប្រទេសCLMV បានប្តេជ្ញាធ្វើការជាមួយគ្នាឲ្យកាន់តែជិតស្និតថែមទៀត ដើម្បីពន្លឿនកិច្ចខិតខំប្រឹងប្រែងសមាហរណកម្មតំបន់អាស៊ានឲ្យមានប្រសិទ្ធភាព រួមមាន ការអនុវត្តផែនទីចង្អុលផ្លូវសម្រាប់សហគមន៍អាស៊ានមួយនិងផែនការមេ ស្តីពី ការតភ្ជាប់អាស៊ាន។ ពង្រីកកិច្ចសម្របស្រួលថែមទៀតដើម្បីប្រើប្រាស់ឲ្យអស់លទ្ធភាពនូវរបៀងសេដ្ឋកិច្ចឆ្លងកាត់ប្រទេសCLMV ក្រោមកិច្ចសហប្រតិបត្តិការមហាអនុតំបន់មេគង្គ។សម្រួលដល់សកម្មភាពឆ្លងកាត់ព្រំដែនរបស់អ្នកដំណើរ និងការដឹកទំនិញក្នុងចំណោមប្រទេសCLMV។ លើកិច្ចសហប្រតិបត្តិការក្នុងវិស័យកសិកម្មឧស្សាហកម្ម និងថាមពលមេដឹកនាំនៃប្រទេសCLMV បានឯកភាពគ្នាក្នុងការសម្រួលគ្នាទៅវិញទៅមកនូវការវិនិយោគ ពិសេសការលើកទឹកចិត្តវិនិយោគលើវិស័យសំខាន់ៗ ដូចជាការអភិវឌ្ឍឧស្សាហកម្មខ្នាតតូច និងមធ្យម ការស្រាវជ្រាវផលិតកម្ម និងកែច្នៃផលិតផលកសិកម្មអាជីវកម្ម ធនធានរ៉ែ ថាមពល ការអភិវឌ្ឍវារីអគ្គិសនី ការតភ្ជាប់បណ្តាញថាមពល ការរុករកប្រេង និងឧស្ម័ន។លើវិស័យទេសចរណ៍មេដឹកនាំនៃប្រទេសCLMV បានសាទរចំពោះលទ្ធផលនៃកិច្ចប្រជុំថ្នាក់រដ្ឋមន្រ្តីទេសចរណ៍នៃប្រទេសCLMV លើកទី២កាលពីថ្ងៃទី៦ ខែធ្នូ ឆ្នាំ២០១៣នៅខេត្តកំពត ដែលបានអនុម័តឡូហ្គោនិងបាវចនាទេសចរណ៍ CLMV និងបានផ្សព្វផ្សាយអំពីគោលដៅទេសចរណ៍CLMV ដោយប្រើប្រព័ន្ធInternet ។ លើវិស័យអភិវឌ្ឍន៍ធនធានមនុស្សមេដឹកនាំនៃប្រទេសCLM បានថ្លែងអំណរគុណចំពោះប្រទេសវៀតណាមដែលបានផ្តល់អាហារូបករណ៍ដល់ប្រទេសCLMV និងបានស្នើដល់ប្រទេសវៀតណាមបន្តផ្តល់អាហារូបករណ៍ក្នុងក្របខណ្ឌCLMV បន្តទៀត។នៅក្នុងសេចក្តីថ្លែងការណ៍រួមនោះដែរមេដឹកនាំនៃប្រទេសCLMV ក៏បានថ្លែងនូវអំណរគុណចំពោះប្រទេសជប៉ុនដែលបានផ្តល់ជំនួយចំនួន២០លានដុល្លារអាមេរិកសម្រាប់ប្រទេសCLMV ក្នុងក្របខណ្ឌកិច្ចសហប្រតិបត្តិការមេគង្គជប៉ុន។

តាមរយៈសេចក្តីថ្លែងការណ៍នេះដែរមេដឹកនាំនៃប្រទេសCLMV បានស្នើដល់អាស៊ាននិងដៃគូអភិវឌ្ឍន៍ដទៃទៀតបន្តគាំទ្រ និងធ្វើឲ្យសម្រេចនូវការអនុវត្តគម្រោងអភិវឌ្ឍCLMV ដើម្បីកាត់បន្ថយគម្លាតអភិវឌ្ឍនៅក្នុងតំបន់។

នៅក្នុងកិច្ចប្រជុំកំពូលCLMV លើកទី៧នេះ បណ្តាមេដឹកនាំនៃប្រទេសCLMVបានស្វាគមន៍ចំពោះប្រទេសវៀតណាមដែលនឹងទទួលធ្វើជាម្ចាស់ផ្ទះនៃកិច្ចប្រជុំកំពូលCLMV លើកទី៨នៅពេលខាងមុខ៕

ឯកឧត្តម ថេន សេន និងលោកជំទាវ រៀបចំពិធីលាងសាយភោជន៍ ជូនបណ្តាមេដឹកនាំ និង គណៈប្រតិភូ ACMECS

នៅរាត្រីថ្ងៃទី២២ ខែមិថុនា ឯកឧត្តម ថេន សេន ប្រធានាធិបតី នៃសាធារណរដ្ឋសហភាពមីយ៉ាន់ម៉ារ និងលោកជំទាវ បានរៀបចំពិធីលាងសាយភោជន៍ជាមហាកិត្តិយសដ៏ខ្ពស់បំផុត ជូនសម្តេច ឯកឧត្តម លោកជំទាវ ប្រមុខរដ្ឋាភិបាល និងគណៈប្រតិភូនៃប្រទេសកម្ពុជា ឡាវ វៀតណាម ថៃ និងអគ្គលេខាធិការអាស៊ាន ដែលបានអញ្ជើញចូលរួមកិច្ចប្រជុំកំពូលកម្ពុជា ឡាវ មីយ៉ាន់ម៉ារ វៀតណាម (CLMV) លើកទី៧ និងកិច្ចប្រជុំកំពូលយុទ្ធសាស្រ្ត នៃកិច្ចសហប្រតិបត្តិការសេដ្ឋកិច្ចអាយ៉េយ៉ាវ៉ាឌី ចៅប្រាយ៉ា មេគង្គ (ACMECS) លើកទី៦ នៅទីក្រុងណៃពិដោ សាធារណរដ្ឋសហភាពមីយ៉ាន់ម៉ារ។

ប្រមុខរដ្ឋាភិបាលនៃប្រទេស ACMECS ដែលមានវត្តមានអញ្ជើញចូលរួមក្នុងពិធីលាងសាយភោជន៍ជាមហាកិត្តិយសដ៏ខ្ពស់បំផុតនេះ រួមមាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ឯកឧត្តម ថងស៊ីន ថាំម៉ាវង្ស នាយករដ្ឋមន្រ្តីនៃសាធារណរដ្ឋប្រជាធិបតេយ្យប្រជាមានិតឡាវ ឯកឧត្តម ង្វៀន តាន់យ៉ុង នាយករដ្ឋមន្រ្តីនៃសាធារណរដ្ឋសង្គមនិយមវៀតណាម ឯកឧត្តមឧត្តមសេនីយ៍ ប្រាយុទ្ធ ចាន់អូចា នាយករដ្ឋមន្រ្តី នៃព្រះរាជាណាចក្រថៃ និងលោកជំទាវ ឯកឧត្តម ឡេ លួងមិញ អគ្គលេខាធិការអាស៊ាន និងលោកជំទាវ ព្រមទាំងគណៈប្រតិភូជាន់ខ្ពស់ជាច្រើនរូប។

ថ្លែងសុន្ទរកថាក្នុងពិធីលាងសាយភោជន៍ជាមហាកិត្តិយសនោះ ឯកឧត្តម ថេន សេន ប្រធានាធិបតីនៃសាធារណរដ្ឋសហភាពមីយ៉ាន់ម៉ារ បានថ្លែងនូវការកោតសរសើរ និងវាយតម្លៃខ្ពស់ជូនចំពោះសម្តេច ឯកឧត្តម លោកជំទាវ ប្រមុខរដ្ឋាភិបាល អគ្គលេខាធិការអាស៊ាន និងគណៈប្រតិភូនៃប្រទេស ACMECS ទាំងអស់ ដែលបានចំណាយពេលវេលាដ៏មានតម្លៃបំផុត អញ្ជើញមកចូលរួមដើម្បីចូលរួមកិច្ចប្រជុំកំពូលកម្ពុជា ឡាវ មីយ៉ាន់ម៉ារ វៀតណាម (CLMV) លើកទី៧ និងកិច្ចប្រជុំកំពូលយុទ្ធសាស្រ្ត នៃកិច្ចសហប្រតិបត្តិការសេដ្ឋកិច្ចអាយ៉េយ៉ាវ៉ាឌី ចៅប្រាយ៉ា មេគង្គ (ACMECS) លើកទី៦ នៅទីក្រុងណៃពិដោ សាធារណរដ្ឋសហភាពមីយ៉ាន់ម៉ារ។

ឯកឧត្តមប្រធានាធិបតីមានប្រសាសន៍បន្តថា វត្តមានរបស់សម្តេច ឯកឧត្តម និងគណៈប្រតិភូទាំងអស់នៃប្រទេស ACMECS ដែលបានអញ្ជើញមកចូលរួមកិច្ចប្រជុំដ៏មានសារៈសំខាន់នេះ គឺជាការចូលរួមចំណែកមិនអាចកាត់ថ្លៃបាន ក្នុងការកសាង និងអភិវឌ្ឍន៍តំបន់របស់យើងទាំងមូល ឲ្យកាន់តែមានភាពរីកចំរើនទ្វេឡើងថែមទៀត ពិសេសការរួមគ្នាកាត់បន្ថយនូវគម្លាតអភិវឌ្ឍន៍ក្នុងចំណោមប្រទេស ជាសមាជិកអាស៊ានចាស់ ជាមួយនិងប្រទេសជាសមាជិកអាស៊ានថ្មី តួយ៉ាងដូចជាប្រទេសកម្ពុជា ឡាវ មី យ៉ាន់ម៉ារ និងវៀតណាម។

ឯកឧត្តមប្រធានាធិបតីក៏បានប្រសិទ្ធពរជ័យ ជូនបណ្តាមេដឹកនាំទាំងអស់ សូមទទួលបាននូវសុខភាពល្អ និងមានជោគជ័យក្នុងការស្នាក់អាស្រ័យបំពេញការងារ នៅទីក្រុងណៃពិដោ សាធារណរដ្ឋសហភាពមីយ៉ាន់ម៉ារ ដើម្បីជានិម្មិតរូបនៃភាពសុខដុមរមនា និងភាពចំរើនជឿនលឿនរបស់ប្រ ជាជាតិនៃប្រទេស ACMECS ក៏ដូចជាប្រជាជាតិក្នុងតំបន់អាស៊ានទាំងមូល៕

Pages

Wednesday, June 24, 2015

សេចក្តី​ប្រកាសព័ត៌​មានស្តីពី​លទ្ឋផល​នៃកិច្ចប្រ​ជុំគណៈ​កម្មាធិការ​អចិន្រ្តៃ​យ៍នៃ​រដ្ឋសភា

Tuesday, June 23, 2015

ពិធីបើកកិច្ចប្រជុំកំពូលកម្ពុជាឡាវមីយ៉ាន់ម៉ារវៀតណាមលើកទី៧

ឯកឧត្តម ថេន សេន និងលោកជំទាវ រៀបចំពិធីលាងសាយភោជន៍ ជូនបណ្តាមេដឹកនាំ និង គណៈប្រតិភូ ACMECS

សេចក្តីប្រកាសព័ត៌មានស្តីពីលទ្ឋផលនៃកិច្ចប្រជុំគណៈកម្មាធិការអចិន្រ្តៃយ៍នៃរដ្ឋសភា