ក្នុងកិច្ចប្រជុំក្រុមប្រឹក្សាធុរកិច្ច បារាំង-កម្ពុជា ដែលបានរៀបចំឡើង ដោយសហព័ន្ធនិយោជក បារាំងអន្តរជាតិ(MEDEF International) នៅថ្ងៃទី ២៦ ខែតុលា ឆ្នាំ២០១៥ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានស្នើឲ្យក្រុមហ៊ុនធំៗរបស់បារាំង ធ្វើការពិចារណាមកបណ្តាក់ទុនវិនិយោគនៅប្រទេសកម្ពុជា ដោយផ្អែកលើសក្តានុពលសំខាន់ៗ របស់កម្ពុជា ជាពិសេស នៅក្នុងវិស័យកសិកម្ម កសិឧស្សាហកម្មឧស្សាហកម្មកែច្នៃ ឧស្សាហកម្មកម្មន្តសាល និងនៅតាមផ្នែកផលិតកម្ម និងសេវាកម្មផ្សេងទៀត។
សម្តេចតេជោ បានមានប្រសាសន៍ថា ផ្អែកទៅលើឧត្តមភាពប្រៀបធៀបពិសេសរបស់កម្ពុជា ដែលជាប្រទេសបើកចំហរ មានប្រាក់ឈ្នួលសមរម្យ មានកំលាំងពលកម្មវ័យក្មេង និងសកម្ម ព្រមជាមួយនឹងភាពអំណោយផលនៃអាកាសធាតុ ដី និងធនធានធម្មជាតិ ដែលសក្តានុពល ទាំងអស់នេះ កំពុងតែរង់ចាំការវិនិយោគ និងការអភិវឌ្ឍប្រកបដោយចីរភាព របស់ក្រុមហ៊ុន របស់បារាំងនៅប្រទេសកម្ពុជា។
តាមប្រសាសន៍របស់ សម្តេចតេជោ ហ៊ុន សែន បានឲ្យដឹងថា ចាប់តាំងពីមានកិច្ចព្រមព្រៀង ទីក្រុងប៉ារីសនៅឆ្នាំ ១៩៩១ មកដល់សព្វថ្ងៃនេះ រដ្ឋាភិបាល និងប្រជាជនបារាំង បានផ្ដល់ការ ឧបត្ថម្ភគាំទ្រទាំងផ្នែកនយោបាយ ហិរញ្ញប្បទាន និងបច្ចេកទេស ដែលមិនអាចកាត់ថ្លៃបាន ក្នុងការស្វែងរកសន្តិភាព ព្រមទាំងការស្ដារ និងអភិវឌ្ឍន៍កម្ពុជា។ លើសពីនេះទៀត ក្នុងក្របខ័ណ្ឌនៃការអភិវឌ្ឍធនធានមនុស្ស រដ្ឋាភិបាលបារាំងបានស្វាគមន៍ និងផ្ដល់អាហា រូបករណ៍ដល់និស្សិតកម្ពុជា មកបន្តការសិក្សាថ្នាក់ឧត្តមសិក្សាក្នុងជំនាញផ្សេងៗ ដូចជា ច្បាប់ ពេទ្យ វិស្វកម្ម។ ការជួយជ្រោមជ្រែងទាំងអស់នេះ បានរួមចំណែកធ្វើឲ្យកម្ពុជាមានលទ្ធភាពក្រោកឈរឡើងវិញជាប្រជាជាតិមួយ ដែលធ្លាប់មានកេរ្តិ៍ឈ្មោះ និងអរិយធម៌ល្បីល្បាញ។
សម្តេចតេជោ បានបន្ថែមថា ជាការគួរឲ្យកត់សម្គាល់ កម្រិតនៃសកម្មភាពវិនិយោគ និងធុរកិច្ច របស់បារាំងនៅកម្ពុជា គឺនៅមានចំនួនតិចនៅឡើយ ជាក់ស្ដែងក្រុមហ៊ុនបារាំង នៅកម្ពុជា មានចំនួនត្រឹមតែប្រមាណ ៥០ ក្រុមហ៊ុនប៉ុណ្ណោះ រួមបញ្ចូលទាំងក្រុមហ៊ុនតូចៗ ដែលបម្រើ ក្នុងវិស័យផ្សេងៗដ៏ទៃទៀត ចំនួនប្រមាណ ១០០ ក្រុមហ៊ុន។ ប៉ុន្តែទោះជាយ៉ាងណា រាជរដ្ឋាភិបាលកម្ពុជា ក៏សូមថ្លែងអំណរគុណ និងវាយតម្លៃខ្ពស់ចំពោះការចូលរួម របស់ក្រុមហ៊ុន បារាំង ទាំងតូច ទាំងធំ ដែលបានចូលរួមក្នុងការអភិវឌ្ឍន៍សង្គម-សេដ្ឋកិច្ចកម្ពុជា នាពេល កន្លងមក ដូចជា ក្រុមហ៊ុនវ៉ាង់ស៊ី (VINCI) ក្រុមហ៊ុនតូតាល់ (Total) ជាដើម ។
សម្តេចតេជោ ហ៊ុន សែន បានបញ្ជាក់ទៅកាន់អ្នកវិនិយោគបារាំងថា រាជរដ្ឋាភិបាលកម្ពុជា តែងតែចាត់ទុកវិស័យឯកជន ជាក្បាលម៉ាស៊ីន នៃកំណើនសេដ្ឋកិច្ច ហើយដោយឈរលើ មូលដ្ឋាននៃទស្សនទាននេះ រាជរដ្ឋាភិបាលបានដាក់ចេញនូវយន្ត ការពិគ្រោះយោបល់ រវាងរាជរដ្ឋាភិបាល ជាមួយនឹងវិស័យឯកជនលើគ្រប់វិស័យ សម្រាប់ជួបប្រជុំពិភាក្សា លើបញ្ហា ពាក់ព័ន្ធ នឹងកិច្ចសម្រួលវិនិយោគ ក្នុងគោលបំណងធ្វើឲ្យប្រសើរឡើងនូវបរិស្ថានវិនិយោគ សំដៅទាក់ទាញលំហូរវិនិយោគបរទេសមកកម្ពុជា។ សម្តេចតេជោ បានសង្កត់ធ្ងន់ថា សម្តេចសូមធានាជូនវិនិយោគិនគ្រប់រូប នូវបរិស្ថានគ្រប់បែបយ៉ាងដែលអនុគ្រោះ និងជួយជំរុញ ដល់ការវិនិយោគ ពិសេសគឺ សន្តិភាព សន្តិសុខ និងស្ថិរភាពនយោបាយ ក៏ដូចជាស្ថិរភាព ម៉ាក្រូសេដ្ឋកិច្ច ក្របខ័ណ្ឌច្បាប់ និងស្ថាប័ន ដែលប្រកបដោយប្រសិទ្ធិភាព តម្លាភាព គណនេយ្យភាព និងភាពអាចប៉ាន់ប្រមាណបាន៕
No comments:
Post a Comment