អ្នកនាំពាក្យ CPP អះអាងថា ការបន្តប្រើប្រាស់ស្លាកសញ្ញា (ឡូហ្គោ) របស់ CNRP គឺជាការរំលោភច្បាប់

អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា ការបន្តប្រើប្រាស់ស្លាកសញ្ញា (ប្រើឡូហ្គោ) របស់អតីតគណបក្ស សង្រ្គោះជាតិ (CNRP) គឺជាការរំលោភច្បាប់ហើយដែលនឹងត្រូវទទួលទោស ផងដែរ។ ការលើកឡើងរបស់អ្នកនាំពាក្យគណបក្សប្រជាជនកម្ពុជា ខណៈអ្នកប្រឆាំងរបស់អតីតបក្សសង្គ្រោះជាតិន បន្តប្រើឡូហ្គោរូប ព្រះអាទិត្យដែលជានិមិត្តសញ្ញារបស់គណបក្សដដែល។ ជាងនេះអតីតបក្ស នេះតែងតែចេញសេចក្តីថ្លែងការណ៍នានាដោយ ប្រើរូបឡូហ្គោបក្សថែម ទៀតផងក្នុងពេលគណបក្សមិនមានរូបរាងដែលត្រូវបានតុលាការកំពូលសម្រេចរំលាយចោលកាលពីចុងឆ្នាំ២០១៧។

លោក សុខ ឥសាន បានឱ្យដឹងនៅថ្ងៃទី២៨ ខែមករា ឆ្នាំ២០១៩ ថា អតីតគណបក្សប្រឆាំងត្រូវបានតុលាការកំពូលសម្រេចរំលាយចោលរួចហើយ កាលពីថ្ងៃទី១៦ ខែវិច្ឆិកា ឆ្នាំ២០១៧ ដូច្នេះរាល់រចនាសម្ព័ន្ធ ឡូហ្គោ របស់អតីតបក្សនេះ ត្រូវអស់សុពលភាពប្រើប្រាស់ហើយ។ លោកបានបន្តថា បើមានអ្នកណាប្រើប្រាស់ទៀត គឺជាទង្វើខុសច្បាប់ ដោយសារប្រឆាំងនឹងសាលដីកាសា្ថពរ និងបិទផ្លូវតវ៉ារបស់តុលាការកំពូល ។

អ្នកនាំពាក្យគណបក្សកាន់អំណាចដដែលនេះ បានបន្ថែមថា សមត្ថកិច្ចមាន ភារកិច្ចអនុវត្តច្បាប់ ណែនាំឱ្យមានការគោរព និងអនុវត្តឱ្យបានត្រឹមត្រូវ ទៅតាមច្បាប់ជាធរមានបើក្នុងករណីនៅតែរឹងទទឹងត្រូវមានវិធានការណ៍ទប់ស្កាត់ និងបង្ក្រាបដើម្បីថែរក្សាសន្តិសុខ និងសណ្តាប់ធ្នាប់សាធារណៈ ជូនប្រជាពលរដ្ឋទូទៅ៕

ប្រភព៖ CPP News