ប្រធាន គ.ជ.ប អនុញ្ញាតឱ្យ ប្រធានសមាគមគ្រឹះស្ថានឧត្តមសិក្សា ចូលជួបដើម្បីស្តាប់របាយការណ៍ ដែលសមាគមន៍នេះចូលរួមសង្កេតការណ៍បោះឆ្នោតព្រឹទ្ធសភា

នាព្រឹកថ្ងៃពុធ ទី២៨ ខែមីនា ឆ្នាំ២០១៨ ស្អែកនេះ លោក ស៊ិក ប៊ុនហុក ប្រធាន​ គ.ជ.ប នឹងជួបពិភាក្សា​ការងារ​ជាមួយ លោក ហេង វ៉ាន់ដា ប្រធានសមាគមគ្រឹះស្ថានឧត្តមសិក្សា នៅទីស្តីការ គ.ជ.ប ដើម្បីស្តាប់​របាយការណ៍​សង្កេតការណ៍ បោះឆ្នោតជ្រើសតាំងសមាជិកព្រឹទ្ធសភារបស់ សមាគមនេះ។ នេះបើតាមសេចក្តីប្រកាសរបស់ គ.ជ.ប នៅថ្ងៃទី២៧ ខែមីនានេះ។

សេចក្តីប្រកាសបានបញ្ជាក់ថា ជំនួបនេះ គឺជាឱកាសដែលសមាគមគ្រឹះស្ថានឧត្តមសិក្សាកម្ពុជា នឹងធ្វើ​របាយការណ៍ជូន គ.ជ.ប ស្តីពីការងារសង្កេតការណ៍បោះឆ្នោតរបស់ខ្លួន កាលពីថ្ងៃទី២៥ ខែកុម្ភៈ ឆ្នាំ២០១៨ ក្នុងព្រឹត្តិការណ៍បោះឆ្នោតជ្រើសតាំងសមាជិកព្រឹទ្ធសភា​ នីតិកាលទី៤​។

សូមបញ្ជាក់ថា សម្រាប់ការបោះឆ្នោតជ្រើសតាំងសមាជិកព្រឹទ្ធសភា​ នីតិកាលទី៤​ កាលពីខែកុម្ភៈ កន្លងទៅនេះ សមាគមគ្រឹះស្ថានឧត្តមសិក្សា ក៏បានដាក់អ្នកសង្កេតការណ៍ជាង៤០នាក់ផងដែរ ដើម្បីឃ្លាំមើលសកម្មភាព​ក្នុងថ្ងៃបោះឆ្នោត។ សមាគមនេះ ក៏បានអបអរសាទរចំពោះលទ្ធផលដ៏ល្អ នៃការបោះឆ្នោតនេះផងដែរ ៕