អភិបាលខេត្តបន្ទាយមានជ័យ៖ ក្រោមម្លប់សុខសន្តិភាព និងការអភិវឌ្ឍ បងប្អួនជនរួមជាតិរីករាយជ្រះថ្លាក្នុងការធ្វើបុណ្យទាននៅតាមគ្រប់វត្តអារាមនៅទូទំាងប្រទេស

 បន្ទាយមានជ័យ៖ នៅរសៀលថ្ងៃទី០២ ខែកញ្ញា ឆ្នាំ២០២០ លោក អ៊ុំ រាត្រី អភិបាលខេត្តបន្ទាយមានជ័យ និងលោកស្រី ជ័យ ណារី អ៊ុ រាត្រី អមដំណើរដោយលោក លោកស្រី ប្រធានមន្ទីរ អង្គភាព អភិបាលក្រុង ស្រុក មន្ត្រីរាជការ កងកម្លាំងប្រដាប់អាវុធ និងមានការចូលរួមពីប្រជាពុទ្ធបរិស័ទ បានអញ្ជើញសូត្រមន្តក្នុងឱកាសកាន់បិណ្ឌវេនទី០១ នៅវត្តសិលារាមភគ្គិនេសន៍ ឃុំសឿ ស្រុកមង្គលបូរី។

ក្នុងឱកាសនោះ លោក អ៊ុំ រាត្រី អភិបាលខេត្ត និងភរិយា មានសទ្ធាជ្រះថ្លាប្រគេនទេយ្យវត្ថុមានគ្រឿងឧបភោគបរិភោគមួយចំនួន និងបច្ច័យកសាងផ្ទាល់ខ្លួនចំនួន ៤ ០០០ ០០០ រៀល បច្ច័យចូលរួមរបស់មន្ទីរ អង្គភាពចំនួន ៣ ៦០០ ០០ រៀល បច្ច័យបួនព្រះសង្ឃក្នុង១អង្គ ៥០០០០ រៀល លោកតា លោកយាយប្រជាពុទ្ធបរិសទ័ថវិកាក្នុង១នាក់ ១០០០០ រៀល។

លោក អ៊ុំ រាត្រី បានមានប្រសាសន៍ថា ក្រោមម្លប់សុខសន្តិភាព និងការអភិវឌ្ឍ បងប្អួនជនរួមជាតិរីករាយជ្រះថ្លាក្នុងការធ្វើបុណ្យទាននៅតាមគ្រប់វត្តអារាមនៅទូទំាងប្រទេស។ តែសូមមានការប្រុងប្រយ័ត្នជាប់ជានិច្ចនូវវិធានការការពារជំងឺកូវីដ-១៩ តាមការណែនាំរបស់ក្រសួងសុខាភិបាល។

លោកអភិបាលខេត្ត ក៏បានអំពាវនាវដល់ប្រជាពលរដ្ឋទាំងអស់ កុំធ្វេសប្រហែសការពារខ្លួនពីការឆ្លងជំងឺកូវីដ-១៩នេះ។ យើងអាចនឹងភ្លេចកូវីដ-១៩ តែជំងឺនេះ មិនដែលភ្លេចយើងនោះទេ។ សូមបងប្អូន កូនក្មួយទំាងអស់ការពារខ្លួនជាប់ជានិច្ច កុំឲ្យជំងឺនេះឆ្លងមកលើខ្លួនយើង គ្រួសារយើង និងសហគមន៍យើង។ ម្យ៉ាងវិញទៀតសូមមានការប្រុងប្រយ័ត្នក្នុងការធ្វើដំណើររតាមដងផ្លូវ ចូលរូមគោរពច្បាប់ចរាចរណ៍ មានការយោគយល់អធ្យាស្រ័យឲ្យគ្នាទៅវិញទៅនៅក្នុងការធ្វើដំណើរ៕