វាលស្មៅនៅបរិវេណខាងមុខប្រាសាទអង្គរ បានចាប់ផ្តើមផ្លាស់ប្ដូរដែលពីមុនមានពណ៌ក្រហមមកជាពណ៌ខៀវវិញ បន្ទាប់ពីអាជ្ញាធរជាតិអប្សរា បានរៀបចំកែលម្អ និងដាំស្មៅបន្ថែមឡើងវិញ ក្នុងន័យលើកសោភ័ណភាពបរិស្ថានក្នុងរមណីយដ្ឋានអង្គរ។
ការងាររៀបចំបរិស្ថាននេះ ត្រូវបានរៀបចំជាបន្តបន្ទាប់ដែលធ្វើឱ្យវាលស្មៅ ក៏ដូចជាបរិស្ថានជុំវិញប្រាសាទមានភាពស្រស់បំព្រង ខៀវស្រងាត់ ទាក់ទាញអារម្មណ៍ទេសចរដែលមកទស្សនាប្រាង្គប្រាសាទដ៏អច្ឆរិយៈរបស់កម្ពុជា៕
កំពង់ចាម ៖ ក្នុងកិច្ចប្រជុំសាមញ្ញលើកទី៣៣ អាណត្តិទី៣ របស់ក្រុមប្រឹក្សាខេត្តកំពង់ចាម នាព្រឹកថ្ងៃទី១៤ ខែកុម្ភៈ ឆ្នាំ២០២២ នេះ អភិបាលនៃគណៈ អភិបាលខេត្តកំពង់ចាម លោក អ៊ុន ចាន់ដា បាន ណែនាំ ដល់មន្ទីរ អប់រំ យុវជន និង កីឡា ខេត្ត ឲ្យ ធ្វើការ ត្រួតពិនិត្យ ឡើង វិញ ចំពោះ បុគ្គលគ្រូដែល បង្ខិតបង្ខំ ឬ ដាក់ គំនាប លើ សិស្សានុសិស្ស ឲ្យ ចូល រៀន គួរ ដេីម្បី យក ប្រាក់កម្រៃ បន្ថែម ដោយ លោកអភិបាលខេត្ត បាន លេីកឡេីងថា ចំពោះ ការ រៀនសូត្រ បំប៉ន ចំណេះវិជ្ជា វា ពិត ជារឿង ល្អ ត្រឹមត្រូវ ណាស់ ប៉ុន្តែចំពោះ ការ បង្ខិតបង្ខំ កូន សិស្ស វាជារឿង មិន សមស្រប ដែល បង្ក ឲ្យ មាន ការ ថ្នាំងថ្នាក់ ពី សំណាក់ អាណាព្យាបាល ព្រោះបេី គ្រូ ល្អ ពូកែមែន នោះ គឺ មាន សិស្ស គាំទ្រច្រើន ហើយ នាំគ្នា ចូល រៀន ពុំខាន មិន ចាំបាច់ បង្ខិតបង្ខំ ទេ ។
ក្នុង កិច្ចប្រជុំ នោះដែរ លោក អ៊ុន ចាន់ដា អភិបាលខេត្តកំពង់ចាម បាន ណែនាំ ដល់ ថ្នាក់ដឹកនាំ មន្ទីរ សាធារណការ និង ដឹកជញ្ជូន ខេត្ត ឲ្យ រៀបចំ បញ្ជូន ក្រុម ការងារ ចុះ ធ្វើ ការ ថែទាំ ផ្លូវ ថ្នល់ ក៏ដូចជា ការ លុប ក្រឡុក សំបុកមាន់ នៅ តាម បណ្ដោយ ដង ផ្លូវ នានា ក្នុង ក្រុង កំពង់ចាម ដែល រងការខូចខាត បន្ទាប់ ពី សាងសង់ រួច មួយ រយៈពេល ដេីម្បីសម្រួល ដល់ ការ ធ្វើ ដំណើរ ក៏ដូចជា ការ លេីក កម្ពស់ សោភ័ណ្ឌភាព នៅតាមដងផ្លូវ ផងដែរ ។
ក្នុង កិច្ចប្រជុំនេះដែរ លោក ខ្លូត ផន ប្រធាន ក្រុមប្រឹក្សា ខេត្តកំពង់ចាម បាន លើក យក សេចក្តី ព្រាង របៀបវារៈ សំខាន់ ៗ មក ពិភាក្សា រួមមាន ៖
១-ពិនិត្យ និង អនុម័ត សេចក្តី ព្រាង កំណត់ហេតុ នៃ កិច្ចប្រជុំ សាមញ្ញ លេីក ទី ៣២ អាណត្តិ ទី ៣ របស់ ក្រុមប្រឹក្សាខេត្ត ។
២-ពិនិត្យ ពិភាក្សា និង អនុម័ត លើ សេចក្ដី ព្រាង របាយការណ៍ បូកសរុប លទ្ធផល ការងារ ប្រចាំ ខែ មករា និង ទិសដៅ ការងារ ប្រចាំ ខែកុម្ភៈ ឆ្នាំ ២០២២ របស់ ក្រុម ក្រុមប្រឹក្សា ខេត្តកំពង់ចាម ។
៣- ពិនិត្យ ពិភាក្សា និង អនុម័ត លើ សេចក្ដី ព្រាង សេចក្តី សម្រេច ស្តីពី ការ កែសម្រួល និង ទទួល ស្គាល់ សមាសភាព គណៈកម្មាធិការ ពិគ្រោះយោបល់ កិច្ចការ ស្ត្រី និង កុមារ ខេត្តកំពង់ចាម ។
៤-បញ្ហា ផ្សេងៗ មួយ ចំនួន ៕
ភ្នំពេញ៖ នៅរសៀលថ្ងៃទី១៤ ខែកុម្ភះ ឆ្នាំ២០២២ រដ្ឋបាលរាជធានីភ្នំពេញ បានបើកដំណើរការសាងសង់មណ្ឌលព្យាបាលជំងឺកូវីដ១៩ តេជោសន្តិភាពរាជធានីភ្នំពេញក្រោមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន ដែលតំរូវឲ្យធ្វើការសាងសង់ឱ្យរួចរាល់ក្នុងរយះពេលមួយឆ្នាំ។
ពិធីក្រុងពាលីតាមបែបសាសនាដើម្បីសុំម្ចាស់ទឹកម្ចាស់ដីដើម្បីសាងសង់មណ្ឌលព្យាបាលជំងឺកូវីដ១៩ តេជោសន្តិភាពរាជធានីភ្នំពេញនេះ ត្រូវបានធ្វើឡើងនារសៀលថ្ងៃទី១៤កុម្ភះ ដោយមានការអញ្ជើញចូលរួមពីលោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកស្រី លោក ម៉ប់ សារិន ប្រធានក្រុមប្រឹក្សារាជធានីភ្នំពេញ។
តាមការអោយដឹងពីមន្ត្រីជំនាញរដ្ឋបាលរាជធានីភ្នំពេញ បញ្ជាក់ថា មណ្ឌលព្យាបាលជំងឺកូវីដ១៩នេះ មានឈ្មោះថាតេជោសន្តិភាពរាជធានីភ្នំពេញ ដែលត្រូវសាងសង់ចំនួន១១អាគារ លើផ្ទៃដីជាង៧ហិកតា ស្ថិតនៅក្នុងភូមិកប់ស្រូវធំ សង្កាត់គោករកា ខណ្ឌព្រែកព្នៅ ដែលនឹងត្រូវសាងសង់ឲ្យបានរួចរាល់ក្នុងរយ:ពេលរវាង១ឆ្នាំ ដើម្បីបំពេញតំរូវការចាំបាច់ក្នុងការព្យាបាលអ្នកជំងឺកូវីដ១៩ ពិសេសក្នុងរាជធានីភ្នំពេញ ក្នុងពេលដែលជំងឺផ្លូវដង្ហើមដ៏កាចសាហាវនេះ កំពុងរីករាលដាលយ៉ាងឆាប់រហ័សចូលក្នុងសហគមន៍ដោយបានបំប្លែងខ្លួនជាអូមីក្រុងនឹងមានការឆ្លងលឿនទៀតផង។
មន្ត្រីសុខាភិបាលបានបង្ហាញក្តីបារម្មណ៍ពីការរាលដាលនៃជំងឺដ៏កាចសាហាវនេះ នឹងបានអំពាវនាវដល់បងប្អូនប្រជាពលរដ្ឋអោយខិតខំយកចិត្តទុកដាក់អនុវត្តវិធានការ៣ការពារ ៣កុំឲ្យបានហ្មត់ចត់និងទៅទទួលវ៉ាក់សាំងការពារជំងឺកូវីដ.១៩ ឲ្យបានគ្រប់ដូសនិងដូសជំរុញ។
ការចាប់ផ្តើមដំណើរការសាងសង់មណ្ឌលព្យាបាលជំងឺកូវីដ.១៩នាពេលនេះ បានបង្ហាញឲ្យឃើញពីការគិតគូរបស់អាជ្ញាធររាជធានីភ្នំពេញ តាមការណែនាំរបស់សម្តេចតេជោដើម្បីផ្តល់សេវាសុខាភិបាលជូនប្រជាពលរដ្ឋយើងក្នុងដំណាក់កាលនៃការរីករាលដាលជំងឺកូវីដ.១៩ ដែលយើងមិនដឹងថាវានឹងបញ្ចប់នៅពេលណាដូច្នេះយើងត្រូវរៀនរស់តាមរបត់ថ្មីនៃសម័យកូវីដ ហើយអាគារមណ្ឌលព្យាបាលជំងឺកូវីដ.១៩ នេះក៏ជាសមិទ្ធិផលថ្មីដែលនឹងកើតចេញជារូបរាងនៅដើមឆ្នាំ២០២២នេះក្រោមការដឹកនាំរបស់លោក ឃួង ស្រេង៕
ពោធិ៍សាត់៖ លោក ចេង ឡៃ អភិបាលរងខេត្តពោធិ៍សាត់ និងជាសមាជិកគណៈកម្មការអន្តរក្រសួង នាព្រឹកថ្ងៃទី១៤ ខែកុម្ភៈ ឆ្នាំ២០២២ បានដឹកនាំក្រុមការងារចុះជួបប្រជុំជាមួយម្ចាស់ក្រុមហ៊ុន អិម ឌី អេស ហេង ហ៉ី អ៉ីនវេសម៉ិន ឯ.ក ខូអិលធីឌី នៅតំបន់សេដ្ឋកិច្ចពិសេសថ្មដា ដើម្បីពិនិត្យ និងតាមដានការប្រើប្រាស់ ហេដ្ឋារចនាសម្ព័ន្ធទូរគមនាគមន៍ ឆ្លងដែនខុសច្បាប់ នៅក្នុងភូមិសាស្ត្រស្រុកវាលវែង នៃខេត្តពោធិ៍សាត់។
នៅក្នុងពិធីនោះ ក៏មានការអញ្ជើញរួមមាន លោក អ៊ូ ឆៃ ប្រធានមន្ទីរប្រៃសណីយ៍ និងទូរគមនាគមន៍ខេត្ត លោកអភិបាលរងស្រុក មេបញ្ជាការមូលដ្ឋានកងរាជអាវុធហត្ថស្រុក មេបញ្ជាការនគរបាលការពារព្រំដែន៨២៥ មេបញ្ជាការវរៈការពារព្រំដែន៥០១ និងមន្ត្រីជំនាញមួយចំនួនទៀត។
បន្ទាប់ពីលោក ចេង ឡៃ បានលើកឡើងពីគោលបំណង នៃការចុះមកនាពេលនេះ ជូនភាគីតំណាងក្រុមហ៊ុនបានដឹងនោះរួចមក ភាគីក្រុមហ៊ុនបានជម្រាបជូនថា បច្ចុប្បន្ននេះក្រុមហ៊ុន គឺបានប្រើប្រាស់ប្រព័ន្ធទូរគមនាគមន៍ នៅក្នុងស្រុក មិនបានប្រើប្រាស់ប្រព័ន្ធទូរគមនាគមន៍ ឆ្លងដែនខុសច្បាប់ទេ។ ចំពោះបណ្ដាញខ្សែបង្កប់តាមព្រៃ ចំនួន២ខ្សែ ឆ្លងកាត់ព្រំដែន រវាងខេត្តត្រាត ប្រទេសថៃ ឆ្លងចូលខេត្តពោធិ៍សាត់ ប្រទេសកម្ពុជានោះ គឺជាខ្សែចាស់ ដែលក្រុមហ៊ុនបានឈប់ប្រើប្រាស់ តាំងពីអំឡុងខែមីនា ឆ្នាំ២០១៩មកម្ល៉េះ។
ថ្លែងក្នុងឱកាសនោះ លោក ចេង ឡៃ បានឱ្យដឹងថា បញ្ហានៃការប្រើប្រាស់ប្រព័ន្ធទូរគមនាគមន៍ ឆ្លងដែនខុសច្បាប់ គឺធ្វើឱ្យប៉ះពាល់យ៉ាងធ្ងន់ធ្ងរដល់សន្តិសុខជាតិ និងបាត់បង់ចំណូលដល់ថវិកាជាតិ ដូច្នេះហើយបានជាក្រុមការងារ ដែលចុះមកនាពេលនេះ គឺដើម្បីធ្វើការត្រួតពិនិត្យ និងតាមដានឱ្យបានច្បាស់លាស់ ជាក់លាក់ ស្របតាមគោលការរបស់ លោករដ្ឋមន្ត្រី ក្រសួងប្រៃសណីយ៍ និងទូរគមនាគមន៍ និងរដ្ឋបាលខេត្ត។ ប្រសិនបើក្នុងករណីក្រុមហ៊ុនប្រើប្រាស់មិនគ្រប់គ្រាន់ ឬរអាក់រអួល ខាងក្រុមហ៊ុនអាចជូនដំណឹងទៅអាជ្ញាធរមូលដ្ឋាន ឬទំនាក់ទំនងផ្ទាល់ទៅមន្ទីរជំនាញ ដើម្បីអន្តរាគមន៍ទៅក្រសួងឈានទៅផ្គត់ផ្គង់សេវាបន្ថែម សម្រាប់តម្រូវការប្រើប្រាស់។
លោកអភិបាលរងខេត្ត ក៏បានដឹកនាំក្រុមការងារ បន្តចុះពិនិត្យជាក់ស្ដែង ដល់ព្រំដែនរវាងខេត្តត្រាត និងខេត្តពោធិ៍សាត់ ព្រមទាំងបានកាត់ផ្ដាច់ខ្សែកាបអុបទិចចាស់ ដែលបានតភ្ជាប់ពីមុនមក ដើម្បីជាភស្ដុតាងបញ្ជាក់ថា ក្រុមហ៊ុនពិតជាបានឈប់ប្រើប្រាស់ពិតប្រាកដមែន៕
ការងារជួសជុលដំបូលទបង្ហូរទឹកខាងត្បូងរបស់ប្រាសាទនាគព័ន្ធ ដែលទទួលរងការខូចខាតធ្ងន់ធ្ងរដែលចាប់ដំណើរការពីដើមខែតុលា ឆ្នាំ២០២១មកនោះ ពេលនេះបានបញ្ចប់ការជួសជុលរួចរាល់១០០ភាគរយហើយ៕
(វ៉ាស៊ីនតោន)៖ ស្ថានការណ៍នៅឯតំបន់ព្រំដែនអ៊ុយក្រែន កាន់តែបង្កការព្រួយបារម្ភខ្លាំងឡើងពីលទ្ធភាពផ្ទុះសង្រ្គាម បន្ទាប់ពីកិច្ចសន្ទនាការទូត ជាច្រើនលើកកន្លងមកនេះ នៅតែមិនទាន់អាចបំបែកភាពជាប់គាំងបាននៅឡើយ។ បើតាមមន្ត្រីជាន់ខ្ពស់សេតវិមាន រុស្ស៊ីអាចនឹងបើក
ការឈ្លានពានលើអ៊ុយក្រែនគ្រប់ពេលវេលា រាប់ពីឥលូវរហូតដល់ថ្ងៃទី២០ ខែកុម្ភៈនេះ។
ទីក្រុងម៉ូស្គូ ក៏បានបដិសេធជាច្រើនលើកមកហើយដែរថា ខ្លួនគ្មានផែនការវាយប្រហារប្រទេសណាមួយឡើយ ហើយថាប្រទេសលោកខាងលិច កំពុងមានរោគសសៃប្រសាទ។ ប៉ុន្តែ ប្រសិនបើ ប្រធានាធិបតីរុស្ស៊ី លោក វ្ល៉ាឌីមៀ ពូទីនពិតជាបញ្ជាឱ្យរថក្រោះរុស្ស៊ីសម្រុកចូលអ៊ុយក្រែនពិតមែន នោះមិនថាតែរុស្ស៊ីទេ ដែលអាចនឹងប្រឈមមុខនឹងទណ្ឌកម្មសេដ្ឋកិច្ច សូម្បីតែអាមេរិក និងលោក ចូ បៃដិនផ្ទាល់ក៏អាចទទួលរងការខាតបង់ធ្ងន់ ផងដែរ។
*បើរុស្ស៊ីវាយអ៊ុយក្រែន, លោក បៃដិន និងអាមេរិក ក៏រងការខាតបង់ដូចគ្នា
លោក ចូ បៃដិន បានបញ្ជាក់រួចហើយថាសហរដ្ឋអាមេរិក នឹងមិនបញ្ជូនកងទ័ពចូលទៅជួយអ៊ុយក្រែន ដើម្បីធ្វើសង្រ្គាមជាមួយរុស្ស៊ីឡើយ។ អតីត ដែនដីសហភាពសូវៀតមួយនេះ មិនមែនជាសមាជិក NATO ដូច្នេះទាំងអាមេរិក និងសមាជិក NATO ផ្សេងទៀតគ្មានកាតព្វកិច្ចអ្វីតម្រូវឱ្យចូលជួយ អ៊ុយក្រែននោះដែរ។ ដូច្នេះ ជម្លោះដោយផ្ទាល់រវាងកងទ័ពអាមេរិក និងរុស្ស៊ីប្រហែលជានឹងមិនកើតឡើងទេ។
តែទោះជាយ៉ាងនេះក្ដី, លោក បៃដិន បានបញ្ជូនកងទ័ពរាប់ពាន់នាក់ទៅកាន់ប្រទេសមួយចំនួនដូចជាប៉ូឡូញ និងរូម៉ានី ដើម្បីពង្រឹងខ្សែការពារ តំបន់អឺរ៉ុបខាងកើត និងកំញើញរុស្ស៊ី។ នៅក្នុងករណីសង្រ្គាមផ្ទុះឡើងមែន, លោក បៃដិន និងសហរដ្ឋអាមេរិក រួមទាំងគណបក្សប្រជាធិបតេយ្យ របស់លោកក៏នឹងត្រូវទទួលរងការខាតបង់ដែរ។
វាអាចបង្កឱ្យមានការខឹងសម្បារនៅក្នុងស្រុក, ធ្វើឱ្យប៉ះពាល់ដល់ជោគវាសនានយោបាយរបស់លោក បៃដិន ក្នុងនាមជាប្រធានាធិបតីអាមេរិក ព្រមទាំងប្រជាប្រិយភាពរបស់បក្សប្រជាធិបតេយ្យ ខណៈការបោះឆ្នោតសភាពាក់កណ្ដាលនឹងឈានចូលមកដល់នៅថ្ងៃខែវិច្ឆិកា ឆ្នាំ២០២២នេះ។ ម្យ៉ាងវិញទៀត វាក៏អាចបំផ្លាញដល់ទំនុកចិត្តនៃបណ្ដាប្រទេសដទៃ ជាពិសេសសម្ពន្ធមិត្តលើសហរដ្ឋអាមេរិកផងដែរ ព្រោះថាបើមិនអាចការពារ អ៊ុយក្រែនដែលជាប្រទេសប្រជាធិបតេយ្យពីការឈ្លានពានរបស់រុស្ស៊ី ដែលលោកខាងលិចចាត់ទុកថាជាប្រទេសផ្ដាច់ការបានផងនោះ តើអាមេរិក និងលោកខាងលិច មានមុខមាត់អ្វី ដើម្បីនិយាយពីការការពារប្រជាធិបតេយ្យប្រឆាំងនឹងរបបផ្ដាច់ការ។
បន្ថែមពីលើនេះ សង្រ្គាមរវាងរុស្ស៊ី និងអ៊ុយក្រែន ក៏អាចបង្កឱ្យតម្លៃប្រេង ឬឧស្ម័នឡើងថ្លៃផងដែរ ជាពិសេសនៅតំបន់អឺរ៉ុបដែលនេះអាចនឹងធ្វើឱ្យ រដ្ឋាភិបាលរបស់ពួកគេត្រូវប្រឈមមុខនឹងការខឹងសម្បារ ឬបាតុកម្មតវ៉ាពីប្រជាជនខ្លួនឯង។
គួរបញ្ជាក់ថា ការស្ទង់មតិចុងក្រោយបំផុតចេញផ្សាយដោយសារព័ត៌មាន CNN កាលពីសប្ដាហ៍មុន បានបង្ហាញថាអត្រាគាំទ្រលោក បៃដិន បាន ធ្លាក់ចុះមកនៅត្រឹមតែ ៤១ភាគរយប៉ុណ្ណោះ។ ម្លោះហើយបើសិន ការឈ្លានពានណាមួយរបស់រុស្ស៊ីលើអ៊ុយក្រែនអាចនឹងកាន់តែបន្ថែមសម្ពាធលើ លោក បៃដិន ខណៈប្រវត្តិសាស្ត្របានបញ្ជាក់ថាប្រធានាធិបតីអាមេរិក ដែលស្ថិតនៅក្នុងវិបត្តិច្រើន តែងតែទទួលបរាជ័យនៅក្នុងការបោះឆ្នោត ពាក់កណ្ដាលអាណត្តិ នៅក្នុងអាណត្តិដំបូងរបស់ខ្លួន៕
ប្រភព៖ CNN (ថ្ងៃចន្ទ ទី១៤ ខែកុម្ភៈ ឆ្នាំ២០២២)
ដោយ៖ Fresh News
