លោកនាយករដ្ឋមន្រ្តី ហ៊ុន សែន អញ្ជើញចូលរួមកិច្ចប្រជុំកំពូលក្រៅផ្លូវការអាស៊ាន-អូស្រ្តាលីក្នុងពិធីពិសារអាហារការងារពេលព្រឹក

នៅព្រឹកថ្ងៃទី១៤ ខែវិច្ឆិកា ឆ្នាំ២០១៨ ប្រមុខរដ្ឋ/ប្រមុខរដ្ឋាភិបាល នៃប្រទេសអាស៊ាន បានអញ្ជើញចូលរួមក្នុងពិធីបើកកិច្ចប្រជុំកំពូលក្រៅផ្លូវការអាស៊ាន-អូស្រ្តាលី ក្នុងពិធីពិសារអាហារការងារពេលព្រឹក។ ប្រមុខរដ្ឋ/ប្រមុខរដ្ឋាភិបាល នៃប្រទេសអាស៊ាន បានស្វាគមន៍យ៉ាងកក់ក្តៅចំពោះលោក ស្កុត ម៉ូសីស សុន (Scott Morrison) ដែលទទួលបានការជ្រើសតាំងជានាយករដ្ឋ មន្រ្តីថ្មីរបស់ប្រទេសអូស្រ្តាលី និងដែលបានអញ្ជើញចូលរួមកិច្ចប្រជុំកំពូលក្រៅផ្លូវការអាស៊ាន-អូស្រ្តាលី នាពេលនេះ។ មេដឹកនាំនៃប្រទេសអាស៊ានក៏បានធ្វើការកត់សំគាល់នូវលទ្ធផលជាផ្លែផ្កានៃកិច្ចប្រជុំកំពូលពិសេសអាស៊ាន-អូស្រ្តាលី កាលពីខែមីនា ឆ្នាំ២០១៨ នៅទីក្រុងស៊ីដនី ដែលយើងទាំងអស់គ្នា ត្រូវបន្តជំរុញការអនុវត្តដោយពេញលេញ និងប្រកបដោយប្រសិទ្ធភាពបំផុត។

មេដឹកនាំនៃប្រទេសអាស៊ាន និងអូស្រ្តាលី មានសេចក្តីរំភើបចំពោះកំណើននៃទំហំពាណិជ្ជកម្ម រវាងតំបន់ទាំងពីរដោយគិតត្រឹមឆ្នាំ២០១៧ ទំហំពាណិជ្ជកម្មអាស៊ាន និងអូស្រ្តាលី មានទំហំ ៥៩ប៊ីលានដុល្លាអាមេរិក កើនជាង១១,៧% ប្រៀបធៀបនិងឆ្នាំ២០១៦ ហើយការវិនិយោគ ដោយផ្ទាល់របស់អូស្រ្តាលីមកកាន់តំបន់អាស៊ានកើនឡើងប្រមាណ ៣៣,៤%។ នេះគឺជាសញ្ញាវិជ្ជមានមួយដែលអាស៊ាន និងអូស្រ្តាលី បន្តជំរុញនិងគាំទ្របន្ថែមទៀតតាមរយៈការលើកកម្ពស់សកម្មភាពនៃការផ្សព្វផ្សាយធុរកិច្ច និងការពង្រឹងការតភ្ជាប់រវាងវិស័យឯកជន និងឯកជន ក៏ដូចជាវិស័យសាធារណៈ និងឯកជន ដោយផ្តោតជាពិសេសលើសហគ្រាសធុនតូច និងមធ្យម។ នៅក្នុងកិច្ចប្រជុំកំពូលក្រៅផ្លូវការនោះដែរ បណ្តាមេដឹកនាំអាស៊ានក៏បានស្វាគមន៍ចំពោះការពង្រីកផែនការកូឡំបូថ្មីរបស់អូស្រ្តាលីដល់បណ្តាប្រទេសសមាជិកអាស៊ានទាំងអស់ដើម្បីលើកកម្ពស់ថែមទៀតនូវការតភ្ជាប់រវាងប្រជាជននិងប្រជាជនឱ្យកាន់តែទូលំទូលាយដោយជួយគាំទ្រដល់សិស្ស និស្សិតអូស្រ្តាលី មកសិក្សានិងអនុវត្តការងារនៅក្នុងបណ្តាប្រទេសសមាជិកអាស៊ាន។

ដូចគ្នានឹងបណ្តាមេដឹកនាំអាស៊ាន-អូស្រ្តាលី លោកនាយករដ្ឋមន្រ្តី ហ៊ុន សែន បានធ្វើបទអន្តរាគមន៍ក្នុងកិច្ចប្រជុំកំពូលក្រៅផ្លូវការអាស៊ាន-អូស្រ្តាលី ដោយបានសង្កត់ធ្ងន់ពីសារៈសំខាន់ នៃទំនាក់ទំនងនិងកិច្ចសហប្រតិបត្តិការរវាងតំបន់ទាំងពីរ អាស៊ាន-អូស្រ្តាលី ពិសេសការ ជំរុញកំណើនសេដ្ឋកិច្ចពាណិជ្ជកម្ម និងការតភ្ជាប់ពីគ្រប់ផ្នែកទាំងអស់រវាងអាស៊ាននិងអូស្រ្តាលី។ នៅក្នុងកិច្ចប្រជុំក្រៅផ្លូវការនោះដែរ កិច្ចប្រជុំ បានឯកភាពគ្នាក្នុងការឈានទៅចេញសេចក្តីប្រកាសព័ត៌មានរបស់ប្រធានកិច្ចប្រជុំក្រៅផ្លូវការ និងពិធីទទួលទានអាហារការងារពេលព្រឹកនៃមេ ដឹកនាំអាស៊ាន-អូស្រ្តាលី៕

មន្រ្តីជាន់ខ្ពស់បក្សប្រឆាំង រិះគន់អំពើអគុណធម៌របស់ទណ្ឌិត សម រង្ស៉ី ដែលយកអតីតគូសត្រូវរបស់ខ្លួន គឺលោកកឹម សុខា ធ្វើជាល្បែងភ្នាល់

លោក គង់ បូរ៉ា កូនប្រុសបង្កើតរបស់លោក គង់ គាំ អតីតតំណាងរាស្រ្តខ្មោចបក្សសង្រ្គោះជាតិ បានផ្ញើសារ​លើបណ្តាញផ្សព្វផ្សាយសង្គម ហាក់បីដូចជាចង់ប្រដៅទៅ ទណ្ឌិត សម រង្ស៊ី ដែលធ្លាប់ជាមេរបស់ខ្លួន ថា បានយកសេរីភាព និងជីវិតនយោបាយរបស់ លោក កឹម សុខា ទៅធ្វើជាល្បែងភ្នាល់ ដែលទង្វើនោះ លោកថា ជាអំពើមិនសមរម្យ។ មិនត្រឹមតែប្រដៅចំពោះលោក សម រង្ស៊ីប៉ុណ្ណោះទេ លោក គង់ បូរ៉ា ក៏បានឆ្លៀតទះកំផ្លៀងអតីតគូជម្លោះរបស់ខ្លួន គឺលោក អេង ឆៃអ៊ាងផងដែរថាជាអ្នកញៀនល្បែង ស្រីញី និងវក់ជាមួយនឹងការភ្នាល់ ញុះញង់ និងមេគំនិតនៅពីក្រោយការជំរុញឲ្យ សម រង្ស៊ី ហ៊ានភ្នាល់ជាមួយលោក ហ៊ុន សែន ។ ប៉ុន្តែ ទោះយ៉ាងណា លោក គង់ បូរ៉ា បានចំអកដល់មនុស្សមួយចំនួនថា បានចាញ់បោក លោក សម រង្ស៉ី ក្នុងរឿងនេះ ដោយសង្ឃឹមថា អតីតគណបក្សសង្រ្គោះជាតិ នឹងរស់ឡើងវិញ។

ដោយឡែក លោក សុខ សុវណ្ណ វឌ្ឍនាសាពង្ស ប្រធានគណបក្សខ្មែរក្រោក (KRP) យល់ថា ទង្វើរបស់លោកសម រង្ស៊ី ដែលបានបបួលលោកនាយករដ្ឋមន្រ្តី ហ៊ុន សែន យកជីវិតវាសនានយោបាយលោក កឹម សុខា មកភ្នាល់បែបនេះវាជាភាព «អសីលធម៌នយោបាយ» ហើយលោកបានបន្ថែមថា ការបកស្រាយរបស់ប្រមុខរាជរដ្ឋាភិបាលគឺជារឿងត្រឹមត្រូវដោយសារលោកពុំមានបុព្វសិទ្ធិក្នុងការស្នើសុំការលើកលែងទោសពីព្រះមហាក្សត្រឡើយ បើសាលក្រមមិនទាន់ស្ថាពរ។

កាលពីពេលកន្លងទៅនេះ លោក ហ៊ុន កុសល ដែលជាអ្នកគាំទ្រសកម្មមួយលើលោក សម រង្ស៉ី កន្លងមក ក៏បានចេញមុខប្រឆាំងនឹងយុទ្ធសាស្រ្តចុងក្រោយរបស់ លោក សម រង្ស៉ី ដែលបានយកសិទ្ធិសេរីភាពរបស់ លោក កឹម សុខា ធ្វើជាកម្មវត្ថុនៃការភ្នាល់ជាមួយលោកនាយករដ្ឋមន្រ្តី ហ៊ុន សែន ផងដែរ ប៉ុន្តែលោកថា លោកប្រកាន់ជំហរ មិនគាំទ្រសារនយោបាយរបស់លោក សម រង្ស៊ីជាដាច់ខាត ដែលបបួលលោកនាយករដ្ឋមន្រ្តី ហ៊ុន សែន ភ្នាល់គ្នាដាក់សេរីភាពព្រោះធ្វើឱ្យប៉ះពាល់ស្មារតីសាមគ្គីរបស់បក្សសង្រ្គោះជាតិ។ និងបានប្រកាសជំទាស់ជាមួយ លោក សម រង្ស៊ី ហើយចាត់ទុកថា យុទ្ធសាស្រ្តភ្នាល់ គឺជាយុទ្ធសាស្រ្តខុសឆ្គង»។

គួរបញ្ជាក់ថា លោក សម រង្ស៉ី កាលពីថ្ងៃទី០៩ ខែវិច្ឆិកា ឆ្នាំ២០១៨ កន្លងទៅ បានយកជីវិតនយោបាយរបស់ លោក កឹម សុខា ទៅបបួលលោកនាយករដ្ឋមន្រ្តី ហ៊ុន សែន ភ្នាល់គ្នា។ ដោយអះអាងថា សម្ពាធបរទេសនឹងធ្វើឱ្យលោកនាយករដ្ឋមន្រ្តី ហ៊ុន សែន លើកលែងទោសដល់ លោក កឹម សុខានោះ លោក សម រង្ស៉ី បានកំណត់ការភ្នាល់ថា «បើសិនមានការដោះលែង កឹម សុខា នៅថ្ងៃទី២៩ ខែធ្នូ ឆ្នាំ២០១៨ ឬយ៉ាងយូរថ្ងៃទី០៣ ខែមីនា ឆ្នាំ២០១៩ខាងមុខនោះ លោកនាយករដ្ឋមន្រ្តី ហ៊ុន សែន ត្រូវតែចុះចេញពីតំណែង តែបើសិនមិនមានការដោះលែងទេ លោក សម រង្ស៊ី ស្ម័គ្រចិត្តប្រឈមចំពោះមុខច្បាប់ដោយចូលឱ្យសមត្ថកិច្ចចាប់ខ្លួន ដើម្បីអនុវត្តទោសក្នុងពន្ធនាគារ។ ភ្លាមៗឆ្លើយតបនឹងការបបួលនេះ នៅព្រលប់ថ្ងៃទី០៩ ខែវិច្ឆិកា ឆ្នាំ២០១៨ ដដែលនោះ លោកនាយករដ្ឋមន្រ្តី ហ៊ុន សែន បានប្រកាសតាមរយៈបណ្តាញព័ត៌មាន Fresh News ដោយសម្រេចភ្នាល់ជាមួយលោក សម រង្ស៊ី តែម្តង ដោយបានកំណត់ថា ប្រសិនសម រង្ស៊ី ចាញ់ក្នុងការភ្នាល់លើកនេះ ត្រូវហ៊ានចូលឱ្យចាប់ខ្លួនដើម្បីអនវុត្តទោស បន្ទាប់ពីបញ្ចប់ការភ្នាល់ភ្លាមៗ។

ការដាក់ចេញយុទ្ធសាស្រ្តភ្នាល់របស់ លោក សម រង្ស៉ី បានធ្វើឱ្យមានប្រតិកម្មប្រឆាំងយ៉ាងខ្លាំងពី អ្នកគាំទ្ររបស់ លោក កឹម សុខា នៅឯក្រៅ និងក្នុងប្រទេស ដែលក្នុងនោះមានទាំងក្រុមគ្រួសាររបស់លោក និងមេធាវីរបស់លោកថែមទៀតផង។ បើតាមអ្នកច្បាប់ ស្ថិតក្នុងដំណាក់កាលនេះ នាយករដ្ឋមន្រ្តី ពុំមានសិទ្ធិសម្រេចស្នើលើកលែងទោសដល់លោក កឹម សុខានោះទេ ដោយសារតែលោក កឹម សុខា កំពុងស្ថិតនៅក្នុងដំណាក់កាលស៊ើបអង្កេត មិនទាន់ក្លាយទៅជាទណ្ឌិត ដែលមានសាលក្រមស្ថាពរ ឬដែលត្រូវស្នើទៅព្រះមហាក្រត្សដើម្បីការលើកលែងទោសបានឡើយ៕

យោងតាមច្បាប់ជាធរមានទោះ១០០០ឆ្នាំទៀត ក៏មិនអាចកើតបានដែរ សម្រាប់ការលើកលែងទោសឲ្យអ្នកដែលមិនមានទោស ឬតុលាការមិនទាន់កាត់ឲ្យមានទោស

លោកនាយករដ្ឋមន្រ្តី ហ៊ុន សែន នៅព្រឹកថ្ងៃទី១៤ ខែវិច្ឆិកា ឆ្នាំ២០១៨នេះ បានថ្លែងផ្តល់កិច្ចសម្ភាសដល់លោក លឹម ជាវុត្ថា នាយកប្រតិបត្តិអង្គភាពព័ត៌មាន Fresh News ឲ្យដឹងយ៉ាងដូច្នេះថា «យោងតាមច្បាប់ជាធរមានទោះ១០០០ឆ្នាំទៀត ក៏មិនអាចកើតបានដែរ សម្រាប់ការលើកលែងទោសឲ្យអ្នកដែលមិនមានទោស ឬតុលាការមិនទាន់កាត់ឲ្យមានទោស ឬកាត់ហើយតែសាលក្រមមិនទាន់ចូលជាស្ថាពរ កុំថាឡើយត្រឹមសេះដុះស្នែង។

ជុំវិញរឿងនេះដែរ លោកនាយករដ្ឋមន្ត្រី បានសង្កត់ធ្ងន់ថា មនុស្សដែលចូលចិត្តវាយប្រហារលោក គឺគេអត់ចេះស្តាប់ និងសិក្សាពីសំដី ដែលបង្កប់ដោយន័យ នយោបាយនិងផ្លូវច្បាប់ដែលរូបលោកបាននិយាយនោះទេ ដូចនេះទើបគេរៀបអន្ទាក់ដាក់លោក តែពេលនេះគេដើរជាន់អន្ទាក់ខ្លួនឯងហើយ។ លោក ហ៊ុន សែន បន្តថា «ដោយសារការភ្នាល់លើកនេះ ជាការភ្នាល់ដាក់ជិវិតនយោបាយ ដែលអ្នកបបួលខ្ញុំភ្នាល់គឺជាជនពាលខាងនយោបាយ ដូចនេះតម្រូវឲ្យខ្ញុំត្រូវមានភស្តុតាង និងសូមស្នើឲ្យមេធាវីខ្ញុំរក្សាទុកភស្តុតាងនេះតាមផ្លូវច្បាប់»។

គួរបញ្ជាក់ថាការប្រកាសផ្តាំផ្ញើរបស់លោកនាយករដ្ឋមន្ត្រី ហ៊ុន សែន ទៅកាន់ក្រុមអ្នកច្បាប់ និងមេធាវីដែលមាននិន្នាការប្រឆាំងបែបនេះ បានធ្វើឡើងបន្ទាប់ពីក្រុមអ្នកច្បាប់ និងមេធាវីទាំងនោះ បានលើកឡើងតាមរយៈវិទ្យុអាស៊ីសេរី​ នៅយប់ថ្ងៃទី១៣ ខែវិច្ឆិកា ឆ្នាំ២០១៨ថា ការមិនដោះលែងលោក កឹម សុខា ជាការរំលោភលើឯករាជ្យភាពរបស់តុលាការ និងរដ្ឋធម្មនុញ្ញ។

លោកនាយករដ្ឋមន្ត្រី ហ៊ុន សែន បានមានប្រសាសន៍ថា «ក្រុមអ្នកច្បាប់ និងមេធាវីដែលគាំទ្រជនពាលខាងនយោបាយ ត្រូវរៀនស្តាប់សម្តីរបស់ខ្ញុំឲ្យច្បាស់ មុនធ្វើការបកស្រាយទាំងមិនដឹងខ្យល់អី។ អ្នកឯងមិនត្រឹមតែខ្វះសមត្ថភាពផ្នែកផ្លូវច្បាប់ធ្ងន់ធ្ងរប៉ុណ្ណោះទេ ប៉ុន្តែជាបុគ្គលគ្មានកាយសម្បទាគ្រប់គ្រាន់ក្នុងការស្តាប់យល់ និងវិភាគឲ្យបានត្រឹមត្រូវ នូវភាសារបស់នាយករដ្ឋមន្ត្រី»៕

កូនប្រុសលោក គង់ គាំ ដាស់តឿន សម រង្ស៉ី កុំឱ្យជឿលើបុគ្គលកំពូលតណ្ហាក្រាស់ និងកំពូលល្បែងពាលា

លោក គង់ បូរ៉ា អតីតតំណាងរាស្រ្ត របស់អតីតគណបក្សសង្រ្គោះជាតិ (CNRP) ដែលជាកូនប្រុសម្នាក់ទៀតរបស់ លោក គង់ គាំ នៅថ្ងៃទី១៣ ខែវិច្ឆិកា ឆ្នាំ២០១៨ បានចេញមុខដាស់តឿន លោក សម រង្ស៉ី កុំឱ្យជឿលើបុគ្គលកំពូលតណ្ហាក្រាស និងកំពូលល្បែងពាលាដែលបង្កប់ខ្លួននៅជាមួយរូបលោករហូតដល់ធ្វើឱ្យគណបក្សសង្រ្គោះជាតិរំលំរលាយ។

លោក គង់ បូរ៉ា បានបញ្ជាក់នៅលើទំព័រ Facebook របស់លោកយ៉ាងដូច្នេះថា៖ «ខ្ញុំអ្នក សម រង្ស៉ី និយម គ្រាន់តែដាស់សម្បជញ្ញៈ លោកប្រធាន សម រង្ស៉ី កុំជឿលើបុគ្គលមេដឹកនាំកំពូលតណ្ហាអំណាចក្រាស់ កំពូលតណ្ហាស្រីញីក្រាស់ និងកំពូលតណ្ហាល្បែងពាលាក្រាស់ ដែលផ្តុំគ្នាជុំវិញលោកប្រធាន សម រង្ស៉ី ហើយធ្វើឱ្យគណបក្សសង្រ្គោះជាតិ ត្រូវបានរលាយ»។

លោក គង់ បូរ៉ា នាពេលកន្លងទៅ បានសម្តែងការខឹងសម្បាយ៉ាងខ្លាំងដាក់លោក អេង ឆៃអ៊ាង ដែលបានហៅឪពុករបស់លោក គឺលោក គង់ គាំ ថាបានផ្លាស់ប្តូរនយោបាយ ព្រោះតែប្រយោជន៍របស់ខ្លួន។ ជាមួយគ្នានេះលោកក៏ធ្លាប់បានបង្ហាញជំហរគាំទ្រដល់គណបក្សឆន្ទៈខ្មែរ ដែលដឹកនាំដោយប្អូនប្រុសរបស់លោកផងដែរ។ លោក គង់ បូរ៉ា បានបន្តទៀតថា «សម្រាប់ខ្ញុំ ខ្ញុំនៅតែប្រកាន់យកឧត្តមគតិប្រជាធិបតេយ្យ សេរីពហុបក្ស ដែលជាស្មារតីកិច្ចព្រមព្រៀងទីក្រុងប៉ារីស និង រដ្ឋធម្មនុញ្ញនៃព្រះរាជាណាចក្រកម្ពុជា»។

ទន្ទឹមនឹងការរិះគន់ដាស់តឿនដល់មេចាស់របស់ខ្លួន ដែលកំពុងយកសេរីភាព និងជីវិតនយោបាយរបស់ លោក កឹម សុខា ទៅធ្វើជាល្បែងភ្នាល់នោះ លោក គង់ បូរ៉ា ក៏បានចំអកដល់អ្នកដែលចាញ់បោក លោក សម រង្ស៉ី ហើយស្មោះស្ម័គ្រ នឹងអតីតគណបក្សសង្រ្គោះជាតិ ដែលពួកគេសង្ឃឹមថាបក្សនេះនឹងរស់ឡើងវិញ។ លោក គង់ បូរ៉ា បាន Comment តបទៅបុរសម្នាក់ ដែលទំនងជាសមាជិករបស់ក្រុមប្រឆាំង ដែលងប់ងល់នឹងមនោគមន៍វិជ្ជារបស់ លោក សម រង្ស៉ី យ៉ាងដូច្នេះថា៖ «ប្រឹងរកស៊ី ចិញ្ចឹម កូនៗ ទៅ ចាំគេកើតមកវិញ ចាំទៅបម្រើគេទៀត មិនទាន់ហួសពេលទេ»៕

ប្រភព៖ Fresh News

កិច្ចប្រជុំកំពូលអាស៊ានលើកទី៣៣ នៅប្រទេសសិង្ហបុរី បានប្រព្រឹត្តទៅក្រោមប្រធានបទ «ការកសាងនវានុវត្តន៍ និងភាពរឹងមាំរបស់អាស៊ាន»

នៅរសៀលថ្ងៃទី១៣ ខែវិច្ឆិកា ឆ្នាំ ២០១៨ លោកនាយករដ្ឋមន្ត្រី ហ៊ុន សែន បានអញ្ជើញចូលរួមក្នុងពិធីបើកកិច្ចប្រជុំកំពូលអាស៊ានលើកទី៣៣ ក្រោមប្រធានបទ «ការកសាងនវានុវត្តន៍ និងភាពរឹងមាំរបស់អាស៊ាន» ដែលបានប្រារព្ធធ្វើនៅមជ្ឈមណ្ឌលពិព័រណ៍ និងសន្និសីទអន្តរជាតិសាន់តិច សាធារណរដ្ឋសិង្ហបុរី ដែលមានការចូលរួមពីបណ្តាប្រមុខរដ្ឋ ប្រមុខរដ្ឋាភិបាលនៃប្រទេសអាស៊ាន ក្រោមកិច្ចស្វាគមន៍យ៉ាងស្និទ្ធស្នាលរាក់ទាក់បំផុតពីលោក លី ស៊ានឡុង នាយករដ្ឋមន្រ្តីសិង្ហបុរី និងជាប្រធានកិច្ចប្រជុំកំពូលអាស៊ានលើកទី៣៣ផងដែរ។

ថ្លែងសុន្ទរកថាគន្លឹះបើកកិច្ចប្រជុំ លោក លី ស៊ានឡុង បានគូសបញ្ជាក់អំពីសារៈសំខាន់នៃអាស៊ានដែលមានសមត្ថភាពចូលរួម និងសហការជាមួយបណ្ដាប្រទេសធំៗ និងអង្គការអន្តរជាតិនានា រួមទាំងការរៀបចំកិច្ចប្រជុំអាស៊ាននានា ដូចជាអាស៊ានបូកបី និង EAS ជាដើម។ នៅថ្ងៃនេះអាស៊ានគឺជាតួអង្គសេដ្ឋកិច្ចដ៏សំខាន់មួយនៅក្នុងពិភពលោក។ ជាមួយនឹងកំណើនយុវជនវ័យកណ្ដាល និងយុវជនវ័យពេញធ្វើការ អាស៊ាននឹងកា្លយជាមហាអំណាចសេដ្ឋកិច្ចធំទី៤ នៅលើពិភពលោកនៅឆ្នាំ២០៣០ ពោលគឺអនាគតអាស៊ានកំពុងមានភាពភ្លឺស្វាង។ នៅពេលនេះគឺយើងត្រូវតែដោះស្រាយបញ្ហាប្រឈមថ្មីៗដោយផ្អែកលើយុទ្ធសាស្រ្តថ្មី និងការផ្លាស់ប្ដូរសំខាន់ៗតាមរយៈបច្ចេកវិទ្យាឌីជីថល។ បច្ចេកវិទ្យាឌីជីថលបានរំខានដល់សេដ្ឋកិច្ចរបស់យើង និងបានផ្លាស់ប្ដូរទម្លាប់ការរស់នៅ ការធ្វើការ និងការទំនាក់ទំនងរបស់យើង រួមមានទាំងការវាយប្រហារតាមព័ត៌មានវិទ្យាទៀតផង។ ព្រមពេលជាមួយគ្នានេះ ការគំរាមកំហែងពីភេរវកម្ម និងការប្រែប្រួលអាកាសធាតុក៏ជាក្ដីកង្វល់របស់យើងផងដែរ។ ភេរវកម្មគឺមិនមែនត្រឹមតែគំរាមកំហែងដល់សន្តិសុខតែមួយមុខប៉ុណ្ណោះទេ ប៉ុន្តែវាក៏បង្កជាការគំរាមកំហែងធ្ងន់ធ្ងរដល់ជាតិសាសន៍នានា និង សាសនាជាច្រើននៃបណ្ដាប្រទេសជាសមាជិកអាស៊ាន។

លោក លី ស៊ានឡុង បានបន្តថា បម្រែបម្រួលអាកាសធាតុ កំពុងធ្វើឱ្យបណ្ដាប្រទេសអាស៊ានមួយចំនួនងាយរងគ្រោះនឹងការកើនឡើងនៃកម្ពស់ទឹកសមុទ្រ។ ការកើនឡើងសីតុណ្ហភាព និងកំដៅផែនដីកំពុងបង្កផលប៉ះពាល់ជាមួយនឹងការបង្កជាជំងឺតំបន់ត្រូពិចដែលគំរាមកំហែងដល់អាយុជីវិត និងការរស់នៅរបស់ប្រជាជន។ ទាំងអស់នេះមានន័យថាកិច្ចសហប្រតិបត្តិការពហុភាគីគឺមានសារៈសំខាន់ និងជាបន្ទាន់បំផុតជាងពេលណាៗទាំងអស់។ ការប្រឈមមុខនឹងបញ្ហារួមនេះគឺមានភាពស្មុគស្មាញនឹងមិនធ្លាប់មាន ហើយដំណោះ ស្រាយក៏មិនមានប្រទេសណាដោះស្រាយបញ្ហាទាំងនេះតែម្នាក់ឯងបាននៅឡើយដែរ។ ពោលគឺយើងត្រូវតែរួមចិត្តរួមកម្លាំង ដោះស្រាយបញ្ហាទាំងនេះជាមួយគ្នា។ នេះហើយគឺមូលហេតុរុញឱ្យប្រទេសសិង្ហបុរីជ្រើសរើសភាពរឹងមាំ និងការច្នៃប្រឌិតជាមូលដ្ឋានសម្រាប់អាស៊ានរបស់យើង។

នាយករដ្ឋមន្រ្តីសិង្ហបុរី មានក្តីរំភើបយ៉ាងខ្លាំងដែលក្នុងអាណត្តិជាប្រធាន គឺប្រទេសសមាជិកទាំងអស់បានអនុវត្តន៍ទ្វេឡើងនូវកិច្ចខិតខំប្រឹងប្រែងដែលបានសម្រេចចេញនូវដំណោះស្រាយដ៏ល្អប្រសើរនានា ដែលបង្ហាញអំពីលទ្ធផលនៃការរួបរួម ប្រសិទ្ធភាព និងសម្ព័ន្ធភាពក្នុងនាមជាអាស៊ាន។ ទន្ទឹមនឹងនោះដែរ អាស៊ានបានបញ្ជាក់ឡើងវិញនូវការប្តេជ្ញាធ្វើពាណិជ្ជកម្មពហុភាគី និងបោះជំហានទៅមុខឲ្យបានលឿន ឆ្ពោះទៅរកការបញ្ចប់កិច្ចចរចានានាទៅលើភាពជាដៃគូសេដ្ឋកិច្ចថ្នាក់តំបន់ប្រកបដោយផ្លែផ្កា។ បណ្តាញទីក្រុងឆ្លាតវៃរបស់អាស៊ាន (ASCN) នឹងក្លាយជាវេទិកាសម្រាប់ទីក្រុងនៃបណ្តាប្រទេសអាស៊ានទាំងអស់ ធ្វើការផ្សាយភ្ជាប់គ្នា ចែក រំលែកបទពិសោធន៍ និងធ្វើការងាររួមគ្នាដើម្បីលើកស្ទួយគុណភាពរស់នៅដែលជាប្រយោជន៍របស់ប្រជាជន។

លោកបានបន្ថែមថា យើងបានពង្រឹងមូលដ្ឋានសម្រាប់បរិស្ថានតំបន់ដែលយកច្បាប់ជាមូលដ្ឋាន ជាមួយនឹងការសន្និដ្ឋាននៃសន្ធិសញ្ញាបណ្តោះអាសន្នជាគំរូរបស់អាស៊ាន។ យើងបានបង្កើនភាពជាដៃគូសកម្មរួមគ្នារបស់យើង ប្រឆាំងនឹងការគំរាមកំហែងឆ្លងដែន រួមទាំងការវាយប្រហារតាមអ៊ីនធើណេត និងការប្រែប្រួលអាកាសធាតុ។ លទ្ធផលទាំងនេះបង្ហាញពីជំនឿយ៉ាងរឹងមាំរបស់អាស៊ាន ចំពោះគំនិតបែបពហុភាគីនិយម គឺជាមូលដ្ឋានដ៏សំខាន់មួយសម្រាប់កិច្ចសហប្រតិបត្តិការអន្តរជាតិ និងសម្រាប់ការរីកចំរើន និងស្ថេរភាពនៃតំបន់។

នៅក្នុងពិធីបើកកិច្ចប្រជុំកំពូលអាស៊ានលើកទី៣៣នោះដែរ លោក លី ស៊ានឡុង នាយករដ្ឋមន្រ្តីសិង្ហបុរី និងជាប្រធានកិច្ចប្រជុំកំពូលអាស៊ានលើកទី៣៣ បានអញ្ជើញជូនរង្វាន់ដល់ជ័យលាភី តម្លៃប្រមាណ ២ម៉ឺន៥ពាន់ដុល្លា ដល់តំណាងអង្គការថែរក្សាកុមារអន់សតិក្នុងប្រទេសហ្វីលីពីន។ បន្ទាប់មក មេដឹកនាំអាស៊ានទាំងអស់ក៏បានថតរូបអនុស្សាវរីយ៍នៅក្នុងពិធីបើកកិច្ចប្រជុំកំពូលអាស៊ានថ្ងៃនេះ។

សូមបញ្ជាក់ដែរថា មេដឹកនាំអាស៊ានក៏បានអញ្ជើញតាមដានស្តាប់នូវបទបង្ហាញដោយក្រុមប្រឹក្សាផ្តល់យោបល់ធុរកិច្ចអាស៊ាន និងបានអញ្ជើញបើកកិច្ចប្រជុំកំពូលពេញអង្គអាស៊ានលើកទី៣៣ និងពិធីពិសារភោជនាហារការងារពេលល្ងាចដែលបានរៀបចំដោយលោក លី ស៊ានឡុង នាយករដ្ឋមន្រ្តីសិង្ហបុរី៕

(សូមទស្សនាវីដេអូ)៖ លោកនាយករដ្ឋមន្រ្តី ហ៊ុន សែន អញ្ជើញដល់អាកាសយានដ្ឋាន អន្តរជាតិចាងងី សាធារណរដ្ឋសិង្ហបុរី ដើម្បីចូលរួមកិច្ចប្រជុំកំពូល អាស៊ានលើកទី៣៣

(សូមទស្សនាវីដេអូ)៖ ក្រុមអ្នកគាំទ្រអតីតគណបក្សប្រឆាំង​នៅ​ប្រទេសបារាំង ថ្កោលទោសលោក សម រង្ស៉ី ដែលផ្តួចផ្តើមយកសេរីភាពលោក កឹម សុខា ទៅភ្នាល់ជាមួយលោក​នាយករដ្ឋមន្ត្រី ហ៊ុន សែន (ប្រភព៖ GN)