សុន្ទរកថា
ឯកឧត្ដមបណ្ឌិតសភាចារ្យ សុខ អាន
ឧបនាយករដ្ឋមន្ដ្រី រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី
ក្នុងពិធីសម្ពោធស្តូបអនុស្សាវរីយ៍មិត្តភាព កម្ពុជា-រុស្សី
រាជធានីភ្នំពេញ ថ្ងៃទី២៧ ខែតុលា ឆ្នាំ២០១៥
- ឯកឧត្តម Dmitry TSVETKOV ឯកអគ្គរដ្ឋទូតសហព័ន្ធរុស្សីប្រចាំព្រះរាជាណាចក្រកម្ពុជា
- ឯកឧត្តមបណ្ឌិត ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា
- ឯកឧត្តម លោកជំទាវ អស់លោក លោកស្រី ថ្នាក់ដឹកនាំ សាស្ត្រាចារ្យ មន្ត្រីរាជការ បុគ្គលិកសិក្សា និងក្មួយនិស្សិតទាំងអស់ ជាទីមេត្រី!
ថ្ងៃនេះ ខ្ញុំមានសេចក្ដីសោមនស្សរីករាយ ចូលរួមជាមួយ ឯកឧត្ដម លោកជំទាវ អស់លោក លោកស្រី ភ្ញៀវកិត្តិយសជាតិ អន្តរជាតិ សាស្រ្តាចារ្យ និងក្មួយៗនិស្សិតទាំងអស់ ក្នុងពិធីសម្ពោធស្តូបអនុស្សាវរីយ៍មិត្តភាព កម្ពុជា-រុស្សី ដើម្បីរំឮកដល់កិច្ចសហប្រតិបត្តិការជាមិត្តភាពដ៍ល្អរវាងប្រទេសទាំងពីរ ជាពិសេស រំឮកដល់អនុស្សាវរីយ៍នៃការសាងសង់គ្រឹះស្ថានឧត្តមសិក្សាបច្ចេកទេសដ៏ចំណាស់ជាងគេមួយនៅកម្ពុជា គឺវិទ្យាស្ថានបច្ចេកវិទ្យាកម្ពុជា កាលពីប្រាំទស្សវត្សរ៍មុន។ ឆ្លៀតក្នុងឱកាសនេះផងដែរ ខ្ញុំសូមថ្លែងអំណរគុណយ៉ាងជ្រាលជ្រៅបំផុតដល់សហព័ន្ធរុស្ស៊ីចំពោះកិច្ចសហប្រតិបត្តិការដ៏ជិតស្និទ្ធកន្លងមក ជាពិសេស ការបង្កើតវិទ្យាស្ថាននេះឡើងក្រោមកិច្ចសហប្រតិបត្តិការខ្មែរ-សូវៀត និងសូមកោតសរសើចំពោះកិច្ចខិតខំប្រឹងប្រែងរបស់ស្ថាបនិកវិទ្យាស្ថាន ក៏ដូចជាគណៈគ្រប់គ្រង សាស្ត្រាចារ្យ មន្ត្រីរាជការ និងបុគ្គលិកសិក្សាទាំងអស់ ក្នុងការបណ្ដុះបណ្ដាលធនធានមនុស្ស និងការអភិវឌ្ឍវិទ្យាស្ថានបច្ចេកវិទ្យាកម្ពុជា រហូតក្លាយជាគ្រឹះស្ថានឧត្តមសិក្សាបច្ចេកទេសនាំមុខគេមួយនៅកម្ពុជា។
ស្ដូបអនុស្សាវរីយ៍មិត្តភាពកម្ពុជា-រុស្ស៊ី ដែលនឹងត្រូវសម្ពោធជាផ្លូវការនៅពេលបន្តិចទៀតនេះ គឺជាសក្ខីភាពឆ្លុះបញ្ចាំងឱ្យឃើញយ៉ាងច្បាស់នូវកិច្ចសហប្រតិបត្តិការជាមិត្តភាពដ៏ល្អ និងយូរអង្វែងរវាងកម្ពុជានិងរុស្ស៊ី ដែលកើតមានឡើងចាប់តាំងពីទសវត្សរ៍ឆ្នាំ១៩៥០ មកម្ល៉េះ។ យើងនៅចងចាំយ៉ាងច្បាស់ណាស់ថា នៅក្រោយថ្ងៃរំដោះ ៧ មករា ១៩៧៩ រដ្ឋជាសមាជិកអតីតសហភាពសូវៀត ជាពិសេសរុស្ស៊ី បានផ្ដល់នូវការគាំទ្រដ៏សំខាន់ដល់កម្ពុជា សម្រាប់ការកសាងប្រទេសឡើងវិញ បន្ទាប់ពីត្រូវបានបំផ្លិចបំផ្លាញស្ទើរទាំងស្រុងលើគ្រប់វិស័យ ដោយរបបប្រល័យពូជសាសន៍ប៉ុលពត តាមរយៈទំនាក់ទំនងសេដ្ឋកិច្ច និងពាណិជ្ជកម្ម ខណៈដែលប្រទេសមួយចំនួនបានដាក់ការហ៊ុំព័ទ្ធមកលើកម្ពុជា។ ជាពិសេស ជំនួយមនុស្សធម៌ ដែលអតីតសហភាពសូវៀតបានផ្ដល់ឱ្យកម្ពុជា បានជួយរំលែកនូវបន្ទុកដ៏ធ្ងន់ធ្ងររបស់កម្ពុជាក្នុងកិច្ចការកសាង ស្ដារ និងអភិវឌ្ឍប្រទេសឡើងវិញ ចេញពីបាតដៃទទេ នៅក្នុងទស្សវត្សរ៍ឆ្នាំ១៩៨០។ ជាងនេះទៅទៀត នៅក្នុងវិស័យអប់រំ សហព័ន្ធរុស្ស៊ី និងអតីតសហភាពសូវៀត ក៏បានចូលរួមចំណែកយ៉ាងច្រើនផងដែរ នៅក្នុងការបណ្ដុះបណ្ដាលធនធានមនុស្សសម្រាប់កម្ពុជា ទាំងនៅកម្ពុជានិងនៅអតីតសហភាពសូវៀត។ គិតមកដល់ពេលបច្ចុប្បន្ននេះ មាននិស្សិតជាង ៨០០០នាក់ បានទៅសិក្សានៅសហព័ន្ធរុស្ស៊ី និងអតីតសហភាពសូវៀត ហើយអតីតនិស្សិតទាំងនោះមួយចំនួនបាននិងកំពុងបម្រើការក្នុងជួររដ្ឋាភិបាលនិងស្ថាប័ននានារបស់រដ្ឋ ក្នុងនោះរួមទាំងឯកឧត្តម ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដែលមានវត្តមាននៅក្នុងពិធីនេះផងដែរ។ ខ្ញុំសង្ឃឹមនិងជឿជាក់ថា ទៅថ្ងៃអនាគត សហព័ន្ធរុស្ស៊ីនឹងបន្តផ្ដល់អាហារូបករណ៍ដល់សិស្សនិស្សិតកម្ពុជា ឱ្យកាន់តែច្រើនថែមទៀត លើគ្រប់មុខជំនាញ និងគ្រប់កម្រិត ជាពិសេស អាហារូបករណ៍សម្រាប់និស្សិតថ្នាក់ក្រោយបណ្ឌិត។
បច្ចុប្បន្ន ប្រទេសយើងទាំងពីរ បាននិងកំពុងខិតខំបន្តរក្សា ពង្រឹង និងពង្រីកបន្ថែមនូវទំនាក់ទំនង និងមិត្តភាពដ៏ល្អនេះ តាមរយៈការផ្លាស់ប្ដូរទស្សនកិច្ចជាបន្តបន្ទាប់ របស់ថ្នាក់ដឹកនាំជាន់ខ្ពស់នៃប្រទេសទាំងពីរ ក៏ដូចជាតាមរយៈសកម្មភាពពាណិជ្ជកម្ម វិនិយោគ អប់រំ និងវប្បធម៌។ ជាក់ស្ដែង នៅក្នុងកិច្ចសន្ទនាកាលពីពេលថ្មីៗកន្លងទៅនេះ ឯកឧត្តមឯកអគ្គរដ្ឋទូតសហព័ន្ធរុស្សីប្រចាំនៅកម្ពុជា បានបញ្ជាក់អំពីបំណងរបស់សហព័ន្ធរុស្ស៊ី ក្នុងការចូលរួមក្នុងគណៈកម្មការសម្របសម្រួលអន្តរជាតិ សម្រាប់រមណីយដ្ឋានប្រាសាទព្រះវិហារបេតិកភណ្ឌពិភពលោក (ICC-Preah Vihear) ។ ខ្ញុំផ្ទាល់ពិតជាមានក្ដីរីករាយ និងសូមស្វាគមន៍យ៉ាងកក់ក្ដៅចំពោះការចូលរួមរបស់សហព័ន្ធរុស្ស៊ី ដែលជាមិត្តចាស់របស់កម្ពុជា នៅក្នុងយន្តការអន្តរជាតិដ៏ជោគជ័យនេះ ដើម្បីការពារបេតិកភណ្ឌពិភពលោក។
ឯកឧត្តម លោកជំទាវ អស់លោក លោកស្រី!
វិទ្យាស្ថានបច្ចេកវិទ្យាកម្ពុជា គឺជាសមិទ្ធផលមួយ ក្នុងចំណោមសមិទ្ធផលជាច្រើនទៀត ដែលកើតចេញពីកិច្ចសហប្រតិបត្តិការដ៏ជិតស្និទ្ធរវាងកម្ពុជា និងអតីតសហភាពសូវៀត ហើយបាននិងកំពុងដើរតួនាទីយ៉ាងសកម្មក្នុងការបណ្ដុះបណ្ដាលធនធានមនុស្ស លើវិស័យវិស្វកម្មបច្ចេកវិទ្យា និងរួមចំណែកដល់ការអភិវឌ្ឍប្រទេសឱ្យកាន់តែរីកចម្រើនថែមទៀត។ តាមរបាយការណ៍របស់ឯកឧត្តម ហង់ ជួន ណារ៉ុន ជារៀងរាល់ឆ្នាំ និស្សិតវិទ្យាស្ថានបច្ចេកវិទ្យាកម្ពុជា ប្រមាណ ៧០% ទទួលបានការងារធ្វើភ្លាមៗ បន្ទាប់ពីការបញ្ចប់ការសិក្សា។ លទ្ធផលជាវិជ្ជមាននេះ សម្រេចបានដោយសារកិច្ចខិតខំប្រឹងប្រែងរបស់គណៈគ្រប់គ្រង សាស្ត្រាចារ្យ បុគ្គលិកសិក្សា និងក្មួយៗនិស្សិតទាំងអស់ ក៏ដូចជាការជឿជាក់របស់មជ្ឈដ្ឋានសាធារណៈ លើសមត្ថភាពបណ្តុះបណ្តាល និងគុណភាពនៃការអប់រំរបស់វិទ្យាស្ថាន ព្រមទាំងកិច្ចសហប្រតិបត្តិការល្អជាមួយដៃគូអភិវឌ្ឍន៍នានា ជាពិសេស ប្រទេសរុស្ស៊ីដែលជាស្ថាបនិករបស់វិទ្យាស្ថាន។
ខ្ញុំជឿជាក់ថា ស្តូបអនុស្សាវរីយ៍មិត្តភាពកម្ពុជា-រុស្សី នេះ នឹងក្លាយជាសក្ខីភាពនៃចំណងមិត្តភាពយូរអង្វែងរវាងប្រទេសយើងទាំងពីរ ហើយកិច្ចសហប្រតិបត្តិការជាមិត្តភាពនេះកាន់តែត្រូវបានពង្រឹងបន្ថែមទៀតនៅពេលបច្ចុប្បន្ន និងទៅអនាគត ជាពិសេស បន្ទាប់ពីជំនួបរវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមួយឯកឧត្តមនាយករដ្ឋមន្ត្រីរុស្ស៊ី Dmitry Medvedev កាលពីឆ្នាំ២០១៤ នៅទីក្រុងណៃពីដោ ប្រទេសមីយ៉ាន់ម៉ា។ ទន្ទឹមនឹងនេះ រាជរដ្ឋាភិបាល ក៏ដូចជាប្រជាជនកម្ពុជាទាំងអស់ មានសេចក្ដីសោមនស្សរីករាយ និងសូមស្វាគមន៍យ៉ាងកក់ក្ដៅ ដំណើរទស្សនកិច្ចជាផ្លូវការរបស់ឯកឧត្តមនាយករដ្ឋមន្ត្រី Dmitry Medvedev នាពេលខាងមុខឆាប់ៗនេះ ដែលជាជំហានមួយយ៉ាងសំខាន់ថែមទៀត សម្រាប់ការពង្រឹង និងពង្រីកទំនាក់ទំនង មិត្តភាព និងកិច្ចសហប្រតិបត្តិការទ្វេភាគី រវាងរាជរដ្ឋាភិបាល និងប្រជាជននៃប្រទេសទាំងពីរ កម្ពុជា-រុស្ស៊ី។
ជាថ្មីម្ដងទៀត ក្នុងនាមរាជរដ្ឋាភិបាល និងប្រជាជននៃព្រះរាជណាចក្រកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជននៃសហព័ន្ធរុស្សី ដែលតែងតែយកចិត្តទុកដាក់ថែរក្សាកិច្ចសហប្រតិបត្តិការល្អជាមួយកម្ពុជា។ ខ្ញុំក៏សូមកោតសរសើផងដែរចំពោះក្រសួងអប់រំ យុវជន និងកីឡា និងស្ថានទូតសហព័ន្ធរុស្ស៊ីប្រចាំព្រះរាជាណាចក្រកម្ពុជា ដែលបានផ្ដួចផ្ដើមគំនិតកសាងស្ដូបអនុស្សាវរីយ៍មិត្តភាព កម្ពុជា-រុស្សី នេះឡើង និងសូមថ្លែងអំណរគុណចំពោះឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ អន្តរជាតិ ទាំងអស់ដែលអញ្ជើញចូលរួមក្នុងពិធីសម្ពោធស្ដូបអនុស្សាវរីយ៍កម្ពុជា-រុស្ស៊ី នៅថ្ងៃនេះ ញុំាងបរិយាកាសកាន់តែមានភាពស្និទ្ធស្នាល រីករាយ និងនាំមកនូវចំណងមិត្តភាពនិងកិច្ចសហប្រតិបត្តិការកាន់តែទូលំទូលាយ សម្រាប់យើងទាំងអស់គ្នា។
ជាទីបញ្ចប់ ខ្ញុំសូមជូនពរ ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ អន្តរជាតិ និងក្មួយៗនិស្សិតទាំងអស់ សូមមានសុខភាពល្អ ទទួលជោគជ័យគ្រប់ភារកិច្ច និងមានសុភមង្គលក្នុងក្រុមគ្រួសារ និងសូមអញ្ជើញឯកឧត្តម លោកជំទាវ អស់លោក លោកស្រី ទាំងអស់ ចូលរួមក្នុងពិធីកាត់ខ្សែបូសម្ពោធស្តូបអនុស្សាវរីយ៍មិត្តភាព កម្ពុជា-រុស្សី និងទស្សនាពិព័រណ៌ប្រវត្តិរបស់វិទ្យាស្ថានបច្ចេកវិទ្យាកម្ពុជា។
សូមអរគុណ!
No comments:
Post a Comment