ក្រសួងសុខាភិបាល ច្រានចោលការផ្សាយបំពុលថា «អ្នកគ្រូបង្រៀនម្នាក់ស្លាប់ដោយសារ ចាក់វ៉ាក់សាំងកូវីដ១៩»

 លោកស្រី ឱ វណ្ណឌីន រដ្ឋលេខាធិការ និងអ្នកនាំពាក្យក្រសួងសុខាភិបាល បានចេញមកច្រានចោលចំពោះការផ្សាយបំពុលខុសពីការពិតថា អ្នកគ្រូបង្រៀនម្នាក់ស្លាប់ដោយសារចាក់វ៉ាក់សាំងកូវីដ១៩។

ការចេញមកច្រានចោលនេះ បន្ទាប់ពីបុគ្គល សឺន ហាយ ជាខ្មែរក្រោម ដែលរត់ចេញពីកម្ពុជាទៅនៅក្រៅប្រទេសកាលពីប៉ុន្មានឆ្នាំមុននោះ បានបង្ហោះលើទំព័រហ្វេសប៊ុកថា មានគ្រូបង្រៀនម្នាក់ស្លាប់ដោយសារចាក់វ៉ាក់សាំងកូវីដ១៩។

លោកស្រី ឱ វណ្ណឌីន បានគូសបញ្ជាក់ថា រហូតមកដល់ថ្ងៃទី១៧ ខែកុម្ភៈ ឆ្នាំ២០២១នេះ ការចាក់វ៉ាក់សាំងកូវីដ១៩ មិនទាន់មានគ្រូបង្រៀនណាម្នាក់ចាក់នៅឡើយនោះទេ។

លោកស្រី ឱ វណ្ណឌីន បានអំពាវនាវឱ្យអាជ្ញាធរចាត់វិធានការតាមផ្លូវច្បាប់ចំពោះជនផ្សព្វផ្សាយព័ត៌មានបំពុលនេះផងដែរ។

សូមបញ្ជាក់ថា កញ្ញា ឆន ណារី អាយុ ២១ឆ្នាំ ជាគ្រូបង្រៀននៅខេត្តក្រចេះ។ អ្នកគ្រូបានទទួលមរណភាពដោយសារតែរលាកស្រោមខួរ ៕

ក្រសួងសុខាភិបាល បង្ហាញចំនួនអ្នកមកទទួលថ្នាំចាក់វ៉ាក់សាំងការពារជំងឺកូវីដ១៩ សរុប ២៦១១នាក់ហើយ

 របាយការណ៍របស់ក្រសួងសុខាភិបាល ដែលទទួលបាននៅយប់ថ្ងៃទី១៦ ខែកុម្ភៈ ឆ្នាំ២០២១នេះ បានបង្ហាញថា គិតចាប់ពីថ្ងៃទី១០ រហូតដល់ថ្ងៃទី១៦ ខែកុម្ភៈ ឆ្នាំ២០២១ ក្រសួងបានចាក់វ៉ាក់សាំងកូវីដ១៩ ស៊ីណូហ្វាម ជូនជនស៊ីវិលបាន ២៦១១នាក់ហើយ ក្នុងនោះស្ត្រីមានចំនួន ៨៥៥នាក់។

របាយការណ៍បានបង្ហាញថា ចំនួនអ្នកដែលស្ម័គ្រចិត្តមកចាក់វ៉ាក់សាំងសរុប ៣២១៩នាក់។ តែអ្នកដែលគ្រូពេទ្យមិនអនុញ្ញាតឱ្យចាក់មានចំនួន ៦០៨នាក់។

ក្រសួងសុខាភិបាល បានចាប់ផ្តើមចាក់វ៉ាក់សាំងការពារជំងឺកូវីដ១៩ ស៊ីណូហ្វាមរបស់ចិន ចាប់ពីថ្ងៃទី១០ ខែកុម្ភៈ ឆ្នាំ២០២១។

ដោយឡែកគិតចាប់ពីថ្ងៃទី១០ រហូតដល់ល្ងាចថ្ងៃទី១៦ ខែកុម្ភៈ ឆ្នាំ២០២១នេះ ក្រសួងការពារជាតិកម្ពុជា បានចាក់វ៉ាក់សាំងការពារជំងឺកូវីដ១៩ ស៉ីណូហ្វាម (Sinopharm) ជូនកងកម្លាំងសរុបបាន ៨,៨៩៤នាក់ហើយ។ នេះបើតាមរបាយការណ៍របស់ក្រសួងការពារជាតិដែលទទួលបាន។

របាយការណ៍បានឱ្យដឹងបន្ថែមទៀតថា ក្នុងថ្ងៃទី១៦ ខែកុម្ភៈ ឆ្នាំ២០២១នេះ ក្រុមវ៉ាក់សាំងកូវីដ១៩ ក្រសួងការពារជាតិ បានចាក់វ៉ាក់សាំងជូននាយទាហាន នាយទាហានរង និងពលទាហាន ចំណុះឱ្យក្រសួងការពារជាតិ បានសរុបចំនួន ៣៩២៥នាក់ ៕

ក្រសួងសុខាភិបាលបន្តប្រកាសថា មិនមានរកឃើញអ្នកឆ្លងជំងឺកូវីដ១៩ ថ្មីនោះទេ ខណៈអ្នកជំងឺម្នាក់ជាសះស្បើយ

 ក្រសួងសុខាភិបាល នៅព្រឹកថ្ងៃទី១៧ ខែកុម្ភៈ ឆ្នាំ២០២១នេះ បានចេញសេចក្តីប្រកាសព័ត៌មានបញ្ជាក់ថា មិនមានរកឃើញអ្នកឆ្លងជំងឺកូវីដ១៩ថ្មីនោះទេ ខណៈអ្នកជំងឺម្នាក់ត្រូវបានព្យាបាលជាសះស្បើយ និងអនុញ្ញាតឲ្យចេញពីមន្ទីរពេទ្យ។

គិតទាំងថ្ងៃនេះ រយៈពេល៥ថ្ងៃជាប់គ្នាហើយ ដែលក្រសួងមិនមានរកឃើញអ្នកឆ្លងជំងឺកូវីដ១៩ ថ្មីនោះកម្ពុជា។

អ្នកជំងឺដែលទើបព្យាបាលជាសះស្បើយជា ស្ត្រីជនជាតិខ្មែរ អាយុ៤០ឆ្នាំ ស្នាក់នៅភូមិព្រៃតាប ឃុំរោងគោ ស្រុកក្រឡាញ់ ខេត្តសៀមរាប បានធ្វើដំណើរមកពីប្រទេសថៃ មកដល់កម្ពុជា នៅថ្ងៃទី២៧ ខែមករា ឆ្នាំ២០២១ ត្រូវបានអនុញ្ញាតឲ្យចេញពីមន្ទីរពេទ្យបង្អែក ខេត្តបន្ទាយមានជ័យ។

សូមជម្រាបថា គិតត្រឹមម៉ោង៧៖០០នាទីព្រឹកថ្ងៃទី១៧ ខែកុម្ភៈ ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ សរុបចំនួន ៤៧៩នាក់ ក្នុងនោះអ្នកជាសះស្បើយចំនួន ៤៧០នាក់ និងអ្នកជំងឺ០៩នាក់ កំពុងសម្រាកព្យាបាលនៅមន្ទីរពេទ្យ ៕

លោក គួច ចំរើន លើកទឹកចិត្តក្រុមកីឡាករបាល់ទាត់ឱ្យខិតខំហ្វឹកហាត់ ដើម្បីប្រកួតដណ្តើមពានរង្វាន់

 ព្រះសីហនុ៖ នៅថ្ងៃទី១៥ ខែកុម្ភៈ ឆ្នាំ២០២១ លោក គួច ចំរើន អភិបាល នៃគណៈអភិបាលខេត្តព្រះសីហនុ អញ្ជើញសំណេះសំណាលជាមួយក្រុមកីឡាករបាល់ទាត់ខេត្តព្រះសីហនុ ដើម្បីចូលរួមប្រកួតដណ្តើមពានរង្វាន់លោកនាយករដ្ឋមន្រ្តី ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា លើកទី១៥ រដូវកាលឆ្នាំ២០២១ នៅរាជធានីភ្នំពេញ ដោយមានការចូលរួមពីលោកអភិបាលរងខេត្ត លោកនាយករដ្ឋបាលសាលាខេត្ត ប្រធានមន្ទីរ អង្គភាព ពាក់ព័ន្ធ និងលោកឧកញ៉ាជាសប្បុរសជន។

លោកស្រី អ៊ុច សោភា ប្រធានមន្ទីរ អប់រំ យុវជន និងកីឡាខេត្តព្រះសីហនុ បានរាយការណ៍ថា មន្ទីរបានសហការជាមួយក្លឹបបាល់ទាត់ទាំង៤ក្រុម ធ្វើការប្រកួតជ្រើសរើសកីឡាករឆ្នើម ដើម្បីត្រៀមចូលរួមប្រកួតបាល់ទាត់ដណ្ដើមពានរង្វាន់លោកនាយករដ្ឋមន្រ្តី ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា លើកទី១៥ រដូវកាលឆ្នាំ២០២១ ។

លោក គួច ចំរើន អភិបាល នៃគណៈអភិបាលខេត្តព្រះសីហនុ មានប្រសាសន៍សំណេះសំណាលជាមួយក្រុមកីឡាករបាល់ទាត់ខេត្តព្រះសីហនុ ត្រៀមកីឡាករចូលរួមការប្រកួតនៅរាជធានីភ្នំពេញ ហើយអ្វីសំខាន់យើងចង់ឃើញខេត្តព្រះសីហនុរបស់យើងមានកីឡាចូលរួមប្រកួត។ យើងបានជ្រើសរើសកីឡាករចេញពីក្លឹបទាំងបួន មានក្លឹបបាល់ទាត់ស្នងការនគរបាលខេត្ត ក្រុមកីឡាករកំពង់ផែស្វយ័តក្រុងព្រះសីហនុ ក្រុមកីឡាករក្តាមថ្ម និងក្រុមកីឡាករខ្យល់ព្យុះហើយយើងបានរៀបចំការប្រកួតជ្រើសរើសយកកីឡាករបានចំនួន ៣០នាក់ ដែលមានកាយសម្បទា សមត្ថភាព ទេពកោសល្យ។ យើងបានធ្វើការហ្វឹកហាត់ច្របាច់បញ្ជូលគ្នា ដូច្នេះយើងត្រូវប្តូរឥរិយាបថស្វែងយល់ចិត្តគ្នា និងបន្តហ្វឹកហាត់ដើម្បីចូលរួមប្រកួតនៅខេត្តកំពតនៅថ្ងៃទី១៧ ខែកុម្ភៈ ឆ្នាំ២០២១ និងត្រៀមបន្តទៅចូលរួមប្រកួតនៅរាជធានីភ្នំពេញ ដូច្នេះកីឡាករត្រូវប្រឹងប្រែងប្រកួតឱ្យទទួលបានជោគជ័យសម្រាប់ប្រជាជន និងខេត្តព្រះសីហនុរបស់យើង ។

ក្នុងឱកាសនោះលោកអភិបាលខេត្ត បានបញ្ជាក់ថា បើកីឡាករយើងប្រកួតឈ្នះ ក្នុងមួយប្រកួតទទួលបានថវិកា ២លានរៀល បើស្មើគ្នាទទួលបានថវិកា ១លានរៀល ចំពោះការទាត់ចូលមួយគ្រាប់ទទួលបានថវិកា ១០០ដុល្លាអាមេរិក ក្នុងនោះក៏បានឧបត្ថម្ភថវិកាដល់កីឡាករ ៣០នាក់ ទៅចូលរួមប្រកួតនៅខេត្តកំពត ក្នុងម្នាក់ៗថវិកា ១០០ដុល្លាអាមេរិក ៕

លោក ប្រាក់ សំអឿន ៖មន្ត្រីអង្គភាពច្រកចេញចូលតែមួយគ្រប់រាជធានី-ខេត្ត ត្រូវខិតខំផ្តល់សេវាប្រកបដោយតម្លាភាព និងប្រសិទ្ធភាព

 កំពង់ធំ៖ នៅថ្ងៃទី១៥ ខែកុម្ភៈ ឆ្នាំ២០២១ លោក ប្រាក់ សំអឿន អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ នឹងលោក សុខ លូ អភិបាលខេត្តកំពង់ធំ អញ្ជើញជាអធិបតីភាពដឹកនាំកិច្ចប្រជុំពិភាក្សាបិទបូកសរុបលទ្ធផលការងារឆ្នាំ២០២០ និងលើកទិសដៅសកម្មភាពឆ្នាំ២០២១ របស់អង្គភាពច្រកចេញចូលតែមួយ រាជធានី-ខេត្ត ដោយមានការអញ្ជើញចូលរួមពីថ្នាក់ដឹកនាំអគ្គនាយកដ្ឋានរដ្ឋបាល នាយករដ្ឋបាលសាលារាជធានី ខេត្ត និងប្រធានអង្គភាពច្រកចេញចូលតែមួយរាជធានី ខេត្តទូទាំងប្រទេស សរុបប្រមាណជាង ៦០នាក់។

នាឱកាសនោះផងដែរដែរ លោក ប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ បានថ្លែង លើកទឹកចិត្តដល់មន្ត្រីអង្គភាពច្រកចេញចូលតែមួយ គ្រប់រាជធានី-ខេត្តទាំងអស់ បង្កើនសាមគ្គីភាព ឯកភាពផ្ទៃក្នុង សូមខិតខំធ្វើការងារ បម្រើសេវាសាធារណៈជូនប្រជាពលរដ្ឋឲ្យបានល្អប្រសើរ បានទាន់ពេលវេលា និងប្រកបដោយតម្លាភាព ប្រសិទ្ធភាព ព្រមទាំងលើកឡើង អំពីលទ្ធផលនៃការពិភាក្សា និងស្វែងរកដំណោះស្រាយនូវបញ្ហាប្រឈម ដើម្បីដាក់ទិសដៅ ធ្វើការសម្រេចលទ្ធផលការងារនៅក្នុងឆ្នាំ២០២១ អោយមានដំណើរការល្អប្រសើរបន្ថែមទៀត ដែលជាការរួមចំណែកសម្រាប់ជួយដល់រាជរដ្ឋាភិបាល ក៏ដូចជារដ្ឋបាលថ្នាក់ក្រោមជាតិ។

លោក សុខ លូ អភិបាលខេត្តកំពង់ធំ មានប្រសាសន៍លើកឡើងថា ថ្វីត្បិតតែអង្គភាពច្រកចេញចូលតែមួយរាជធានីខេត្ត ទើបតែដំណើរការរយៈពេលខ្លី បានជួបប្រទះនូវការលំបាកខ្លះៗ ក៏ពិតមែន នៅតែដំណើរការទៅមុខ ដោយប្រជាពលរដ្ឋមានការគាំទ្រពេញចិត្តនូវការផ្ដល់សេវាសាធារណៈបានឆាប់រហ័ស នឹងមានភាពងាយស្រួលជាងមុន៕

អភិបាលខេត្តកោះកុង ដាក់ចេញវិធានការណ៍ដ៏តឹងរ៉ឹងលើការត្រួតពិនិត្យអ្នកឆ្លងកាត់ព្រំដែន និងការធ្វើចត្តាឡីស័ក

 កោះកុង៖ នៅថ្ងៃទី១៥ ខែកុម្ភៈ ឆ្នាំ២០២១ លោកស្រី មិថុនា ភូថង អភិបាល នៃគណៈអភិបាលខេត្ត បានដឹកនាំប្រជុំគណ:បញ្ជាការឯកភាពរដ្ឋបាលខេត្ត ដើម្បីត្រួតពិនិត្យការអនុវត្តការងារប្រយុទ្ធនឹងជំងឺកូវីដ-១៩ និងរៀបចំការពង្រឹងការត្រួតពិនិត្យអ្នកឆ្លងកាត់តាមព្រំដែន និងការធ្វើចត្តាឡីស័ក។

នៅក្នុងកិច្ចប្រជុំ លោកស្រីអភិបាលខេត្ត បានផ្តល់ការណែនាំ ដូចខាងក្រោម៖
១-សមត្ថកិច្ចពាក់ព័ន្ធ ត្រូវរៀបចំផែនការពង្រឹងការងារឆ្លងដែនដោយខុសច្បាប់របស់ប្រជាពលរដ្ឋនៅតាមព្រំដែនប្រទេសជិតខាង ពិសេសតាមបណ្តោយព្រំដែនខេត្ត ទាំងព្រំដែនគោក និងព្រំដែនទឹក។
២-ត្រូវអនុវត្តឲ្យមានប្រសិទ្ធភាពខ្ពស់ការងារគ្រប់គ្រងប្រជាពលរដ្ឋក្នុងមណ្ឌលធ្វើចត្តាឡីស័ក ដើម្បីទប់ស្កាត់ការចម្លងជំងឺកូវីដ-១៩ ចូលក្នុងសហគមន៍។
៣-អាជ្ញាធរមូលដ្ឋានត្រូវធ្វើការផ្សព្វផ្សាយឲ្យបានទូលំទូលាយ នូវគោលការណែនាំរបស់រាជរដ្ឋាភិបាល និងក្រសួងពាក់ព័ន្ធនានា អំពីវិធានការប្រយុទ្ធប្រឆាំងជំងឺកូវីដ-១៩៕

ពិធីស្រោចស្រពសុគន្ធវារី និងពិធីបញ្ចុះបឋមសិលាកសាងប្រាសាទដំកល់ព្រះសពព្រះមហាថេរៈបុញ្ញនន្ទោ សម បុណ្យសាន្ត

កំពង់ឆ្នាំង៖ នៅថ្ងៃទី១៥ ខែកុម្ភៈ ឆ្នាំ២០២១ សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា សព្វព្រះរាជហឫទ័យយាងក្នុងពិធីស្រោចស្រពសុគន្ធវារី ប្រគេនដល់ព្រះគ្រូវិចិត្រសីលញាណ ខុន ឆុន ឱ្យឡើងទីជា ព្រះមុនីសីលវង្សា ព្រះរាជាគណៈថ្នាក់កិត្តិយស និងពិធីបញ្ចុះបឋមសិលាកសាងប្រាសាទដំកល់ព្រះសពព្រះមហាថេរៈបុញ្ញនន្ទោ សម បុណ្យសាន្ត នៅវត្តវារីផាសុខារាម ហៅវត្តទឹកជុំ ឬអង្គជុំ ស្ថិតនៅស្រុកទឹកផុស ខេត្តកំពង់ឆ្នាំង។

ក្នុងពិធីក៏មានការអមព្រះរាជដំណើរដោយសម្តេចព្រះមហាអរិយវង្ស បណ្ឌិត ឃី សុវណ្ណរតនា ព្រះសាកលវិទ្យាធិរងទទួលបន្ទុកសាកលវិទ្យាល័យព្រះសីហនុរាជ ព្រះសិរីសម្មតិវង្ស ទេព ផាន ព្រះរាជាគណៈថ្នាក់ត្រី ជាព្រះបាឡាត់គណរាជធានីភ្នំពេញ ព្រះឥន្ទសិរីវង្ស តាត វិបុល ព្រះរាជាគណៈថ្នាក់កិតិ្តយស និងមានការអញ្ជើញចូលរួមពីឧត្តមសេនីយ៍ឯក ហ៊ុន ជា, លោកស្រី ដោក សុទ្ធា ទីប្រឹក្សារាជរដ្ឋាភិបាល លោក ឡុច វណ្ណារ៉ា សមាជិកក្រុមប្រឹក្សាខេត្ត លោក លោកស្រីជាថ្នាក់ដឹកនាំខេត្ត អាជ្ញាធរស្រុក សមាគមន៍នារី ស.ស.យ.ក.ស្រុក អាចារ្យ គណៈកម្មការ ប្រជាពលរដ្ឋ។

ក្នុងឱកាសនោះ សម្តេចរួមនឹងថ្នាក់ដឹកនាំបាននិមន្ត និង ចែកអំណោយជូនដល់គ្រួសារងាយរងគ្រោះ ក្នុងឱកាសនោះចំនួន ២៦គ្រួសារដោយមួយគ្រួសារទទួលបាន៖ អង្ករ ២៥ គីឡូក្រាម, មី ១កេស, ទឹកត្រី ១យួរ, ទឹកស៊ីអ៊ីវ ១យួរ, ត្រីខ ១ យួរ, សារុង២ និងថវិកាក្នុងមួយគ្រួសារចំនួន ៥ ម៉ឺនរៀល ៕