ដើម្បីចូលរួមចំណែកជួយសង្គ្រោះ និងព្យាបាលកុមារកម្ពុជា ដែលមានជំងឺនៅទូទាំងប្រទេស
ពិសេសគឺកុមារដែលមានជំងឺធ្ងន់ធ្ងរ ដែលត្រូវការការវះកាត់ និងព្យាបាលតាម បច្ចេកវិទ្យាទំនើប
និងយកចិត្តទុកដាក់ខ្ពស់នោះ កាកបាទក្រហមកម្ពុជា នៅថ្ងៃទី ១៩ ខែឧសភា ឆ្នាំ២០១៥
បានបរិច្ចាគថវិកា ដែលប្រមូលបានពីសប្បុរសជននៅទូទាំងប្រទេសចំនួន ១លានដុល្លារអាមេរិកដល់
មន្ទីរពេទ្យគន្ធបុប្ផា។
សម្តេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា
បានប្រគល់ថវិកា១លានដុល្លារ របស់កាកបាទក្រហមកម្ពុជា ទៅឲ្យមន្ទីរ លោក វេជ្ជបណ្ឌិត Beat Richner ប្រធានមន្ទីរពេទ្យគន្ធបុប្ផា នៅស្នាក់ការរបស់កាកបាទក្រហមកម្ពុជា
ក្នុងឱកាសដែលសម្តេចគតិព្រឹទ្ធបណ្ឌិត ជួបសំណេះសំណាលដោយផ្ទាល់ជាមួយលោក វេជ្ជបណ្ឌិត
Beat Richner។
សូមបញ្ជាក់ថា នេះមិនមែនជាលើកទី១ទេ ដែលកាកបាទក្រហមកម្ពុជា
បានបរិច្ចាគថវិកា ដល់មន្ទីរពេទ្យគន្ធបុប្ផា ដោយក្នុងនោះជារៀងរាល់ឆ្នាំ
កាកបាទក្រហមកម្ពុជាតែងផ្តល់ថវិកាដល់មន្ទីរពេទ្យគន្ធបុប្ផា ចំនួន១លានដុល្លារ
ដោយសារតែមើលឃើញថា មន្ទីរពេទ្យនេះបានរួមចំណែកយ៉ាងធំធេង ក្នុងការជួយសង្គ្រោះកុមារកម្ពុជា
ពិសេសគឺកុមារដែលមកពីគ្រួសារក្រីក្រ ហើយមន្ទីរពេទ្យនេះ ទទួលបានគាំទ្រយ៉ាងខ្លាំង
ពីប្រជាពលរដ្ឋខ្មែរ និងបានឲ្យឈ្មោះថាជាមន្ទីរទេវតា ដែលបានផ្តល់នូវការសង្គ្រោះដល់កុមាររាប់សែននាក់ជារៀងរាល់ឆ្នាំ។
ជារៀងរាល់ឆ្នាំ ក្រៅពីកាកបាទក្រហមកម្ពុជា មន្ទីរពេទ្យគន្ធបុប្ផាក៏ទទួលបានការឧបត្ថម្ភ
ពីរាជរដ្ឋាភិបាលកម្ពុជា ១លានដុល្លារ, មូលធិនិបាយ័ន ៣០ម៉ឺនដុល្លារ
និងពីសប្បុរជនជាច្រើនទៀតក្នុងប្រទេស។ ទោះជាយ៉ាងណាជំនួយឧបត្ថម្ភពីសប្បុរសជនក្នុងស្រុក
នៅតែមានកម្រិតនៅឡើយ បើធៀបនឹងការចំណាយប្រចាំឆ្នាំរបស់មន្ទីរពេទ្យ ដែលតំរូវឲ្យលោក
វេជ្ជបណ្ឌិត Beat Richner ប្រធានមន្ទីរពេទ្យគន្ធបុប្ផា
ត្រូវស្វែងរកជំនួយបន្ថែមទៀតពីក្រៅប្រទេស ដើម្បីទប់ទល់ និងបន្តដំណើរការរបស់ខ្លួន
ទន្ទឹមនឹងចំនួនកុមារដែលមានជំងឺកំពុងកើនឡើងពីមួយឆ្នាំទៅមួយឆ្នាំ។
តាមរបាយការណ៍ ដែលទទួលបានពីមន្ទីរពេលគន្ធបុប្ផា បានឱ្យដឹងថា
រយៈពេល៤ខែ ចាប់ពីថ្ងៃទី១ ខែមករា ដល់ថ្ងៃទី៣០ ខែមេសា ឆ្នាំ ២០១៥ មន្ទីរពេទ្យគន្ធបុប្ផា
បានពិនិត្យជំងឺជូនកុមារ ចំនួន ២២៣ ៤៩៥នាក់ ក្នុងនោះមានកុមារ ៣៤ ៨៨៥នាក់ បានសម្រាកព្យាបាល
មានកុមារ ៦ ៣៣៦នាក់ បានឆ្លងកាត់ការវះកាត់ និងកុមារ ៦៥.៧៩៧នាក់ បានទទួលការចាក់វ៉ាក់សាំង
ប្រឆាំងនឹងជំងឺរលាកខួរក្បាល៕
អត្ថបទ៖ ច័ន្ទ ទេវី
No comments:
Post a Comment