សម្តេចតេជោ ហ៊ុន សែន អំពាវនាវកុំឱ្យដឹកលើសទម្ងន់នាំឱ្យខូចផ្លូវ ហើយរថយន្តធុនធំ មិនត្រូវតទ្រុង ឱ្យលើស និងហួសលក្ខណៈបច្ចេទេសនោះទេ

ពីខេត្តរតនគីរី ដែលជាខេត្ត ស្ថិតនៅភាគឥសាន្ត នៃប្រទេសកម្ពុជា មានចម្ងាយជាង​៥០០​គីឡូម៉ែត្រ ពីរាជធានីភ្នំពេញ ក្នុងពិធីសម្ពោធដាក់ឲ្យប្រើប្រាស់ជាផ្លូវការ ផ្លូវជាតិលេខ៧៦ ប្រវែង​១៧២ គ.ម ចាប់ពីសែនមនោរម្យ-កោះញែក (ខេត្តមណ្ឌលគិរី) ដល់តាអង (ខេត្តរតនគិរី) ក្រោម​ហិរញ្ញប្បទាន ពីរដ្ឋាភិបាល សាធារណរដ្ឋប្រជាមានិតចិន ដែលធ្វើឡើង នាព្រឹកថ្ងៃ​ទី២១ ខែវិច្ឆិកា ឆ្នាំ២០១៦នេះ សម្តេចអគ្គមហាសេនាបតី តេជោហ៊ុន សែន នាយករដ្ឋមន្ត្រី នៃ​ព្រះរាជា​ណាចក្រកម្ពុជា បានលើកឡើងថា ជំងឺឡានតទ្រុង ខុសលក្ខណៈបច្ចេកទេស និង​ស្តង់ដារ​ចេញពីរោងចក្រ និងដឹកលើសទំងន់ ពេលនេះវាបានរើឡើងវិញហើយ បន្ទាប់​ស្ងាត់​មួយរយៈ ក្រោយពីសម្តេចបានស្រែកម្តង ពីខេត្តសៀមរាប កាលពីប៉ុន្មានឆ្នាំមុន។

ដូច្នេះថ្ងៃនេះ ពីខេត្តរតនគិរី សម្តេចបានបញ្ជា ឱ្យអនុវត្តន៍ ចំពោះរថយន្តដឹកធ្ងន់ និងតទ្រុង ទាំងនេះ ជាបន្តទៀត ព្រោះរថយន្តទាំងនេះហើយ ដែលវាមិនត្រឹមតែបំផ្លាញផ្លូវថ្នល់ ដែល​យើង​បានធ្វើ​ស្អាតនោះទេ តែវាបានបង្កើតស្ថានភាព គ្រោះថ្នាក់ចរាចរថែមទៀត។ អញ្ចឹងទេ​សូម​អំពាវនាវឱ្យមានការដឹកជញ្ជូន និងការធ្វើចរាចរ ដោយគោរពច្បាប់ចរាចរ ដោយមិនត្រូវ​ដឹក​លើសទម្ងន់ ហើយមិនត្រូវតទ្រុងរថយន្ត អោយលើស និងហួសលក្ខណៈបច្ចេទេស យានយន្ត​ផលិត​​ចេញពីរោងចក្រនោះទេ។ តែបើនៅតែមាន នៅតែល្មើស ត្រូវចាប់ឱ្យអស់ ហើយប្រមូល​ឡាន​ហ្នឹង កុំអោយបើកបរលើផ្លូវ ហើយនគរបាល និងសមត្ថកិច្ចពាក់ព័ន្ធ ត្រូវ​សហការគ្នា ដើម្បី​ប្រមូល​រថយន្តទាំងនោះ យកទៅកាត់ទ្រុងចេញ តែបើមិនកាត់ចេញទេ ចាប់​ហើយ​ទុក​ចោល​តែ​ម្តងកុំខ្ចីខ្វល់ ព្រោះយើងមិនអាចអោយវាមកបំផ្លាញផ្លូវ ដែលយើងប្រឹង​ធ្វើ​យ៉ាង​ល្អស្អាតបានទៀត​ឡើយ។ បើតាមសម្តេច យើងប្រឹងណាស់ ដើម្បីបានផ្លូវល្អ ហើយសួរ​ថាផ្លូវនេះផលប្រយោជន៍​នរណា?

ដោយឡែក សំរាប់អ្នកធ្វើដំណើរតាមម៉ូតូ ពេលបានផ្លូវល្អស្អាតហើយ កុំភ្លេចពាក់មួក​សុវត្ថិភាព​​ជាប្រចាំផង ហើយបើកបរនោះទៀតសោធ ត្រូវប្រុងប្រយ័ត្នជានិច្ច ហើយបើ​ក្នុង​ករណី មានកើត​គ្រោះ​ថ្នាក់ចរាចរ ដោយការជិះលឿនលើផ្លូវល្អ សូមកុំជេរនាយករដ្ឋមន្ត្រី ដោយ​សារការធ្វើផ្លូវ​ល្អ​នេះ ព្រោះកន្លងមកធ្លាប់មានករណីនេះ កើតឡើងរួចមកហើយ។

ពីវេទិការនេះដែរ សម្តេចអគ្គមហាសេនាបតីតេជោ ហ៊ុន សែន បានលើកឡើងថា ដោយមិន​រាប់​បញ្ចូលថ្ងៃនេះ គឺនៅសលតែ៨ថ្ងៃទៀតតែប៉ុណ្ណោះ សំរាប់ការចុះឈ្មោះបោះឆ្នោត ឃុំសង្កាត់។ ដូច្នេះ​សូមអំពាវនាវទៅដល់ប្រជាពលរដ្ឋទូទាំងប្រទេស ដែលគ្រប់អាយុបោះឆ្នោត ហើយមិន​ទាន់​បានទៅចុះឈ្មោះបោះឆ្នោត សូមអញ្ចើញរួសរាន់ប្រញាប់ប្រញាល់  ទៅចុះឈ្មោះបោះឆ្នោត ដើម្បីធានាការប្រើសិទ្ធិ ក្នុងការបោះឆ្នោត ជ្រើសរើសក្រុមប្រឹក្សាឃុំសង្កាត់  នៅថ្ងៃទី០៤ខែមិថុនា ឆ្នាំ២០១៧ និងការបោះឆ្នោតសភា នៅឆ្នាំ២០១៨ខាងមុខនេះ ខណៈដែលការិយាល័យ​ចុះ​ឈ្មោះ​បោះឆ្នោតទូទាំងប្រទេស ត្រូវបិទទ្វារនាល្ងាចថ្ងៃទី២៩ វិច្ឆិកានេះ។ ទន្ទឹមនេះដែរ ជាមួយ នឹង​ការ​អំពាវនាវដល់ប្រជាពលរដ្ឋ សម្តេចតេជោ ហ៊ុន សែន ក៏បានអំពាវនាវផងដែរ ទៅដល់មន្ត្រី​បំរើ​ការងារផ្នែកចុះឈ្មោះបោះឆ្នោត មេត្តាជួយសម្រួល ក្រែងលោនាទីចុងក្រោយ ប្រជាពលរដ្ឋ លោក​សម្រុក​ទៅ ដើម្បីបំពេញបែបបទ ក្នុងការចុះឈ្នោះបោះឆ្នោតនេះ។

គួរបញ្ជាក់ថា របាយការណ៍សាងសង់ ដែលថ្លែងដោយទេសរដ្ឋមន្ត្រីរដ្ឋមន្ត្រី ក្រសួងសាធារណការ និងដឹកជញ្ជូន លោក ស៊ុន ចាន់ថុល កំណាត់ផ្លូវជាតិលេខ៧៦បន្ត ដែលមានប្រវែង១៧៦គ.ម នេះ ត្រូវបានលើកកម្រិត និងពង្រីកទទឹងតួផ្លូវ ទំហំ៩មែត្រ ក្នុងនោះទ្រូងថ្នល់ មាន២គន្លង ទទឹង​៣.៥០ម និងមានចិញ្ចើមថ្នល់ទទឹង ១ម៉ែត្រសងខាង ព្រមទាំងសាងសង់ស្ពានឆ្លងកាត់​ទន្លេ​ស្រែពក មួយកន្លែងប្រវែង ប្រវែង២៧៨ម៉ែត្រ ស្ពានតូច និងស្ពានមធ្យម ចំនួន២៩កន្លែង ប្រវែង ១២០៦​ម៉ែត្រ សាងសង់លូកាត់ផ្លូវចំនួន២៩៦កន្លែង និងលូដាក់តាមប្រឡាយសងខាង ចំនួន២១៤​កន្លែង។ កំណាត់ផ្លូវជាតិលេខ៧៦បន្តនេះ សាងសង់ឡើងតាមស្តង់ដារ ផ្លូវថ្នល់កម្រិតទី៣​នៃគំរូ​រចនា​ប្លង់សំណង់ របស់សាធារណរដ្ឋប្រជាមានិតចិន ជាប្រភេទផ្លូវក្រាលកៅស៊ូ ពីរ​ស្រទាប់​(DBST) ដែលចំណាយថវិកាប្រមាណ ៩១លាន៦សែន ៨ម៉ឺនដុល្លា អាមេរិក​ ជាហិរញ្ញប្បទាន​សម្បទាន ពីរដ្ឋាភិបាលចិន រួមជាមួយថវិកាបដិភាគ របស់រាជរដ្ឋាភិបាលកម្ពុជាចំនួន ៤លាន ៦សែន ៩ម៉ឺន ៨៦០០ដុល្លារអាមេរិក និងថវិកាសំរាប់ដោះស្រាយផលប៉ះពាល់ និងដោះមីន អាវុធ​យុទ្ធភណ្ឌ​មិនទាន់ផ្ទុះ សរុប ២លាន ១សែន ៤ម៉ឺន ៣ពាន់ ៧២ដុល្លា អាមេរិក ដែល​អនុវត្តន៍​ការសាង​សង់ដោយក្រុមហ៊ុន សាជីវកម្មស្ពានថ្នល់ចិន និងត្រួតពិនិត្យបច្ចេកទេស ដោយក្រុមហ៊ុន​ត្រួត​ពិនិត្យបច្ចេកទេស ក្វាងចូវ វ៉ានអាន របសរដ្ឋចិន ដែលចាប់ផ្តើម ពីឆ្នាំ២០១២ ហើយបញ្ចប់​ការសាង​សង់​ជាស្ថាពរនាឆ្នាំ២០១៦នេះ។ កំណាត់ផ្លូវជាតិលេខ៧៦បន្តនេះ ជាសមិទ្ធិផល ដ៍ធំធេង​ថ្មីមួយទៀត របស់រាជរដ្ឋាភិបាលកម្ពុជា ក្រោមការដឹកនាំរបស់ប្រមុខរាជរដ្ឋាភិបាល សម្តេចតេជោ ហ៊ុន សែន ដែលបានប្រែក្លាយកម្ពុជា ឲ្យស្គាល់នូវសុខសន្តិភាព និង​ប្រែក្លាយ​ក្តីស្រមៃរបស់ប្រជាជនកម្ពុជា ទៅជាក្តីសង្ឈឹម នៃមោទនភាពជាតិ និងជំនឿជាក់ លើការអភិវឌ្ឈ៕

នេះគឺជាថ្ងៃទី១ នៃកិច្ចប្រជុំ CLV លើកទី៩ ស្តីពីតំបន់ត្រីកោណអភិវឌ្ឍន៍ ដែលកម្ពុជាធ្វើជាម្ចាស់ផ្ទះ

ថ្ងៃទី២១ ខែវិច្ឆិកា ឆ្នាំ២០១៦នេះ គឺជាថ្ងៃបើកកិច្ចប្រជុំកំពូល ដ៏សំខាន់ ស្តីពី «តំបន់ត្រីកោណអភិវឌ្ឍន៍» នៃប្រទេសទាំងបី កម្ពុជា ឡាវ វៀតណាម (CLV) លើកទី៩  ដើម្បីពិនិត្យមើលវឌ្ឍនភាពលើការងារអភិវឌ្ឍតំបន់ខាងលើ។

យោងតាមសេចក្តីជូនដំណឹងរបស់ក្រសួងពាណិជ្ជកម្ម ចុះថ្ងៃទី១៨ ខែវិច្ឆិកា ឆ្នាំ២០១៦ បានឱ្យដឹងថា ចំណុចសំខាន់ៗនៃសេចក្តីថ្លែងការក្នុងកិច្ចប្រទេសនោះរួមមាន៖ ការប្តេជ្ញាចិត្តពង្រឹងកិច្ចសហប្រតិបត្តិការរួមគ្នា ដើម្បីធានាសន្តិសុខ និងសុវត្ថិភាពដល់ប្រជាពលរដ្ឋ និងអ្នកវិនិយោគទុន, ការផ្លាស់ប្តូរទំនិញ, ការបង្កើនទំនាក់ទំនងពាណិជ្ជកម្ម, ការទាក់ទាញទេសចរណ៍, ការទប់ស្កាត់អំពើជួញដូរមនុស្ស, ឧក្រិដ្ឋកម្ម, គ្រឿងញៀន, និងការបោសសម្អាតមីន។

សម្រាប់កិច្ចប្រជុំកំពូលលើកទី៩នេះ នឹងផ្តោតសំខាន់លើវិស័យអាទិភាពមួយចំនួនទៀត មិនត្រឹមតែកិច្ចសហការលើវិស័យសេដ្ឋកិច្ច និងពាណិជ្ជកម្មប៉ុណ្ណោះទេ ប៉ុន្តែរួមបញ្ជូលទាំងវិស័យសន្តិសុខ និងកិច្ចការបរទេស, សង្គម, បរិស្ថាន, និងការសម្របសម្រួលអភិវឌ្ឍន៍ថ្នាក់ខេត្តផងដែរ។

ការធ្វើជាម្ចាស់ផ្ទះនៃកិច្ចប្រជុំកំពូល CLV លើកទី៩ និងកិច្ចប្រជុំពាក់ព័ន្ធ នៅលើទឹកដីអង្គរនៃខេត្តសៀមរាប នឹងនាំមកនូវលទ្ធផលល្អៗជាមួយទិសដៅថ្មីៗថែមទៀត ដើម្បីប្រែក្លាយតំបន់ត្រីកោណអភិវឌ្ឍន៍នៃប្រទេសទាំងបី ឱ្យទៅជាមជ្ឈមណ្ឌលសេដ្ឋកិច្ច, ពាណិជ្ជកម្ម, ឧស្សាហកម្ម និងទេសចរណ៍ដ៏ធំនៅក្នុងតំបន់៕

ប្រភពពីGNN

សម្តេចតេជោ ហ៊ុន សែន អនុញ្ញាតឱ្យ​ប្រតិភូ​យុវជន អាស៊ាន ជប៉ុន ជួបសំដែង​ការគួរសម

នៅវិមានសន្តិភាព នារសៀលថ្ងៃទី១៩ ខែវិច្ឆិកា ឆ្នាំ២០១៦ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាត ឱ្យប្រតិភូនាវា យុវជន អាស៊ីអាគ្នេយ៍ ជប៉ុន ដឹកនាំដោយលោកស្រី កៅ រីណាកាមូរី (Kao Ri Nakamuri) ចូល ជួបសំដែងការគួរសម ។

លោកស្រី បានគោរពសំដែងនូវការរីករាយ និងអំណរគុណដល់រាជរដ្ឋាភិបាល និងមន្ត្រីរបស់រាជរដ្ឋាភិបាល កម្ពុជា ដែលបានគាំទ្រដល់កម្មវិធីនាវាយុវជនអាស៊ីអាគ្នេយ៍ ជប៉ុននេះ។ លោកស្រីបន្តថា កម្មវធីនេះ បានចាប់ផ្តើមតាំងពីឆ្នាំ១៩៧៤មក ដែលគោលដៅនៃកម្មវិធីដើម្បីពង្រឹង និងពង្រីកមិត្តភាព ទំនាក់ទំនង រវាង យុវជន និងយុវជននៅក្នុងតំបន់។

សព្វថ្ងៃ កម្មវិធីនេះបានក្លាយទៅជាបណ្តាញយុវជនមួយដែលមានការ យល់គ្នាទៅវិញទៅមក ហើយរដ្ឋាភិបាលជប៉ុនពិតជាមានមោទនភាព និងគាំទ្រចក្ខុវិស័យនេះតទៅមុខទៀត។ លោកស្រីបន្តថា ប្រទេសជប៉ុន ក៏បានសំដែងការរីករាយ និងមោទនភាពដែលកម្ពុជា បានរៀបចំសន្និបាតនាវាយុវជន អាស៊ីអាគ្នេយ៍ ជប៉ុន នៅខេត្តសៀមរាបកន្លងមក ក្រោមប្រធានបទ បរិស្ថាននិងពិភពលោកបៃតង។ ការដឹកនាំសន្និបាតនេះ បានប្រព្រឹត្តទៅប្រកបដោយអត្ថន័យដ៏ល្អប្រសើរដែលប្រទេសជប៉ុន នឹងចងចាំទុកជានិច្ច។

ជាការឆ្លើយតប សម្តេចតេជោ នាយករដ្ឋមន្ត្រី ហ៊ុន សែន បានស្វាគមន៍ចំពោះយុវជនទាំងអស់ ដែលបានមកកាន់ប្រទេសកម្ពុជានាពេលនេះ។ សម្តេចបន្តថា ចក្ខុវិស័យ របស់ថ្នាក់ដឹកនាំជប៉ុន និងអាស៊ាន ឱ្យមាន កម្មវិធីនាវាយុវជន ជប៉ុននេះ កាលពី៤៩ឆ្នាំកន្លងមកនេះហើយនោះ គួរជាទីគោរព និងមរតក ដែលបន្សល់ ឱ្យយើង ជំរុញកម្មវិធីតទៅទៀត ហើយតាមរយៈកម្មវិធីនេះ ពិតជានាំឱ្យយុវជន កម្ពុជា យុវជន អាស៊ាន ជប៉ុន យល់គ្នាច្បាស់ ហើយការស្គាល់គ្នាច្បាស់ នឹងសម្រួលជួយធ្វើឱ្យរាល់ទំនាក់ទំនងជាមួយគ្នាបានស្រួលដោយប្រសិទ្ធភាពទៅថ្ងៃអនាគត។ សម្តេចបានមានប្រសាសន៍ថាអាស៊ាន ជាសហគមន៍មួយ មានជោគវាសនាតែមួយ ហើយតាមរយៈការយល់គ្នារវាងរវានាវាយុវជននេះ នឹងជំរុញទំនាក់ទំនងរវាងយុវជន អាស៊ាន និង ជប៉ុនកាន់តែស៊ីជម្រៅថែមទៀត។ សម្តេចបានជំរាបជូនថា  កម្ពុជាពិតជាមានមោទនភាពណាស់ ដែលបាន រៀបចំសន្និបាត នាវាយុវជន អាស៊ីអាគ្នេយ៍ ជប៉ុន នៅខេត្តសៀមរាបកន្លងមក ហើយសម្តេចបានមាន ប្រសាសន៍ថា នៅលើពិភពលោកនេះ ជាការពិតណាស់ទោះបីប្រទេសនីមួយៗមានទស្សនៈផ្សេងៗគ្នា ក៏ដោយ ប៉ុន្តែប្រទេសទាំងអស់នោះមានការស្រុះស្រួលគ្នា លើ៤ចំណុច ទី១.គឺការការពារ ដោះស្រាយបញ្ហា វិបត្តិសេដ្ឋកិច្ច , ទី២.ការប្រយុទ្ធប្រឆាំងភេរវកម្ម ,ទី៣.ការគ្រប់គ្រងគ្រោះមហ្តរាយ និងទី៤.គឺការដោះស្រាយការប្រែប្រួលអាកាសធាតុ។ កត្តាទាំង៤ចំណុចខាងលើនេះហើយ ដែលយុវជនទាំងអស់ត្រូវចូលរួមជួយការពារ ជួយដល់ពិភពលោកយើងទាំងមូល។ សម្តេចក៏បានលើកឡើងជំរាបជូនប្រតិភូអំពីប្រវត្តិសាស្ត្រ របស់កម្ពុជា អំពីស្ថានភាពនយោបាយ របស់កម្ពុជាហើយ ជាទីបញ្ចប់ សម្តេចក៏បានផ្តាំផ្ញើតាមរយៈយុវជន ទាំងអស់ សូមពាំនាំនូវការសួរសុខទុក្ខដល់ថ្នាក់ដឹកនាំនៃប្រទេសរៀងៗខ្លួនជូនចំពោះសម្តេចផង៕

ប្រភពពីGNN

អាជ្ញាធរជាតិអប្សរាដឹកនាំសហគមន៍ប្រើប្រាស់ទឹកបារាយណ៍ខាងលិច សម្អាតប្រឡាយត្រៀម​ការងារស្រែប្រាំង

ប្រជាពលរដ្ឋជាង៣០០នាក់មកពី៤ឃុំសង្កាត់ នៅព្រឹកថ្ងៃទី២០ ខែធ្នូ ឆ្នាំ២០១៦នេះ បានចូលរួមជាមួយអាជ្ញាធរជាតិអប្សរា ធ្វើការសម្អាតប្រព័ន្ធប្រឡាយបង្ហូរទឹក ចេញពីបារាយណ៍ខាងលិច ដែលជាប្រភពទឹកដ៏សំខាន់ សម្រាប់ប្រជាសហគមន៍ចំនួន៩ឃុំសង្កាត់ក្នុងក្រុងសៀមរាប និងស្រុកពួកប្រើប្រាស់ក្នុងវិស័យកសិកម្ម។

ការចូលរួមសម្អាតប្រឡាយនៅពេលនេះ ធ្វើឡើងដើម្បីថែទាំប្រព័ន្ធប្រឡាយមេ ធានាការប្រើប្រាស់យូរអង្វែង ក៏ដូចជាបំពេញតម្រូវការជាក់ស្តែងសម្រាប់ការងារបង្កបង្កើនផលនារដូវប្រាំង ខាងមុខនេះ។

លោក ហួត ហាយ ប្រធានសហគមន៍កសិករប្រើប្រាស់ទឹកបារាយណ៍ខាងលិច បានឲ្យដឹងក្នុងពេលដែលលោកកំពុងដឹកនាំប្រជាពលរដ្ឋសម្អាតប្រឡាយនេះថា សហគមន៍របស់លោកមានប្រជាពលរដ្ឋ៩ឃុំសង្កាត់ និងមានផ្ទៃដីធ្វើសែ្រប្រាំងចំនួន៤ពាន់ហិកតា។ លោកបញ្ជាក់ថា ចាប់តាំងពីអាជ្ញាធរជាតិអប្សរាបានទទួលការគ្រប់គ្រងប្រព័ន្ធទឹកនៅបារាយណ៍ខាងលិចមក កសិករយើងមានទឹកប្រើប្រាស់គ្រប់គ្រាន់សម្រាប់បង្កបង្កើនផល មិនមានការបារម្ភពីកង្វះខាតទឹកនោះទេ។ ការសម្អាតប្រឡាយនៅពេលនេះ គឺជួយសម្រួលទឹកឲ្យបានហូរលឿន អាចស្រោចស្រពដល់ស្រែប្រាំង ដែលនៅខាងក្រោមៗ។

លោក មាន់ ផានិត បុគ្គលិកបច្ចេកទេសនាយកដ្ឋានគ្រប់គ្រងទឹក ដែលទទួលបន្ទុកប្រព័ន្ធស្រោចស្រពបញ្ជាក់ថា ចាប់ពីទទួលបានគោលការណ៍គ្រប់គ្រងទឹក និងទ្វារទឹកនៅបារាយណ៍ខាងលិចពីរាជរដ្ឋាភិបាល រយៈពេលជាង២ឆ្នាំកន្លងមកនេះ យើងបានសហការគ្នាល្អណាស់ជាមួយសហគមន៍ប្រើប្រាស់ទឹកបារាយណ៍ខាងលិច។ យើងបានជួបពិភាក្សាជាមួយពួកគាត់ជាញឹកញាប់ អំពីតម្រូវការរបស់ពួកគាត់ និងអ្វីដែលយើងត្រូវធ្វើបន្ថែមទៀត។ យើងសង្កេតឃើញថា បច្ចុប្បន្នពួកគាត់រីករាយណាស់ ដោយសារមានទឹកគ្រប់គ្រាន់សម្រាប់ការងារបង្កបង្កើនផល។

លោក ផានិត បន្ថែមថា ឆ្នាំមុនយើងមានបញ្ហាខ្លះ ដោយសាររដូវប្រាំងបានអូសបន្លាយយូរ និងទឹកទន្លេទាបមិនអាចហូរចូលទំនប់៧៨ ទើបធ្វើឲ្យអាជ្ញាធរជាតិអប្សរាសម្រេចបង្ហូរទឹកជូនប្រជាពលរដ្ឋស្រោចស្រពកសិកម្មយ៉ាងច្រើន រហូតស្ទើរតែរីងស្ងួតពីបារាយណ៍។ ប៉ុន្តែ សម្រាប់ឆ្នាំនេះវិញ យើងសង្ឃឹមថា នឹងមិនមានបញ្ហានេះឡើយ ដោយសារទំនប់៧៨ក៏មានទឹកចូល ហើយទឹកបារាយណ៍ខាងលិចក៏មានគ្រប់កម្រិតអតិបរមា ហើយអាចបញ្ជូនចេញសម្រាប់ប្រជាពលរដ្ឋស្រោចស្រពស្រែប្រាំងរបស់ពួកគាត់បានគ្រប់គ្រាន់។

ការចូលរួមសម្អាតប្រឡាយរបស់ប្រជាកសិករក្នុងពេលនេះ គឺជាការបញ្ជាក់ពីការគាំទ្រ ចំពោះអាជ្ញាធរជាតិអប្សរាដែលបានរៀបចំប្រព័ន្ធធារាសាស្ត្របុរាណនាសម័យអង្គរ ឲ្យដំណើរការឡើងវិញ ដែលសកម្មភាពនេះ មិនត្រឹមតែចូលរួមក្នុងកិច្ចការអភិរក្សប្រាង្គប្រាសាទ ការបញ្ជៀសទឹកជំនន់តំបន់អង្គរ និងទីក្រុងសៀមរាបប៉ុណ្ណោះទេ តែថែមទាំងបានក្លាយជាប្រភពទឹកយ៉ាងសំខាន់ដល់បងប្អូនប្រជាពលរដ្ឋសម្រាប់ការងារកសិកម្មទៀតផង។ ជាមួយគ្នានេះដែរ អាជ្ញាធរជាតិអប្សរា សូមគាំទ្រនិងលើកទឹកចិត្តប្រជាពលរដ្ឋក្នុងឧទ្យានអង្គរ ក៏ដូចជាប្រជាពលរដ្ឋទូទៅ ឲ្យចូលរួមក្នុងកិច្ចការអភិរក្ស ក៏ដូចជាកិច្ចការសង្គមផ្សេងៗទៀត។

សូមបញ្ជាក់ថា កាលពីថ្ងៃទី១ ខែកក្កដា ឆ្នាំ២០១៤ រាជរដ្ឋាភិបាលបានប្រគល់ការងារគ្រប់គ្រងទឹក និងទ្វារទឹកនៅបារាយណ៍ខាងលិច ជូនអាជ្ញាធរជាតិអប្សរា ដោយត្រូវទទួលខុសត្រូវទាំងស្រុងលើតម្រូវការទឹកសម្រាប់ស្រូវចំនួន១២០០០ហិកតា (ស្រូវវស្សា៨០០០ហិកតា ស្រូវប្រាំង៤០០០ហិកតា) និងដំណាំរួមផ្សំផ្សេងទៀតចំនួន១០០០ហិកតា និងធានាដោះស្រាយរាល់បញ្ហាគ្រោះទឹកជំនន់ និងភាពរាំងស្ងួត ដែលអាចកើតមានឡើងជាយថាហេតុ។ បន្ទាប់ពីបានទទួលគោលការណ៍នេះហើយ អាជ្ញាធរជាតិអប្សរាបានជួសជុល ស្តារឡើងវិញជាបន្ទាន់នូវទ្វារទឹក និងប្រព័ន្ធប្រឡាយនៃបារាយណ៍ខាងលិច ដែលការងារនេះ ធ្វើឲ្យប្រជាពលរដ្ឋមានទឹកគ្រប់គ្រាន់សម្រាប់ការបង្កបង្កើនផលបានគ្រប់រដូវ៕

សម្ដេចតេជា ហ៊ុន សែន នាយករដ្ឋមន្ត្រី ជួបសំណេះសំណាលជាមួយមន្រ្តីរាជការខេត្តស្វាយរៀង

នៅព្រឹកថ្ងៃទី១៨  វិច្ឆិកា ឆ្នាំ២០១៦ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជួបសំណេះសំណាល ជាមួយក្រុមប្រឹក្សាឃុំ សង្កាត់ ក្រុង ស្រុក និងមន្ត្រីរាជការ កងកម្លាំងប្រដាប់អាវុធក្នុងខេត្តស្វាយរៀង។

នៅមុនកិច្ចសំណេះសំណាល សម្តេចតេជោនាយករដ្ឋមន្រ្តី បានលើកឡើងថាខេត្តស្វាយរៀង គឺជាខេត្តមួយក្នុងចំណោមខេត្តលូតលាស់ផ្នែកសេដ្ឋកិច្ចផ្សេងទៀត ដោយការកើតឡើងនូវតំបន់សេដ្ឋកិច្ចពិសេស ដែលជួយកម្ពុជាក្នុងការនាំចេញផលិតផលទៅកាន់បណ្ដាប្រទេសដ៏ទៃ។

សម្ដេចតេជោ បានមានប្រសាសន៍ថា អាជ្ញាធរខេត្តគ្រប់ជាន់ថ្នាក់ ជាពិសេសកងកម្លាំងមានសមត្ថកិច្ចត្រូវរក្សា សន្តិសុខ សណ្ដាប់ធ្នាប់សង្គម ការពារនូវបទល្មើសផ្សេងៗ ជាពិសេសបញ្ហាគ្រឿងញៀន ដែលជាបញ្ហាធ្ងន់ធ្ងរដែលត្រូវតែយកចិត្តទុកដាក់សហការណ៍គ្នាដោះស្រាយអោយបានព្រមគ្នា ការពារអំពើរភេរវកម្ម   ត្រូវអនុវត្តនយោបាយភូមិឃុំមានសុវត្ថិភាព អោយបានខ្ជាប់ខ្ជួន។ ត្រូវខិតខំដោះស្រាយសេវាជូនប្រជាពលរដ្ឋដោយអនុវត្តអោយបានត្រឹមត្រូវទៅតាមច្បាប់កំណត់រួមមាន សេវាតម្រូវការ និងសេវាសំណូមពរ ជាពិសេសគឺសេវាតម្រូវការរួមមានការធ្វើអត្រានុកូលដ្ឋាន សៀវភៅគ្រួសារ ប័ណ្ណស្នាក់នៅ ធ្វើអត្តសញ្ញាណប័ណ្ណ ។

មន្ត្រីទាំងអស់ត្រូវខិតខំលុបបំបាត់ភាពអសកម្មដែលធ្វើអោយប្រជាជនថ្នាំងថ្នាក់ លើសពីនេះត្រូវយកចិត្តទុកដាក់កសាងអំពើល្អជាមួយប្រជាពលរដ្ឋអោយបានច្រើន។ សមត្ថកិច្ចទាំងអស់ត្រូវគាំទ្រក្នុងការប្រមូលពន្ធ និងប្រឆាំងការគេចពន្ធដើម្បីបង្កើនប្រាក់ចំណូលជាតិ។ ខេត្តស្វាយរៀងគឺជាខេត្តដែលមានច្រកអន្តរជាតិផង ទ្វេភាគីផង  និងតំបន់រោងចក្រជាច្រើនទៀតដែលបានបោះទីតាំងនៅក្នុងខេត្តស្វាយរៀង ដូច្នេះត្រូវសហការអោយបានល្អដើម្បីបង្កើនប្រាក់ចំណូលពីការប្រមូលពន្ធ។ ត្រូវពិនិត្យមើល និងយកចិត្តទុកដាក់តំបន់ដែលត្រូវការពារ ជាពិសេសយកចិត្តទុកដាក់ការពារបង្គោលព្រំដែនដែលបាននៅសល់ពីអតីតកាល។ ទន្ទឹមនឹងនេះត្រូវយកចិត្តទុកដាក់ដោះស្រាយជម្លោះដីធ្លី ដែលមាននៅក្នុងខេត្តរបស់ខ្លួនអោយបានល្អ។ ត្រូវបន្តពន្យល់ និងជំរុញប្រជាពលរដ្ឋអោយបានទៅចុះឈ្មោះបោះឆ្នោតអោយបានឆាប់រហ័ស និងគ្រប់គ្នា ព្រោះនឹងត្រូវបញ្ចប់នៅពេលឆាប់ៗនេះហើយ។

អាជ្ញាធរខេត្ត ត្រូវផ្សព្វផ្សាយសារាចរណ៍ណែនាំអំពីផ្សារលក់ដូរអោយបានល្អ និងទូលំទូលាយទៅដល់បងប្អូនអាជីវករនៅតាមបណ្ដាផ្សារនៅក្នុងខេត្តរបស់ខ្លួន។  ត្រូវយកចិត្តទុកដាក់ធ្វើការងារជាមួយកម្មករអោយបានល្អ ព្រោះខេត្តស្វាយរៀងមានរោងចក្រច្រើន ជាពិសេសគឺនៅតាមតំបន់ឧស្សាហកម្មពិសេស។ ត្រូវខិតខំរក្សាទំនាក់ទំនងអោយបានល្អជាមួយប្រទេសវៀតណាម ដោយខេត្តស្វាយរៀងគឺជាខេត្តដែលមានព្រំប្រទល់ជាប់វៀតណាម ដែលត្រូវពឹងផ្អែកគ្នាទៅវិញទៅមក។  លើសពីនេះត្រូវពិនិត្យមើលលទ្ធភាពដីរបស់ខេត្តជាក់ស្ដែងដើម្បីរៀបចំអោយបងប្អូនប៉ូលីស ឬយោធាការពារព្រំដែនដែលពុំមានដី ដើម្បីទទួលបានដីសម្រាប់រស់នៅ និងប្រកបរបរកសិកម្មនៅតំបន់ព្រំដែនតែម្ដងតែទន្ទឹមនឹងនេះត្រូវទប់ស្កាត់អោយបាន នូវការលក់ ឬជួលដីទៅអោយប្រជាជនវៀតណាម។

សម្តេចតេជោ ហ៊ុន សែន នាយករដ្ឋមន្រ្តី ក៏បានកោតសរសើរដល់មន្ត្រីគ្រប់ជាន់ថ្នាក់ដែលបានរួមសហការគ្នាអភិវឌ្ឍខេត្តស្វាយរៀងអោយកាន់តែរីកលូតលាស់លឿនទៅមុខ។ កិច្ចការដែលសម្រេចទៅបានដោយជោគជ័យគឺអាស្រ័យដោយមានការចូលរួមពីគ្រប់មជ្ឈដ្ឋានទាំងអស់ប្រកបដោយមនសិការ និងឆន្ទះល្អមុះមុត និងការទទួលខុសត្រូវខ្ពស់ក្នុងការបម្រើផលប្រយោជន៍ប្រជាពលរដ្ឋ និងប្រទេសជាតិ៕

ព្រឹកនេះ រដ្ឋសភា បើកកិច្ចប្រជុំគណៈកម្មាធិការអចិន្រ្តៃយ៍ក្រោមអធិបតីភាព សម្តេច ហេង សំរិន ប្រធានរដ្ឋសភា

(ភ្នំពេញ)៖ ដូចការគ្រោងទុក នាវេលាម៉ោង ៩៖០០នាទីព្រឹក មុននេះបន្តិច រដ្ឋសភា បានបើកប្រជុំគណៈកម្មាធិការអចិន្រ្តៃយ៍ ក្រោមអធិបតីភាព សម្តេច ហេង សំរិន ប្រធានរដ្ឋសភានៃព្រះរាជាណាចក្រកម្ពុជា។

នៅក្នុងកិច្ចប្រជុំរដ្ឋសភានោះ មានរបៀបវារៈមួយចំនួន ដែលនឹងពិភាក្សារួមមាន ការពិភាក្សាលើច្បាប់ស្តីពីការប្រែប្រួលអាកាសធាតុ នៃកិច្ចព្រមព្រៀងទីក្រុងប៉ារីស របស់អង្គការសហប្រជាជាតិ ច្បាប់ទូទាត់ថវិកាឆ្នាំ២០១៥ និងច្បាប់ស្តីពីការ គ្រប់គ្រងថវិកាជាតិ ឆ្នាំ២០១៧ និងរបៀបវារៈផ្សេងៗមួយចំនួនទៀត។

គួរបញ្ជាក់ថា នៅព្រឹកថ្ងៃទី១៨ ខែវិច្ឆិកា ឆ្នាំ២០១៦នេះ គណៈកម្មការអចិន្ត្រៃយ៍នៃរដ្ឋសភា បើកកិច្ចប្រជុំរៀបចំរបៀបវារៈខាងលើ សម្រាប់ប្រជុំសភាពេញអង្គ នៅថ្ងៃទី២២ ខែវិច្ឆិកា ឆ្នាំ២០១៦ ខាងមុខនេះ៕

លោក សុខ ឥសាន្ត ៖ បាតុកម្មនៅអាមេរិក បង្ហាញឱ្យឃើញពីប្រទេសលទ្ធិប្រជាធិបតេយ្យ មានលក្ខណៈខុសគ្នាយ៉ាងណាខ្លះ

អ្នកនាំពាក្សគណបក្សប្រជាជនកម្ពុជា (CPP) លោក សុខ ឥសាន បានលើកឡើងថា ការធ្វើបាតុកម្ម របស់ក្រុមមួយក្ដាប់តូច មិនពេញចិត្តលោក ដូណាល់ត្រាំ ដែលទើបជាប់ឆ្នោត ជាប្រធានាធិបតីថ្មីរបស់ សហរដ្ឋអាមេរិកនោះ គឺជាការឆ្លុះបង្ហាញឱ្យឃើញថា តើប្រទេសមហាប្រជាធិបតេយ្យ មានលក្ខណៈខុសប្លែកពីកម្ពុជា ឬបណ្ដាប្រទេសដែលកាន់លទ្ធិប្រជាធិបតេយ្យយ៉ាងណាខ្លះ ។ លោក សុខ ឥសាន្ត បានថ្លែងថា “ជាការបង្ហាញឱ្យឃើញថា តើនៅប្រទេសមហាប្រជាធិបតេយ្យ មានលក្ខណៈយ៉ាងណា តើវាមានការខុសប្លែកពីកម្ពុជា ឬបណ្ដាប្រទេសនានា លើពិភពលោកដែរ ឬទេ?” ។

លោកបានបន្តថា  គ្រប់គ្នាដឹងហើយថា លោក ដូណាល់ត្រាំ ទោះបីគាត់មិនទាន់ចូលកាន់តំណែងក៏ពិតមែន ប៉ុន្តែគាត់ជាប្រធានាធិបតីស្របច្បាប់ ដែលកើតចេញពីឆន្ទៈរបស់ប្រជាពលរដ្ឋ ភាគច្រើនលើសលប់ ហើយអ្នកភាគតិចមួយចំនួន ដែលជ្រុលនិយម ធ្វើបាតុកម្មប្រឆាំងនឹងឆន្ទៈអ្នកភាគច្រើន គឺមិនអាចទៅរួចទេ ។ កាលណាធ្វើល្មើសច្បាប់ហើយ គឺត្រូវទទួលរងការបង្ក្រាប ពីអាជ្ញាធរ ដែលជាតំណាងឱ្យអំណាចប្រជាពលរដ្ឋ ។

អ្នកនាំពាក្យគណបក្សប្រជាជនកម្ពុជា បានបន្ថែមថា ចំពោះការធ្វើបាតុកម្មនៅអាមេរិក មិនមានអ្វីខុសប្លែកពីកម្ពុជានោះទេ ឱ្យតែធ្វើបាតុកម្មគឺខុសហើយ ហើយបើធ្វើបាតុកម្មប៉ះពាល់ដល់ជីវភាពសង្គម សណ្ដាប់ធ្នាប់សាធារណៈ  ដូច្នេះអាជ្ញាធរមានវិធានការបង្ក្រាប ។ លោក បានអះអាងថា  អាមេរិកជាប្រទេសមហាអំណាច ខាងលទ្ធិប្រជាធិបតេយ្យ តើអាមេរិកធ្វើការបង្ក្រាបបាតុករឬអត់? នេះជាគំរូទៅដល់ មេបក្សប្រឆាំង ឱ្យភ្លឺភ្នែក កុំចេះតែស្រែកឈ្នះហើយៗ ទៅមិនរួចទេ ។

លោក សុខ ឥសាន្ត បានធ្វើការអំពាវនាវ ដល់ប្រជាពលរដ្ឋដែលជាម្ចាស់ឆ្នោត ជាពិសេសប្រជាពលរដ្ឋ ដែលគាំទ្រ និងដើរតាមបក្សប្រឆាំង មិនត្រូវងប់ងល់ ទាំងមិនមានការពិចារណា ធ្វើតាមអ្វីដែលជាការញុះញង់ ដើម្បីគ្រាន់តែបម្រើផលប្រយោជន៍ ឯកជនរបស់គេនោះទេ ៕