នេះគ្មានអ្វីដែលគួរឱ្យកត់សម្គាល់ច្រើនជាងការប្រើប្រាស់របស់មជ្ឈឹមលោក ដើម្បីដាក់ទណ្ឌកម្មសេដ្ឋកិច្ចធ្វើជាឧបករណ៍ដ៏សំខាន់ក្នុងការដាក់សម្ពាធលើរុស្ស៊ី ដើម្បីឱ្យផ្លាស់ប្តូរគោលនយោបាយរបស់ខ្លួនដែលពាក់ព័ន្ធនឹងអ៊ុយក្រែន។
ការដាក់ទណ្ឌកម្មនេះ បានចូលជាធរមានបន្តិចម្តងៗដោយកំណត់គោលដៅលើវិស័យយុទ្ធសាស្រ្តមួយចំនួននៃសេដ្ឋកិច្ចរបស់រុស្ស៊ី រាប់បញ្ចូលទាំងផ្នែកថាមពល ការការពារ និងហិរញ្ញវត្ថុ។ ប៉ុន្តែវាក៏បានធ្វើឱ្យប៉ះពាល់ដល់ស្ថាប័នរបស់រុស្ស៊ីមួយចំនួន ហើយក្រុមហ៊ុនលោកខាងលិចក៏រងផលប៉ះពាល់ផងដែរ។
ការផលិតរបស់អាមេរិក និងសហភាពអឺរ៉ុប និងក្រុមហ៊ុនថាមពលធំៗបានបាត់បង់ប្រាក់ជាច្រើន។ ការលក់នាវាចម្បាំងរបស់បារាំង និងម៉ាស៊ីនរបស់អាល្លឺម៉ង់ត្រូវបានផ្អាក។ ការវិនិយោគទុនដែលមានទឹកប្រាក់រាប់ប៊ីលានដុល្លារអាមេរិកដោយក្រុមហ៊ុនថាមពលធំៗ ដូចជាក្រុមហ៊ុន ExxonMobil ក្រុមហ៊ុន Total និងក្រុមហ៊ុន Shell ក៏ត្រូវបានផ្អាកផងដែរ។ ការធ្វើធុរកិច្ចនៅក្នុងបណ្តាប្រទេសដែលមានទំនាក់ទំនងយ៉ាងជិតស្និទ្ធជាយូរមកហើយជាមួយនឹងរុស្ស៊ី ដូចជាប្រទេសហុងគ្រី និងប៊ុលហ្គារី ក៏ទទួលរងផលប៉ះពាល់យ៉ាងខ្លាំងផងដែរ។
ប៉ុន្តែតម្លៃសេដ្ឋកិច្ចគួរឱ្យពិចារណាដែលបានចំណាយដោយក្រុមហ៊ុនប្រទេសលោកខាងលិចនោះ គឺបានធ្វើឱ្យមានការរួបរួមគ្នាផ្នែកនយោបាយក្នុងការដាក់ទណ្ឌកម្មដែលបានធ្វើឡើងរហូតដកដល់សព្វថ្ងៃនេះ ដែលទាំងអស់នេះបានធ្វើឱ្យមានចាប់អារម្មណ៍កាន់តែខ្លាំងឡើង។ ទោះបីជាមានផលលំបាកផ្នែកសេដ្ឋកិច្ចក៏ដោយ ក៏ប៉ុន្តែការទទួលផលផ្នែកនយោបាយដែលកើតចេញពីការរក្សានូវការសាមគ្គីគ្នាជាធ្លុងមួយ គឺត្រូវបានគេចាត់ទុកថា មានសារៈសំខាន់ខ្លាំងណាស់។ ចំណុចស្នូលចំពោះការរួបរួមគ្នានេះ គឺបង្ហាញឱ្យឃើញនូវកិច្ចខិតខំប្រឹងប្រែងដ៏ច្បាស់ក្រឡែតរវាងរដ្ឋាភិបាលទីក្រុងវ៉ាស៊ីនតោន និងសហភាពអឺរ៉ុប។ ក៏ប៉ុន្តែការរួបរួមនេះអាចនឹងបញ្ចប់ក្នុងពេលឆាប់ៗនេះ។
ទណ្ឌកម្មដែលបានស្នើឡើង គឺពួកគេបានបង្កប់នូវគោលបំណងយ៉ាងពិតប្រាកដផងដែរ ដូចជានៅក្នុងសេចក្តីព្រាងច្បាប់ដដែលនោះ អ្នកតាក់តែងច្បាប់របស់អាមេរិកមានបំណងធ្វើឱ្យមានឥទ្ធិពលក្នុងការបញ្ជូនអាវុធទៅកាន់ប្រទេសស៊ីរី ការលក់ថាមពលរបស់រុស្ស៊ី និងរបៀបក្នុងការធ្វើឯកជនភាវូបនីយកម្មនៃសហគ្រាសរដ្ឋដែលគ្រប់គ្រងដោយរដ្ឋាភិបាលរុស្ស៊ី។
ជាឧទាហរណ៍ បំណងប្រាថ្នាពិតប្រាកដនោះ គឺដើម្បីកំណត់គោលដៅបំពង់បង្ហូរឧស្ម័ន Nord Stream 2 ដែលត្រូវបានមន្រ្តីអឺរ៉ុបមួយចំនួនមើលឃើញថា ជាការប៉ុនប៉ងដើម្បីជំនួសឧស្ម័នរបស់រុស្ស៊ីដែលមានតម្លៃថោកជាមួយនឹងឧស្ម័នធម្មជាតិរាវរបស់អាមេរិកដែលមានតម្លៃថ្លៃ៕
ប្រភព: CNN ចុះថ្ងៃទី២៨ ខែកក្កដា ឆ្នាំ២០១៧
