សម្តេចធិបតី ហ៊ុន ម៉ាណែត៖ សេដ្ឋកិច្ចឌីជីថលជឿនលឿន គឺត្រូវការគ្រប់តួអង្គសង្គមចូលរួមអភិវឌ្ឍចំណេះដឹង

សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាល កំពុងយកចិត្តទុកដាក់ខ្ពស់ លើការធ្វើបដិវត្តន៍សេដ្ឋកិច្ច និងសង្គម ដែលបានដាក់ចេញនូវក្របខណ្ឌគោលនយោបាយសេដ្ឋកិច្ច និងសង្គមឌិជីថលកម្ពុជា ឆ្នាំ២០២១ ដល់ឆ្នាំ២០៣៥ ដែលមានចក្ខុវិស័យកសាងសេដ្ឋកិច្ច និងសង្គមឌីជិថល។

សម្តេចធិបតី ហ៊ុន ម៉ាណែត បានថ្លែងដូចនេះ នៅថ្ងៃទី១៥ ខែកុម្ភៈ ឆ្នាំ២០២៤ ក្នុងឱកាសអញ្ជើញជាអធិបតី “សម្ពោធទីតាំងសាកលវិទ្យាល័យជាតិគ្រប់គ្រង សាខាវាលស្បូវ និងប្រគល់សញ្ញាបត្រជូននិស្សិតជ័យលាភី នៃសាកលវិទ្យាល័យជាតិគ្រប់គ្រង” ។

សម្តេចធិបតី បានថ្លែងបន្តថា តាមរយៈការរៀបចំមូលដ្ឋានគ្រឹះជំរុញការធ្វើបដិវត្តន៍ឌីជីថល និងគ្រប់តួអង្គសង្គម ទាំងវិស័យរដ្ឋ ពលរដ្ឋ និងធុរៈជន ដើម្បីជំរុញសន្ទុះកំណើនសេដ្ឋកិច្ចថ្មី និងលើកកម្ពស់សុខុមាលភាពសង្គម។ ជាមួយគ្នានេះ គ្រឹះស្ថានឧត្តមសិក្សា ក៏ជាផ្នែកមួយយ៉ាងសំខាន់ក្នុងការអភិវឌ្ឍទេពកោសល្យ ការច្នៃប្រឌិត និងប្រព័ន្ធអេកូឡូស៊ី ដើម្បីកំណើននិរន្តរភាពនៃសេដ្ឋកិច្ចឌីជីថលផងដែរ៕