លោក ហ៊ុន ណេង ដឹកនាំសមាជិក ចុះពិនិត្យសិក្សាការងារសន្តិសុខ សម្រាប់មហាសន្និបាតសភាតំបន់អាស៊ី (APA) លើកទី៩ នៅខេត្តសៀមរាប

កាលពីព្រឹកថ្ងៃទី១១ ខែតុលា ឆ្នាំ២០១៦ លោក ហ៊ុន ណេង ប្រធានគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភា និងជាប្រធានអនុគណៈកម្មការ ទទួលបន្ទុក ផ្នែកសន្តិសុខនៃគណៈកម្មការរៀបចំមហាសន្និបាតសភាតំបន់អាស៊ី APA លើកទី៩ បានអញ្ជើញចុះត្រួតពិនិត្យ ការងារសន្តិសុខ សម្រាប់មហាសន្និបាតលើកទី៩ នៃសភាតំបន់អាស៊ី ដែលសភាកម្ពុជា ទទួលធ្វើជាម្ចាស់ផ្ទះ នៅចុងខែវិច្ឆិកា ខាងមុខនេះ ក្នុងខេត្តសៀមរាប។

នៅក្នុងបេសកកម្មនេះ លោក ហ៊ុន ណេង បានជួបពិភាក្សាការងារជាមួយ លោកអភិបាលខេត្តសៀមរាប និងថ្នាក់ដឹកនាំកងកម្លាំងប្រដាប់អាវុធ គ្រប់ប្រភេទ។ ដោយនៅក្នុងឱកាសនោះ លោកបានជំរុញដល់អាជ្ញាធរត្រូវខិតខំធ្វើយ៉ាងណាថែរក្សា ការពារសន្តិសុខ សណ្ឋាប់ធ្នាប់ ជូនមហាសន្និបាតឲ្យបានល្អ ពីព្រោះថា នេះជាព្រឹត្តិការណ៍ធំ ដែលមានវត្តមានថ្នាក់ដឹកនាំកំពូលៗ របស់កម្ពុជា និងថ្នាក់ដឹកនាំសភានៃប្រទេស ជាសមាជិកសភាតំបន់អាស៊ីជាច្រើនចូលរួម។ លោក ហ៊ុន ណេង ប្រធានគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភាបានគូសបញ្ជាក់ថា ព្រឹត្តិការណ៍នេះ ជាកិត្តិយស និងជាមុខមាត់របស់កម្ពុជាទំាងមូល ដូច្នេះអាជ្ញាធរ កងកម្លំាងប្រដាប់អាវុធ ទំាងអស់ត្រូវខិតខំបំពេញតួនាទីរបស់ខ្លួន ដើម្បីឆ្លើយតបការទុកចិត្ត របស់ថ្នាក់ដឹកនាំ។

សូមជម្រាបថា តាមគម្រោងមហាសន្និបាតលើកទី៩ នៃសភាតំបន់អាស៊ី គ្រោងនឹងប្រារព្ធធ្វើពីថ្ងៃទី២៧ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០១៦ ខាងមុខនេះ នៅលើទឹកដីអង្គរខេត្តសៀមរាប។

ដើម្បីរៀបចំមហាសន្និបាតនេះ សភាកម្ពុជាបានបង្កើតគណៈកម្មការរៀបចំមហាសន្និបាតមួយ ដោយមានអនុគណៈកម្មការទទួលបន្ទុក តាមវិស័យផ្សេងៗគ្នាមួយចំនួនទៀតដូចជា អនុគណៈកម្មការទទួលបន្ទុកផ្នែកហិរញ្ញវត្ថុ និងផ្គត់ផ្គង់ អនុគណៈកម្មការទទួលបន្ទុកផ្នែកឯកសារ និងខ្លឹមសារកិច្ចប្រជុំ អនុគណៈកម្មការទទួលបន្ទុកផ្នែកដឹកជញ្ជូន អនុគណៈកម្មការទទួលបន្ទុកផ្នែកសន្តិសុខ អនុគណៈកម្មការទទួលបន្ទុកផ្នែក ពិធីការ និងអនុគណៈកម្មការទទួលបន្ទុកផ្នែកព័ត៌មាន និងICT ជាដើម។

បន្ទាប់ពីបានជួបប្រជុំជាមួយអាជ្ញាធរខេត្ត និងកងកម្លំាងនានារួចហើយ លោក ហ៊ុន ណេង និងសហការី បានអញ្ជើញចុះត្រួតពិនិត្យទីតាំង រៀបចំមហាសន្និបាតសភាតំបន់អាស៊ី លើកទី៩ ដោយផ្ទាល់ផងដែរ៕

ក្រសួងការ​ងារ ចេញ​សេចក្តី​ប្រកាសព័​ត៌មានស្តី​ពីឧបទ្ទវហេតុគ្រោះថ្នាក់​ចរាចរណ៍នៅ​ខេត្តស្វាយរៀង

យោងតាមសេចក្តីប្រកាសព័ត៌មាន របស់ក្រសួងការងារ និងបណ្តុះបណ្តាលវិជ្ជាជីវៈ ចុះថ្ងៃទី១២ ខែតុលា ឆ្នាំ២០១៦នេះ បានបញ្ជាក់ថា កាលពីវេលាម៉ោង ៦និង៣០នាទីព្រឹក ថ្ងៃទី១១ ខែតុលា ឆ្នាំ២០១៦ ស្ថិតនៅចំណុចភូមិគោកល្វៀង សង្កាត់ព្រៃអង្គុញ ក្រុងបាវិត ខេត្តស្វាយរៀង ដែលបានបណ្តាលឱ្យកម្មកររងរបួសធ្ងន់ស្រាលចំនួន៣៦នាក់។

អ្នករងរបួសទាំងនេះ បានទទួលថវិកាជួយសង្រ្គោះពីសំណាក់អាជ្ញាធរមានសមត្ថកិច្ច និងមន្រ្តីបេឡាជាតិរបបសន្តិសុខសង្គមនៃក្រសួងការងារ និងបណ្តុះបណ្តាលវិជ្ជាជីវៈ ដោយយកចិត្តទុកដាក់បំផុត។

សេចក្តីប្រកាសព័ត៌មាន ក៏បានបញ្ជាក់ថា ក្រសួងការងារ សូមចូលរួមរំលែកនូវសេចក្តីសោកស្តាយ និងអាណិតស្រឡាញ់ជាទីបំផុតជាមួយក្រុមគ្រួសារ និងញាតិមិត្តទាំងអស់របស់ជនរងគ្រោះ ហើយសូមជូនពរដល់អ្នករងរបួសទាំងអស់ឆាប់បានជាសះស្បើយ។

ក្រសួងការងារ និងបណ្តុះបណ្តាលវិជ្ជាជីវៈ នឹងបន្តជួយដោះស្រាយទុក្ខលំបាករបស់បងប្អូន កម្មការិនី និងក្រុមគ្រួសារទៅតាមគោលរបបសន្តិសុខសង្គមរបស់បេឡាជាតិរបបសន្តិសុខសង្គម៕

ក្រសួងពាណិជ្ជកម្ម និងក្រុមហ៊ុនកូហ្វកូ (COFCO) របស់ចិន ព្រមព្រៀងលើអនុស្សរណៈ ដើម្បីនាំចេញអង្ករទៅប្រទេសចិន

(ភ្នំពេញ)៖ ក្រសួងពាណិជ្ជកម្ម កាលពីព្រឹកថ្ងៃទី១១ ខែតុលា ឆ្នាំ២០១៦ បានរៀបចំកិច្ចប្រជុំមួយ រវាងក្រសួងពាណិជ្ជកម្ម សហព័ន្ធស្រូវអង្ករកម្ពុជា និងក្រុមហ៊ុនកូហ្វកូ (COFCO) នៃសាធារណរដ្ឋប្រជាមានិតចិន។

ដឹកនាំកិច្ចប្រជុំនេះរួមមាន លោក សុខ សុភ័ក្ដ្រ អនុរដ្ឋលេខាធិការ នៃក្រសួងពាណិជ្ជកម្ម លោក សុខ ពុទ្ធីវុធ ប្រធានសហព័ន្ធស្រូវអង្ករកម្ពុជា និងលោកស្រី យ៉ាង ហុង អនុប្រធានក្រុមហ៊ុនកូហ្វកូ។
កិច្ចប្រជុំនេះក៏មានចូលរួមផងដែរ ពីសំណាក់អគ្គនាយកជំរុញពាណិជ្ជកម្ម អគ្គនាយកពាណិជ្ជកម្មអន្តរជាតិ អគ្គនាយកក្រុមហ៊ុនហ្គ្រីនត្រេដ អគ្គនាយករង ប្រធាន អនុប្រធាននាយកដ្ឋាន និងមន្ត្រីពាក់ព័ន្ធ ក៏ដូចជាលោក លី អាន ទីប្រឹក្សាពាណិជ្ជកម្ម ប្រចាំស្ថានទូតចិននៅកម្ពុជា និងតំណាងរបស់សហព័ន្ធស្រូវអង្ករ និងអ្នកនាំចេញអង្ករជាច្រើនទៀតផងដែរ។

កម្មវត្ថុនៃកិច្ចប្រជុំនេះ គឺដើម្បីពិភាក្សាលើការធ្វើពាណិជ្ជកម្ម ផលិតផលអង្កររវាងកម្ពុជា និងចិនសម្រាប់ឆ្នាំ២០១៦-២០១៧។

កិច្ចប្រជុំក៏ពិភាក្សា និងសម្រេចផងដែរ លើអនុស្សរណៈនៃការយោគយល់គ្នា រវាងក្រសួងពាណិជ្ជកម្ម និងក្រុមហ៊ុនកូហ្វកូ ស្ដីពីការធ្វើពាណិជ្ជកម្មអង្ករ ដែលអនុស្សរណៈនោះ នឹងជម្រះផ្លូវសម្រាប់ធ្វើការនាំចេញអង្ករ របស់កម្ពុជាប្រមាណ ២០០.០០០ តោនទៅប្រទេសចិន៕

ឯកឧត្តម កែវ រ៉េមី បានស្នើដល់លោកស្រី រ៉ូណា ស្មីត អ្នករាយការណ៍ពិសេសរបស់ UN ផ្តល់យុត្តិធម៌ដល់រាជរដ្ឋាភិបាលកម្ពុជា ពាក់ព័ន្ធនឹងបញ្ហាសិទ្ធិមនុស្ស

ឯកឧត្តម    កែវ រ៉េមី    ប្រធានគណៈកម្មាធិការសិទ្ធិមនុស្សកម្ពុជា    បានស្នើដល់លោកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកបញ្ហាសិទ្ធិមនុស្សនៅកម្ពុជា ផ្តល់យុត្តិធម៌ដល់រាជរដ្ឋាភិបាលកម្ពុជា ពាក់ព័ន្ធនឹងបញ្ហាគោរពសិទ្ធិមនុស្ស ។

ឯកឧត្តម កែវ រ៉េមី បានឲ្យដឹងថា ចំណុចសំខាន់បំផុត គឺយើងបានសំណូមពរទៅគាត់វិញ ដោយសារតែយើងអស់ពេលវេលាសំណូមពរគាត់    សុំឱ្យគាត់ផ្តល់យុត្តិធម៌ដល់កម្ពុជា ជូនរដ្ឋាភិបាលកម្ពុជា     ទាក់ទងនឹងបញ្ហាគោរពសិទ្ធិមនុស្ស     ជាពិសេសសុំឱ្យលោកស្រីយល់ថា ស្ថិរភាពនយោបាយ សន្តិភាព គឺជាមូលដ្ឋានគ្រឹះនៃសិទ្ធិមនុស្ស។

នៅរសៀលថ្ងៃទី១១ ខែតុលា ឆ្នាំ២០១៦នេះ សំណូមពររបស់ប្រធានគណៈកម្មាធិការសិទ្ធិមនុស្សកម្ពុជា បានធ្វើឡើងនៅក្នុងជំនួបជាមួយលោកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកបញ្ហាសិទ្ធិមនុស្សនៅកម្ពុជា នៅគ្រាដែលលោកស្រី រ៉ូណា ស្មីត ធ្វើទស្សនកិច្ចនៅក្នុងប្រទេសកម្ពុជា ជាលើកទី១ រយៈពេល១០ថ្ងៃ។

ឯកឧត្តម កែវ រ៉េមី បានបន្ថែមថា គាត់ចេះតែស្រែកថាបញ្ហាសិទ្ធិមនុស្សនៅកម្ពុជាអាក្រក់ ក៏ប៉ុន្តែសម្រាប់ប្រជាជនដែលធ្លាប់រស់នៅ ប្រសព្វនឹងបញ្ហាទាំងប៉ុន្មានហ្នឹង គឺគាំទ្រទៅវិញ។ ឯកឧត្តមបានបន្តទៀតថា ក្រោយពីរបបខ្មែរក្រហម មានតែសម្តេចតេជោ ហ៊ុន សែន ដែលគាត់បានរំដោះឱ្យប្រជាជនបានរស់ឡើងវិញនេះ គឺជាសិទ្ធិរស់រានមានជីវិត ហ្នឹងគឺជាសិទ្ធិមនុស្សធំណាស់។

សូមបញ្ជាក់ថា លោកស្រី រ៉ូណា ស្មីត ពុំបានលើកឡើងអំពីបញ្ហាសិទ្ធិមនុស្សនៅក្នុងប្រទេសកម្ពុជានោះទេ នៅក្នុងជំនួបជាមួយ ឯកឧត្តម កែវ រ៉េមី ប្រធានគណៈកម្មាធិការសិទ្ធិមនុស្ស នឹងជួបជាមួយរដ្ឋមន្រ្តីក្រសួងយុត្តិធម៌ ឯកឧត្តម អង្គ វង្សវឌ្ឍានា នៅថ្ងៃទី១១ ខែតុលា ឆ្នាំ២០១៦នេះ៕

មន្ដ្រីCPP ៖ ការចោទប្រកាន់ថា សម្ដេចតេជោផ្ញើសារគំរាមលោកកឹម សុខា ជាពិសពុលនយោបាយ ទុច្ចរិតរបស់CNRP

(ភ្នំពេញ) ៖ ឯកឧត្តម សុខ ឥសាន មន្ដ្រីនាំពាក្យគណបក្សប្រជាជនកម្ពុជា បានប្រតិកម្មយ៉ាងខ្លាំងទៅនឹងការលើកឡើងរបស់មន្ដ្រីគណបក្សសង្គ្រោះជាតិ ដែលបានលើកឡើងថា មានការគំរាមកំហែងលើលោកកឹម សុខា មុនពេលចូលប្រជុំសភានាពេលកន្លងទៅនោះ ថាគ្រាន់តែជាលេសដើម្បីទម្លាក់កំហុសទៅគណបក្សប្រជាជន ដើម្បីឲ្យពលរដ្ឋថ្កោលទោស និងស្អប់គណបក្សប្រជាជនកម្ពុជាតែប៉ុណ្ណោះ។

ឯកឧត្តម សុខ ឥសាន បានបញ្ជាក់ថា “…ការលើកឡើងនោះ គឺគ្មានមូលដ្ឋាននោះទេ…CNRP មិនចូលប្រជុំហ្នឹង វាមិនមែនមកពីរឿងភ័យខ្លាចទេ អាហ្នឹងគ្រាន់តែជាលេសរបស់គាត់ទេ…មូលហេតុដែលគាត់មិនចូលសភា គឺគាត់ចង់យកនីតិរដ្ឋ ទៅដោះដូរជាមួយវប្បធម៌និទណ្ឌភាព…”។

ឯកឧត្តម បានបន្ដថា “…ដំណោះស្រាយនយោបាយ វាមិនអាស្រ័យនឹងការពិភាក្សាគ្នាទេ…បើមិនមានការដោះលែងអ្នកជាប់ទោសរាល់ថ្ងៃហ្នឹង គាត់ថា មិនមានដំណោះស្រាយនយោបាយទេ…អញ្ចឹងបានន័យថា យើងយកវប្បធម៌និទណ្ឌភាព មកដោះដូរជាមួយនីតិរដ្ឋ តើវាទៅរួចទេ…”។

ឯកឧត្តម សង្កត់ធ្ងន់ថា “…នេះជាឧបាយកលទុច្ចរិតធ្ងន់ធ្ងររបស់CNRP ដោយមិនអាចអត់ឱនឲ្យបានទេ…”។

ក្នុងនោះដែរ ឯកឧត្តមក៏បានបញ្ជាក់ជាថ្មីថា មូលហេតុដែលមន្ដ្រីគណបក្សសង្គ្រោះជាតិទាំងនោះ មានទោស គឺដោយសារតែពួកគាត់ប្រព្រឹត្តខុសច្បាប់ ហើយនោះជារឿងបុគ្គលផ្ទាល់ខ្លួនដែលខ្លួនឯងត្រូវតែទទួលខុសត្រូវ៕

ប្រជាពលរដ្ឋខ្មែរ-អូស្ត្រាលី ប្រមាណ៤០០នាក់ ស្ម័គ្រចិត្ត ចូលរួមរស់ជា មួយ CPP

ពលរដ្ឋខ្មែរ នៅអូស្ត្រាលីប្រមាណ ៤០០នាក់ ត្រូវបានប្រកាស បញ្ចូលជាសមាជិក របស់គណបក្ស ប្រជាជនកម្ពុជានៅទីក្រុងស៊ីដនី ប្រទេសអូស្ត្រាលី កាលពីថ្ងៃទី៩ ខែតុលាឆ្នាំ២០១៦ ក្រោមវត្តមានប្រធានគណកម្មាធិការគណបក្សប្រជាជនកម្ពុជា ប្រចាំប្រទេសអូស្ត្រាលី និងញូវសេឡែន លោក កុយ គួង, លោក ហ៊ុន ម៉ាណែត ប្រធានក្រុមអង្គការចាត់តាំងយុវជនគណបក្សនៅក្រៅប្រទេស និងលោកគឹម សន្តិភាព ប្រធានក្រុមយុវជនបក្សប្រចាំ នៅអូស្ត្រាលី និងញូវសែឡែន។

ក្នុងនោះដែរលោក ហ៊ុន ម៉ាណែត បានជំរុញអោយសមាជិកគណបក្សដែលចូលថ្មីត្រូវចេះស្មោះត្រង់ សាមគ្គីភាពផ្ទៃក្នុង ខិតខំបំពេញការងារបំរេីប្រជាពលរដ្ឋ ដោយមិនប្រកាន់និន្នាការនយោបាយ ពិសេសផ្សព្វផ្សាយព័តមានពិតពីប្រទេសកម្ពុជា ។

គួរបញ្ជាក់ថាយុវជន និងប្រជាពលរដ្ឋខ្មែរច្រើននាក់ មកហើយ ដែលរស់នៅតាមតំបន់នានា នៅក្រៅប្រទេស បានចូលមកជាមួយគណបក្សប្រជាជនកម្ពុជា មាននៅទ្វីបអាមេរិក អឺរ៉ុប កូរ៉េ ផងដែរ។ ហេីយកន្លងមកនៅកម្ពុជានោះដែរ សមាជិកគណបក្សប្រឆាំងជាច្រេីនក៏ផ្តាច់ខ្លួនចូលមករួមរស់ជាមួយគណបក្សប្រជាជននោះដែរ៕

សាលាដំបូងរាជធានីភ្នំពេញ ចេញដីការកោះហៅលោក សម រង្ស៊ី មកសាកសួរជុំវិញករណីញុះញង់ បង្កចលាចលប៉ះពាល់ដល់សន្តិសុខសង្គម

កាលពីថ្ងៃទី១១ ខែកញ្ញា ឆ្នាំ២០១៦កន្លងទៅ សាលាដំបូងរាជធានីភ្នំពេញ បានចេញដីកាមួយទៀត ដោយធ្វើការកោះហៅលោក សម រង្ស៊ី ប្រធានគណបក្សសង្គ្រោះជាតិ មកសាកសួរជុំវិញករណីញុះញង់ បង្កចលាចលប៉ះពាល់សន្តិសុខសង្គម នេះបើយោងតាមដីការបស់ព្រះរាជអាជ្ញារង អយ្យការអមសាលាដំបូងរាជធានីភ្នំពេញ លោក សៀង សុខ។

នៅក្នុងដីការបស់ព្រះរាជអាជ្ញារង សៀង សុខ បានបញ្ជាក់ថា សូមអញ្ជើញលោក សម រង្ស៊ី ជាជនសង្ស័យ ឲ្យចូលមកកាន់អយ្យការអមសាលាដំបូងរាជធានីភ្នំពេញ នៅថ្ងៃទី២១

ខែតុលា ឆ្នាំ២០១៦ខាងមុខនេះ វេលាម៉ោង៩ព្រឹក ដើម្បីសាកសួរ។

មន្រ្តីនគរបាលបានឲ្យដឹងថា នៅវេលាម៉ោងប្រមាណ១២ថ្ងៃត្រង់ទី១១ ខែតុលា ឆ្នាំ២០១៦នេះ ក្រុមមន្រ្តីនគរបាលយុត្តិធម៌បានយកដីកានេះ ទៅប្រគល់ជូននៅឯទីស្នាក់ការកណ្តាល គណបក្សសង្គ្រោះជាតិ ប៉ុន្តែមន្រ្តីជាន់ខ្ពស់នៅទីនោះគឺ លោក ហូ វ៉ាន់ បានពិនិត្យមើល ប៉ុន្តែមិនទទួលយក ហើយនិយាយថា ទុកឲ្យមេធាវីជាអ្នកទទួល។

មន្រ្តីតុលាការបានបញ្ជាក់ថា ការចេញដីកាកោះហៅ លោក សម រង្ស៊ី នៅពេលនេះធ្វើឡើងតាមរបាយការណ៍របស់សមត្ថកិច្ចក្រសួងមហាផ្ទៃ៕

ប្រភព៖ Fresh News