ក្នុងនោះដែរ លោកប្រធានអង្គភាពអគ្គិសនីកម្ពុជាខេត្ត ក៏បានធ្វើការបញ្ជាក់អំពីប្រភពនៃការផ្គត់ផ្គង់ចរន្តអគ្គិសនី មកខេត្តសៀមរាប តាមរយៈការទិញភ្លើងពីប្រទេសថៃ និង វ៉ារីអគ្គិសនីពីខេត្តពោធិសាត់ និងខេត្តកំពត ។ ក្នុងនោះដែរ លោកក៏បានធ្វើការបង្ហាញ និង ធ្វើការណែនាំមួយចំនួន អំពីការដាក់ពាក្យសុំតភ្ជាប់ចរន្តអគ្គិសនីប្រើប្រាស់នៅតាមលំនៅដ្ឋាន និង សាលារៀនជាដើម ដែលដំណើរការនៅថ្ងៃទី១៨ ខែធ្នូខាងមុខនេះ ព្រមទាំងបាន ធ្វើការបកស្រាយបំភ្លឺពីចំណោទបញ្ហារបស់ប្រជាពលរដ្ឋអ្នកប្រើប្រាស់ភ្លើងផងដែរ ។
លោក ពៅ ពិសិដ្ឋ ក៏បានចូលរួមអបអរសាទរ ជាមួយបងប្អូនប្រជាពលរដ្ឋ បានទទួលការតភ្ជាប់ចរន្តអគ្គិសនីរបស់រដ្ឋប្រើប្រាស់ ដែលធ្វើឲ្យរួចផុតពីទុក្ខកង្វល់របស់បងប្អូន អំពីតម្លៃភ្លើងរបស់ឯកជន ។ ក្នុងនោះដែរលោកក៏បានលើកឡើង ពីគោលនយោបាយ យុទ្ធសាស្ត្ររបស់រាជរដ្ឋាភិបាល ដែលមាន សម្តេចតេជោ ហ៊ុន សែន នាយករដ្ឋមន្ត្រី ក្នុងការជម្រុញវិស័យអគ្គិសនី នៅឆ្នាំ២០២០ មានអគ្គិសនីប្រើប្រាស់ នៅគ្រប់មូលដ្ឋាន និង ជនបទ ។ លោក ពៅ ពិសិដ្ឋ បានបន្តទៀតថា កត្តាទាំងនេះក៏កើតចេញឡើង ពីការខិត ខំរបស់ប្រមុខរាជរដ្ឋាភិបាល ក្រោមគោលនយោបាយឈ្នះៗ ក្នុងការបញ្ចប់ជីវិតនយោបាយដឹកនាំរបស់ខ្មែរក្រហម នាឆ្នាំ១៩៩៨ បានធ្វើឲ្យប្រទេសជាតិ មានសុខសន្តិភាពពេញផ្ទៃប្រទេស ។
ក្នុងនោះដែរលោកអភិបាលរងខេត្ត ក៏បានធ្វើការណែនាំមួយចំនួន ទៅតាមបច្ចេកវិទ្យាអគ្គិសនី ក្នុងការធានានូវសុវត្ថិភាពក្នុងការប្រើប្រាស់របស់បងប្អូន ព្រមទាំងមានការសនំ្សសំចៃការប្រើប្រាស់ភ្លើង ដែលចំណេញនូវការចំណាយថវិកាប្រចាំខែរបស់បងប្អូនទៀតផង ។ លោកក៏បានសំណូមពរផងដែរថា រាល់ការប្រើប្រាស់ចរន្តអគ្គិសនីឯកជន ហើយបងប្អូនចងមកតភ្ជាប់ចរន្តអគ្គិសនីរដ្ឋវិញនោះ សូមបងប្អូនត្រូវធ្វើការ ទូទាត់ថ្លៃភ្លើងជាមួយវិស័យឯកជន ឲ្យបានដាច់ស្រឡះ នោះទើបអង្គភាពអគ្គិសនីកម្ពុជាខេត្ត ធ្វើការតភ្ជាប់ ជូនបងប្អូនបានប្រើប្រាស់ ។ ក្នុងនោះដែរលោកក៏បានធ្វើការណែនាំដល់ក្រុមប្រឹក្សាឃុំ ត្រូវចេះប្រមូលផ្តុំនូវរាល់ សំណូមពរ និង ទុក្ខកង្វល់របស់ប្រជាពលរដ្ឋ អំពីបញ្ហាអគ្គិសនីនេះ ពីព្រោះថាបញ្ហានេះ ក៏ជាចំណោទដ៏ចំបងមួយផងដែរ ដែលធ្វើឲ្យប៉ះពាល់ដល់សតិអារម្មណ៍របស់ប្រជាពលរដ្ឋ ដើមី្បធ្វើការទំនាក់ទំនងជាមួយអង្គភាពអគ្គិសនី ព្រមទាំងសូមបងប្អូនចូលរួមសហការជាមួយក្រុមការងារផងដែរ ។ ម៉្យាងទៀតនៅពេលបងប្អូនបានតភ្ជាប់ចរន្តអគ្គិសនីរដ្ឋហើយនោះ តម្លៃភ្លើងប្រើប្រាស់ថោកជាងរបស់ឯកជនទៀតផង ៕
