មុនពេលគណបក្សប្រឆាំងចូលសភា សម្តី សន្យារាប់រយ រាប់ម៉ឺនសន្យា
របស់លោក សម រង្ស៊ី និងលោក កឹម សុខា រួមនិងមន្ត្រីគណបក្ស
បានអង្រន់ចិត្តប្រជាពលរដ្ឋឲ្យមានអារម្មណ៍រំភើប និងរវើរវាយ
នឹកស្មានថា នឹងធ្វើបានតាមអ្វីដែលអ្នកនយោបាយប្រឆាំង
តែងតែបោកប្រាស់របៀប នយោបាយបំភ្លៃការពិត
ថាខ្លួនអាចធ្វើបានគ្រប់បញ្ហា។
ពួកគេបានប្រើយុទ្ធសាស្ត្រកុហក់ប្រជាពលរដ្ឋ
ទៅតាមទីតាំងដែលខ្លួនចុះទៅដល់ ដូចជា បើពួកគេចុះទៅតាមភូមិឃុំ
ស្រែចម្ការពួកគេនឹងថាខ្លួនអាច តភ្លើង ឬតទឹក ទៅដល់ផ្ទះប្រជាពលរដ្ឋ
ឬតអគ្គិសនី រហូតទៅដល់វាលស្រែ ឬដល់ចម្ការ របស់កសិករទៀតផង។
បើពួកគេទៅជួបជាមួយមន្ត្រីរាជការ ឬកម្លាំងសមត្ថកិច្ច ពួកគេនឹងសន្យាថា
តម្លើងប្រាក់ខែ ឲ្យបានសមរម្យ ឬ១លានរៀល បើទៅជួបជាមួយចាស់ៗ
ថានឹងបាន៤ម៉ឺន ហើយបើ ពួកគេទៅជួបជាមួយកម្មកររោចក្រកាត់ដេរ
ពួកគេនឹងសន្យាថាផ្តល់ប្រាក់ខែខ្ពស់ ជាដើម។ នៅមានការសន្យា
ភូតកុហក់ច្រើនទៀតមិនអាចរៀបរាប់អស់ ដែលរហូតមកដល់ពេលនេះ ប្រជាពលរដ្ឋ
អស់ជំនឿទាំងស្រុងទៅហើយ។
ប៉ុន្តែ ក្រោយពេលដែលគណបក្សប្រឆាំងចូលក្នុងសភា ទើបពួកគេដឹងថា គ្រប់ចំណុចដែលពួកគេបានសន្យាកន្លងមក
សុទ្ធតែជាបញ្ហាលំបាកក្នុងការដោះស្រាយ ហើយត្រូវបានរាជរដ្ឋាភិបាលខិតខំធ្វើ
និងបានដោះស្រាយខ្លះជាបន្តបន្ទាប់រួចមកហើយ។
ទាក់ទងនឹងរឿងប្រាក់ខែអប្បបរមា របស់កម្មករ
ដោយសារស្ថានភាពសេដ្ឋកិច្ចមិនទាន់មានអំណោយផលល្អ
ក្នុងការផ្តល់ជូនឲ្យបានដូចការទាមទារ ទើបរដ្ឋ បានពិភាក្សាជាមួយនិយោជក
និងក្រុមសហជីព សម្រេចផ្តល់ជូន និងដោះស្រាយបន្តិចម្តងៗ។ ជាក់ស្តែង
មកដល់បច្ចុប្បន្ន កម្មករមានប្រាក់ខែអប្បបរមាដល់១០០ដុល្លារ
ហើយដែរ។ ដូច្នេះ ការស្នើសុំប្រាក់ខែខ្ពស់របស់កម្មករ រហូតដល់ ១៧៧
ដុល្លារនោះ អាចនឹងធ្វើឲ្យថៅកែរោងចក្រឈប់វិនិយោគនៅកម្ពុជា
វានឹងនាំឲ្យកម្មករបាត់បង់ការងារធ្វើ
ប្រៀបដូចផ្កាប់ឆ្នាំបាយខ្លួនឯង ដូច្នោះដែរ។ មានន័យថា
បើកម្មករចេះតែទាមទារប្រាក់ឈ្នួលខ្ពស់ហួសហេតុ
មិនគិតពីស្ថានភាពសេដ្ឋកិច្ចវានឹងធ្វើឲ្យរោងចក្រខាតហើយបិទទ្វារជាមិនខាន។
ជាក់ស្តែង ចាប់តាំងពីប្រទេសចិន និងប្រទេសថៃ
ចាប់ផ្តើមបង្កើនប្រាក់ឈ្នួលអប្បបរមាដល់កម្មកររបស់ខ្លួន
គឺប្រទេសទាំងនោះ បានបង្កនូវផលវិបាកភ្លាម សម្រាប់ឧស្សាហកម្ម
ដែលធ្វើឲ្យប្រតិបត្តិការអាជីវកម្មរបស់ពួកគេអាចបាត់បង់ភាពប្រកួតប្រជែង
ដោយសារមានថ្លៃដើមខ្ពស់ ហើយធ្វើឲ្យវិនិយោគិនចាប់ផ្តើមពិនិត្យពិចារណា
អំពីការផ្លាស់ប្តូរទីតាំងវិនិយោគថ្មី។ នេះជាកត្តាសត្យានុម័ត
ដែលកម្ពុជាត្រូវច្បាមឲ្យជាប់នូវឱកាសនេះ
ដើម្បីត្រងយកវិនិយោគិនដែលកំពុងស្វែងរកទីតាំងវិនិយោគថ្មីៗទាំងនោះ។
ចំណុចមួយទៀត ចង់បញ្ជាក់ថា
នៅពេលដែលគណបក្សប្រឆាំងបានទទួលបន្ទុកទទួលខុសត្រូវចំពោះមុខប្រជាពលរដ្ឋ
តាមរយៈគណៈកម្មការជំនាញនៃរដ្ឋសភា ហើយការដោះស្រាយបញ្ហាជូនប្រជាពលរដ្ឋជួបការលំបាក
ពួកគេបែរជាអះអាងថា ចាប់ពីពេលនេះឈប់និយាយពីបក្សនយោបាយ
ប៉ុន្តែត្រូវនិយាយពីការដោះស្រាយនៅចំពោះមុខវិញ។ មកដល់ពេលនេះ
ទើបគណបក្សប្រឆាំងដឹងថា ការសន្យាលើបញ្ហាប្រាក់ឈ្នួល តាមការទាមទារ
របស់កម្មករ គឺមិនមែនចេះតែស្រែកដើម្បីតែប្រជាប្រិយភាពបក្សខ្លួននោះទេ
គឺវាត្រូវការឲ្យមានការយកទៅជជែក ពិភាក្សាលម្អិត
ជាមួយរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ
ជាមួយតំណាងសមាគមរោងចក្រកាត់ដេរ និងតំណាងសហជីពផងដែរ
ទើបកិច្ចការនោះអាចសម្រេចទៅបាន។
ម៉្យាងទៀត កន្លងមក អ្នកបញ្ជាទិញមួយចំនួន
តែងនិយាយថាខ្លួនអាចតម្លើងថ្លៃផលិតផលដែលបញ្ជាទិញដល់រោងចក្របាន
ដើម្បីអាចតម្លើងប្រាក់ឈ្នួលដល់កម្មករ ប៉ុន្តែ មកដល់បច្ចុប្បន្ននេះ
មិនទាន់ឃើញមានអ្នកបញ្ជាទិញ ឬម្ចាស់ផ្លាកសញ្ញាណាមួយនៅបរទេស
សម្រេចថានឹងតម្លើងថ្លៃផលិតផលបញ្ជាទិញឲ្យចំនួនប៉ុន្មាននៅឡើយទេ
គឺបានត្រឹមតែ « អ្នកថា
ចេះតែថា រីឯអ្នកធ្វើ ចេះតែធ្វើ » ទៅប៉ុណ្ណោះ។
បច្ចុប្បន្ន វិស័យកាត់ដេរគឺជាជន្ទុលមួយនៃកំណើនសេដ្ឋកិច្ចជាតិរបស់កម្ពុជា។
វិស័យមួយនេះបានជួយផ្តល់ការងារយ៉ាងច្រើនដល់ប្រជាជនកម្ពុជា
ជាពិសេសដល់កូនចៅប្រជាពលរដ្ឋនៅជនបទ
ដែលបានមកធ្វើការនៅតាមរោងចក្រនានា ទាំងនៅរាជធានី
និងតាមទីប្រជុំជន។ ដូច្នេះ រាជរដ្ឋាបាលអាណត្តិទី៥
បានធ្វើការយ៉ាងយកចិត្តទុកដាក់
ក្នុងការសិក្សាពិចារណាអំពីលទ្ធភាពនៃការតម្លើងប្រាក់ខែអប្បបរមាជូនដល់កម្មករ
ដោយផ្អែកលើកំណើននៃសេដ្ឋកិច្ច និងស្ថេរភាពនៃអ្នកវិនិយោគ
ទៅតាមស្ថានភាពជាក់ស្តែង ។ មានន័យថា មិនសន្យា តែគិតគូរ
បង្កើនបន្តិចម្តងៗ ដើម្បីរក្សាទាំងឆ្នាំងបាយកម្មករ
ទាំងឆ្នាំងបាយនិយោជក។
លោកនាយករដ្ឋមន្ត្រី ហ៊ុន សែន ក៏បានថ្លែង
នៅចំពោះមុខអ្នកវិនិយោគ និងក្រុមហ៊ុនដែលមានបំណងមកវិនិយោគនៅកម្ពុជា
ក្នុងឱកាស សន្និសីទវិនិយោគអន្តរជាតិ កាលពីថ្ងៃទី៦ ខែតុលា ឆ្នាំ២០១៤
ថា៖ « បញ្ហាប្រាក់បៀវត្សអប្បបរមារបស់កម្មករ
គឺរាជរដ្ឋាភិបាលបន្តពិនិត្យរួមគ្នា ទៅតាមយន្តការត្រីភាគី
សម្រាប់ដោះស្រាយ
ហើយនឹងត្រូវពិនិត្យឡើងវិញនូវកម្រិតប្រាក់បៀវត្សអប្បបរមា
ដែលអាចធ្វើឡើងជារៀងរាល់ឆ្នាំ »។
ដូច្នេះ ការទាមទារប្រាក់ខែគោលខ្ពស់ហួសហេតុ
ដែលបំផុសបំផុលដោយសហជីពមួយចំនួនតូចនោះ និងមន្ត្រីរបស់គណបក្សប្រឆាំង
គឺមិនបានបម្រើផលប្រយោជន៍ ដល់កម្មករនោះឡើយ។ ម៉្យាងទៀត ការសន្យានានារបស់គណបក្សសង្គ្រោះជាតិ
ជាពិសេសការសន្យាតម្លើងប្រាក់បៀវត្ស១៥០ ឬ ១៧៧ដុល្លារ នៅពេលនេះ
គឺមិនអាចក្លាយជាការពិតបានឡើយ
បើផ្អែកទៅលើកំណើនសេដ្ឋកិច្ចបច្ចុប្បន្ននេះ។
ការសន្យារបស់បក្សប្រឆាំងកន្លងមក គឺជាការសន្យាបែបប្រជាភិថុតិ និងជាការបោកប្រាស់កម្មករ
ដើម្បីកេងចំណេញខាងនយោបាយ ជាពិសេសគឺដើម្បីតែផលប្រយោជន៍
និងប្រជាប្រិយភាពរបស់បក្សខ្លួនតែប៉ុណ្ណោះ៕
No comments:
Post a Comment