កញ្ញា ធី សុវណ្ណថា​ ដាក់ពាក្យបណ្តឹងប្តឹង​អ្នកកាន់ហ្វេសប៊ុក​របស់គណបក្សប្រឆាំងពីររូប

យោងតាមពាក្យបណ្តឹងរបស់កញ្ញា ធី សុវណ្ណថា ចេញថ្ងៃទី២៤ ខែមិថុនា ឆ្នាំ២០១៦ បានឲ្យដឹងថាឈ្មោះ ធី សុវណ្ណថា កាន់អត្តសញ្ញាណប័ណ្ណលេខ ០១០៩០០៣២២ កើតថ្ងៃទី០៣ ខែមេសា ឆ្នាំ១៩៩៥   ដែលមានទីលំនៅផ្ទះលេខ   ២៧០ ផ្លូវលេខ៥៩៨    សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ទី១-ប្តឹងឈ្មោះ អូន វ៉ាន់សាក់ (Oun Vansak) ម្ចាស់ទំព័រហ្វេសប៊ុក I Love Cambodia Hot News II ពីបទបរិហាកេរ្តិ៍ និងជេរប្រមាថ និងទី២-ប្តឹងឈ្មោះ ម៉ោញ សារ៉ាត់ (Mounh Sarath) ម្ចាស់គណនីហ្វេសប៊ុក (Facebook Account) (Mounh Sarath) ពីបទបរិហាកេរ្តិ៍។ គណនីហ្វេសប៊ុកទាំងពីរនេះបច្ចុប្បន្នត្រូវបានគេដឹងថាបានផលិតព័ត៌មានភូតកុហក មូលបង្កាច់ខុសពីការពិតជាច្រើនក្នុងគោលដៅរិះគន់ វាយប្រហារមកលើសង្គមកម្ពុជាបច្ចុប្បន្ន ហ្វេសប៊ុកនេះគឺបាននឹងកំពុងបំរើបក្សប្រឆាំងទាំងផ្កាប់មុខ។

ពាក្យបណ្តឹងរបស់កញ្ញា ធី សុវណ្ណថា ធ្វើឡើងដោយយោងទៅលើអត្ថបទបង្ហោះលើទំព័រហ្វេសប៊ុកឈ្មោះ I Love Cambodia Hot News II    កាលពីថ្ងៃទី២១    ខែមិថុនា  ឆ្នាំ២០១៦ បរិហាកេរ្តិ៍អំពីការប្រារព្ធធ្វើវេទិការបស់កញ្ញា នៅខេត្តឧត្តមានជ័យ និងបង្ហោះលើទំព័រហ្វេសប៊ុក I Love Cambodia Hot News II កាលពីថ្ងៃទី១៥ ខែឧសភា ឆ្នាំ២០១៦ អំពីការជេរប្រមាថមកលើរូបកញ្ញា និងវីដេអូឃ្លីបរបស់ទំព័រហ្វេសប៊ុកឈ្មោះ I Love Cambodia Hot News III កាលពីថ្ងៃទី៧ ខែមិថុនា ឆ្នាំ២០១៦ ដែលឈ្មោះ អូន វ៉ាន់សាក់ អះអាងថា ខ្លួនជាម្ចាស់ទំព័រហ្វេសប៊ុកឈ្មោះ I Love Cambodia Hot News II។ តបតាមកម្មវត្ថុ និងយោងខាងលើ ​​  កញ្ញាធី    ​​​ សុណ្ណថា ​​   ក៏សូមជម្រាបជូនឯកឧត្តមព្រះរាជអាជ្ញាជ្រាបថា     ឈ្មោះ អូន វ៉ាន់សាក់ ដែលជាម្ចាស់ទំព័រហ្វេសប៊ុក I Love Cambodia Hot News II បានធ្វើការបង្ហោះអត្ថបទបរិហាកេរ្តិ៍ និងជេរប្រមាថមកលើរូបកញ្ញផ្ទុយពីសកម្មភាពពិតដែលកញ្ញាបានធ្វើវេទិកាសាធារណៈ  ​ នៅភូមិត្រាំប៉ោង   ​ ឃុំព្រះប្រឡាយ    ស្រុកត្រពាំងប្រាសាទ    ខេត្តឧត្តមានជ័យ កាលពីថ្ងទី១៨ ខែមិថុនា ឆ្នាំ២០១៦។

ជាមួយគ្នានេះពាក្យបណ្តឹងទី២-ប្តឹងឈ្មោះ ម៉ោញ សារ៉ាត់ ម្ចាស់គណនីហ្វេសប៊ុក (Facebook Account) (Mounh Sarath) ពីបទបរិហាកេរ្តិ៍ ដោយបានសរសេរបង្ហោះនៅក្នុងគណនីហ្វេសប៊ុកផ្ទាល់ខ្លួន នៅថ្ងទី២១ ខែមិថុនា ឆ្នាំ២០១៦។ តបតាមកម្មវត្ថុ និងយោងខាងលើកញ្ញា ធី សុវណ្ណថា ក៏សូមជម្រាបជូន ឯកឧត្តមព្រះរាជអាជ្ញាជ្រាបថា ឈ្មោះ ម៉ោញ សារ៉ាត់ បានសរសេរបង្ហោះអត្ថបទនៅលើបណ្តាញសង្គមហ្វេសប៊ុកឈ្មោះ Mounh Sarath ដោយចោទប្រកាន់មកលើរូបកញ្ញា ក្នុងនាមប្រធានអង្គការយុវជន កិច្ចការសង្គម ថាសកម្មភាពដែលនាងជួបជុំពលរដ្ឋ នៅភូមិត្រាំប៉ោង ឃុំព្រះប្រឡាយ ស្រុកត្រពាំងប្រាសាទ ខេត្តឧត្តមានជ័យ កាលពីថ្ងៃទី១៨ ខែមិថុនា ឆ្នាំ២០១៦ នោះថាមានចំនួនអ្នកចូលរួមក្នុងវេទិកា អង្គការកញ្ញាចំនួន ៧០នាក់ប៉ុណ្ណោះ តែការពិតអ្នកចូលរួមពិតប្រាកដមានរហូតដល់ទៅ ៩០០នាក់។    លើសពីនេះទៅទៀតគណនីហ្វេសប៊ុក    (Facebook Account)   ឈ្មោះ ម៉ោញ សារ៉ាត់ បានចោទប្រកាន់មកលើរូបកញ្ញាថា បានកាត់តរូបភាពនៃសកម្មភាពក្នុងវេទិកាដដែលនេះ។ អាស្រ័យដូចបានជម្រាបជូនខាងលើកញ្ញា ធី សុណ្ណថា សូមឲ្យឯកឧត្តមព្រះរាជអាជ្ញា មេត្តាជួយចាត់ការលើឈ្មោះ អូន វ៉ាន់សាក់ (Oun Vansak) និងចាត់ការលើឈ្មោះ ម៉ោញ សារ៉ាត់ (Mounh Sarath) ទៅតាមនីតិវិធីច្បាប់៕