សម្តេចតេជោ ហ៊ុន សែន
នាយករដ្ឋមន្រ្តីនៃព្រះរាជាណាចក្រកម្ពុជា បានល្មើសច្បាប់ចរាចរណ៍ផ្លូវគោក
ពីបទបើកបរម៉ូតូមិនពាក់មួកសុវត្ថិភាព។ នៅព្រឹកថ្ងៃទី ២៤ ខែមិថុនា ឆ្នាំ២០១៦នេះ
សម្តេចតេជោ ហ៊ុន សែន បានចេញមុខទទួលខុសត្រូវ ដោយបានអញ្ជើញទៅបង់ប្រាក់ពិន័យ
ចំពោះការជិះម៉ូតូ ដោយមិនពាក់មួកសុវត្ថិភាពនៅប៉ុស្តិ៍នគរបាលសង្កាត់ចតុមុខ
ខណ្ឌដូនពេញ ។ ទោះបីជាការល្មើសច្បាប់នេះ មិនស្ថិតនៅក្នុងកំរិតមួយធ្ងន់ធ្ងរ
តែអាចចាត់ទុកថា សម្តេចតេជោ ហ៊ុន សែន បានល្មើសច្បាប់ចរាចរណ៍ផ្លូវគោក ដែលបានចែងថា
រាល់អ្នកបើកបរម៉ូតូនៅលើដងផ្លូវទាំងអស់ ត្រូវពាក់មួកសុវត្ថិភាពឲ្យបានគ្រប់ៗគ្នា។
ប៉ុន្តែជាភាពទទួលខុសត្រូវសម្តេចតេជោ ហ៊ុន សែន នាយករដ្ឋមន្រ្តីកម្ពុជា
បានអញ្ជើញទៅបង់ប្រាក់ពិន័យតាមការកំណត់ក្នុងច្បាប់ចរាចរណ៍ផ្លូវគោកថ្មី។
ភាពទទួលខុសត្រូវរបស់សម្តេចតេជោ
ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នាពេលនេះ «គឺជាគំរូដ៏ល្អមួយសម្រាប់អ្នកមានអំណាចដទៃទៀត
ដែលមិនគោរពច្បាប់ចរាចរណ៍»។ កន្លងមក
សាធារណជនបានរិះគន់យ៉ាងចាស់ដៃចំពោះអ្នកមានអំណាចមួយចំនួននៅកម្ពុជា
ដែលតែងល្មើសច្បាប់ជាអន្លើ ហើយមិនបានចេញមុខទទួលខុសត្រូវតាមផ្លូវច្បាប់។
ប្រជាពលរដ្ឋទូទៅតែងរិះគន់ថា
អ្នកមានអំណាចមិនថាអ្នកនយោបាយ មន្រ្តីជាន់ខ្ពស់ មន្រ្តីមានស័ក្តធំ
គឺយកអំណាចរបស់ខ្លួនជិះជាន់លើប្រជាពលរដ្ឋខ្មែរ ដោយមិនគោរពច្បាប់បាន ចែង។ ការរិះគន់នេះបានកើតឡើងក្រោយពីសង្កេតឃើញថា
អ្នកមានអំណាចទាំងនោះ តែងល្មើសច្បាប់ ពេលបើកបរនៅលើដងផ្លូវ តាមរូបភាព
បើកបរលើសល្បឿនកំណត់ បើកបរក្នុងស្ថានភាពស្រវឹងជាដើម តែបែរជាអាងអំណាច
ហើយមិនព្រមទទួលខុសត្រូវតាមការ ផាកពិន័យពីសំណាក់សមត្ថកិច្ច។
សម្តេចតេជោ ហ៊ុន សែន
បានអំពាវនាវឲ្យបងប្អូនទាំងអស់គោរពច្បាប់ចរាចរណ៍ ទោះបីថ្នាក់ណាក៏ដោយ
ក៏ត្រូវគោរពច្បាប់ទាំងអស់ ដើម្បីជីវិតខ្លួនឯង និងជីវិតអ្នកដទៃ៕
No comments:
Post a Comment