លោក សុខ ឥសាន ថ្លែងថា ឧបាយកលឧទ្ទាមខុសច្បាប់ត្រូវបានបរាជ័យទាំងស្រុង

លោក សុខ ឥសាន អ្នកនាំពាក្យគណបក្សប្រជាជនកម្ពុជា នៅថ្ងៃទី១៩ ខែមករា ឆ្នាំ២០១៨នេះ បានបញ្ជាក់ជាថ្មីម្តងទៀតជូនសាធារណជនថា «ឧបាយកលឧទ្ទាមខុសច្បាប់ត្រូវបានបរាជ័យទាំងស្រុង» ដោយសារពុំទទួលបានការជឿជាក់ពីឆាកអន្តរជាតិ និងពីប្រជាជនកម្ពុជា ដែលកំពុងរស់នៅក្នុងសុខសន្តិភាព និងការអភិវឌ្ឍ។

លោក សុខ ឥសាន បានបញ្ជាក់ថា ក្រោយបក្សប្រឆាំងត្រូវបានតុលាការកំពូលសម្រេចរំលាយចោល ស្របតាមបទល្មើសរបស់ខ្លួន និងបន្ទាប់ពី កឹម សុខា ត្រូវបានចាប់ខ្លួនពីបទសន្ទិដ្ឋិភាព (ក្បត់ជាតិ) ឃុបឃិតជាមួយរដ្ឋបរទេសប៉ុនប៉ងផ្តួលរំលំរាជរដ្ឋាភិបាលស្របច្បាប់មក ក្រុមមន្ត្រីអតីតបក្សប្រឆាំងបានរត់ភៀសខ្លួនទៅក្រៅប្រទេស ដើម្បីទៅឱបដៃឱបជើងចៅហ្វាយនាយ ឱ្យជួយស្រោចស្រង់ខ្លួន ដោយវិធីផ្សេងៗតាមដែលអាចធ្វើបាន។ ប៉ុន្តែទោះបីខិតខំអង្វរករយ៉ាងណា ក៏មិនឃើញហុចផលអ្វីដែលជាផលប្រយោជន៍ ឬផលចំណេញដល់ប្រទេសជាតិ និងប្រជាជនបន្តិចណាសោះឡើយ។ ដូច្នេះហើយមេឧទ្ទាមខុសច្បាប់ម្តងរត់ទៅខាងនេះ ម្តងរត់ទៅខាងនោះ ឆ្លេឆ្លាដូចមាន់ដង្កោកាច់។

លោក សុខ ឥសាន បានបន្ថែមថា ថ្មីៗនេះស្រាប់តែពួកគេបានបែកគំនិតបង្កើតរបស់ដែលហៅថា ចលនាសាង្គ្រោះជាតិស្អីគេនោះ ដោយនិយាយថា ដើម្បីបានដោះលែង កឹម សុខា ឱ្យបក្សដែលស្លាប់ហើយរស់ទ្បើងវិញ ហើយថាឱ្យលទ្ធិប្រជាធិបតេយ្យដំណើរការជាថ្មី។ អ្នកនាំពាក្យគណបក្សប្រជាជន បានគូសបញ្ជាក់ថា គោលដៅរបស់ដែលហៅថា ចលនាសង្គ្រោះជាតិស្អីគេនោះ ដែលជាចលនាឧទ្ទាមខុសច្បាប់ មិនត្រូវបានរាជរដ្ឋាភិបាលយកចិត្តទុកដាក់នោះទេ ចំណែកស្ថានភាពប្រជាជននៅនឹងនរធម្មតា គឺមិនមានការគាំទ្រចំពោះសកម្មភាពក្រុមប្រឆាំងទាំងនោះទេ។

លោក សុខ ឥសាន បានលើកឡើងទៀតថា ដោយសារអស់ក្បួនហក់លោត ឥឡូវស្រាប់តែមកស្នើសុំឱ្យលើកពេលបោះឆ្នោតទៅវិញ។ មេឧទ្ទាមខុសច្បាប់យល់ច្រឡំហើយ មិនអាចយកប្រជាជនកម្ពុជា ធ្វើជាចំណាប់ខ្មាំងបាននោះទេ ទោះបីដោយតម្លៃណាក៏ដោយ កុំយល់ច្រឡំឱ្យសោះ។ លោកបន្ថែមថា ចំណែកកាលបរិច្ឆេទបោះឆ្នោតត្រូវបាននាយករដ្ឋមន្ត្រីកំណត់រួចហើយ។ ដូច្នេះការបោះឆ្នោតជ្រើសតាំងសមាជិកព្រឹទ្ធសភា និងការបោះឆ្នោតជ្រើសតាំងតំណាងរាស្ត្រអាណត្តិទី៦ នឹងប្រព្រឹត្តទៅ តាមពេលវេលាដែលបានកំណត់ អត់មានផ្លាស់ប្តូរនោះឡើយ។

លោក សុខ ឥសាន បានធ្វើការសន្និដ្ឋានថា ដោយសារមិនអាចរកវិធីដាក់គំនាបមកលើរាជរដ្ឋាភិបាលកម្ពុជា និងមិនអាចធ្វើបាបមកលើប្រជាជនកម្ពុជាដែលកំពុងរស់នៅក្នុងសន្តិភាព ហើយដោយសារការស្នើនេះស្នើនោះទៅចៅហ្វាយនាយមិនបាន ពួកឧទ្ទាមខុសច្បាប់បានបរាជ័យយ៉ាងធ្ងន់ធ្ងរ និងជាក់ស្តែង ដោយសារគ្មានការគាំទ្រពីមេក្លោងបរទេស និងពីប្រជាជនកម្ពុជា នាំឱ្យពួកឧទ្ទាមខុសច្បាប់ទាំងនេះ នឹងឈានទៅរកការវិនាសសាបសូន្យនាពេលឆាប់ៗខាងមុខនេះជាមិនខានឡើយ៕