វគ្គបណ្ដុះបណ្ដាលស្តីពីការពង្រឹងសមត្ថភាពមន្រ្តីអនុវត្តច្បាប់ជួរមុខសម្រាប់មន្ត្រីអនុវត្តច្បាប់ខេត្តបន្ទាយមានជ័យ និងខេត្តឧត្តរមានជ័យ

 បន្ទាយមានជ័យ៖ អាជ្ញាធរជាតិប្រយុទ្ធប្រឆាំងគ្រឿងញៀន បានរៀបចំបើកវគ្គបណ្ដុះបណ្ដាលស្តីពីការពង្រឹងសមត្ថភាពមន្រ្តីអនុវត្តច្បាប់ជួរមុខសម្រាប់មន្ត្រីអនុវត្តច្បាប់ខេត្តបន្ទាយមានជ័យ និងខេត្តឧត្តរមានជ័យ ពិធីនេះប្រព្រឹត្តទៅក្រោមអធិបតីភាពឧត្តមសេនីយ៍ឯក នាក់ យុន្ធា អគ្គលេខាធិការស្តីទីនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន (អ.ជ.ប.គ.ញ) លោក អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យនាព្រឹកថ្ងៃទី២៣ ខែវិច្ឆិកា ឆ្នាំ២០២០ ធ្វើនៅសាលប្រជុំសាលាខេត្តបន្ទាយមានជ័យ។

ជាមួយគ្នានោះ ឧត្តមសេនីយ៍ឯក នាក់ យុន្ធា អគ្គលេខាធិការស្តីទីនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន(អ.ជ.ប.គ.ញ) បានធ្វើការកោធសរសើចំពោះមន្រ្តីជំនាញរបស់នាយកដ្ឋានពាក់ព័ន្ធ ចំណុះអគ្គលេខាធិការដ្ឋាន អាធរជាតិប្រយុទ្ធប្រឆាំងគ្រឿងញៀន ក្រុមប្រឹក្សាត្រួតពិនិត្យគ្រឿងញៀនថៃ(ONCB) និងគណៈកម្មាធិការត្រួតពិនិត្យគ្រឿងញៀនខេត្តបន្ទាយមានជ័យ ក្នុងការរៀបចំវគ្គបណ្តុះបណ្តាលនេះឡើង ដែលមានរយៈពេល៣ថ្ងៃចាប់ពីថ្ងៃទី២៣ដល់ថ្ងៃទី២៥ ខែវិច្ឆិកា ឆ្នាំ២០២០។

ឧត្តមសេនីយ៍ឯក នាក់ យុន្ធា បានមានប្រសាសន៍បញ្ជាក់ថា វគ្គបណ្តុះបណ្តាលនាថ្ងៃនេះមានគោលបំណងដើម្បីពង្រឹងសមត្ថភាពដល់មន្រ្តីអនុវត្តច្បាប់ជួរមុខ សំដៅរួមមាន៖
១- លើកកម្ពស់ចំណេះដឹង និងបង្កើនសមត្ថភាពជូនដល់មន្រ្តីអនុវត្តច្បាប់ជួរមុខដើម្បីចូលរួមសកម្មភាពក្នុងការបង្ការ ទប់ស្កាត់ និងបង្រ្កាប ការចរាចរគ្រឿងញៀនខុសច្បាប់ ពិសេសពង្រឹងការត្រួតពិនិត្យនៅព្រំដែន ដែលជាចុះណុចចេញ.ចូលនិងឆ្លងកាត់។
២- ត្រូវបង្កើនកិច្ចសហការគ្នាអោយបានជិតស្និទថែមទៀតជាមួយសមត្ថកិច្ចពាក់ព័ន្ធ។
៣- ពង្រឹងយន្តការនិងប្រសិទ្ធភាពការងាររបស់ការិយាល័យទំនាក់ទំនងព្រំដែន(BLO)ពិសេសលើការផ្លាស់ប្តូរព័ត៌មាន ជាប្រចាំនិងទាន់ពេលវេលាស្តីពីមុខសញ្ញាឧក្រិដ្ឋជន និងសកម្មភាពរបស់គេសំដៅបង្កើនប្រៀឈ្នះក្នុងការបង្ការ និងទប់ស្កាត់បទល្មើស។

ជាក់ស្តែងតាមរយៈលទ្ធផលដែលបង្រ្កាបដោយសមត្ថកិច្ចកម្ពុជាក្នុងរយៈពេល៦ខែដើមឆ្នាំ២០២០នេះ សមត្ថកិច្ចយើងបានបានបង្រ្កាបបទល្មើសគ្រឿងញៀន បានចំនួន៥,៤៦៣ករណី និងចាប់ខ្លួនជនសង្ស័យចំនួន១០.៨៧៨នាក់ ក្នុងនោះមានជនបរទេសចំនួន១៥សញ្ជាតិ(ស្មើនិង១៧៧នាក់) និងចាប់ខ្លួនយកសាធាតុញៀនប្រមាណជាង២៦០គីឡូក្រាមហើយក្នុងនោះក៏មានទីតាំង កែច្នៃ ផលិត មួយចំនួនត្រូវបានយើងបង្រាបបានទាន់ពេលវេលាទោះបីក្នុងរូបភាពតូចក្តី។

ថ្លែងក្នុងពិធីបើកវគ្គបណ្តុះបណ្តាលនាឱកាសនោះលោក អ៊ុ រាត្រី អភិបាលខេត្ត បានមានប្រសាសន៍ថា វគ្គបណ្តុះបណ្តាលនេះបិតជាមានសារៈសំខាន់ណាស់ក្នុងការចូលរួមចំណែកអភិវឌ្ឍន៍សមត្ថភាពជូនដល់មន្រ្តីអនុវត្តច្បាប់គ្រឿងញៀនតាមរយៈការចែករំលែកនូវចំណេះដឹងនិងបទពិសោធន៍បន្ថែមទៀតលើចំណេះដឹងរបស់ខ្លួនដែលមានស្រាប់ ពិសេសមន្រ្តីជួរមុខ។លោក ក៏បានធ្វើការផ្តាំផ្ញើដល់សិក្ខាកាមទាំងអស់គ្នាត្រូវខិតខំយកចិត្តទុកដាក់រៀនសូត្រនិងសួរដេញដោលនូវចំណុចមន្ទិលសង្ស័យដើម្បីក្រេបយកចំណេះដឹងពីគ្រូឧទ្ទេសនាមទាំងអស់ ពីព្រោះពេលនេះជាឱកាសដែលយើងបានទទួលយកនិងបំពេញបន្ថែមនូវកង្វះខាតដើម្បីត្រៀមលក្ខណៈចូលរួមក្នុងសកម្មភាពប្រយុទ្ធប្រឆាំងគ្រឿងញៀនតាមអោយទាន់សភាពការណ៍វិវត្តនៃនិន្នាការគ្រឿងញៀននាពេលបច្ចុប្បន្ន៕